1. Mukuzwirana no 1 Vatesaronika 5:11, ngorapi basa rinodikana kuitwa ndisu tese?

 MAKAMBOVA pa musongano pa vhaza yokutanga pasure po kuvakwa kana kugejerehwa ko Nyumba yo Umambo? Pacina kukana-kana kangaije muri kuceukija musongano uu. Makabonga maningi Jehovha. Kangaije makatocema ngo kudakara, motokonehwa kuimba ndumbo yokutanga. Nyumba jedu jo Umambo jakavakwa ushoni, jinokuja Jehovha. Asi tinozomukujazve maningi kudari tikabatikana pa basa rimweni ro kuvaka. Kuvaka uku kunobatanija ciro cinosisira maningi kupinda kuvaka nyumba kamare. Ikona kunobatanija kuvangisa vandhu vanoviya konamata mu nyumba yo Umambo yaperari kuvakwa. Pauro wairangarira ngo pamusoro po kuvaka uku ko kuezanisira, paakatara karata yake yo 1 Vatesaronika 5:11, iyo iri musoro wo jijo yedu.—Verenganyi.

2. Ngozvapi zvatinozovona pa jijo iyi?

² Mupostori Pauro ndi muezaniso wakanaka wo mundhu waiziva manera okuvangisa hama no hambzaji jake. Iyena waivazwira pena. Pa jijo iyi, tiri kuda kuvona kuti iyena wakavangisa kudini hama no hambzaji kuti (1) jicungirire zvineso zvajaisongana nazvo, (2) jive no runyararo no vamweni no (3) jivangise rutendo hwajo kuna Jehovha. Wari ngatende tivone kuti tingatevejeresa kudini Pauro no kukwanisa kuvangisa hama no hambzaji jedu nyamasi uno.—1 Vakorinte 11:1.

3. Pauro waivona kudini basa rake ro kucumaera no basa rake ro kunyama?

³ Pauro waida maningi hama jake. Iyena wakasonganavo no zvineso zvakawanda. Ngo kudaro, waikwanisa kukhombija pena no usizi kuno hama no hambzaji pajaisonganavo no zvineso. Pa vhaza imweni, Pauro aacaengepizve no mare. Ngo kudaro, iyena waidikana kupsaka basa kuti akwanise kujisapota  no kusapotavo shamwari jake. (Mabasa o Vapostori 20:34) Iyena waivaka tenda kuti atengese. Paakaguma ku Korinte, basa rokutanga raakaita ngo ro kuvaka tenda pamwepo na Akira na Prisira. Asi mu “masabudu mwese” iyena waicumaera ku Vajudha no ku Vagiriki. Perapo, Sira na Timoti povakaguma, “Pauro wakatanga kubatikana pa kucumaira soko ra Mwari.” (Mabasa o Vapostori 18:2-5) Pauro aazivi kukanganwa kuti cinangwa cikuru co upenyu hwake, cainga co kushandira Jehovha. Zvecivoneka kuti iyena wakagaja muezaniso wakanaka wo kushanda ngo simba mu basa ro kucumaera no kujisapota pacake, wakakwanisa kuvangisa hama no hambzaji jake. Iyena wakavaceukija kuti avacaidikana kutendera kuti zviro zvokunyama no kusapota mbhuri kuvaite kuti vareje-reje zviro “zvinosisira maningi,” kana zvese zvinobatanijwa pa kunamata Jehovha.—Vafiripi 1:10.

4. Pauro na Timoti vakabesera kudini hama no hambzaji kuti vakwanise kucungirira zvineso zvavaisongana nazvo?

⁴ No pakhirira mukuvo mushomani ungano yo Tesaronika noyaumbwa, Makristu mapsa aya akatanga kuteverehwa. Pa mukuvo umweni cikwata co vavengi cainga cecipsaka Pauro na Sira. Pocakatama kuvawana, cakatanga kukhwekhwereja “hama jimweni vecienda navo ku vatongi vo dhorobha” vecikhuwa kuti: “Vandhu vese ava vari kuhwisana no mutemo ja Sezari.” (Mabasa o Vapostori 17:6, 7) Munokwanisa kurangarira kuthya kwakava no Makristu mapsa aya, pakuvona vandhu vo dhorobha rondhoro ecivateverera? Ivona vaizoguma pakuremba kushandira kwavo Jehovha, asi Pauro aacaidepi kuti izvi zviitike. Pikija iyena na Sira vainga vecida kubuda mu dhorobha iri, ivona vakaita zvese zvavaikwanisa kuti ungano ibza iyi inase kutajwa ushoni. Pauro wakatara kudari ku ungano iyi yo Tesaronika: “Itusu takatuma Timoti hama yedu . . . , kuti amuvangise no kumutondhoja ngo pamusoro po rutendo hwenyu, kuti patame anozungunyiswa ngo ndava yo matambujiko aya.” (1 Vatesaronika 3:2, 3) Kangaije Timoti wakasonganavo no kuteverehwa ku dhorobha raakabarihwa ku Ristra. Iyena wakavona manera Pauro wakavangisa hama kondhoyo. Zvecivoneka kuti Timoti wakavona manera Jehovha wakabesera hama no hambzaji ku Ristra, iyena wakagondesa hama no hambzaji jo ku Tesaronika kuti Jehovha waizovabeseravo.—Mabasa o Vapostori 14:8, 19-22; Vahebheru 12:2.

5. Hama Bhrianti vakabesehwa kudini ngo mukuru umweni?

⁵ Mupostori Pauro wakaitenyizve kuti avangise hama no hambzaji jake? Povakahwirira ku ungano yo Ristra, Ikoniyo no Antiyokiya, Pauro na Bharnabha “vakagaja vakuru mu ungano imwe na imwe.” (Mabasa o Vapostori 14:21-23) Pacina kukana-kana, vakuru vakagajwari vakakwanisa kuvangisa ungano inga zvinoitwa ngo vakuru nyamasi uno. Vonanyi basi zvakananga hama imweni inodanwa Bhrianti: “Pondainga no gumi na mashanu o makore, baba wangu vakabuda pa muzi, mai wangu vakajingwa. Izvi zvakandiita kuti ndijizwe ndiri ndega no kutoperehwa ngo simba.” Zvicinyi zvakabesera hama Bhrianti kuti vacungirire zvineso zvavaisongana nazvo? Ivona vakati: “Mukuru umweni anozwi Toni, waibhuya na inini pa musongano no mukuvo jimweni. Vaindivhunja ngo muezaniso jo vandhu vaisongana no zvineso asi voenderera mberi vakadakara. Vakaverenga na inini Nduyo 27:10. Vobhuya ngo muezaniso wa Ezekiya, uwo wakashandira Jehovha wakagondeka pikija baba wake avacainga muezaniso waushoni.” Izvi zvakabesera kudini hama Bhrianti? Ivona vakati: “Ndaivangiswa kamare ngo magama aindivhunja hama Toni. Zvakandiita kuti  ndidakarire kutanga kushanda mu nguva yakazara.” Vakuru, beseranyi vaya vari kusongana no zvineso, inga zvakasongana na hama Bhrianti. Kangaije ngo kuvavhunja “izwi rakanaka” no rinovangisa.—Mazwi Akangwara 12:25.

6. Pauro wakashandisenyi kuti avangise hama no hambzaji jake?

⁶ Mupostori Pauro wakabesera hama no hambzaji jake kuti jiceukije kuti ngo besero ra Jehovha “njama huru yo zvapupu” yakakwanisa kucungirira zvineso zvoyaisongana nazvo mu upenyu hwavo. (Vahebheru 12:1) Pauro waiziva kuti zviitiko zvo vandhu vokare vakacungirira zvineso, zvaizobesera Makristu kuti akwanisevo kucungirira pa zvineso no kusotesesa “dhorobha ra Mwari anopona.” (Vahebheru 12:22) Izvi ndizvona zvinoitikavo na itusu nyamasi uno. Tinobesereka maningi ngo kuvona manera Jehovha wakabesera Gidhiyoni, Bharaki, Dhavhidhi, Samuweri no vandhu vamweni. (Vahebheru 11:32-35) Tinobeserekazve patinovona muezaniso jo hama no hambzaji jiri kucungirira zvineso nyamasi uno. Ku cine ro pasi pese, itusu tiri kuashira karata jo hama no hambzaji, jecinanga manera ojakabesereka ngo kuverenga zviitiko zvo upenyu zvo vashandiri va Jehovha vo nyamasi uno.

7. Majijenyi ngo mbhangiro yaakapa Pauro inowanika pana Varoma 14:19-21?

⁷ Tingakwanisazve kuvangisa hama no hambzaji jedu, patinoita kana patinovereketa zviro zvinoita kuti ungano ive no runyararo. Atidikani kuita kuti mavonero edu ngo pamusoro po shwiro iri yese, aite kuti ungano iparajane. Atidikani kuvangirira pamavonero edu basi kudari apana ndhungamiriro inorambisa zvondhozvo. Vonanyi muezaniso uu basi. Mu nguva jo mupostori Pauro, ungano yo Roma, yainga no Makristu o Cijudha no Makristu akavha ku majinja. Hama jimweni jainga mu ungano iyi, jicito jajija cokwadi, jaitevera mutemo wa Mosi. Asi mutemo wa Mosi pawakapera, ivona vaitendehwa kuha zvese zvavaida. (Marko 7:19) Ngo iyo ndava, Makristu o kuti kare aipona mukuzwirana no mutemo wa Mosi, aacaivona zvakashata kuha zviro zvese, kuveni Makristu amweni, aivona zvakashata kuita izvi. Shwiro iyi yakaita kuti ungano iparajane. Asi zvakananga Pauro zvakavonesa kuti kuita runyararo kunosisira maningi. Iyena wakati: “Zviri nane kutama kuha nyama no kumwa vhinyu kana kutama kuita ciri cese haco cinokhugunya hama yako.” (Verenganyi Varoma 14:19-21.) Ngo magama aya, Pauro wakabesera hama no hambzaji kuti vavone kuti zvavaiitari zvaiita kuti vaparajane ngo cavo no kuparajanisavo ungano. Pauro waida kusiya zvese zvaaitendehwa kuita kuti atame kukhugunya vamweni. (1 Vakorinte 9:19-22) Tingavangisavo vamweni no kuita runyararo, paya patinotama kuvereketesana no kuita kuti zviro zviitwe mu mavonero edu basi.

8. Pauro wakaitenyi paya pakamuka shwiro yaizopeja runyararo mu ungano?

⁸ Pauro wakagaja muezaniso wakanaka wo kuita runyararo paya patinotama kuzwana pa shwiro inosisira maningi. Inga muezaniso mu nguva jo vapostori, hama jimweni mu ungano jainanga kuti Makristu ese acaengepi Vajudha vaidikana kusokwa. Kangaije vaiita zvondhozvo kuti vatame kushohwa ngo Vajudha. (Vagaratiya 6:12) Pauro wakaramba kamare kutenderana no mavonero avo. Kusiyapo kuvangirija vamweni kuti vaite mukuzwirana no mavonero ake, iyena wakazvidodokesa, okumbira mazano kuno vapostori no vakuru vo ku Jerusarema. (Mabasa o Vapostori 15:1, 2) Zvakaitari Pauro pa shwiro iyi, zvakabesera hama  no hambzaji kuti jive no mudakaro no runyararo mu ungano.—Mabasa o Vapostori 15:30, 31.

9. Tingatevejeresa kudini muezaniso wa Pauro?

⁹ Kudari pakava no shwiro inonesa maningi, tingaita kuti pave no runyararo ngo kuzwira ndhungamiriro jinovha ku sangano ra Jehovha. Kuna ndhungamiriro jakawanda kuitira shwiro jakasiyana-siyana jatinowana mu mabhuku akacijikira mu Bhaibheri no ndhungamiriro jinovha ku sangano ra Jehovha. Kudari tikabatisisa ndhungamiriro iji kusiyapo kugaja zvimutemo kana kuda kuti shwiro iitwe mu mavonero edu, tinozoita kuti mu ungano muve no runyararo.

10. Ngozvapi zviro zvimweni zvakaita Pauro kuti aite kuti mu ungano muve no runyararo?

¹⁰ Pauro waiita kuti pave no runyararo, ngo kusotesesa mugariro jaushoni jo hama no hambzaji, kusiyapo zvavaiposa. Inga muezaniso, pa karata yake ku Varoma, wakapejisa ecinanga vandhu vazinji ngo mazina avo no zviro zvaushoni zvavaiita. Tingatevejeravo muezaniso wo mupostori Pauro ngo kusimba hama ngo mugariro javo jaushoni. Kuita izvi, kunozobesera hama no hambzaji kuti jive no ushamwari wo phedo no kuvangisa rudo wo vese mu ungano.

11. Tingaitisa kudini kuti mu ungano muve no runyararo kudari pakamuka kutama kuzwana?

¹¹ Mukuvo umweni Makristu akaivha ku mujimu angagumavo pakutama kuzwana. Izvi ndizvona zvakaitika na Pauro no shamwari yake Bharnabha. Ivona vakaguma pa kutama kuzwana ngo pamusoro po kutora Marko kuti vaite nae hwendo hwavo wo umisiyonariyo. Ivona “vakapopana maningi,” voguma po kutama kuitazve hwendo vese. (Mabasa o Vapostori 15:37-39) Asi Pauro, Bharnabha na Marko vakaita runyararo ngocavo, ngokuti ivona vaireremeja maningi runyararo no rubatano mu ungano. Pakufamba ko nguva, Pauro wakananga zviro zvaushoni zvakaitwa ndi Bharnabha na Marko. (1 Vakorinte 9:6; Vakorose 4:10) Itusu tinodikanavo kuita zviri zvese ngo kukasika kudari atiripi kuzwanana no hama mu ungano, ngo kuvangisira kuti tisotesese mugariro javo jaushoni. Tikaita kudaro, tinoita kuti mu ungano muve no runyararo no rubatano.—Vaefeso 4:3.

12. Ngozvapi zvineso zvimweni zviri kusongana no hama no hambzaji jedu nyamasi uno?

¹² Tingavangisa hama no hambzaji jedu patinovabesera kuti vave no rutendo hwakavanga kuna Jehovha. Hama jimweni jinoshohwa ngo ukama ucikanamati Jehovha, vadoni vokubasa kana vadoni vokushikora. Jimweni jiri kuhwisana no zvineso zvo uhomi. Kana kugara vakasuruvara ngo kunyangajiswa ko vakaitwa ngo vamweni. Kuveni vamweni vakabhabhatijwa kare zvokuti vari kutovetera ko mukuvo wakareba kupera ko nyika ino. Zvese izvi zvingaeja rutendo hwedu. Makristu o muzana ro kutanga, akasonganavo no zvineso zvakadari. Ngozvapi zvakaita Pauro kuti avangise rutendo wo hama no hambzaji jake?

13. Mupostori Pauro wakabesera kudini vaya vaishohwa ngo ndava yo zviro zvavaitenda?

¹³ Pauro wakashandisa Matahwa kuti avangise rutendo wo hama no hambzaji jake. Inga muezaniso, kangaije Makristu o Cijudha aacaiziva co kunanga ukama hwavo powainanga kuti Vajudha vainga vakakhwirira maningi kupinda Makristu. Asi karata ya Pauro ku Vahebheru yakabesera maningi Makristu aya. (Vahebheru 1:5, 6; 2:2, 3; 9:24, 25) Zvainangwari mu karata iyi zvakavabesera kuti vazive zvokunanga kuno vandhu ava. Nyamasi uno, tingaitavo zvakafanana. Hama no hambzaji jimweni jiri kushohwa ngo ndava yo zvavanotenda. Asi itusu tingabesera hama  iji kuti jikwanise kusanangura zvavanotenda. Kudari majaha ari kushohwa ngo ndava yo kutenda kuti zviro zvakaitwa ngo kusikwa, tingavabesera kuti vawane masoko mazinji mu mabhurushura anoti: A Vida—Teve um Criador? no A Origem da Vida—Cinco Perguntas Que Merecem Resposta. Iwona anovonesa kuti ngenyi tinotenda kuti upenyu wakasikwa.

14. Pikija Pauro wainga wakabatikana pa basa ro kucumaera no kujijisa, ngozvapi zvimweni zvaakaitazve?

¹⁴ Pauro wakavangisa hama no hambzaji jake ngo kukhombija rudo hwake ngo “mabasa akanaka.” (Vahebheru 10:24) Iyena wakabesera hama no hambzaji kuciripi basi ngo zviya zvaainanga asi ngo zviya zvaiita. Inga muezaniso, hama ku Judheya pojakava no njara, Pauro wakabesera pakukovanisa zvokuha no zvimweni zvovaida. (Mabasa o Vapostori 11:27-30) Pikija Pauro wainga wakabatikana pa kucumaera no kujijisa, iyena waipsakavo manera okubesera hama jaida besero ku divi ro kunyama. (Vagaratiya 2:10) Ngo kuita kudaro, iyena waivangisa hama kuti jithembe kuti Jehovha waizojikorondha. Nyamasi uno, patinojipira kuti tibesere hama jawihwa ngo ngozi jinoitika jega, tinovangisavo rutendo wo hama no hambzaji jedu. Tingabeserazve patinoita mupiro nguva jese kuitira kubesera basa ro pasi pese. Ngo njira iyi, tinobesera hama no hambzaji jedu kuti jithembe kuti Jehovha narini aazojisii.

15-16. Tingabesera kudini hama no hambzaji jino rutendo wakarembajeka?

¹⁵ Pauro wakaenderera mberi ecibesera vaya vainga no rutendo wakaremba. Iyena wakakhombija usizi no kubhuya ngo njira yo rudo. (Vahebheru 6:9; 10:39) Inga muezaniso, pa karata yake ku Vahebheru iyena kazinji wakashandisa gama ro kuti “itusu,” ecida kuvonesa kuti iyena waidikanavo kushandisa mbhangiro yaakapari. (Vahebheru 2:1, 3)  Inga ndi Pauro, itusu atirembi pa kubesera vaya vano rutendo wakaremba. Kusiyapo zvondhozvo, tinovavangisa ngo kukhombija kuti tinovada. Ngo njira iyi tinonga tecivonesa rudo hwedu kwavari. Manera atinobhuya angavangisa maningi hama no hambzaji jedu.

¹⁶ Pauro wakavangisa hama no hambzaji jake kuti Jehovha anovona mabasa ese akanaka atinoita. (Vahebheru 10:32-34) Tingaitavo zvakafanana patinonga tecibesera hama no hambzaji jino rutendo wakarembejeka. Tingavakumbira kuti vatisumurire manera ovakaziva cokwadi kana zviri zvese zvakaitika mu upenyu hwavo zvinovonesa kuti Jehovha wakavabesera. Tingashandisazve mukana uwu kuti tivavangise kuti Jehovha narini aazokanganwi rudo wovakakhombija kwaari kareko, nokutizve iyena aazovasii kumbejiyo. (Vahebheru 6:10; 13:5, 6) Mabhuyo akadari anozoita kuti ivona vaenderera mberi vecishandira Jehovha.

17. Ngozvapi zviro zvatinodikana kuita kuti tivangise hama jedu?

¹⁷ Kudari inga muvaki anoitisa nane kukwanisa kwake kuvaka pa kufamba ko nguva, itusu tingakwanisavo kuitisa nane kuvangisa kwatinoita hama no hambzaji pa kufamba ko nguva. Tingavabesera kuti vawane simba ro kucungirira zvineso zvavari kusongana nazvo, ngo kuvavhunja muezaniso jo vandhu vakambocungiriravo zvineso. Tingaita kuti mu ungano muve no runyararo ngo kunanga zviro zvaushoni zvinoitwa ngo vamweni no kuita runyararo no vamweni paya patinova no mavonero akasiyana. Cimwenizve, kudari tikavavangisa tecishandisa zvotajija mu Bhaibheri no kuvapa zviri zvese zvavanoda, tinovabesera kuti vave no rutendo hwakavanga.

18. Tinodikana kutema civaringo co kuitenyi?

¹⁸ Hama jinobesera pa basa ro kuvaka jinodakara maningi ngo kuita zvondhozvo. Itusu tingatodakara ngo kubesera basa iri ro kuvaka ungano yedu ku divi ro umwari. Mukusiyana no nyumba inovakwa iyo inopejisira ngo kuwa, basa ratinoitari ro kuvangisa ungano ku divi ro umwari, rinozogara kwenda no kwenda. Ngo kudaro, ngatiteme civaringo co kwenderera mberi ‘tecivangisana no kubesana ngocedu.’—1 Vatesaronika 5:11.