1-2. Ngozvapi zvatinozovona pa musoro uno?

MAKAJIZWA kudini pamainga mecivetera ciro comaida kuti cigume pa mukuvo wakati kuti, asi icona acizivi kuguma? Makasuruvara here? Kangaije maizojizwa inga zvinonangwa pana Mazwi Akangwara 13:12. Painonanga kudari: “Ruvetero hunonoka kuguma, unohwaja mwoyo.” Asi tingati kudini kudari mukaziva kuti ciro comaiveteraya ciri kunonoka kuguma ngo thangwe guru kamare? Pa mugariro uwu, imwimwi maizodikana kuvetera ngo kusengerera kwese.

² Pa musoro uno, tinozovona ndhungamiriro jakatikuti jo Bhaibheri jinozotibesera kuti tisakurire mugariro wo ‘kuvetera.’ (MIKEYA 7:7) Perapo, tinozovona mathangwe maviri anotiita kuti tivetere ngo kusengerera kwese, zvinozoita Jehovha. Pakupejisira, tinozovona makomborero anozova no vaya vanovetera kuna Jehovha.

3. Tinojijenyi ngo zvakatahwa pana Mazwi Akangwara 13:11?

³ Muezaniso umweni unovonesa dikano yo kusengerera, tinouwana pana Mazwi Akangwara 13:11. Inoti: “Upfumi hwakaunganijwa ngo kukasika, hunongarangara, anounganija upfumi padoko padoko anoita mukhupuki.” Makwanisa kuvona zvanangari vhesi iyi? Mundhu ano uzivi anoita zviro ngo kusengerera kwese. Izvo zvinoviisa muviyo waushoni maningi.

4. Ndhungamiriro yatinowana pana Mazwi Akangwara 4:18, inogogomejerenyi?

⁴ Pana Mazwi Akangwara 4:18, panotivhunja kuti “gwanja ro varurami rinojeka inga mamba kwaeja, rinondoveneka mbhera zuva ribude.” Magama aya anovonesa kuti Jehovha anobesera vandhu vake kuti vazwisise zvaanoda, padoko ngo padoko.  Pikija zvakadaro, vhesi iyi ingatibeserazve kuzwisisa kuti Mukristu angaitisa kudini cinjo mu upenyu hwake. Zvinotora mukuvo kuti mundhu ave no ushamwari wo phedo na Jehovha. Kudari tikanasa kujija no kushandisa ndhungamiriro jatinowana mu Soko ra Mwari no jatinopuwa ngo sangano rake, padoko ngo padoko tinosakurira mugariro jo Cikristu. Uzivi hwedu ngo pamusoro pa Mwari unoengejeka. Ngativone kuti Jesu wakazviezanisa kudini izvi.

5. Ngowapi muezaniso wakashandisa Jesu unovonesa kuti panoda nguva kuti mundhu aite cinjo?

⁵ Jesu wakashandisa muezaniso umweni kuti adurujire kuti masoko o Umambo atinocumaera, akadari inga cimbeu cidoko cinomera mu mwoyo jo vandhu vanoda kujija kamare. Iyena wakati: “Mbeu inomera perapo yokura, iyena aazvizivi kuti zviri kuitisa kudini. Mavhu ega anobara mucero padoko ngo padoko. Pakutanga panobuda musonjoti, tevere pobuda mucece, pejisire yozoivha mbeuyo.” (Marko 4:27, 28) Jesu waida kunangenyi apa? Iyena waidurujira kuti inga muti unokura padoko ngo padoko, mundhu anotendera masoko o Umambo anokura padoko ngo padoko ku divi ro umwari. Inga muezaniso, vajiji vedu vo Bhaibheri povanonga vecikhwedera phedo na Jehovha, tinotanga kuvona cinjo jakawanda maningi jo vanoita. (Vaefeso 4:22-24) Asi tinodikana kuceukija kuti ndi Jehovha anoitisa kuti mbeu dokowane iyani ikure.—1 VaKorinte 3:7.

6-7. Tinojijenyi ngo manera Jehovha wakasika nyika?

⁶ Pa zvese zvaanoita, Jehovha ngo kusengerera kwese anotora mukuvo wese unodiwaro kuti apejise basa rake. Iyena anoita zvondhozvo kuti akuje zina rake no kubesera vamweni. Inga muezaniso, vonanyi manera aakaita kuti asike nyika padoko ngo padoko.

⁷ Bhaibheri parinobhuya ngo manera Jehovha wakasika nyika, irona rinonanga kuti wakagaja “ukuru hwayo,” wocira “maambo ayo” no kucira “buwe ro kuvaka.” (Jobe 38:5, 6) Atee wakatora nguva kuti avone basa raakaita. (Genesi 1:10, 12) Rangariranyi  mazwiro akava no ngirozi pojaivona zviro zvese zvipsa zvakasika Jehovha. Ijona jaidakara maningi. Ngo ndava yazvo ijona jakatanga ‘kubwa-bwaijira nyara.’ (Jobe 38:7) Ngozvapi zvatinojija apa? Kwakapera zviuru no zviuru zvo makore Jehovha ecisika nyika, ndhondho no zviro zvese zvinopona. Asi Jehovha paakavona zvese zvaakasika, iyena wakati: “Bzainga bzakanaka.”—Genesi 1:31.

8. Ngozvapi zvatinoda kuvona wari?

⁸ Inga zvotapera kuvona pa muezaniso iji wari, tingakwanisa kuwana ndhungamiriro jakawanda mu Soko ra Mwari, jinogogomejera kuti kusengeserera kunosisira maningi. Wari ngativone mativi maviri anovonesa kuti tinodikana kuvetera Jehovha.

9. I divi rapi ratinodikana kuvetera Jehovha?

⁹ Tinodikana kuvetera Jehovha kuti adavire mukumbiro jedu. Patinoita mukumbiro tecikumbira simba kuti tihwisane no zvineso zvedu kana kunyisa kurembejeka kwedu, tingatojizwa kuti kutondojwa kwatiri kupsakari kuri kunonoka kupinda zvataivetera. Ngenyi Jehovha aadaviri mukumbiro jedu jese ngo kukasika?

10. Ngenyi tinodikana kusengerera kuti Jehovha adavire mukumbiro jedu?

¹⁰ Jehovha anonasa kupurukira mukumbiro jedu. (Nduyo 65:3) Iyena anovona mukumbiro jedu inga citatijo co rutendo hwatinahwo kwaari. (Vahebheru 11:6) Jehovha anodazve kuti itusu titeme civaringo co kupona mukuzwirana no mukumbiro jatinoita no kuda kwake. (1 Johani 3:22) Tinodikana kuva vandhu vanosengerera no kuita mukuzwirana no mukumbiro jedu, patinovangisira kuti tihwisane no zvirovejeso zvakashata no marembo edu. Jesu wakatibesera kuzwisisa kuti mukumbiro jimweni ajidavihwi ngo kukasika. Iyena wakati: “Endereranyi mberi mecikumbira, munozopuwa; endereranyi mberi mecipsaka, munozowana; endereranyi mberi mecigogoja, munozofunungurihwa; ngokuti wese anokumbira anopuwa, wese anopsaka anowana, wese anogogoja, anozofunungurihwa.” (Mateu 7:7, 8) Patinotevejera ndhungamiriro iyi no ‘kuvangirira teciita mukumbiro,’ tingathemba kuti Baba wedu vo mugore vanozotipurukira no kuzodavira mukumbiro jedu.—Vakorose 4:2.

11. Vahebheru 4:16, inotibesera kudini kudari mukumbiro jedu jikaita inga jiri kunonoka kudavihwa?

¹¹ Pikija kuti mukumbiro jimweni jingatovoneka inga jiri kunonoka, asi Jehovha anogondesa kujidavira pa “nguva kwayo.” (Verenganyi Vahebheru 4:16.) Ngo zvinotiitisa kuti titame kupumbha Jehovha, kudari ciri cese cikatama kuitika ngo kukasika inga zvotaivetera. Inga muezaniso, ko makore akawanda vazinji vari kuita mukumbiro kuti vavone Umambo hwa Mwari hweciparaja nyika ino. Jesu wakatonangavo kuti tiite mukumbiro jakadaro. (Mateu 6:10) Zvaizova zvo urethe kudari mundhu akatendera kuti rutendo hwake kuna Mwari urembe ngokuti nyika aizivi kuparajwa pa mukuvo waivetehwa ngo vandhu. (Habakuki 2:3; Mateu 24:44) Tinova vandhu vakangwara kudari tikavetera Jehovha no kuita mukumbiro tecithemba kuti iyena anozodavira mukumbiro jedu. Nyika ino inozoparajwa pa nguva kwayo, ngokuti Jehovha wakapera kare kusana “njiku no nguva” yo kupaja nyika ino. Njiku inozoitikari izvi inozova yakanaka kuno vandhu vese.—Mateu 24:36; 2 Pedhru 3:15.

12. Mugariro wapi ungaeja maningi kusengerera kwedu?

¹² Tinodikana kusengerera patinoitihwa zviro zvakashata. Vandhu vo nyika ino vanoshaisha  kutaja vandhu vo jinja rakasiana, ganda rakasiyana, zvirovejeso zvakasiyana kana vandhu vanovha ku ndau imweni. Vamweni vanoshaisha kutajwa ngo ndava yo kuti vakaremara. Vashandiri vazinji va Jehovha vari kushaisha kutajwa ngo ndava yo zviro zvavanotenda zvakacijikira mu Bhaibheri. Patinoshaisha kutajwa ngo njira iji, tinodikana kurangarira magama a Jesu, paakati: “Wiya anocungirira mbhera ku magumo, anozoponeswa.” (Mateu 24:13) Asi maizodini kudari mukaziva kuti mu ungano ari wese waita cishaishi cikuru? Kunanga kuti pakupera kuvhunja vakuru shwiro iyi, munozoisiya mu nyara javo, movetera no kusengerera kwese kuti vaitonge ngo manera anoda Jehovha? Ngozvapi zvinobatanijwepo?

13. Ngozvapi zvinobatanijwa pa kutonga shwiro mu njira ya Jehovha?

¹³ Vakuru pavanoziva kuti maitwa cishaishi cikuru mu ungano, ivona vanoita mukumbiro vecikumbira “ungwaru hunovha mugore” kuti vakwanise kuva no mavonero a Jehovha ngo pamusoro po shwiroyo. (Jakobo 3:17) Cinangwa cavo ngo co kubesera “mushaishi kuvha mu gwanja rake rakashata,” kudari zvikakwanisika. (Jakobo 5:19, 20) Ivona vanodazve kuita zvese zvavanokwanisa kuti vajivirire ungano no kutondhoja vaya vari kuhwajihwa ngo cishaishico. (2 VaKorinte 1:3, 4) Pakutonga zvishaishi zvikuru, pakutanga vakuru vanodikana kuziva zvese zvinobatanijwepo, zviro zvokuti zvingatora mukuvo kamare. Perapo ivona vanoita mukumbiro no kupa mbhangiro yakacijikira mu Matahwa ngo kubhasopa kwese pa kupangira washaisharo ‘inga bzaanofanera.’ (Jeremia 30:11) Pikija vakuru avaiti mangwana mangwana, ivona avagogomeri maningi pa kutonga shwiro. Kudari shwiro jikatongwa ushoni, vese mu ungano vanozojizwa vakangwaririka. Ngo kudaro, pikija zvese zvikatotongwa ushoni, mundhu acizivi weya kushaisha angatosara ecihwajihwa. Waro kudari izvi zviri kumuitikira, mungaitenyi kuti mutame kuhwajihwa maningi?

14. Ngowapi muezaniso uri mu Bhaibheri ungamutondhoja, kudari muri kuitihwa zvakashata ngo mutendi doni?

¹⁴ Imwimwi makamboitihwa zvakashata ngo ari wese, pikija ngo mutendi doni here? Imwimwi mungawana muezaniso jakawanda maningi mu Soko ra Mwari, jingatijijisa kuvetera  Jehovha mbhera atonge shwiroyo. Inga muezaniso, pikija Josefa wakaitihwa zvicizivi kururama ngo hama jake kamare, iyena aazivi kuregera kuti zvishaishi zvavo zvimuite kuti iyena ave mundhu ano cishatihwa. Kusiyapo zvondhozvo, iyena wakabatikana pa kushandira Jehovha. Ngo kudaro, Jehovha wakamukomborera ngo kucungirira kwake no kusengerera. (Genesi 39:21) Pa kufamba ko nguva, Josefa wakakwanisa kukanganwa zvaakaitihwaya, wovona kukomborehwa kaakaitwa ndi Jehovha. (Genesi 45:5) Inga ndi Josefa, tinoembezehwa patinokhwedera phedo na Jehovha, tosiya mu nyara jake zvakashata zvatinoitihwa.—Nduyo 7:18; 73:28.

15. Zvicinyi zvakabesera hambzaji imweni kuti icungirire ngo kusengerera kushaisha kutajwa, yova no runyararo?

¹⁵ Kunasa kunanga, asipi zvakashata zvese zvatinoitihwa zvakaezana no zvakasongana na Josefa. Asi kushaisha kutajwa ko mukhaindi umweni, kungaita kuti mundhu ahwajihwe. Patinonesana no ari wese, kubatanijavo acikanamati Jehovha, tinozobesereka maningi kudari tikashandisa ndhungamiriro jo Bhaibheri. (Vafiripi 2:3, 4) Vonanyi basi zvakaitika. Hambzaji imweni yakahwajihwa maningi poyakaziva kuti mwanakaji umweni woyaibata nayo basa, wakabhuya zvakashata no zviciripi izvona ngo pamusoro payo. Kusiyapo kuita zviri zvese ngo kukasika, hambzaji iyi yakatora mukuvo yorangarijisisa ngo muezaniso wa Jesu. Paaitukwa, iyena aacaihwirijiravo ngo kutuka. (1 Pedhru 2:21, 23) Yecirangarira zvaiitari Jesu, hambzaji iyi yakatema civaringo co kutama kuita ciri cese. Pa kufamba ko nguva, hambzaji iyi yakazoziva kuti mudoni wo pa basa wiya, wainga ecihwisana no zvineso zvo uhomi pomwe no kusuruvara kukuru. Hambzaji iyi, yakazoguma pa mbhejiso yo kuti kangaije mudoni wo pa basa wiya, aacaidepi kubhuya zvaakabhuyaya. Iyona yakazodakara maningi ngo kucungirira no kusengerera kwese kushaisha kutajwa kwiya, yova no runyararo.

16. Ngozvapi zvingamutondhoja kudari muri kucungirira kushaisha kutajwa? (1 Pedhru 3:12)

¹⁶ Kudari muri kucungirira kushaisha kutajwa kana zvimweni zvinomuhwajisa, mucakanganwa kuti Jehovha ari phedo no vaya vano “mwoyo yakakhuvazwa.” (Nduyo 34:19) Iyena  anomuda maningi ngo kusengerera kwenyu no kuthura kwamunoita muthwaro wenyu kwaari. (Nduyo 55:23) Iyena ndiyena mutongi wo nyika yese, apana caacikavoni. (Verenganyi 1 Pedhru 3:12.) Waro kudari muri kusongana no zvineso zvamucikakwanisi kupeja mwega, munoda kuvetera Jehovha?

17. Mukuzwirana na Isaia 30:18, Jehovha anotithembesenyi?

¹⁷ Sambiri pano, Baba vedu vo mugore vanozotikomborera vecishandisa Umambo hwavo. Isaia 30:18 inoti: “Tenji anogarira mukuvo wo kumuvonesa unyaxa hwake; yena anomuka kuti amutatije usizi hwake, ngokuti Tenji ndi Mwari wo ururami: anomucena wiya anomugonda.” Vaya vanovetera Jehovha vanozoashira makomborero akawanda wari uno no mu nyika imbza iri kuzari.

18. Ngoapi makomborero atiri kuvetera?

¹⁸ Vandhu va Mwari pavanozoghwina mu nyika imbza, ivona avazodikanizve kucungirira ngo ndava yo kuthimwa-thimwa pomwe no kusongana no zvineso zvo nyamasi uno. Kushaisha kutajwa kunozopera no kuhwajihwa akuzowanikizve. (Apokaripsi 21:4) Atizodikanizve kuvetera ngo kuthimwa-thimwa zviro zvatinoda, ngokuti kunozova no zviro zvakawanda. (Nduyo 72:16; Isaia 54:13) Aya anozova makomborero acikaezaniswi!

19. Ngozvapi zvaari kutinasirira Jehovha padoko ngo padoko wari uno?

¹⁹ Wari uno Jehovha ari kutinasirira kuti tiende kootongwa ndiyena, ngo kutibesera kuti tinyise zvirovejeso zvakashata no kusakurira mugariro jinomudakajisa. Mucadocamwa, nee mucadosiya kushandira Jehovha. Upenyu hwakanaka ndihwona huri kuviyari kumbejiyo. Ngo kudaro, ngatienderere mberi tecivetera Jehovha ngo kusengerera, paanonga ecikwanirisa zvese zvaakananga.