1. Muvhunjo wapi watingava na iwona kudari tikarangarira ngo pamusoro po zviro zvese zvakaitwa ndi Jehovha?

PATINORANGARIRA ngo pamusoro po zviro zvakasikwa ndi Jehovha, itusu tingava no mazwiro akava na Dhavhidhi uwo wakaita muvhunjo uu mu mukumbiro wake. Iyena wakati: “Ndikavona denga, basa ro nyara jenyu, mweji no nyereji bzomakarura, ndinoxamaiswa ndeciti: Ndiani mundhu kuti mumucereceje, ndiani mwana wa Adamu, kuti muvie komuvona?” (Nduyo 8:4, 5) Inga ndi Dhavhidhi, itusu tingavona kuti tiri zvidodori maningi kudari tikaezanisa no ndhondho jakawanda jakasikwa ndi Jehovha, torangarira kuti Jehovha anotitaja kamare. Itusu tinozovona kuti Jehovha, waitaja vandhu vokutanga Adhamu na Evha, cimwenizve iyena wakavaita kuti ivona vave mbhuri yake kamare.

2. Jehovha waidenyi ku vana vake vokutanga vo pasi pano?

² Adhamu na Evha vainga vana vokutanga va Jehovha, Jehovha wainga Baba wavo ano rudo wo kudenga. Iyena waivetera kuti mukaji no mwamuna ava, vave mbhuri inobara vana. Ngo kudaro, Mwari wakavavhunja kuti: “Barananyi muwande. Muzaje nyika, muitonge.” (Genesi 1:28) Ivona vaidikana kuva no vana no kunasa kutaja ushoni muzi wavo pasi pano. Kudari no vakazwira cidisiso ca Jehovha kwavari, Adhamu na Evha no vana vavo, vaizonga vari mbhuri ya Mwari kwenda no kwenda.

3. Ngenyi tingananga kuti Adhamu na Evha, vakapuwa ndau inosisira maningi mu mbhuri ya Jehovha?

³ Adhamu na Evha vainga no ndau inosisira maningi mu mbhuri ya Jehovha. Inga zvakatahwa pana Nduyo 8:5 mu Shanduro yeNyika Itsva, Dhavhidhi wakananga kudari ngo pamusoro po cisikwa ca Jehovha, cinodaninjwa kuti mundhu. Iyena wakati: ‘Makamurura wakadoezana padoko no ngirozi, mecimudira hata yo goja no yo useji.’ Zvokadi, vandhu avazivi kupuwa simba, ungwaru no kukwanisa kuita zviro inga zvinoitwa  ngo ngirozi. (Nduyo 103:20) Ndizvona, vandhu ndivona basi ‘vakadoezana padoko’ kupinda ngirozi jino simba. Izvi zvinoshamaisa maningi! Jehovha wakapekeja majibaba edu okutanga upenyu waidakajisa maningi.

4. Ngozvapi zvakaitika na Adhamu na Evha ngo ndava yo kutama kuzwira Jehovha, tinozojijenyi pa musoro uno?

 ⁴ Zvinosuruvarisa ngo zvo kuti, Adhamu na Evha vakaruza ndau yavo mu mbhuri ya Jehovha. Izvi zvakabara ngozi inga zvatinozovona pamusoro uno. Asi cidisiso ca Jehovha acizivi kucinja. Iyena anoda vandhu vanozwira kuti vave vana vake mbhera narini. Pokutanga, ngatende tivone kuti Jehovha wakatireremejesa kudini. Tevere, tinozobhuisana kuti zvicinyi zvatinodikana kuita wari uno kuti tivonese kuti itusu, tinoda kuva divi ro mbhuri ya Mwari. Pakupejisira, tinozovona kuti makomborero api Jehovha aanozopekeja vana vake vo pasi pano kuti vabuse kwenda no kwenda.

5. Tingakhombijisa kudini Mwari kuti itusu tiri kubongesera ngo kutiita ngo muezaniso wake?

⁵ Jehovha wakatireremeja ngo kutirura ngo muezaniso wake. (Genesi 1:26, 27) Zvecivoneka kuti itusu takaitwa ngo muezaniso wa Mwari, itusu tinokwanisa kutevejera muezaniso ja Mwari jinoshamaisa, jakadari inga rudo, usizi, kugondeka no ururami. (Nduyo 86:15; 145:17) Patinosakurira mugariro iji, itusu tiri kureremeja Jehovha i tiri kuvonesazve kuti itusu tinobonga maningi kamare ndizvona. (1 Pedhru 1:14-16) Patinonga tinomufambiro unodakajisa Baba wedu vo kudenga, itusu tinova takadakara. Cimwenizve, zvecivoneka kuti Jehovha wakatipekeja mugariro jakatojana no jake, itusu tinokwanisa kuva mukhaindi wo vandhu vaanoda pa mbhuri yake.

6. Jehovha wakareremejesa kudini vandhu paainasirira pasi pano?

⁶ Jehovha wakanasirira muzi unosisira maningi kwatiri. Acito warura vandhu, Jehovha wakanasirira nyika kuti vandhu vagaremo. (Jobe 38:4-6; Jeremia 10:12) Zvecivoneka kuti Jehovha wakanaka maningi no kukova, iyena wakasika zviro zvakawanda zvakanaka kuti itusu tidakare. (Nduyo 104:14, 15, 24) Iyena wakatora mukuvo acirangarira ngo zviro zvainga aita, “wakabzivona kuti bzakanaka.” (Genesi 1:10, 12, 31) Iyena wakareremeja mundhu ngo kumuita “kuti atonge panyezuru po” zvisikwa zvake zvese zvinoshamaisa zvo pasi pano. (Nduyo 8:7) Mwari waida kuti zvisikwa zvake zvakakwana zvidakajihwe kwenda no kwenda. Waro imwimwi nguva jese munobonga Jehovha ngo basa ramakapuwari?

7. Joxwa 24:15, inokhombijisa kudini kuti mundhu anotendehwa kukheta zvaanoda?

⁷ Jehovha wakatipekeja rusujunuko kuti tikhete zvatinoda. Itusu tingakheta kuti tiri kuda kuitenyi mu upenyu hwedu. (Verenganyi Joxwa 24:15.) Mwari wedu ano rudo, anodakara maningi patinokheta kumushandira. (Nduyo 84:12; Mazwi Akangwara 27:11) Itusu tinganasa kushandisa rusujunuko uu, patinoda kutema zvivaringo zvakasiyana-siyana. Ambovonanyi muezaniso wakagajwa ndi Jesu basi.

8. Jesu wakakhombijisa kudini rusujunuko wo kukheta zviro zvaaida?

⁸ Tecitevejera muezaniso wa Jesu, itusu tingatosana kudira zvinodiwa zvo vamweni pakutanga. Dhiya imweni, Jesu no vapostori vake vainga vakaremba, vorangarira kwenda ku ndau yainga icina vandhu, kuti vakwanise kuzorora kondhono. Asi avazivi kukwanisa kuzorora. Vandhu vazinji vakavatevera ngokuti vaida kujijiswa ndi Jesu. Jesu aazivi kunyangajwa ndizvona. Asi iyena wakavazwira pena. Waro Jesu wakazoitenyi? “Iyena wakatanga kuvajijisa zviro zvizinji.” (Marko 6:30-34) Patinotevejera Jesu ngo kuda kushandisa nguva yedu no simba redu pakuda  kubesera vamweni, itusu tinoviisa rukujo kuna Baba wedu vo kudenga. (Mateu 5:14-16) Itusu tinonga ticikhombijazve Jehovha kuti tiri kuda kuva umwe wo mbhuri yake.

9. Ngocapi cipo cinosisira cakapuwa vandhu ndi Jehovha?

⁹ Jehovha wakapekeja vandhu simba ro kubara vana pomwe no mutoro wo kuvajijisa kuti vade Jehovha no kumushandira. Kudari muri mubari, imwimwi munobonga here ngo cipo ici cinosisira? Pikija kuti ngirozi jakakomborehwa maningi ndi Jehovha, ijona ajizivi kupuwa cipo cokubara. Kudari muri mubari, bongeseranyi ngo makomborero aya o kurera vana. Vabari vakapuwa basa rinosisira maningi ro kurera vana vavo “mu mbhangiro no jijiso ya Jehovha.” (Vaefeso 6:4; Deuteronòmio 6:5-7; Nduyo 127:3) Kuti sangano ra Jehovha ribesere vabari, irona riri kubudisa mathurusi akawanda maningi akacijikira mu Bhaibheri, akadari inga mabhuku, mavhidhiyo, mumbo no musoro jimweni jinowanika mu interneti. Zviri pambhene kuti vese vovaviri, Baba wedu wo kudenga pomwe no Mwana wavo, vanoda maningi majaha. (Ruka 18:15-17) Vabari pavanothemba Jehovha, voita zvese zvavanokwanisa kuti vataje vana vavo, Jehovha anodakara ndizvona. Vabari ava, vanopekeja vana vavo mukana wo kuva umwe wo mbhuri ya Jehovha kwenda no kwenda.

10-11. Jehovha wakakwanisa kuitenyi acishandisa muripo?

¹⁰ Jehovha wakatipekeja Mwana wake anosisira maningi kuti itusu tikwanisezve kuva umwe wo mbhuri Yake. Inga zvanangwaya pa  ndima yo cirongomuna, Adhamu na Evha vakaruza ndau yavo inosisira mu mbhuri ya Jehovha. Ivona vakaruzisavo vana vavo ndau iyi. (Varoma 5:12) Ivona vakakheta kutama kuzwira Mwari, ngo kudaro vaidikana kuti vavhiswe pakati po mbhuri yake. Tingati kudini no vana vavo? Jehovha ngo rudo hwese, wakaita nasiriro kuti vana va Adhamu vanozwira, vavezve mu mbhuri yake. Iyena wakakwanisa kuita izvi, ecishandisa muripo wo Mwana wake umwe ega, Jesu Kristu. (Johani 3:16; Varoma 5:19) Muripo wa Jesu, wakaitisa kuti vandhu vanokwana kuita 144.000, vakagondeka vave vana va Mwari.—Varoma 8:15-17; Apokaripsi 14:1.

¹¹ Cimwenizve, zviuru no zviuru zvo vandhu vakagondeka, vari kuzwira Mwari no kuita zvaanoda. Ivona vanozova no vetero yo kuzovazve umwe wo mbhuri ya Mwari pakupera ko muejo wo kupejisira, kumbhiri ko ciuru co makore. (Nduyo 25:14; Varoma 8:20, 21) Ngo pamusoro po vetero iyi, ivona vanodaninja Jehovha, Musiki wavo kuti “Baba.” (Mateu 6:9) Vaya vanozomuswa, vanozopuwavo mukana wo kujijira zvinoda Jehovha. Vaya vanozokheta kuzwira ndhungamiriro yake, vanozovavo umwe wo mbhuri yake.

12. Ngowapi muvhunjo watiri kuda kudavira?

¹² Inga zvatapera kuvona, Jehovha wakaita zviro zvakawanda maningi, zvinovonesa kuti iyena anotireremeja. Iyena wakakheta vokuzojwa kuti vave vana vake, wopekeja “vandhu vakawanda” vetero yo kuzova vana vake mu nyika imbza. (Apokaripsi 7:9) Zvicinyi zvatingaita nyamasi uno kuti tikhombije Jehovha kuti itisu, tiri kuda kuva umwe wo mbhuri yake kwenda no kwenda?

13. Tinodikana kuitenyi kuti tive mbhuri ya Mwari kwenda no kwenda? (Marko 12:30)

¹³ Khombijanyi rudo hwenyu kuna Jehovha ngo kumushandira ngo mwoyo wenyu wese. (Verenganyi Marko 12:30.) Ngo mwoyo wese, Mwari wakatipekeja zviro zvakawanda maningi zvinosisira, cimwe cazvo ngo co kukwanisa kumunamata. Itusu tinokhombija  Jehovha kuti tinomuda ngo “kuzwira mutemo yake.” (1 Johani 5:3) Umwe wo mutemo Jehovha waanoda kuti itusu tiuzwire, ngo wiyana wakanangaya Jesu kuti itusu tinodikana kujijisa vandhu no kuvabhabhatija. (Mateu 28:19) Iyenazve, anotivhunja kuti tinodikana kudisana ngocedu. (Johani 13:35) Jehovha, anoashira vese vayana vanozwira ndhungamiriro jake kuti vave mbhuri yo vanamati vake pasi pese.—Nduyo 15:1, 2.

14. Tingakhombijisa kudini rudo hwedu kuno vandhu vamweni? (Mateu 9:36-38; Varoma 12:10)

¹⁴ Idanyi vamweni. Rudo i mugariro umweni unosisira maningi wa Jehovha. (1 Johani 4:8) Jehovha, wakatanga kutida itusu ticito tamuziva. (1 Johani 4:9, 10) Itusu tinomutevejera, payani patinoda vamweni. (Vaefeso 5:1) Njira yaushoni yo kukhombija rudo hwedu, ngo yo kubesera vandhu kuti vajijire ngo pamusoro pa Jehovha nguva iciripo. (Verenganyi Mateu 9:36-38.) Ngokuita kudaro, itusu tinonga ticivapekeja mukana kuti ivona, vave umwe wo mbhuri ya Mwari. Pavanopera kubhabhatijwa itusu tinoenderera mberi tecivada no kuvareremeja. (1 Johani 4:20, 21) Izvi zvinobatanijenyi? Zvinobatanija kuti itusu tinovareremeja maningi ticikavapekeji thangwe rakashata ngo pamusoro po kubhabhatijwa kwavo. Inga muezaniso, pavanoita ciri cese vacikanasi kuzwisisa, ativapekeji thangwe rakashata, asi tinoreremeja hama yedu toivona inga yakakura kupinda itusu.—Verenganyi Varoma 12:10; Vafiripi 2:3.

15. Itusu tinodikana kukhombijira yani usizi no unyasha?

¹⁵ Zwiranyi vandhu vese usizi no unyasha. Kudari tecida kuva pakati po vandhu vayani vanonasa kudaninja Jehovha kuti Baba kwenda no kwenda, itusu tinodikana kushandisa Soko ra Mwari mu upenyu hwedu. Inga muezaniso, Jesu wakajijisa kuti itusu, tinodikana kukhombijira unyasha no usizi ku vandhu vese pikija ku vavengi vedu kamare. (Ruka 6:32-36) Nguva jimweni, tinganesehwa maningi kuita zviro zvondhozvo. Kana zvakadaro, itusu tinodikana kujijira kurangarira no kuita zviro ngo njira yaiita Jesu. Patinonga teciita zvese zvatinokwanisa kuti tizwire Jehovha no kutevejera Jesu, itusu tiri kukhombija Baba wedu kuti tinoda kuva divi ro mbhuri yavo kwenda no kwenda.

16. Tingaitisa kudini kuti itusu tijivirire zina ro mbhuri ya Jehovha?

¹⁶ Jiviriranyi zina ro mbhuri ya Jehovha. Pa mbhuri jo vandhu vazinji nyamasi uno, kazinji zvinoitika kuti munukuna, atevejere zvinonga zviciitwa ndi nyavanji wake. Asi kudari nyavanji wake vecitevejera ndhungamiriro jo Bhaibheri mu upenyu hwavo, iyena anozotevejeravo muezaniso wondhowo. Asi kudari njavanji vayana vakatama kuita zviro zvakanaka voita zviro zvakashata, munukuna wiyana anozotevejeravo muezaniso wondhowo. Ndizvona zvondozvo zvinoitikavo nyamasi uno mu mbhuri ya Jehovha. Kudari Mukristu wakagondeka wotanga kuva mupanduki, kana kuva no mufambiro wakashata, vamweni vangazobatanavo na iyena pa kuita zviro zvondhozvo. Vese vanoita zviro izvi, vari kuvsipisa zina ro mbhuri ya Jehovha. (1 Vatesaronika 4:3-8) Itusu, tinodikana kungwarira maningi kutama kuteverera muezaniso jondhojo, totama kutendera kuti ciricese haco citidire ndhambo na Baba wedu vano rudo vo kudenga.

17. Tinodikana kungwarira murangariro wapi, ngenyi?

¹⁷ Thembanyi Jehovha kuciripi zviro zvo kunyama. Jehovha anotigondesa kuti anozotipekeja zvese zvatinoda, zvokuha, zvokusimira no po kuvata kudari itusu tikadira pakutanga Umambo hwake no ururami hwawo. (Nduyo 55:23; Mateu 6:33) Teciziva izvi, itusu tinongwarira maningi murangariro wo kuti zviro zvo kunyama zvinoviiswa ngo nyika ino,  zvingatipekeja jiviriro no mudakaro ucikaperi. Itusu tinozviziva kuti njira imwe basi ingatipekeja runyararo mu murangariro ngo yo kuita zvinoda Jehovha. (Vafiripi 4:6, 7) Pikija ticikwanisa kutenga zviro zvakawanda, tinodikana kuvona dangani itusu tinayo nguva no simba ro kushandisa zviro zvondhozvo. Kureva kuti itusu tiri kubatisisa zviro zvatinazvo? Tinodikana kuceukija kuti Mwari, anovetera kuti tiite basa ratakapuwa mu mbhuri yake. Izvi zvinoreva kuti atidikani kusiya kuti ciri cese citiphingaije. Zvokadi kamare, itusu atidi kuita inga jaha riyana rakapindaya rakanyangajwa pasure po kupuwa mukana wo kushandira Jehovha, pomwe no mukana wo kuva mwana wake, zvese izvi ngo ndava yo kubatisisa zviro zvainga nazvo zvo kunyama.—Marko 10:17-22.

18. Rukujo wapi no makomborero, anozobuswa kwenda no kwenda ngo vandhu vanozwira?

¹⁸ Vandhu vanozwira, vanozobusa rukujo ukuru wakadari inga mukana wo kuda no kunamata Jehovha kwenda no kwenda. Vayani vano vetero yo kurarama pasi pano, vanozobusavo mudakaro wo kunasa kutaja pasi pano pakanasirihwa ndi Jehovha kuitira ivona. Sambiri pano, pasi pano zviro zvinopona zvinozoitwa zvipsa, pasi po Umambo hwa Mwari. Jesu, anozovhisa mugariro wese wakashata wakaviiswa ndi Adhamu na Evha pavakaramba kuva mu mbhuri ya Mwari. Jehovha, anozomusa zviuru no zviuru zvo vandhu wozvipa mukana wo kurarama no kucingaperi nyika ino painonga yacinja kuva paradhiso yakakwana. (Ruka 23:42, 43) Divi ro pasi pano ro mbhuri ya Jehovha parinonga recienda mu kukwana, umwe na umwe anonga acikwanisa kukhombijira kamare, ‘goja no useji’ wakatahwaya ndi Dhavhidhi.—Nduyo 8:5, Shanduro yeNyika Itsva.

19. Tinodikana kugara tecirangarirenyi?

¹⁹ Kudari imwimwi muri ku divi ro “vandhu vakawanda,” imwimwi muno vetero inodakajisa. Mwari anomuda maningi, iyena anoda kuti imwimwi muve umwe wo mbhuri yake. Itanyi zvese zvamunokwanisa kuti mumudakajise. Njiku ngo njiku, garanyi mecirangarira zvigondiso zva Mwari mu murangariro mwenyu no mu mwoyo mwenyu. Bongeseranyi mukana wamunawo wo kunamata Baba wedu vo kudenga vanodiwa no kuda kuvakuja kwenda no kwenda.