MUSORO WO KUJIJA WO 34
Jijanyi ngo Zviporofita zvo Bhaibheri
“Vaya vano zivo vanozozwisisa.”—DHANYERI 12:10.
NDUMBO 98 Matahwa Ese —Akafemehwa ndi Mwari
ZVATICAJIJA a
1. Zvicinyi zvinozomubesera kudakarira kujija zviporofita zvo Bhaibheri?
MUJAHA umweni anodanwa Bheni wakati: “Ndinodakarira maningi kujija zviporofita zvo Bhaibheri.” Munotenderana no zvaakanangari? Kana munorangarira kuti kujija zviporofita zvo Bhaibheri kunonesa maningi? Zvingaita kuti munorangarira kuti kujija ngo pamusoro po shwiro jakadari akudakajisi. Asi pamunozwisisa kuti ngenyi Jehovha wakaita kuti zviporofita izvi zviwanike mu Soko rake, mungacinja manera enyu okurangarira.
2. Ngozvapi zvatinozovona mu cijijo ici?
2 Mu cijijo cino, tinozovona kuti ngenyi tinodikana kujija maningi ngo pamusoro po zviporofita zvo Bhaibheri no kuvonazve kuti tingazviitisa kudini mu njira yaushoni. Tinozojijavo ngo zviporofita zviviri zvinowanika mu bhuku ra Dhanyeri no kuvona kuti kuitisa kudini kuzwisisa zviporofita izvi kunozotibesera kuvhira wari kamare.
NGENYI TINODIKANA KUJIJA ZVIPOROFITA ZVO BHAIBHERI?
3. Zvicinyi zvatinodikana kuita kudari tecida kuzwisisa zviporofita zvo Bhaibheri?
3 Kudari tecida kuzwisisa zviporofita zvo Bhaibheri tinodikana kubesehwa ngo ari wese. Vonanyi muezaniso uwu basi. Ngatiti imwimwi muri kwenda kovhakacira ndau yokuti amuzivi kumboendeyozve, asi maenda no shamwari inonasa kuziva ndau iyi. Iyona inonasa kuziva pamuri waro no kuziva kuti gwanja ramuri kufambaro rinomuendesa kwapi. Zvokadi kamare, kuva no shamwari inoziva pamuri waro zvinobesera maningi. Mu njira yakafanana, Jehovha wakadari inga shamwari iyi. Iyena anonasa kuziva mukuvo watiri, tikasotesesa zviporofita zvo Bhaibheri. Ngo kudaro, kudari tecida kuzwisisa zviporofita zvo Bhaibheri tinodikana kuva vandhu vanojidodokesa topsaka besero ra Jehovha.—Dhanyeri 2:28; 2 Pedhru 1:19, 20.
Kujija zviporofita zvo Bhaibheri kungatibesera pa zviro zvinozoitika kumbejiyo (Vonanyi ndima 4)
4. Ngenyi Jehovha wakaita kuti zviporofita zvitahwe mu Bhaibheri? (Jeremia 29:11) (Vonanyi foto.)
4 Inga vabari vanoda kuti vana vavo vagare ushoni, Jehovha anoda kuti vana vake vave no kumbeji kunodakajisa. (Verenganyi Jeremia 29:11.) Asi mukusiyana no vabari vo vandhu, Jehovha anonasa kuziva zvinozoitika kumbejiyo. Zvaanonanga mukuvo wese ndizvonadi, izvo ngo zvakamuitisa kuti atarise zviporofita mu Bhaibheri. Ngo kudaro, tingakwanisa kuziva nguva iciripo zvinozoitika kumbeji. (Isaia 46:10) Kunasa kunanga zviporofita izvi, izvipo zvinovha kuna Jehovha kwatiri. Waro tingava kudini no cokwadi co kuti zviporofita zvo Bhaibheri zvinozokwanirisikadi?
5. Majaha angajijenyi ngo muezaniso wa hama Maki?
5 Ku cikora majaha ari Zvapupu akatendenejwa ngo vandhu vacikareremeji Bhaibheri. Zvinonangwa no kuithwa ngo vandhu ava, zvingaita kuti majaha o Cikristu atange kukana-kana. Vonanyi zvakaitika no hama imweni iri mujaha inozwi Maki. Iyona yakati: “Pandainga ndiciri ku cikora ndakatanga kukana-kana dangani vabari vangu vainga vecindijijisa ciyara cokadi kana kuti Bhaibheri raingadi rakafemehwa ndi Mwari.” Vabari vo hama iyi vakaitenyi? Iyona yakati: “Ivona vakaramba vakagajana, asi ngo mukati ndaizviziva kuti vainga vecineseka.” Vabari va hama Maki vakadavira muvhunjo jese javainga najo ngo pamusoro po Bhaibheri. Hama Maki vakaitavo divi ravo. Ivona vakati: “Ndakajija zviporofita zvo Bhaibheri, ndovhunjavo vamweni zvandainga ndecijija.” Ngowapi wakava muviyo wakona? Hama Maki vakati: “Pakupera ko zvese izvi, ndakavadi no cokwadi cokuti Bhaibheri raingadi rakafemehwa ndi Mwari.”
6. Ngozvapi zvamunodikana kuita mukatanga kukana-kana, ngenyi?
6 Inga ndi hama Maki, kudari mukatanga kukana-kana kuti zvinojijiswa ngo Bhaibheri ngo zvokadi kana kuti haiwa, mucajipa ndava. Munodikana kuita zviri zvese. Ngenyi? Ngokuti kukana-kana kwakadari inga furujhu. Tikatama kungwarira, padoko ngo padoko furujhu ingakhuvaza ciro cinosisira maningi. Kuti muvhise “furujhu” kana kukana-kana kungakhuvaza rutendo hwenyu, munodikana kujivhunjisa kudari: ‘Ndinotendadi kamare zvinonanga Bhaibheri ngo pamusoro po kumbeji?’ Kudari amuna cokwadi ngo pamusoro pazvo, munodikana kujija zviporofita zvo Bhaibheri zvakakwanirisika. Mungazviitisa kudini izvi?
MUNGAITISA KUDINI KUTI MUJIJE ZVIPOROFITA ZVO BHAIBHERI?
Inga ndi Dhanyeri kuti tikwanise kuthemba Jehovha, tinodikana kujija zviporofita zvo Bhaibheri ngo kuzvidodokesa, ngo kunasa kungwarira pomwe no kuzviita ngo thangwe raushoni (Vonanyi ndima 7)
7. Dhanyeri wakagaja muezaniso wapi ngo pamusoro po kujija zviporofita zvo Bhaibheri? (Dhanyeri 12:10) (Vonanyi foto.)
7 Dhanyeri wakagaja muezaniso waushoni ngo pamusoro po kujija zviporofita zvo Bhaibheri. Iyena waijija zviporofita zvo Bhaibheri no cinangwa caushoni, waida kuziva cokwadi. Cimwenizve, iyena waijidodokesa, wainasa kuziva kuti Jehovha waizomubesera kuti azwisise zviporofita kudari akaramba ari phedo naye no kuzwira mutemo jake. (Dhanyeri 2:27, 28; verenganyi Dhanyeri 12:10.) Dhanyeri waikhombija kuti waijidodokesadi ngo kuthemba besero raivha kuna Jehovha. (Dhanyeri 2:18) Kusiyapo zvondhozvo, iyena wainasa kungwarira paainga ecijija. Wainasa kupsakisisa mativi o Bhaibheri aiwanika pa mukuvo wondhowo. (Jeremia 25:11, 12; Dhanyeri 9:2) Tingatevejeresa kudini muezaniso wa Dhanyeri?
8. Ngenyi vamweni vanoramba kutenda zviporofita zvo Bhaibheri, asi ngozvapi zvatinodikana kuita?
8 Jijanyi no cinangwa caushoni. Munojija zviporofita zvo Bhaibheri ngokuti munoda kuziva zvokadi here? Kudari ndizvona, Jehovha anozomubesera. (Johani 4:23, 24; 14:16, 17) Waro ngenyi vamweni vanojija zviporofita no cinangwa cimweni? Ngokuti vanoda kuvonesa kuti Bhaibheri arizivi kufemehwa ndi Mwari. Kwavari, kudari Bhaibheri asipi ra Mwari, ivona avadikani kutevera zvarinonanga nokutizve vanodikana kujikhetera pacavo zvakanaka no zvakashata. Ngo iyo ndava, tinodikana kujija Bhaibheri no cinangwa caushoni. Ngowapi mugariro watinodikana kuva nawo patinojija zviporofita zvo Bhaibheri?
9. Ngowapi mugariro watinodikana kuva nawo kudari tecida kuzwisisa zviporofita zvo Bhaibheri? Sananguranyi.
9 Ivanyi anojidodokesa. Jehovha anobesera vaya vanojidodokesa. (Jakobo 4:6) Ngo kudaro, tinodikana kuita mukumbiro kuna Jehovha tecikumbira besero kuti tizwisise zviporofita zvo Bhaibheri. Tinodikanavo kuva vandhu vanojidodokesa kuti titendere besero ratinopuwa ngo muranda wakagondeka no wakangwara, uwo unoshandiswa ndi Jehovha kuti utipe zvokuha zvo umwari pa nguva kwayo. (Ruka 12:42) Jehovha ndi Mwari wakarongeka, ngo iyo ndava tinonasa kuzwisisa kuti ngenyi iyena anoshandisa njira imwe kuti atibesere kuzwisisa zviporofita zvo Bhaibheri.—1 Vakorinte 14:33; Vaefeso 4:4-6.
10. Majijenyi ngo muezaniso wa Esteri?
10 Nasanyi kungwarira pamunonga mecijija. Psakanyi ciporofita camunodakarira, perapo mopsakisisa ngo pamusoro paco. Ndizvona zvakaithwa ngo hambzaji imweni inodanwa Esteri. Iyona yaida kuziva zvizinji ngo pamusoro po zviporofita zvinobhuya ngo pamusoro pa Mesiya. Iyona yakati: “Pandainga no gumi na mashanu o makore ndaida kuva no cokwadi cokuti zviporofita ngo pamusoro pa Jesu zvakatahwa iyena acito abahwa. Ngo kudaro ndakatanga kupsakisisa.” Poyaijija ngo pamusoro po Muphukutu jo Mar Morto, yakavona kuti ijona jainga jakatahwa kare kamare Jesu acito abahwa. Iyona yakanangazve kudari: “Ndakazwisisa kuti zviporofita izvi zvakafemehwa ndi Mwari. Ndizvona kuti ndakadikana kuverenga shwiroyo ko vhaza jakawanda kuti ndinase kuzvizwisisa.” Wari iyona ino cokwadi cokuti zvinonanga Bhaibheri ngozvokadi. Esteri paakapera kujija zviporofita zvizinji zvo Bhaibheri, wakadakara maningi ngo kuziva kuti kuvangisira kwese kwaakaitari kwakabesera.
11. Ngenyi zvinosisira maningi kujikhohwesa pacedu kuti Bhaibheri ngo rokadi?
11 Patinovona zviporofita zvimweni zvecikwanirisika, zvinoita kuti tithembe maningi Jehovha no kuthembavo ndhungamiriro jaanotipa. Kusiyapo zvondhozvo, zviporofita zvo Bhaibheri zvinotibesera kuti tibatikane maningi pa vetero yedu yo kumbeji, pikija tinonga tecisongana no zvineso wari uno. Ngatende tivone zviporofita zviviri zvakanangwa ndi Dhanyeri no kuvona manera azviri kukwanirisika. Kuzwisisa zviporofita izvi kungatibesera kuti titeme zvivaringo zvaushoni.
NGENYI MUNODIKANA KUZIVA NGO PAMUSORO PO SOKA JO SIMBI JAKAVHENGWA NO DONGO?
12. Soka jo ‘simbi jainga jakavhengana no dongo’ jinoimirirenyi? (Dhanyeri 2:41-43)
12 Verenganyi Dhanyeri 2:41-43. Mu hope jakadurujira Dhanyeri kuna mambo Nebhukadhinezari, soka jo cithombi jainga jo simbi “yakavhengana no dongo.” Patinoezanisa ciporofita ici no zvimweni zvatinowana mu bhuku ra Dhanyeri na Apokaripsi, tingaguma pambhejiso yokuti soka jo cithombi jinoimirira Utongi wo Nyika Yese wo Angro Amerikana, utongi uri kutonga nyamasi uno. Ecibhuya ngo utongi uhu, Dhanyeri wakati: ‘Waizova no divi rimwe rakavanga, divi rimweni rakaremba.’ Ngenyi divi rimweni raizova rakaremba? Ngokuti vandhu vanotongwa ngo umambo uhu vanoezanisihwa no dongo, vanovhiringija utongi uhu zvoita kuti ukonehwe kuvonesa simba rahwo rakaezana no simbi. b
13. Zvokadi zvapi zvinosisira zvotajija kuvha ku ciporofita ici?
13 Tingajija zvokadi zvinosisira kuvha ku cithombi cakanangwari ndi Dhanyeri, maningi-ningi ngo soka jo cithombi ici. Pakutanga, tajija kuti Utongi wo Nyika Yese wo Angro Amerikana uri kuvonesa simba rahwo mbhera pakati kuti. Inga muezaniso, Estadhus Unidhus no Grabhetanya ndi jimwe jo nyika jakawina pa Hondo Yokutanga no Yocipiri yo Nyika Jese. Asi utongi uhu uri kuva wakaremba, zviri kuvonekazve kuti zviro zvinondoenderera mberi zvakadaro. Ngokuti vandhu vari kuva vakaparajana ngocavo nee avatoripi kudakara ngo manera avari kutongwaro. Tevere, tajijazve kuti utongi uhu ndiwona wokupejisira Umambo hwa Mwari ucito watonga no kuparaja majimambo ese ari pasi pano. Pikija nyika jimweni jiri kueja kutora ndau yo utongi uhu, ajizokwanisi. Ngokuti umambo uhu unozoparajwa basi ngo Umambo hwa Mwari, uwo unoimirihwa ngo “buwe” rinozocangaja soka jo cithombi, ijo jinoimirira utongi wo Angro Amerikana.—Dhanyeri 2:34, 35, 44, 45.
14. Mu njira yapi kuzwisisa ciporofita ngo pamusoro po soka jo simbi jakavhengana no dongo kunotibesera kuti titeme zvivaringo zvaushoni?
14 Muno cokwadi cokuti ciporofita ca Dhanyeri ngo pamusoro po soka jo simbi no dongo ciri kukwanirisika? Kudari muno cokwadi nazvo, zvinozomubesera maningi pa manera amunopona. Amuzopeji nguva yakawanda mecipsaka zviro zvokunyama kana kutoeja kupsaka kuva no zviro zvakawanda, ngokuti munonga mecizviziva kuti nyika ino, inopera sambiri pano. (Ruka 12:16-21; 1 Johani 2:15-17) Kuzwisisa ciporofita ici kunozomubesera kuti muvone basa ro kucumaera no ro kujijisa kuva rinosisira maningi. (Mateu 6:33; 28:18-20) Pakupera kujija ciporofita ici, jivhunjisenyi kudari: ‘Zvivaringo zvandinotema zvinovonesa kuti ndino cokwadi cokuti Umambo hwa Mwari unozoparaja utongi hwese hwo vandhu?’
NGENYI TINODIKANA KUZIVA NGO PAMUSORO PA “MAMBO WO KANJIKAZI” NA “MAMBO WO KAKUSI?”
15. Ndiyani “mambo wo kanjikazi” na “mambo wo kakusi” nyamasi uno? (Dhanyeri 11:40)
15 Verenganyi Dhanyeri 11:40. Dhanyeri cipauko 11 cinobhuya ngo pamusoro po majimambo maviri, anohwisana ngocawo ngo ndava yo utongi. Tikambhera ngo kuezanisa ciporofita ici no zvimweni zvinowanika mu Bhaibheri, tinokwanisa kuvona kuti “mambo wo kanjikazi” ndi Rusiya no vabeseri vayo kuveni “mambo wo kakusi” ndi Utongi wo Nyika Yese wo Angro Amerikana. c
Kuziva kuti kuhwisana kuri kuita “mambo wo kanjikazi” na “mambo wo kakusi” kuri kukwanirisa zviporofita zvo Bhaibheri, kunovangisa rutendo hwedu no kutibesera kuti tive takagajana (Vonanyi ndima 16-18)
16. “Mambo wo kanjikazi” ari kutajisa kudini vandhu va Jehovha nyamasi uno?
16 Vandhu va Jehovha vari kupona mu nyika jiri kutongwa ndi “mambo wo kanjikazi” vari kusongana no kuteverehwa kwakakura maningi. Hama no hambzaji jimweni jiri kutakwa no kudihwa mu kadheya ngo ndava yo rutendo hwajo. Kunja ko kuthyisijira hama no hambzaji jedu, kuteverehwa uku kuri kuvangisa rutendo hwavo. Ngenyi? Ngokuti ivona vanozviziva kuti zviri kuitikari zviri kukwanirisa ciporofita cakanangwa ndi Dhanyeri. d (Dhanyeri 11:41) Kuziva kwedu izvi, kungatibesera kuti tivangise vetero yedu yo kumbeji no kubeserazve kuti tikwanise kwenderera mberi takagondeka kuna Jehovha.
17. Zvineso zvapi zviri kusongana no vandhu va Jehovha vari kutongwa ndi “mambo wo kakusi”?
17 Kare “mambo wo kakusi” wakatevereravo maningi vandhu va Jehovha. Inga muezaniso, kutangira mu gore ra 1900 mbhera 1950, hama jakawanda jakasungwa, vana vamweni vo Zvapupu vakagogomehwa ku cikora ngo ndava yo kuva kwavo vacina kwavakapeamira. Asi mu makore ano, vandhu va Jehovha vari kupona mu nyika jiri kutongwa ndi mambo wo kakusi, vari kuejwa kogondeka kwavo kuna Jehovha ngo njira jimweni. Inga muezaniso, pa mukuvo unonga weciithwa vhoto, Mukristu angatoda kubesera paritidhu iri yese kana mundhu ari wese. Ndizvona kuti aazoendi kovhota, asi ngo mu mwoyo anonga asana mundhu ari wese waaida. Ngo iyo ndava, tinodikana kungwarira maningi zviro zvatinorangarira.—Johani 15:18, 19; 18:36.
18. Tinovona kudini kuhwisana kuri kuitari “mambo wo kanjikazi” na “mambo wo kakusi”? (Vonanyi foto.)
18 Vandhu vacikatendi zviporofita zvo Bhaibheri vangathimwa-thimwa maningi pavanovona “mambo wo kanjikazi” na “mambo wo kakusi,” “vecigwandhana.” (Dhanyeri 11:40) Majimambo maviri aya ano nvuti jakakura jinokwana kuuraya vandhu vese vari mu nyika. Asi tinoziva kuti Jehovha aazotenderi kuti izvi zviitike. (Isaia 45:18) Itusu atigari tecineseka maningi ngo pamusoro po kumbeji, kuhwisana kuri kuithwari ndi “mambo wo kanjikazi” na “mambo wo kakusi” kunovangisa rutendo hwedu. Kunovonesa kuti nyika ino yaakumagumo kamare.
ENDERERANYI MBERI MECIJIJA ZVIPOROFITA ZVO BHAIBHERI
19. Ngozvapi zvatinodikana kuceukija ngo pamusoro po zviporofita zvo Bhaibheri?
19 Itusu atizvizivi kuti zviporofita zvimweni zvo Bhaibheri zvinozokwanirisika kudini? Nee muporofita Dhanyeri aacaizwisisa revo yo zviro zvese zvaaitara. (Dhanyeri 12:8, 9) Asi kutama kuziva manera anozokwanirisika ciporofita ciri cese, azvirevi kuti icona acizokwanirisiki. Ngative no cokwadi cokuti Jehovha anozotibesera kuti tinase kuzwisisa zvese zvatinodikana kuziva pa nguva kwayo kamare inga manera aakaita mu nguva yokare.—Amosi 3:7.
20. Zviporofita zvapi zvinoshamaisa zvinozokwanirisika sambiri pano, ngozvapi zvatinodikana kwenderera mberi teciita?
20 Sambiri pano ciziviso co kuti “tiri kugara mu runyararo ticina ngozi iri yese” cinozoithwa. (1 Vatesaronika 5:3) Tevere, utongi hwo nyika ino unozohwisana ngocawo woparaja mukuperera ciyara cokunyepa. (Apokaripsi 17:16, 17) Ivona vanozohwisa vandhu va Mwari. (Ezekieli 38:18, 19) Zviitiko zvese izvi zvinozoita kuti Armagedhoni itange. (Apokaripsi 16:14, 16) Ngative no cokwadi cokuti zvese izvi zvinozokwanirisika sambiri pano. Mbhera izvi zviitike, ngatienderere mberi tecivonesa kubongesera kwedu kuna Jehovha ngo kunasa kujija zviporofita zvo Bhaibheri no kubesera vamweni kuti vaitevo zvakafanana.
NDUMBO 95 Kujeka Kuri Kuramba Kuciengejereka
a Mugariro wo nyika ino uri kwenderera mberi wecishatisisa, asi tingava no cokwadi cokuti sambiri pano zviro zvinozocinja. Tingava no kuthemba uku ngo kujija zviporofita zvo Bhaibheri. Mu cijijo cino, tinozovona mathangwe amweni anosisira, anoitisa kuti tide kujija zviporofita zvo Bhaibheri. Kusiyapo zvondhozvo, tinozovona zviporofita zviviri zvakatahwa ndi Dhanyeri no kuvona kuti ngenyi kuzvizwisisa kunozotibesera maningi.
b Vonanyi musoro unoti: “Jehovha Anonanga Zvinoitika ‘Sambiri Pano’,” mu Murindiri wa 15 ya Junho wo 2012, ndima 7-9, mu Cishona.
