• “Ndaijizwa inga kuti mwamunangu vaindicengeja ko vhaza jakawanda.”

• “Ndaijizwa ndakanyowejeka, ndakashata no ndicikasisiri.”

• “Andicaidikanepi kubhuya no ari wese ngo pamusoro pazvo. Ndaigara ndecitambujika no ndakanyarara.”

• “Ndaijizwa inga kuti Jehovha aacaindidepizve.”

Zvaperari kunangwa zvinokhombija kuti mwanakaji anotambujika maningi mwamunake paanovona zvoumitumitu. Kudari mwamunewo anozviita ngo cifishe-fishe ko mukuvo wakareba, zvingaita kuti mukajiwo atamezve kuthemba mwamunake. Mwanakaji umweni wakananga kudari: “Inini ndakajivhunjisa kuti: ‘Ndiyani mwanarume uwu wandakacadhari naye? Kureva kuti ari kundifishirazve zvimweni?’”

Musoro uwu wakanasirihwa kuitira mukaji wokuti mwamunake anovona zvoumitumitu. a Ngativone ndhungamiriro jo mu Bhaibheri jingabesera vakaji vari pamugariro uwu no kuvonazve kuti ndhungamiriro iji jinokhombijisa kudini kuti vakaji vanosisira maningi pamberi pa Jehovha. Ijona jinozobeserazve vakaji kuti vave no runyararo no kujizwa kuti vari phedo na Jehovha. b

Amungakwanisi kuvonerera zvese zvinoithwa no mwamunenyu, asi zviripo zvamungaita kuti muve no runyararo. Vonanyi muezaniso jinotevera.

Mucajipa ndava. Mwanakaji angarangarira kuti mwamunake ari kuvona zvoumitumitu ngo ndava jake. Hambzaji Dhaniyera c vakati: “Ndakanyangajwa maningi ndoviga bundu ndecirangarira kuti ndini ndaiitisaro kuti mugariro uwu uve wecinesa.” Hambzaji Arisi avacaijizwa inga vakaseja maningi kuno mwamunavo. Ivona vaijivhunjisa kuti: ‘Ngenyi ivona vanosota vanakaji vamweni?’

Kudari imwimwi mukajizwa kudaro, nasanyi kuziva kuti Jehovha aamupi ndava ngo zviito zvo mwamunenyu. Jakobo 1:14, inoti: “Asi umwe nga umwe anoejwa ngo kuemura kwake, perapo wotohwa mwoyo ngo cido cake.” (Varoma 14:12; Vafiripi 2:12) Kusiyapo kumupa ndava, Jehovha anoreremeja maningi kugondeka kwenyu.—2 Kronike 16:9.

Asi zvinosisiravo kuziva kuti kudari mwanarume  akavona zvoumitumitu azvirevi kuti mukajiwo aazivi kuseja. Vandhu vanojija ngo pamusoro po kuvona zvoumitumitu vanonanga kuti mundhu anovona zvoumitumitu anonga ano cido cakavanga zvokuti apana mwanakaji angakwanisa kugutisa cidoco.

Mucathimwa-thimwa maningi. Hambzaji Katarina vanogara vecirangarira mwamunavo vecivona zvoumitumitu. Hambzaji Fransiska vanoti: “Ndinothimwa-thimwa maningi ndikatama kuziva kuti mwamunangu vari kwapi, ndinopeja njiku yese ndicikazivi kugajana.” Vakaji vamweni vanonyowejeka maningi pavanonga vano hama no hambzaji jimweni jokuti kangaije vanoziva cineso cavo. Kuveni vamweni vanotojizwa vari vega ngo kuti vanorangarira kuti apana anouzwisisa mugariro wavo.

Azvizivi kushata kuva no mazwiro aya. Asi kubatikana pakurangarira maningi ngo pamusoro po mugarirowo zvinozomuita kuti muengejere kuthimwa-thimwa kwenyu, kusiyapo zvondhozvo, batikananyi pa ushamwari hwenyu na Jehovha. Inga muviyo munozova mundhu wakavanga.—Nduyo 62:3; Vaefeso 6:10.

Munozobeserekazve ngo kuverenga no kurangarijisisa muezaniso jo mu Bhaibheri jo vanakaji vakapsaka kuembezehwa ndi Jehovha ngo kuita mukumbiro. Asipi nguva jese Jehovha wakapeja zvineso zvavo asi iyena wakavapa runyararo wavaida. Inga muezaniso, Ana “wakacamwa” ngo ndava yo mugariro wake. “Paakavangirira kunamata pambeji pa Tenji Mwari, pikija acainasepi kuziva kuti mugariro wake waizoguma pakudini.”—1 Samueli 1:10, 12, 18; 2 Vakorinte 1:3, 4.

Psakanyi besero ku vakuru vo ungano. Ivona “vangava inga ndau yokutizira panoitika mbhepo inga ndau yokufindara panoitika dutu.” (Isaia 32:2) Zvingaita kuti vakuru vangamuvhunja ngo pamusoro po mukuru ari wese wamungaenda kobhuya naye kuti mukwanise kujizwa ushoni.—Mazwi Akangwara 17:17.

Kunanga kuti zviripo zvamungaita kuti mubesere mwamunenyu kuti vanyise cirovejeso ici cokuvona zvoumitumitu? Kangaije. Kazinji Bhaibheri parinobhuya ngo pamusoro po kunyisa cineso ciri cese cinonesa kana kunyisa muvengi wakavanga maningi, irona rinoti “zviri nane vaviri, kupinda umwe.” (Mucumaeri 4:9-12) Kupsakisisa kumweni kwakaithwa kwakavonesa kuti mukaji no mwamuna pavanoshanda vese zvinokwanisika kunyisa cirovejeso co kuvona zvoumitumitu no kukwanisazve kuthembana mu mucadho wavo.

Asi kuti izvi zvikwanisike zvinofira pa civaringo cinotemwa ngo mwamunenyu dangani anoda kuima kuvona zvoumitumitu kana kuti haiwa. Kunanga kuti mwamunenyu vanoita mukumbiro vecikumbira besero kuna Jehovha kuti vawane simba kuitira kunyisa cinesoco  kana kutokumbira besero ro vakuru? (2 Vakorinte 4:7; Jakobo 5:14, 15) Kunanga kuti mwamunenyu vari kueja kuita zviri zvese kuti vanyise cineso co kuvona zvoumitumitu? Inga muezaniso, ari kukwanisa kudira mugano pamanera aanoshandisa foni kana komputadhori nokutoeja kutiza mugariro jimweni jaizomudira pangozi yokuhwirirazve kovona zvoumitumitu? (Mazwi Akangwara 27:12) Kunanga kuti mwamunenyu anoda besero renyu no kubhuya cokwadi mukuvo wese? Kudari akaita zvondhozvo munozokwanisa kumubesera.

Mungazviitisa kudini? Vonanyi muezaniso uwu basi. Hambzaji Ferisiya vakarovohwa ndi hama Etani vakananga kuti mwamunavo vainga no cirovejeso cokuvona zvoumitumitu pavainga vaciri mujaha. Ivona mukuvo wese vanoita kuti mwamunavo vajizwe vakasunujuka pakubhuya navo pavanonga no cido cokuvona zvoumitumitu. Hama Etani vanonanga kudari: “Ndinovhunja mukaji wangu zvese zvandiri kuzwa. Ngo njira yo rudo iyena anondibesera kuti nditame kuwirazve mu ngozi yo kuvona zvoumitumitu no kugara ecindivhunjisa kuti ndiri kubudirira kudini pashwiro iyi. Anondibeserazve kuti nditame kugara ndecishandisa maningi interneti.” Ngozvokadi kuti hambzaji Ferisiya vanohwajihwa maningi ngokuvona kuti mwamuna wavo anoda maningi kuvona zvoumitumitu. Ivona vakati: “Kugara ndakanyangajwa no kuva no ushungu azvizondibeseri kuti mwamunangu vajisujunure pa cirovejeso cakashata. Mukuvo wese watinobhuya ngokuhwisana kwavari kuita kuti vanyise cirovejeso ici ivona vanondibesera kuti ndikwanise kurovejana no kuhwisana kwandinako.”

Kuva no mabhuyo akadari kungabesera mwamuna kuti anyise cirovejeso cokuvona zvoumitumitu no kubeseravo mukajiwo kuti akwanise kuthemba mwamunake. Mwamuna paanova no cido cokuda kubhuya no mukaji wake akasujunuka ngo pamusoro po zviro zvaacikakwanisi kunyisa, kwaari kuenda, zvaanoda kuita zvinozoita kuti mukaji wake arerukihwe kuzomuthemba ngokuti anonga eciziva kuti mwamunewo aaripi kumufisira ciro.

Munovona kuti munokwanisa kubesera mwamunenyu? Madini kuverenga mese musoro uwu no kubhuisana ngo pamusoro po zvamawanaro? Zvaanoda kamare ndi kukwanisa kuima kuvona zvoumitumitu no kuthembwazve ndimwi. Kusiyapo kunyangajwa ngo ndava yo kuda kwenyu kubhuya naye, iyena anoda kuziva kuti cinesoco ciri kumupsasa kudini. Camunoda i kubesera mwamunenyu kuti anyise cineso ici no kumupa mukana wokuti iyena angavazve mundhu anothembeka. Zvinosisira maningi kuti mwese muzwisise kuti ngenyi mundhu angada kuvona zvoumitumitu no kupsaka manera kuti munyise cinesoco. d

Kudari mukavona kuti mabhuyo amunozodari kubhuya no mwamuna wenyu aazoperi ushoni, endanyi  kobhuya no mukuru ari wese wamunojizwa makasujunuka kuti mubhuisane naye. Ceukijanyi kuti pikija mwamunenyu akakwanisa kunyisa cirovejeso cokuvona zvoumitumitu, zvingatora nguva yakareba kuti mukwanise kumuthembazve. Asi mucadoremba. Ejanyi kuvona manera mucadho wenyu uri kuita nane. Mucadoruza vetero yokuti pakufamba ko nguva no kusengerera, mucadho wenyu unozovazve wakavanga.—Mucumaeri 7:8; 1 Vakorinte 13:4.

Kudari mwamuna wenyu akaenderera mberi ecivona zvoumitumitu, zvinoreva kuti iyena aazivi kukhauya kana apacina camucaveterazve? Haiwa. Andizvopi zvazvinoreva, maningi-ningi mwamunenyu vakagara no cineso ici ko mukuvo wakareba zvingatoita kuti anodikana kuhwisana naco ko upenyu hwese. Pikija pasure po kupeja makore akawanda acizivi kuvona zvoumitumitu, iyena angatovazve no cido cokuda kuvonazve zviro zvakadaro. Kuti izvi zvitame kuitika iyena anodika kuenderera mberi eciita zviri zvese kuti ajijivirire. Angatodikana kuita zvondhozvo pikija paya pokuti cinesoco cingatovoneka inga capera kunyiswa. (Mazwi Akangwara 28:14; Mateu 5:29; 1 Vakorinte 10:12) Iyena anozodikana kucinja “manera ake okurangarira” no kujijira ‘kuramba bzakaxata.’ Izvi zvinobatanija kuvona zvoumitumitu no zvirovejeso zvimweni zvicizivi kucena zvakadari inga kuita cinyamundundu. (Vaefeso 4:23; Nduyo 97:10; Varoma 12:9) Kunanga kuti iyena ari kuvangisira kuti anyise cineso ici? Kudari ari kuvangisira zvinokwanisika. e

Ngozvapi zvamaizoita kudari mwamunenyu avadi kusiya kuvona zvoumitumitu? Zvingaita kuti imwimwi mungasuruvara maningi, kunyangajwa motojizwa inga kuti muri kucengejwa. Zvaizova zvaushoni kusiya shwiroyo munyara ya Jehovha, mukaita kudaro imwimwi munozokwanisa kuva no runyararo. (1 Pedhru 5:7) Itanyi zvese zvamunokwanisa kuti muve phedo na Jehovha ngo kujija, kurangarijisisa no kuita mukumbiro. Ivanyi no cokwadi cokuti kudari imwimwi mukaita izvi Jehovha anozovavo phedo nemwi. Inga zvinonangwa pana Isaia 57:15, Jehovha anogara pamwepo no vandhu “vanobzinyirihwa no vanojidodokesa,” woita kuti vavezve no mudakaro. Endereranyi mberi meciita zvese zvamunokwanisa pakushandira kwenyu Jehovha. Psakanyi besero ro vakuru. Narini mucaruza vetero yo kuti njiku iri yese mwamunenyu vanozokwanisa kuita cinjo jinodikana.—Varoma 2:4; 2 Pedhru 3:9.