1. Ngenyi Jesu wakakumbira Jehovha kuti ajivirire vateveri vake?

 PA USIKU acito afa, Jesu wakakumbira Baba wake vo kudenga ciro cinosisira maningi. Iyena wakavakumbira kuti vangwarire vateveri vake. (Johani 17:15, 20) Zvokadi kamare, Jehovha nguva jese anovona, anongwarira no kujivirira vandhu vake. Asi, Jesu waiziva kuti ivona vaizosongana no zvineso zvaizoviiswa ndi Sathana. Iyena waizivazve kuti ivona vaida kujivirihwa ndi Jehovha kuti vakwanise kuhwisana na Dhiyabhu.

2. Mukuzwirana na Nduyo 33:18-20, ngenyi atidikani kuthya zvineso zvatiri kusongana nazvo?

² Nyika ino iri kutongwari ndi Sathana, iri kuita kuti Makristu ocokwadi asongane no zvineso zvakasiyana-siyana. Tinosongana no zvineso zvinotirembesa no zvinoeja kugondeka kwedu kuna Jehovha. Asi, inga zvaticazovona pa jijo iyi, atidikani kuthya. Jehovha ari kutingwarira, izvi zvinoreva kuti iyena anoziva zvineso zvese zvatiri kusongana nazvo no kuita zviri zvese kuti atibesere. Ngatende tivone muezaniso muviri jo mu Bhaibheri jinokhombija kuti Jehovha ari kuitisa kudini kuti ave “panyezuru pa vaya vanomuthya.”—Verenganyi Nduyo 33:18-20.

3. Ngenyi nguva jimweni tingajizwa tiri toga?

³ Pikija itusu tino hama no hambzaji jakawanda mu ungano, nguva jimweni tingatojizwa tiri tega. Inga muezaniso, majaha angajizwa ari oga paanonga ecisanangura zvaanotenda ku vadoni vokushikora kana paanocinja ungano. Vamweni vedu vangajizwa vakasuruvara kana vacina simba pavanorangarira kuti vanodikana kuhwisana no zvineso izvi voga. Kangaije tingathya kubhuya no vamweni ngo manera atiri kujizwa, tecithya kuti ivona avazotizwisisi. Nguva jimweni tinotothya tecirangarira kuti apana mundhu anotitaja. Azvinenyi kuti ngozvapi zvinotiita  kuti tijizwe tiri toga, nguva jimweni tingatojizwa kuti atisisiri kana kutothimwa-thimwa. Jehovha narini aadi kuti itusu tijizwe kudaro. Ngenyi tingananga kudaro?

4. Ngenyi muporofita Eriya wakananga kuti “ndasara inini ndega”?

⁴ Ambovonanyi muezaniso wo mwanarume wakagondeka anodanwa Eriya. Jhezabheri waida kumuuraya. Ngo iyo ndava, wakadikana kutiza ko makumarongomuna o dhiya kuti akwanise kuponesa upenyu hwake. (1 Majimambo 19:1-9) Pakupejisira, iyena wakazokwanisa kufindara mu bako. Iyena wakakhuwa kuna Jehovha eciti: “Ndasara inini ndega” muporofeti. (1 Majimambo 19:10) Kwainga kuno vaporofeti vamweni. Inga muezaniso, Obhadhiya wakaponesa vaporofeti vanokwana kuita 100 vaida kuuraiwa ndi Jhezabheri. (1 Majimambo 18:7, 13) Waro, ngenyi Eriya waijizwa ari ega? Kangaije iyena wairangarira kuti vaporofeti vakaponeswaya ndi Obhadhiya vainga vapera kuuraiwa. Zvingaitazve kuti iyena waijizwa ari ega ngokuti vamweni avazivi kubatana naye pa kushandira Jehovha, pikija Jehovha wainga wapera kuvonesa kuti ndiyena Mwari wokadi pa Dundhu Karmero. Kangaije iyena wairagarira kuti apana mundhu waiziva zvineso zvaaisongana nazvo kana kutorangarira kuti apana waineseka ndiyena. Zvinganesa kuzwisisa mazwiro ainga na Eriya. Tino cokwadi co kuti Jehovha wainansa kuziva kuti ngenyi Eriya waijizwa kudaro no kuziva kamare manera aushoni okumubesera.

5. Jehovha wakaitisa kudini kuti abesere Eriya kuti atame kujizwa ari ega?

⁵ Jehovha wakabesera Eriya ngo njira jakasiyana-siyana. Pokutanga, iyena wakamuvangisa kuti anange mazwiro ake. Pa vhaza mbiri Jehovha wakavhunjisa Eriya kudari: “Unoitenyi pano, Elia?” (1 Majimambo 19:9, 13) Pa vhaza imwe nga imwe, Jehohva wakanasa kupurukira Eriya paainga ecinanga mazwiro ake. Jehovha wakadavira Eriya ngo kuvonesa kuti iyena wainga pondhopo kuti amubesere no kuvonesazve simba rake. Wakamugondesa kuti iyena aacaengepi ega. Ngokuti kwainga kuno Vaiziraeri vazinji vainga vacanamata Jehovha. (1 Majimambo 19:11, 12, 18) Pacina kukana-kana, Eriya wakajizwa ushoni paakapera kuvhunja Jehovha mazwiro ake no kuzwa mupinguro wakapa Jehovha. Cimwenizve, Jehovha  wakapa Eriya mabasa akasiyana-siyana anosisira. Iyena wakamuvhunja kuti aende kozoja Hazaeri inga mambo wo Siriya. Jehu inga mambo wo Vaiziraeri. No kuzojavo Erizeu inga muporofeti. (1 Majimambo 19:15, 16) Ngo kupa mabasa aya Eriya, Jehohva wakamubesera kuti abatikane pa zviro zvaushoni. Cimwenizve, Jehovha wakamupa shamwari yaushoni, Erizeu. Muri kuashirisa kudini besero ra Jehovha pamunojizwa muri moga?

6. Ngozvapi zvamungananga pa mukumbiro jenyu kudari muri kujizwa muri moga? (Nduyo 62:9)

⁶ Jehovha anotikoka kuti tiite mukumbiro kwaari. Iyena anovona zvineso zvese zvatinazvo. Anotigondesa kuti anozopurukira mukumbiro jedu pa nguva iri yese. (1 Vatesaronika 5:17) Iyena anodakajihwa kuzwa vashandiri vake veciita mukumbiro kwaari. (Mazwi Akangwara 15:8) Ngozvapi zvamungananga pa mukumbiro jenyu kudari muri kujizwa muri moga? Vhunjanyi Jehohva manera muri kujizwa inga zvakaita Eriya. (Verenganyi Nduyo 62:9.) Muvhunjenyi zvese kamare zviri kumunesa. Kumbiranyi Jehovha kuti amubesere kunyisa mazwiro enyu. Inga muezaniso, kudari muri kujizwa muri moga kana mucithya pamunoda kucumaera kushikora, kumbiranyi Jehovha kuti amupe cicunge camunoda kuti mukwanise kuvereketa. Mungatomukumbiravo kuti amupe uzivi wokusanangura zvokadi zvo Bhaibheri mu njira yakapfava. (Ruka 21:14, 15) Kudari makasuruvara, kumbiranyi Jehovha kuti mubhuye no hama yakaivha ku divi ro umwari. Mungatokumbiravo Jehovha kuti abesere hama yamuri kwendaro kobhuya nayo kuti inase kuzwisisa mazwiro enyu. Itanyi mukumbiro kuna Jehovha, vonanyi manera iyena anodavira mukumbiro jenyu no kutendera besero ro vamweni. Mukadaro, amuzojizwi maningi muri moga.

7. Ngozvapi zvomajija ngo muezaniso wa hama Maurisiyo?

⁷ Jehovha wakapa tese basa rinosisira maningi kuti tiite. Thembanyi kuti iyena anovona zvese zvamuri kuita no kureremeja kuvangisira kwamuri kuita kuti mukwanirise basa renyu mu ungano no mu basa ro kucumaera. (Nduyo 110:3, Sandujo yo Nyika Imbza) Kuitisa kudini kubatikana mu basa iri kunozomubesera kuti mutame kujizwa muri moga? Vonanyi basi muezaniso wo hama imweni iri mujaha inodanwa Maurisiyo. b No papera mukuvo mushoma Maurisiyo naabhabhatijwa, shamwari yake yo phedo yakasiya cokwadi padoko ngo padoko. Hama Maurisiyo vakati: “Pandakamuvona ecisiya kushandira Jehovha, ndakamuka kupera simba. Ndaithya dangani ndaizokwanisa kupona mukuzwirana no kujipira kwandakaita no kwenderera mberi ndeciita divi ro mbhuri ya Jehovha. Ndaijizwa ndiri ndoga, ndairangarira kuti apana mundhu waizwisisa mazwiro angu.” Waro, zvicinyi zvakabesera hama Maurisiyo?  Ivona vakati: “Ndakabatikana mu basa ro kucumaera. Zvondhozvo zvakandibesera kuti nditame kubatikana pa mazwiro angu no kutama kuva no mazwiro acikabesi. Pandaishanda no vamweni mu basa ro kucumaera ndaidakara, ndicikajizwizve ndiri ndoga.” Hina, pikija ticikatokwanisi kubuda no hama no hambzaji jedu mu basa ro kucumaera inga zvotaiita kare, tingaenderera mberi tecicumaera navo tecishandisa foni no kutara karata. Izvi zvinotivangisa maningi. Waro zvicinyi zvakabeserazve hama Maurisiyo? Ivona vakati: “Ndaiita mabasa akasiyana-siyana mu ungano. Ndainasa kunasirira no kuita ushoni mativi ondaigajwa. Mabasa aya akaita kuti ndijizwe kuti ndinoreremejwa ndi Jehovha no vamweni.”

8. Patinosongana no zvineso zvakasiyana-siyana, tinojizwa kudini?

⁸ Tinovetera kusongana no zvineso zvakasiyana-siyana mu njiku jino jo kupejisira. (2 Timoti 3:1) Asi zvineso zvimweni zvatingasongana nazvo zvingatotikahamaja. Ngo civhumbu tingatova no zvineso zvo mare, medhiko wedu angatotivhunja kuti tino ndhendha inonesa kana mundhu watinoda angatotamika. Pa mugariro jakadari inga iji, tingatosuruvara maningi, maningi-ningi kudari zvineso izvi zvingaitika zvecitevererana kana zvese pa nguva yondhoyo. Ceukijanyi kuti Jehovha anoziva zvese zvatiri kusonganari nazvo. No besero rake, tinokwanisa kuhwisana no zvineso zvese.

9. Ngozvapi zvineso zvakasongana na Jobe?

⁹ Amborangariranyi manera Jehovha wakabesera mwanarume wakagondeka Jobe. Iyena wakasongana no zvineso zvakashatisisa maningi mu upenyu hwake pa nguva yondhoyo. Pa njiku yondhoyo, Jobe wakavhunjwa kuti zvinyama zvake zvese zvapera kufa. Vashandiri vake vainga vapera kuuraiwa. Cimwenizve, vana vake vaaida maningi vainga vapera kufavo. (Jobe 1:13-19) Paainga acacumba ngo zvaingari zvaitika, iyena wakabathwa ngo ndhendha inozizimusa. (Jobe 2:7) Mugariro wake wainga wakashatisisa maningi, zvoita kuti iyena anange kudari: “Ndiri kufa, andizorarami mbhera narini.”—Jobe 7:16.

10. Jehovha wakaitenyi kuti Jobe akwanise kucungirira zvineso zvake? (Vonanyi foto yo pakapa.)

¹⁰ Jehovha wainga ecivona zvese zvaisonganari na Jobe. Zvecivoneka kuti iyena waida maningi Jobe, wakamupa zvese zvaaida kuti akwanise kucungirira zvineso zvake. Jehovha wakabhuya na Jobe womuvhunja ngo pamusoro po uzivi hwake ucikaperi no manera aanotaja zvisikwa zvake. Iyena wakabhuya ngo pamusoro po zvinyama zvizinji zvinoshamaisa. (Jobe 38:1, 2; 39:9, 13, 19, 27; 40:15; 41:1, 2) Jehovha wakashandisavo mwanarume wakagondeka waidanwa Erihu kuti avangise no kutondhoja Jobe. Erihu wakavhunja Jobe kuti Jehovha nguva jese anokomborera kucungirira ko vanamati vake. Asi Jehovha wakashandisavo Erihu kuti arungamise mavonero akaposeka ainga na Jobe. Erihu wakabesera Jobe kuti atame kurangarira maningi ngo pamusoro pake, no kumuvhunja kuti itusu tiri vadoko maningi tikaezanisa na Jehovha, Musiki wo pasi no mudenga. (Jobe 37:14) Kusiyapo zvondhozvo, Jehovha wakapa Jobe basa kuti iyena aite. Iyena waidikana kukumbirira shamwari ndhatu jiya jo kunyepa jaingaya japera kushaisha. (Jobe 42:8-10) Jehovha anotibeseresa kudini nyamasi uno, patinosongana no zvineso?

11. Bhaibheri rinotibeseresa kudini patinosongana no zvineso?

¹¹ Jehovha nyamasi uno aabhuyi na itusu kamare inga zvaakaita na Jobe, asi anozviita ecishandisa Soko rake Bhaibheri. (Varoma 15:4) Iyena anotivangisa ngo kutipa vetero kuitira kumbeji. Ambovonanyi basi mavhesi manganani o Bhaibheri angativangisa patinosongana no  zvineso. Mu Bhaibheri, Jehovha anotivhunja kuti apana ciri cese, kubatanijavo no zvineso, zvingakwanisa “kutiparajanisa ku rudo hwakatatijwa ndi Mwari.” (Varoma 8:38, 39) Iyena anotivhunjavo kuti “ari phedo po vese vanomudanija.” (Nduyo 145:18) Jehovha anotivhunja kuti, kudari tikamuthemba, tinozokwanisa kucungirira zvineso zvatiri kusongana nazvo no kudakara pikija tecitambujika. (1 Vakorinte 10:13; Jakobo 1:2, 12) Bhaibheri rinotivhunjavo kuti zvineso zvatiri kusonganari nazvo ngo zvo nguva shomani tikada kuzviezanisa no upenyu ucikaperi watinozova nawo kumbejiyo. (2 Vakorinte 4:16-18) Jehovha anozoparaja wiya ari kuitisa matambujiko, kana kuti Sathana Dhiyabhu no vaya vanomubesera. (Nduyo 37:10) Kureva kuti muri kudiravo vhesi nganani mu musoro kuti jizomubesere pamunozosongana no zvineso kumbejiyo?

12. Jehovha anovetera kuti tiitenyi kudari tecida kunasa kubesereka ngo zvinonangwa mu Soko rake?

¹² Jehovha anovetera kuti itusu tipsake mukuvo wo kujija Bhaibheri nguva jese no kurangarijisisa zvotaverengaro. Patinoshandisa zvotajija, rutendo hwedu unovanga, tova phedo na Baba wedu vo kudenga. Inga muviyo, tinozokwanisa kucungirira zvineso zvese zvatinozosongana nazvo. Jehovha anopavo mujimu mucena kuno vaya vanothemba zvinonangwa mu Soko rake. Mujimu wondhowo unozotipa “simba rinopindirija ro vandhu” kuti tikwanise kucungirira cineso ciri cese.—2 Vakorinte 4:7-10.

13. Zvokuha zvo umwari zvatinopuwa ngo “muranda wakagondeka no wakangwara” zvinotibesera kudini kuti ticungirire patinosongana no zvineso?

¹³ Ngo besero ra Jehovha, “muranda wakagondeka no wakangwara” uri kubudisa mabhuku akawanda, mavhidhiyo no ndumbo jingatibesera kuti tive no rutendo hwakavanga no kwenderera mberi tiri phedo na Jehovha. (Mateu 24:45) Tinodikana kunasa kubesereka ngo zvese zvatinopuwari. Hambzaji imweni yo ku Estadhus Unidhus yakananga manera ainojizwa ngo pamusoro po zvokuha izvi zvo umwari zvatinoashirari. Iyona yakati: “Ko makomarongomuna o makore ndecishandira Jehovha, rutendo hwangu hwakaejwa ko vhaza jakawanda.” Iyona yakasongana no zvineso zvakasiyana-siyana. Cekuru wayo vakatamika povakacikwa ngo karu ngo mundhu wainga wakarejera, umwe wo ukama hwayo wakahwaja maningi wogumira pa kufa. Cimwenizve, iyona yakabatwa ngo ndhendha yo kanseri ko vhaza mbiri. Zvicinyi zvakaibesera kuti icungirire? Iyona yakati: “Jehovha nguva jese anondibesera. Zvokuha  zvo umwari zvaanondipekeja ecishandisa muranda wakagondeka no wakangwara, zvinondibesera kuti ndicungirire. Ngo kudaro, ndingavavo no mazwiro akafanana no akava na Jobe, paakati: ‘Ndinotokotesa uceni hwangu mbhera kufa.’”—Jobe 27:5.

14. Jehovha anoshandisa kudini hama no hambzaji jedu kuti jitibesere patinosongana no zvineso? (1 Vatesaronika 4:9)

¹⁴ Jehovha ari kujijisa vandhu vake kuti vade no kuvangisa hama no hambzaji pa mukuvo wo zvineso. (2 Vakorinte 1:3, 4; verenganyi 1 Vatesaronika 4:9.) Mukutevejera Erihu, hama no hambzaji jedu jakanasiririka kuti jitibesere kuti tienderere mberi takagondeka patinosongana no zvineso. (Mabasa o Vapostori 14:22) Inga muezaniso, vonanyi kuti ungano yakabesera kudini hambzaji Dhiyana kuti vaenderere mberi vakavanga ku divi ro umwari, mwamuna wavo paakahwaja maningi. Ivona vakati: “Zvainga zvecinesa. Asi takakwanisa kuvona rudo no simba ra Jehovha pa mweji iji jainesa. Ungano yedu yakaita zviro zvakawanda kuti itibesere. Vaiviya kotivona, vaitifonera no kutikumbatira. Zviro izvi zvakatibesera kuti tikwanise kucungirira. Inini andicaikwanisa kufamba no karu. Ngo kudaro, hama no hambzaji jaiviya kotitora kuti tiende ku musongano no kocumaera pazvaikwanisika weya.” I makomborero kamare kuva divi ro mbhuri iyi ino rudo!

15. Ngenyi tingathemba kuti tinozokwanisa kucungirira zvineso zvese zvatinosongana nazvo?

¹⁵ Tese tinozosongana no zvineso. Asi inga zvotapera kuvona, atizokwanisi kucungirira zvineso izvi notiri tega. Inga ndi Baba vano rudo, Jehovha nguva jese ari kuvona zvineso zvatiri kusongana nazvo. Iyena ari phedo na itusu, anotipurukira no kutibesera. (Isaia 43:2) Tingathemba kuti tinozokwanisa kuhwisana no zvineso izvi ngokuti Jehovha anotipa zvese zvatinoda kuti ticungirire. Iyena anotipa cipo co kuita mukumbiro, Bhaibheri, zvokuha zvo umwari zvakawanda pomwe no hama no hambzaji kuti jitibesere pa nguva kwayo kamare.

16. Tingaitisa kudini kuti tienderere mberi tecitungamirihwa ndi Jehovha?

¹⁶ Tinobonga maningi ngo kuva na Baba vanotingwarira. “Mwoyo yedu inodakara nayena.” (Nduyo 33:21) Tingakhombija Jehovha kuti itusu tinobongesera ngo zvese zvaanotipa ngo kunasa kuzvishandisa. Tinodikana kuita divi redu kuti tivonese kuti tiri kwenderera mberi tecitungamirihwa ndi Jehovha. Ngo magama amweni, kudari tikaita zvese zvatinokwanisa kuti tizwire Jehovha no kuita zvakanaka mu mavonero ake, iyena anozoenderera mberi ecitingwarira.—1 Pedhru 3:12.