MUSORO WO KUJIJA WO 34
Endereranyi Mberi ‘Mecifamba mu Cokwadi’
‘Fambanyi mu Cokwadi.’—3 JOHANI 4.
NDUMBO 111 Zvinotiita kuti Tidakare
ZVATICAJIJA a
1. Ngenyi zvaushoni kubhuisana ngo manera otakajija “cokwadi”?
“MAKAZIVISA kudini cokwadi?” Atikani-kani kuti imwimwi makadavira muvhunjo uwu ko vhaza jakawanda. Ngokuti muvhunjo uwu unoanja kuitwa maningi paya po kuti hama jinotanga kuzivana. Zvaushoni maningi kuziva kuti hama no hambzaji jedu jakagumisa kudini pa kuziva Jehovha. Zvaushonivo kunanga manera otakajija cokwadi. (Varoma 1:11) Mabhuyo aya anotibesera kuti tizwisise kuti cokwadi cinosisira maningi kwatiri. Izvi zvinozotibesera kuti tienderere mberi ‘tecifamba mu cokwadi.’ Kana kuti tecipona mu njira inodakajisa Jehovha.—3 Johani 4.
2. Ngozvapi zvatinozovona pa musoro uwu?
2 Pa musoro uwu, tinozovona mathangwe manganani anotiita kuti tide cokwadi. Perapo tinozovona manera atingakhombija ndiona kuti tinoda kamare cokwadi. Iwona unozotibeserazve kuti tiengejere kubongesera kwedu Jehovha ngo kutikwevera mu cokwadi. (Johani 6:44) Unozovangisazve cido cedu co kuda kujijisa vamweni cokwadi.
NGENYI TINODA “COKWADI”
3. Ngorapi thangwe rinosisira maningi rinotiita kuti tide cokwadi?
3 Tino mathangwe akawanda anotiita kuti tide cokwadi. Thangwe rimwe rinosisira maningi, ngo rokuti itusu tinoda Jehovha Mwari, uwo ari Cinyuke co cokwadi. Tecishandisa Soko rake, Bhaibheri, atigumi pa kuziva Jehovha inga mundhu ano simba wakaita denga no nyika basi, asi tinozomuziva inga Baba vano rudo, avo vanotitaja. (1 Pedhru 5:7) Tinoziva kuti Mwari wedu “anounyaxa no usizi, anononoka kuceneka, wakazara ngo rudo no ugondeki.” (Exodo 34:6) Kusiyapo zvondhozvo, iyena anoda ururami. (Isaia 61:8) Iyena anohwajihwa maningi paanotivona tecitambujika. Ngo kudaro, wakanasiririka kuti apeje zvineso zvese zvatiri kusongana nazvo pa nguva yaakagaja. (Jeremia 29:11) Tiri kuvetera no cidaka-daka cese mukuvo wo kuti zviro izvi zviitike! Izvi ndizvona zvinotiita kuti tide maningi Jehovha.
Zvokadi zvo Bhaibheri Zvakadari inga . . . Nanga
Kudari inga nanga inobesera ngavara kuti itame kutohwa ngo mbhepo, vetero yedu yakacijikira mu Bhaibheri, ingatibeseravo patinosongana no zvineso. Zvokadi zvo Bhaibheri zvinotiitavo kuti tivhunje vamweni ngo pamusoro po vetero yatinayo kuitira kumbeji (Vonanyi ndima 4-7)
4-5. Ngenyi mupostori Pauro wakaezanisa vetero yedu no nanga?
4 Ngorapi thangwe rimweni rinotiita kuti tide cokwadi? Cokwadi cinotibesera maningi. Inga muezaniso, cokwadi cinotipa vetero kuitira kumbeji kwedu. Vonanyi kuti Pauro wakaezanisira cokwadi no cinyi. Iyena wakati: “Vetero iyi yakadari inga nanga yo upenyu hwedu, yakacijikira no kuvanga.” (Vahebheru 6:19) Kudari inga nanga inobesera ngarava kuti itame kutohwa ngo mavimbi, vetero yedu yakacijikira mu Bhaibheri inotibeseravo patinosongana no zvineso mu upenyu.
5 Apa Pauro wainga ecibhuya ngo pamusoro po vetero yo kwenda mugore ino Makristu okuzojwa. Asi magama aya anoshandavo kuno Makristu ano vetero yo kupona pasi pano kwenda no kwenda mu paradhiso. (Johani 3:16) Hina, vetero yatinayo wari yo kuzopona kwenda no kwenda, inoita kuti upenyu hwedu huve no cinangwa.
6-7. Hambzaji Ivhoni vakabesereka kudini ngo kujija cokwadi ngo pamusoro po kumbeji?
6 Vonanyi muezaniso wo hambzaji imweni inodanwa Ivhoni. Iyona aizivi kurehwa ngo vabari vari Zvapupu. Poyainga mwana mudoko yaithya maningi kufa. Iyona aikanganwi magama amweni oyakamboverenga, aiti: “Njiku imweni akuzovi no mangwana.” Iyona yakati: “Magama aya aindiita kuti nditame kuvata co usiku ndecirangarira ngo pamusoro po kumbeji kwangu. Ndairangarira kudari: ‘Upenyu auvhiri kuva wakadari. Ngenyi ndiri pano?’ Inini andicaidepi kufa.”
7 Pa kufamba ko nguva, hambzaji Ivhoni povainga vecikura, vakasongana no Zvapupu zva Jehovha. Ivona vakati: “Ndakatanga kutenda kuti ndaizokwanisa kupona kwenda no kwenda mu paradhiso pasi pano.” Vakabesereka kudini ngo kujija cokwadi? Ivona vakaengejera veciti: “Andicapejizve usiku ndicikavati ndecirangarira ngo kumbeji kwangu kana ndecithya kufa.” Zvakajeka kamare kuti hambzaji Ivhoni vanoda maningi cokwadi co Bhaibheri. Ivona vari kudakaravo ngo kuvhunja vamweni vetero yavo yo kumbeji.—1 Timoti 4:16.
Zvokadi zvo Bhaibheri Zvakadari inga . . . Upfumi
Kushandira Jehovha wari no kuva no vetero yo kuzomushandira kwenda no kwenda, tecitongwa ngo Umambo hwa Mwari, zvakadari inga upfumi. Zvese zvatinoita kuti timushandire zvinofanera kamare (Vonanyi ndima 8-11)
8-9. (a) Mwanarume wo pa muezaniso wa Jesu, wakakhombijisa kudini kuti waireremeja upfumi waakawana? (b) Munojizwa kudini ngo cokwadi comakawana?
8 Cokwadi co Bhaibheri cinobatanijavo masoko akanaka ngo pamusoro po Umambo hwa Mwari. Jesu wakaezanisa cokwadi co Umambo no upfumi wakavigwa. Pana Mateu 13:44, Jesu wakati: “Umambo hwo kumatenga hwakaezana no upfumi hwakavigwa mu munda. Mundhu wakahuwana wohufisa. Ngo pamusoro po mudakaro waanawo, iyena anoenda kootengesa zvese zvaainga nazvo, wotenga munda wiya.” Vonanyi basi kuti mwanarume uwu aacaengepi ecipsaka upfumi. Asi paakauwana, wakaita zvese zvaikwanisa kuti autenge. Kunasa kunanga, iyena wakatengesa zvese zvaainga nazvo. Ngenyi? Iyena waiziva kuti iwona waisisira maningi. Iwona waisisira kupinda zviro zvese zvaakasiyari.
9 Kureva kuti muri kudakaravo ngo kuwana cokwadi? Pacina kukana-kana muri kudakara! Tinoziva kuti apana ciro catingapuwa ngo nyika ino, cingaezaniswa no mudakaro watinao wokushandira Jehovha wari, no kuva no vetero yokuzopona kwenda no kwenda kumbejiyo tecitongwa ngo Umambo hwake. Ngo kudaro, tinodikana kuvangisira kuti tireremeje cidakajiso catinaco co kuva no ushamwari wo phedo na Jehovha. Tinodikana ‘kunasa kumudakajisa.’—Vakorose 1:10.
10-11. Zvicinyi zvakaita kuti hama Mishaeri vaite cinjo huru mu upenyu hwavo?
10 Vazinji vedu takadikana kuita cinjo jakakura maningi kuti tikwanise kudakajisa Jehovha. Vamweni vakadikana kusiya mabasa ano nduma ovaiita mu nyika. Kuveni vamweni vakadikana kuima kupsaka maningi mare. Vamwenivo vakadikana kucinja kamare mukuperera manera ovaipona, povakajijira ngo pamusoro pa Jehovha. Izvi ndizvona zvakaitika na hama Mishaeri. Ivona avazivi kurehwa ngo vabari vari Zvapupu. Povainga mujaha vakatanga kutamba kharate. Ivona vakati: “Inini ndaida kwenderera mberi ndino muviri wakanaka. Nguva jimweni ndaijizwa inga kuti apana mundhu anokwanisa kundinyisa.” Asi povakatanga kujija Bhaibheri, hama Mishaeri vakavona kuti Jehovha anonyenya uphanga. (Nduyo 11:5) Vecibhuya ngo pamusoro po varovorani vakavajijisa cokwadi, ivona vakati: “Ivona avazivi kumbondivhunja kuti ndisiye kutamba kharate, covakaita kwainga kwenderera mberi vecindijijisa cokwadi.”
11 Hama Mishaeri povaienderera mberi vecijija ngo pamusoro pa Jehovha, rudo hwavo kwaari waiengejekavo. Ivona vaidakarira maningi usizi unokhombija Jehovha kuno vandhu vake. Pa kufamba ko nguva, hama Mishaeri vakazwisisa kuti vaidikana kuita cinjo mu upenyu. Ivona vakati: “Ndaizviziva kuti kusiya kutamba kharate cainga ciro cinonesa maningi. Asi ndaizivazve kuti zvondhozvo zvaizodakajisa Jehovha. Ndaithemba kuti kusiya kuita zviro zvandaidakarira kuti ndishandire Jehovha zvainga zviro zvaushoni zvo kuita.” Hama Mishaeri vaiziva kuti cokwadi covakawana caisisira maningi. Izvo zvakavaita kuti vaite cinjo huru mu upenyu hwavo.—Jakobo 1:25.
Zvokadi zvo Bhaibheri Zvakadari inga . . . Ruvheneko
Rujhu inonasa kubhwaka ushoni, inotibesera kuti tikwanise kuvona zvatinoda mu cidima. Mukuezanavo, Soko ra Mwari, rinokhombija manera atingatema zvivaringo zvaushoni pikija tecipona mu nyika ino yakashata (Vonanyi ndima 12-13)
12-13. Cokwadi co Bhaibheri cakabesera kudini hambzaji Mairi?
12 Bhaibheri rinoezanisa cokwadi no rujhu inobhwaka pa cidima. Kuezanisira uku kunotibesera kuzwisisa kuti cokwadi cinosisira maningi. (Nduyo 119:105; Vaefeso 5:8) Hambzaji Mairi vanogara ku Azerbhajhau vakadakara maningi ngo besero rovakawana recivha mu Soko ra Mwari. Ivona vakakura pa mbhuri yakaparajana mu zvokunamata. Baba wavo vainga Musurumano, mai wavo vainga Mujudha. Ivona vakati: “Andicaikana-kana ngo kuvepo ka Mwari. Asi ndainga no muvhunjo jakawanda. Ndaijivhunjisa kudari: ‘Ngenyi Mwari wakasika vandhu, perapo voenderera mberi vecitambujika mu upenyu, vopejisira ngo kwenda koopiswa mu inferno?’ Vandhu vamweni vainanga kuti zvese zvinoitika ngo kuda ka Mwari. Ndaijivhunjisazve kudari: ‘Mwari ndiyena ari kuitisari matambujiko aya? Kunanga kuti Mwari anodakara ngo kuvona vandhu vecitambujika?’”
13 Hambzaji Mairi vakaenderera mberi vecipsakisisa mupinguro jo muvhunjo javo. Pa kufamba ko nguva ivona vakatanga kujija Bhaibheri, voguma pa kuva Capupu ca Jehovha. Ivona vakati: “Zvinonangwa ngo Bhaibheri zvandibesera kuti ndive mundhu wakadakara. Izvona zvakandiitazve kuti ndive no runyararo wo mukati.” Kudari inga ndi hambzaji Mairi, itusu tese tinoda kukuja Jehovha “Wiya wakatidanija kuvha mu cidima kuti tiviye ku ruvheneko hwake hunoshamaisa.”—1 Pedhru 2:9.
14. Tingaitisa kudini kuti tiengejere kuda kwatinoita cokwadi? (Vonanyi bhokiso rinoti: “ Zviro Zvimweni Zvatingaezanisira no Zvokadi zvo Bhaibheri.”)
14 Iji muezaniso mushoma basi jinovonesa kuti zvokadi zvo Bhaibheri zvinosisira maningi. Pacina kukana-kana, imwimwi mungarangariravo muezaniso jakawanda. Ngenyi amuiti urongwa pa jijo yenyu yo mundhu ega kuti muwane mathangwe amweni anomuita kuti mude cokwadi? Patinoengejera kuda kwedu cokwadi, tinozowanavo njira jakawanda jokukhombija kuti tinocida.
TINGAKHOMBIJISA KUDINI KUTI TINODA COKWADI?
15. Ngoyapi njira imwe yatingakhombija ndiyona kuti tinoda cokwadi?
15 Tingakhombija kuti tinoda cokwadi, ngo kujija Bhaibheri mukuvo wese no mabhuku akajicikira mu Bhaibheri. Azvinenyi dangani taano makore akadini tiri mu cokwadi, nguva jese tingajija zviro zvizinji. Revhista yokutanga yo Murindiri, yakananga kudari: “Mu nyika muno muna manyepo akawanda. Ngo kudaro, zvinganesa maningi kuziva kuti ngocapi cokwadi. Kudari tecicida tinodikana kwenderera mberi tecicipsaka. Tinodikana kucipsaka mbhera kuciwana. Atidikani basi kudakara ngo kuwana cokwadi cimwe. Tinodikana kwenderera mberi tecipsaka zvimweni.” Kujija akuzivi kureruka. Asi kuvangisira kwese kwatinonga teciita, kunozotibesera.
16. Ngoyapi njira yamunoshandisa pa kujija Bhaibheri? (Mazwi Akangwara 2:4-6)
16 Asipi tese tinodakarira kuverenga no kujija. Asi Jehovha, anotivhunja kuti tienderere mberi ‘tecipsakisisa’ kuti tinase kuzwisisa cokwadi. (Verenganyi Mazwi Akangwara 2:4-6.) Patinoita izvi, tinobesereka maningi. Vecibhuya ngo pamusoro po kuverenga kwavo Bhaibheri, hama Kore vakananga kuti vanoverenga vhesi imwe nga imwe. Ivona vakati: “Ndinoverenga masoko ese o pasi, ndosota referensiya kuruzadha jese no kutopsakisisa. . . . Ndakavona kuti njira iyi inondibesera kuti ndijije zviro zvakawanda.” Azvinenyi dangani munoshandisa njira iyi kana imweni, kudari mukavangisira pa kujija Bhaibheri munonga mecivonesa kuti munoreremeja cokwadi.—Nduyo 1:1-3.
17. Kupona mukuzwirana no cokwadi zvinoda kurevenyi? (Jakobo 1:25)
17 Kujija cokwadi kunosisira, asi tinodikana kuita zvizinji. Kuti tinase kubesereka, tinodikana kupona mukuzwirana no cokwadi kana kuti kuzvishandisa mu upenyu hwedu. Tikaita kudaro, tinozova no mudakaro wokadi. (Verenganyi Jakobo 1:25.) Tingazvizivisa kudini kuti tiri kupona mukuzwirana no cokwadi? Hama imweni yakananga kuti zvaushoni kusotesesa upenyu hwedu kuti tivone dangani tiri kushandisa zvatiri kujija kana paripo patinodikana kuitisa nane. Mupostori Pauro wakati: “Azvinenyi no makurire ataita, ngatirambe tecifamba mu gwanja rondhoro.”—Vafiripi 3:16.
18. Ngenyi tinoita zvese zvatinokwanisa kuti tienderere mberi ‘tecifamba mu cokwadi’?
18 Amborangariranyi basi manera atinobesereka ngo kuita zvese zvatinokwanisa kuti tienderere mberi ‘tecifamba mu cokwadi.’ Izvi azviiti basi kuti upenyu hwedu huve nane asi zvinodakajisa Jehovha pamwepo no hama no hambzaji jedu. (Mazwi Akangwara 27:11; 3 Johani 4) Aya ndi mathangwe aushoni anotiita kuti tide cokwadi no kwenderera mberi tecipona mukuzwirana naco.
NDUMBO 144 “Upenyu Hucingaperi—Mbhera na Rini!”
a Kazinji patinonanga gama rokuti “cokwadi,” tinonga tecinangira zviya zvatinotenda no manera atinopona. Azvinenyi dangani tava Capupu ca Jehovha wari kana taano mazuva tecishandira Jehovha, zvaizova zvaushoni kuceukija zvakatiita kuti tide cokwadi. Izvi zvinozovangisa cisungo cedu co kwenderera mberi tecidakajisa Jehovha.
