1. Ngenyi tinodakarira maningi vandhu vanosengerera?

 TESE tinodakarira maningi vandhu vanosengerera. Ngenyi? Ngokuti tinoreremeja maningi vandhu vanovetera zviro vacikanyangajwi. Tinodakara maningi vamweni pavanosengerera na itusu pikija patinonga taita ciri cese cakashata. Tinodakarazve mujiji wedu wo Bhaibheri akava anosengerera paya paanonga ecivangisira kuti ajije, kutendera no kushandisa zvinojijiswa ngo Bhaibheri. Kusiyapo zvese izvi, tinodakara maningi patinozwisisa kuti Jehovha Mwari anosengerera na itusu.—Varoma 2:4.

2. Mugariro japi jingaita kuti tinesehwe kuva vandhu vanosengerera?

² Pikija tinoreremeja maningi vandhu vanosengerera na itusu, nguva jimweni azvizivi kureruka kuti tive vandhu vanosengerera. Inga muezaniso, tinganesehwa maningi kuti tive vandhu vakagajana no vanosengerera patinonga tiri mu citaka tecifambisa karu, tovona karu jakawanda jakaima jecivetera, maningi-ningi paya pokuti tiri kukasika kuti tiite zvimweni. Tingatoguma pa kuva vandhu vacikasengereri vamweni pavanotinyangajisa. Nguva jimweni tingatovona kuti zvinonesa maningi kuvetera kukwanirisika ko cigondiso ca Jehovha co nyika imbza. Maidakarira kuengejera kusengerera kwenyu? Mu cijijo cino, tinozovona kuti kusengerera kunorevenyi, ngenyi ikona kunosisira. Tinozovonazve zviro zvingatibesera kuti tiengejere kusengerera kwedu.

3. Mundhu anosengerera anoitenyi paanonga ecishohwa?

³ Vonanyi njira murongomuna jatingakhombija ndijona kusengerera. Yokutanga, mundhu anosengerera anononoka kunyangajwa. Iyena anoeja kuva wakagajana nee aatohwirijiri paanonga ecishohwa. Gama rokuti “anononoka kunyangajwa” rinowanika pa vhaza yokutanga mu Bhaibheri paya pokuti Jehovha anosananguhwa inga “Mwari anounyaxa no usizi, anononoka kuceneka, wakazara ngo rudo no ugondeki.”—Exodo 34:6.

4. Mundhu anosengerera anoitenyi paanonga ecivetera kuti ciri cese ciitike?

 ⁴ Yocipiri, mundhu anosengerera anovetera naakagajana. Kudari ciro cikatora mukuvo wakareba maningi kupinda waivetehwa kuti icona ciitike, mundhu anosengerera anoeja kutama kunyangajwa ndizvona. (Mateu 18:26, 27) Kuno mugariro jakawanda maningi jingatodikana kuti tive tinosengerera takagajana. Inga muezaniso, tinodikana kuvetera no kusengerera kwese umweni paanonga ecivereketa, ticikamuphingaiji. (Jobe 36:2) Tingatodikanazve kuvetera no kusengerera kwese kuti azwisise zvinojijiswa ngo Bhaibheri kana asiye kuita zviro zvakashata zvaiita kuvhira kare.

5. Ngoyapi njira imweni yokukhombija kusengerera?

⁵ Yocitatu, mundhu anosengerera aaiti zviro ngo kukasika acizivi kunasa kurangarira. Ndizvona kuti nguva jimweni tingatodikana kuita zviro ngo kukasika. Asi kudari mundhu anosengerera anoda kuita basa rinosisira maningi, iyena aazoriiti ngo kukasika nee aazoriiti ngo hasha kuti akasike kuripeja. Kusiyapo zvondhozvo, anopsaka nguva inokwana kuti arangarijisise manera aanozozviita. Perapo, woita mukuzwirana no zviya zvaapera kuronga.

6. Ngozvapi zvinoithwa ngo mundhu anosengerera paanonga ecisongana no zvineso?

⁶ Yocirongomuna, mundhu anosengerera anoeja kuhwisana no zvineso acikang’ung’uti. Izvi zvinovonesa kuti kusengerera kwakabatana no kucungirira. Azvizivi kushata kuvhunja shamwari yedu manera atiri kujizwa ngo pamusoro po zvineso zvatiri kusongana nazvo. Cimwenizve, mundhu anosengerera anorangariravo zviro zvaushoni zviri kuitika mu upenyu hwake paanonga eciita zvese zvaanokwanisa kuti aenderere mberi ecishandira Jehovha akadakara. (Vakorose 1:11) Inga Makristu tinodikana kusengerera pa mugariro jese iji. Ngenyi? Ngatende tivone mathangwe manganani.

7. Mukuzwirana na Jakobo 5:7, 8, ngenyi kusengerera kunosisira? (Vonanyi foto.)

⁷ Kusengerera kunosisira maningi kuti tiponeswe. Inga vashandiri vakagondeka va Jehovha vokare, tinodikana kuvetera no kusengerera kwese kuti Jehovha akwanirise zvigondiso zvake. (Vahebheru 6:11, 12) Bhaibheri rinoezanisa mugariro wedu no wo murimi. (Verenganyi Jakobo 5:7, 8.) Murimi anoshanda ngo simba kuti asime no kudirijira zvirimwa zvake, asi iyena aanasi kuziva kuti zvinozokura rini. Ngo kudaro, iyena anovetera no kusengerera kwese kuti anozokotora zvaakasima. Mukuezanavo, itusu tinoshanda ngo simba inga vateveri va Jesu pikija ticikazivi “njiku yaanozoviya Mambo [wedu].” (Mateu 24:42) Tinovetera no kusengerera kwese tecivetera kuti pa nguva kwayo, Jehovha anozokwanirisa zvese zvaakagondesa. Kudari tikatama kusengerera, kangaije tingatoremba pakuvetera kwatiri kuita, zvoita kuti padoko ngo padoko totanga kusiya Jehovha. Tingatobatikanavo pa zviro zvingatiita kuti tidakare wari uno. Kudari tikava vandhu vanosengerera tinokwanisa kucungirira mbhera kumagumo, togumira pa kuponeswa.—Mikeya 7:7; Mateu 24:13.

8. Kusengerera kunotibesera kudini kuti tive no ushamwari hwaushoni no vamweni? (Vakorose 3:12, 13)

⁸ Tinodikana kuva vandhu vanosengerera kuti tive no ushamwari hwaushoni no vamweni. Ikona kunotibesera kuti tinase kupurukira vamweni pavanonga vecivereketa. (Jakobo 1:19) Kusengerera kunotibeserazve kuti tiite runyararo. Kudari itusu tiri vandhu vanosengerera, atizokasiki kuita zviri zvese kana kunanga zviro patinongaya takanyangajwa. Cimwenizve, atizokasiki kudavira vamweni pavanotinyangajisa. Kusiyapo zvondhozvo, tinozoenderera mberi ‘tecicungirirana ngocedu no kuregererana ngo mwoyo wese.’—Verenganyi Vakorose 3:12, 13.

9. Kusengerera kunozotibesera kudini patinoda kutema zvivaringo? (Mazwi Akangwara 21:5)

⁹ Kusengerera kunotibeserazve kuti titeme zvivaringo zvaushoni. Kusiyapo kutema civaringo ngo kukasika, tinozopsaka nguva kuti tipsakisise no kunasa kusotesesa civaringo catinodaro kutema. (Verenganyi Mazwi Akangwara 21:5.) Inga muezaniso, kudari tiri kupsaka basa, aticaizotendera basa riri rese rataizowana kudari irona raizoita kuti tiruze musongano no kutama kwenda mu basa ro kucumaera. Kudari tiri mundhu anosengerera, tinozopsaka nguva kuti tinase kurangarijisisa zvese zvinobatanijwa pa basero, manera arinozopsasa mbhuri yedu pomwe no ushamwari hwedu na Jehovha. Ngo kuva mundhu anosengerera, tinozotema zvivaringo zvaushoni.

10. Mukristu angaitisa kudini kuti aenderere mberi ecisengerera?

¹⁰ Itanyi mukumbiro kuti muve mundhu anosengerera. Kusengerera imucero wo mujimu mucena. (Vagaratiya 5:22, 23) Ngo kudaro, tingakumbira mujimu mucena no kukumbirazve kuti Jehovha atibesere kusakurira mugariro uwu. Kudari tiri pa mugariro unoeja kusengerera kwedu, tinodikana ‘kwenderera mberi tecikumbira’ mujimu mucena kuti utibesere pa kuva vandhu vanosengerera. (Ruka 11:9, 13) Tingakumbirazve Jehovha kuti atibesere kuvona zviro manera iyena anozvivona. Patinopera kuita mukumbiro, tinodikana kuita zvese zvatinokwanisa kuti tive vandhu vanosengerera pa njiku imwe nga imwe. Patinoenderera mberi tecikumbira kuti tive vandhu vanosengerera no kuvangisira pakuzviita, mugariro uwu unozobara muji mu mwoyo mwedu wogumira pa kuva divi ro undhu hwedu.

11-12. Jehovha ari kukhombijisa kudini kusengerera?

¹¹ Rangarijisisanyi ngo muezaniso jo mu  Bhaibheri. Bhaibheri rino muezaniso jakawanda maningi jo vandhu vakasengerera. Ngo kurangarijisisa ngo muezaniso iji, tingajija njira jakawanda jo kukhombija mugariro uwu. Asi ticito tavona muezaniso iji, ngatende tibhuisane ngo muezaniso wo mundhu mukuru anotatija mugariro uwu, Jehovha.

¹² Mu munda wo Edheni, Sathana wakashora zina ra Jehovha no kunanga kuti iyena asipi Mutongi ano rudo no wakarurama. Kusiyapo kukasika kuparaja Sathana, Jehovha wakakhombija kusengerera no kujibata, eciziva kuti zvaizotora nguva kuti avonese kuti utongi hwake hwakanaka maningi. Paanongari ecivetera, iyena ari kucungirira kushohwa kwese kuri kuithwari zina rake. Mukuengejera, Jehovha paanongari ecivetera, ari kuita kuti vandhu vakawanda vakwanise kuwana upenyu ucikaperi. (2 Pedhru 3:9, 15) Inga muviyo, zviuru no zviuru zvo vandhu zviri kuguma pa kuziva Jehovha. Tikambhera ngo kubatikana pa muviyo jinovepo ngo kusengerera kwa Jehovha, zvinozotirerukira maningi kuvetera mukuvo waanozoparaja nyika ino.

13. Jesu wakakhombijisa kudini kuti waitevejera kusengerera ka Baba wake? (Vonanyi foto.)

¹³ Jesu wakanasa kutevejera kusengerera kwa Baba wake no kunasa kuukhombija paainga pasi pano. Zvainga zvicizivi kureruka mukuvo wese kuti Jesu akhombije kuva mundhu anosengerera, maningi-ningi paya paaidikana kuhwisana no vatari pomwe no Vafarisi. (Johani 8:25-27) Asi inga ndi Baba wake, Jesu wainonoka kunyangajwa. Iyena aacaihwirijira, pikija paaitukwa kana kushohwa. (1 Pedhru 2:23) Jesu wakacungirira no kusengerera kwese acikang’ung’uti. Izvo ngo zvinoitisa kuti Bhaibheri ritivhunje kudari: “Rangariranyi ngo pamusoro pa wiya wakacungirira masoko akashata, masoko awo aiverekethwa ngo vashaishi vecitozvishaishira.” (Vahebheru 12:2, 3) Ngo besero ra Jehovha, tingakwanisavo  kucungirira no kusengerera zvineso zviri zvese zvatingasongana nazvo.

14. Tinojijenyi ngo kusengerera ka Abhirahama? (Vahebheru 6:15) (Vonanyi foto.)

¹⁴ Vazinji vedu taivetera kuti mugumo wo nyika ino waizoguma kare kamare. Asi mbhera wari, apana caitika. Tingatotanga kurangarira kuti atizokwanisi kuvona mugumo weciitika. Waro ngozvapi zvinozotibesera kuti tienderere mberi tecivetera no kusengerera? Vonanyi muezaniso wa Abhirahama. Abhirahama paainga no makore anokwana kuita 75 acina mwana, Jehovha wakamugondesa kudari: “Ndinozoita kuti uve jinja guru.” (Genesi 12:1-4) Kunanga kuti Abhirahama wakavona kukwanirisika ko cigondiso ici? Hina, asi aazivi kuvona kukwanirisika ko zvese. Pakupera kuambuka Murambo Eufrati no kuvetera makore anokwana kuita 25, iyena wakavona kubahwa ko mwana wake Izaki. Tevere no papera makore anokwana kuita 60 izvi nozvaitika, iyena wakavona kubahwa ko vazukuru vake, Izau na Jakobe. (Verenganyi Vahebheru 6:15.) Asi Abhirahama aazivi kuvona mubarihwana wake weciva jinja guru no kugara mu Nyika Yakagondeswa. Mwanarume uwu wakagondeka wakava no ushwamwari wo phedo no Musiki wake. (Jakobo 2:23) Abhirahama paanozomuswa, anozodakara maningi ngo kuziva kuti rutendo hwake no kusengerera kwake, kwakaita kuti majinja ese akomborehwe. (Genesi 22:18) Tinojijenyi? Zvingaita kuti itusu atizovoni kukwanirisika ko zvigondiso zvese zva Jehovha wari uno. Asi kudari tikava vandhu vanosengerera inga ndi Abhirahama, tingava no cokwadi co kuti Jehovha anozotikomborera wari no kuzotikomborerazve maningi mu nyika imbza yaanotigondesa.—Marko 10:29, 30.

15. Ngowapi urongwa watingaita pa jijo yedu yo mundhu ega?

 ¹⁵ Bhaibheri rino muezaniso jakawanda maningi jo vandhu vamweni vakakhombija kusengerera. (Jakobo 5:10) Ngenyi amuiti urongwa wo kujija ngo pamusoro po muezaniso iji? b Inga muezaniso, pikija Dhavhidhi wakagajwa kuti ave mambo paainga cimujaha kamare iyena wakadikana kuvetera makore akawanda kuti atange kutonga. Simiyoni na muporofitakaji Ana vakanamata Jehovha vakagondeka pavainga vecivetera Mesiya wakagondeswa. (Ruka 2:25, 36-38) Pamunonga mecijija ngo pamusoro po vandhu ava, psakanyi mupinguro jo muvhunjo jinoteverari: Ngozvapi zvakabesera mundhu uwu kuti akhombije kusengerera? Kusengerera kwakamubeseresa kudini? Inini ndingamutevejeresa kudini? Mungatobeserekavo ngo kujija muezaniso jo vandhu vamweni vacizivi kukhombija kusengerera. (1 Samueli 13:8-14) Pamunonga meciita zvondhozvo, jivhunjisenyi kudari: ‘Zvicinyi zvakaita kuti ivona vagume pa kuva vandhu vacikasengereri? Ngojapi muviyo jovakava najo?’

16. Ngojapi muviyo munganani jatingava najo ngo kuva kwedu vandhu vanosengerera?

¹⁶ Vonanyi muviyo jinovepo ngo kuva kwenyu mundhu anosengerera. Patinova vandhu vanosengerera, itusu tinodakara no kugajana. Kusengerera kunotibeserazve kuti tive no uhomi hwaushoni. Patinova vandhu vanosengerera, tinova no shamwari jaushoni. Ungano yedu inova yakabatana. Kudari ari wese akatishora, tinozononoka kunyangajwa no kuita kuti zviro zvitame kunyanyisa. (Nduyo 37:8; Mazwi Akangwara 14:29) Cinosisira maningi pa zvese, patinova vandhu vanosengerera, tinonga tecitevejera Baba wedu vo kudenga, togumira pa kuva no ushamwari wo phedo navo.

17. Tinodikana kutema civaringo co kuitenyi?

¹⁷ Pacina kukana-kana, kusengerera imugariro unodakajisa maningi unobesera itusu tese. Pikija azvizivi kureruka mukuvo wese kuva vandhu vanosengerera, ngo besero ra Jehovha tinozokwanisa kwenderera mberi tecikhombija mugariro uwu. Cimwenizve, patinonga tecivetera no kusengerera kwese nyika imbza yakagondeswa, tingathemba kuti “jiso ra Tenji Mwari riri panyezuru pa vaya vanomuthya, panyezuru pa vaya vanovetera rudo hwake.” (Nduyo 33:18) Tese ngatiteme civaringo co kwenderera mberi tecitatijirana kusengerera.