Pa musoro uwu, takajija kuti kuno shwiro imwe inosisira maningi inopsasa vandhu vese pamwepo no ngirozi. Shwiro iyi ngo yo kuceneswa ko zina ra Jehovha. Shwiro yokuti utongi hwa Jehovha ndiwona wakanaka kana kuti haiwa, unobatanijwavo pa kuceneswa ko zina rake. Kuva kwedu takagondeka kunobatanijwavo pa shwiro iyi inosisira.

Ngenyi wari itusu tiri kugogomejera maningi shwiro yo zina ra Jehovha no kuceneswa kwaro? Ngatende tivone mathangwe matatu.

Rokutanga, Sathana wakahwisa zina ra Jehovha kana mugariro wake, mu munda wo Edheni. Muvhunjo wakaita Sathana kuna Evha waivonesa kuti Jehovha asipi mundhu anokova no kuvonesazve kuti ndhungamiriro yaakapa kuna Adhamu na Evha aaizivi kururama. Tevere Sathana wakananga zviro zvakasiyana no zvakanangwa ndi Jehovha. Ngo kuita izvi, wainga ecinanga kuti Jehovha ndi munyepi. Iyena wakareva zina ra Jehovha. Wakagumira pa kudanijwa “Dhiyabhu” zvinoreva “Murevi.” (Johani 8:44) Zvecivoneka kuti Evha wakatenda manyepo aya, iyena aazivi kuzwira Mwari, wopandukira ukuru-kuru hwake. (Genesi 3:1-6) Kuvhira njiku iyi, Sathana ari kwenderera mberi ecireva zina ra Mwari no kundhandhanisa manyepo ngo pamusoro pake. Vandhu vanotenda manyepo aya avaripivo kuzwira Jehovha. Asi kuno vandhu va Mwari kureviwa kuri kuithwari zina rakacena ra Jehovha izviro zvakashata maningi. Ndizvona zviri kuitisa kuti mu nyika muno muve no matambujiko akawanda kudari.

Rocipiri, kuti akwanise kubesera vandhu vese, Jehovha wakatema civaringo co kucenesa zina rake pa manyepo ese ari kunangwari. Izvi zvinosisira maningi kuna Jehovha. Iyena wakati: “Ndinozocenesa zina rangu rakakura.” (Ezekieli 36:23) Jesu wakajekesavo kuti ngocapi ciro cinosisira maningi cinodikana kuva pakutanga pa mukumbiro jinoithwa ngo vashandiri vakagondeka va Jehovha, paakati: “Zina renyu ngariceneswe.” (Mateu 6:9) Bhaibheri rinonanga ko vhaza jakawanda ngo pamusoro po kukujwa ko zina ra Jehovha. Vonanyi muezaniso munganani basi: “Ipanyi Tenji Mwari goja ro zina rake.” (1 Kronike 16:29; Nduyo 96:7b) “Imbiranyi goja ro zina rake.” (Nduyo 66:2) “Ndinozokuja zina renyu kucikaperi.” (Nduyo 86:12) Vhaza imwe Jehovha yaakavereketa naari mu gore, zvakaitikira mu themberi ku Jerusarema Jesu paakati: “Baba, kujanyi zina renyu.” Jehovha wakadavira kudari: “Ndakarikuja, ndinozorikujazve.”—Johani 12:28. a

Rocitatu, nguva jese cidisiso ca Jehovha cakabatana no zina rake. Vonanyi kuti zina ra Jehovha rinozosisira zvakadini pakupera ko muejo wokupejisira kumbhiri ko Ciuru co Makore co Kutonga ka Kristu. Vandhu vese pamwepo no ngirozi, vanozojizwa kudini ngo pamusoro po zina ra Jehovha? Kuti tidavire muvhunjo uwu, ngaticeukije zviro zviviri zvinobatanijwa pa kuceneswa ko zina ra Jehovha,  kugondeka ko vandhu no ukuru-kuru hwa Jehovha. Pa mukuvo uwu, kunanga kuti vandhu vanozodikanazve kuvonesa kuti ivona vakagondeka? Haiwa. Vese vanonga vakakwana. Cimwenizve vanonga vapera kuejwa mukuperera. Vanonga vapera kuashira upenyu ucikaperi. Pa mukuvo uwu, kunanga kuti panozovazve no dikano yo kuvonesa kuti utongi hwa Jehovha wakanaka? Haiwa. Vandhu vese mudenga no pasi vanonga vakabatana no kutendera kutongwa ndi Jehovha. Kunanga kuti zina ra Jehovha rinozoenderera mberi reciva rinosisira maningi kuno vandhu vake?

Pa mukuvo uwu, vandhu vanozoziva cokwadi ngo pamusoro pa Jehovha, zina rake rinonga rapera kuceneswa mukuperera. Asi rinozoenderera mberi reciva rinosisira ku vashandiri vake vese, mudenga no pasi pano. Ngenyi? Ngokuti ivona vanozoenderera mberi vecivona Jehovha eciita zviro zvinoshamaisa. Vonanyi basi: Ngo ndava yo kujidodokesa kwake, Jesu anozohwirija umambo kuna Jehovha, wozova “musoro wo zviro zvese.” (1 Vakorinte 15:28) Tevere, vandhu vese pa nyika pano vanozobusa “rusujunuko hukuru hwo vana va Mwari.” (Varoma 8:21) Mbhera apa, Jehovha anonga akwanirisa cidisiso cake co kuda kubatanija vandhu vake kumatenga no pasi pano kuti vave mbhuri imwe yakabatana.—Vaefeso 1:10.

Zvese izvi pazvinopera kuitika, mbhuri ya Jehovha kudenga no pasi pano, inozojizwa kudini? Zvokadi kamare, vanozoenderera mberi vano cido cakavanga co kuda kukuja zina ra Jehovha. Mutari wo nduyo Dhavhidhi wakafemehwa kutara kudari: “Ngaakomborehwe Tenji Mwari. . . . Zina rake ro goja rikomborehwe mbhera narini.” (Nduyo 72:18, 19) Tinozoenderera mberi tecipsaka manera mapsa no anodakajisa kuti tikuje zina ra Jehovha, kwenda no kwenda.

Zina ra Jehovha rinoimirira zvese zvaari. Maningi-ningi, rinoticeukija rudo hwake kwatiri. (1 Johani 4:8) Nguva jese tinozoceukija kuti Jehovha wakatisika ngo ndava yo rudo hwake, wakatipa muripo ngo ndava yo rudo hwake. Cimwenizve, wakakhombija ururami pa manera ake okutonga ngo ndava yo rudo hwake. Tinozoenderera mberi tecivona manera Jehovha anokhombija rudo hwake kwatiri mbhera narini. Tinozoendererazve mberi teciita zvese zvatinokwanisa kuti tive phedo na Baba wedu no kuvaimbira rukujo kuti tisimbe zina ravo, mbhera narini.—Nduyo 73:28.