MUSORO WO KUJIJA WO 33
NDUMBO 130 Ivanyi Munoregerera
Jehovha Anoda Kuti Ungano Itajise Kudini Vaya Vanoita Cishaishi Cikuru?
“Kudari mundhu akaita cishaishi, tino mubeseri.”—1 JOHANI 2:1.
ZVATICAJIJA
Mu cijijo cino, tinozovona zvijijo zvinosisira maningi zvatingajija kuvha ku zvakaitika ku ungano yo Korinte hama imweni payakaita cishaishi cikuru.
1. Jehovha anodenyi ku vandhu vese?
JEHOVHA wakasika vandhu no rusujunuko wokujikhetera. Itusu tinoshandisa rusujunuko uhwu patinotema zvivaringo njiku ngo njiku. Cimwe co civaringo cinosisira maningi cingatemwa ngo mundhu, ngo cokujipira kuna Jehovha no kuita divi ro mbhuri yake. Jehovha anovetera kuti vandhu vese vaite zvondhozvo. Ngenyi? Ngokuti iyena anoda vandhu, cimwenizve, anoda zvaushoni kwavari. Iyena anoda kuti ivona vabuse ushamwari wophedo naye no kupona no kucikaperi.—Dhotoronome 30:19, 20; Vagaratiya 6:7, 8.
2. Jehovha anozwa kudini ngo vashaishi vacikakhauyi? (1 Johani 2:1)
2 Asi pikija zvakadaro, Jehovha aavangiriji ari wese kuti amushandire, iyena anotendera kuti mundhu umwe nga umwe asane zvaanoda kuita. Waro Mukristu wakabhabhatijwa kudari akaphwanya mutemo wa Mwari oita cishaishi cikuru keni? Kudari iyena akatama kukhauya anodikana kuvhiswa mu ungano. (1 Vakorinte 5:13) Pikija zvakadaro, Jehovha anovetera no kusengerera kwese kuti mundhu wakaitaro zvakashata, ahwirire Kwaari. Kunasa kunanga, iri ndirona thangwe rinosisira rakaita kuti Jehovha atipe muripo, kuitira kuti vashaishi vanokhauya varegerehwe. (Verenganyi 1 Johani 2:1.) Jehovha Mwari wedu ano rudo anobesera vaya vakaita zvishaishi zvikuru kuti vakhauye.—Zakariya 1:3; Varoma 2:4; Jakobo 4:8.
3. Tinozovonenyi mu cijijo cino?
3 Jehovha anotivhunja mazwire ake ngo pamusoro po cishaishi na vaya vanoita zvishaishi zvikuru. Iyena anoda kuti itusu tivevo no mazwiro akadaro. Cijijo cino, cinozobhuya manera atingazviita ndiwona. Mu cijijo cino, tinozovona kuti Pauro wakananga kuti ungano yo Korinte yaidikana kuitenyi ngo pamusoro po hama inonga yaita cishaishi cikuru. Perapo, tinozovonazve kuti ngozvapi zvakanangwa ndi Pauro zvaidikana kuithwa ngo ungano iyi kudari hama ikakhauya. Pejisire, tinozojija kuti Jehovha anozwa kudini ngo pamusoro pa vaya vanoita zvishaishi zvikuru.
NGOZVAPI ZVAKAITIKA KU UNGANO YO KU KORINTE HAMA PAYAKAITA CISHAISHI CIKURU?
4. Zvicinyi zvakaitika ku ungano yo ku Korinte muzana ro kutanga ro makore? (1 Vakorinte 5:1, 2)
4 Verenganyi 1 Vakorinte 5:1, 2. Paainga eciita hwendo hwake hwocitatu inga misiyonario, Pauro wakazwa masoko ainga aciripi aushoni ngo pamusoro po ungano yainga yecivha kuumbhwa ku Korinte. Hama imweni yainga mu ungano iya, yaiita zvouhure no mukaji wa baba wakona. Pikija ku ‘vandhu vo majinja, uhure uhu ahucaiwanikepi pakati pavo.’ Asi ungano yairangarira kuti azvicaishatepi kuti hama iyi ienderere mberi iri mu ungano pikija yaiita zviro zvakashata. Kangaije vandhu vamweni vairangarira kuti kuita izvi zvaikhombija kuti Jehovha ndi Mwari ano unyasha no anosengerera ku vandhu vacizivi kukwana. Jehovha aatenderi vandhu vanoita zviro zvakashata pakati po vandhu vake. Ngo ndava yo mufambiro wavo wakashata, vandhu vamweni vokuti avacainamatepi Jehovha kangaije vakakahamara maningi no kunanga zviro zvakashata ngo pamusoro po vandhu va Jehovha. Hama iyi yaizoita kuti Makristu amweni aishamwarijana nayo aitevo zviro zvoyaiitaro. Asi Pauro wakapa ndhungamiriro yapi ku ungano?
5. Pauro wakananga kuti ungano yaidikana kuitenyi, zvondhozvo zvaida kurevenyi? (1 Vakorinte 5:13) (Vonanyi foto.)
5 Verenganyi 1 Vakorinte 5:13. Pakarata yake yakafemehwa, mupostori Pauro wakatara kuti mushaishi acikakhauyi anodikana kuvhiswa mu ungano. Makristu akagondeka aidikana kumutaja ngo njira yapi? Pauro wakavavhunja kuti ‘vatame kuita ushamwari naye.’ Izvi zvairevenyi? Pauro wakasanangura kuti ndhungamiriro iyi yaibatanija ‘kutama kuha no mundhu wakadaro.’ (1 Vakorinte 5:11) Kuha pamwepo no mundhu wakadaro zvaizoita kuti zvive zvakareruka kuva no ushamwari naye. Zvakajeka kuti Pauro waida kunanga kuti ungano aicaidikanepi kushamwarijana no mwanarume wiya. Izvi zvaizojivirira ungano kuti itame kupsaswa ngo mufambiro wayo wakashata. (1 Vakorinte 5:5-7) Kusiyapo zvonazvo, kutama kushamwarijana naye kwaizomubesera kuti avone kuti wainga aandhambo na Jehovha, cimwenizve, zvaizomuita kuti anyowejeke no kuda kukhauya.
Paakatara karata yake yakafemehwa, mupostori Pauro wakananga kuti mushaishi acikakhauyi waidikana kuvhiswa mu ungano (Vonanyi ndima 5)
6. Ungano yo ku Korinte yakadavirisa kudini karata ya Pauro, ngozvapi zvakazoithwa ngo mwanarume wiya?
6 Paakapera kutumira karata ku Makristu o ku Korinte, Pauro wakatanga kurangarira kuti dangani ungano yaizomuvona kudini. Pejisire, Tito wakazoviya no masoko kuzovhunja Pauro akamusiya akadakara maningi. Masoko akona ainga okuti ungano yakadavira ushoni karata ya Pauro. (2 Vakorinte 7:6, 7) Ivona vakaita zvakanangwa ndi Pauro, no kuvhisa mushaishi pakati pavo. Kusiyapo zvondhozvo, pa mweji jese jakazotevera, Pauro naavha kuvatumira karata, mushaishi wiya wainga akhauya no kusiya makwanja ake akashata. Iyena wainga acinja no kusiya mufambiro wake pomwe no zviito zvakashata, otanga kutevera ndhungamiriro jakarungama ja Jehovha. (2 Vakorinte 7:8-11) Pauro wakavhunja ungano kuti izoitenyi pasure pa izvi?
UNGANO YAKATAJISA KUDINI MUSHAISHI WAINGARI AKHAUYA?
7. Mwanarume uwu wakaitenyi pasure po kuvhiswa mu ungano? (2 Vakorinte 2:5-8)
7 Verenganyi 2 Vakorinte 2:5-8. Pauro wakavona kuti “Kupangihwa ngo vazinji uku, kunokwana ku mundhuwo.” Ngo magama amweni, kupangihwa uku kwainga kwashanda kwaari. Ngowapi wakazova muviyo? Iyena wakagumira pakukhauya.—Vahebheru 12:11.
8. Pauro wakavhunja ungano kuti iitenyi?
8 Pauro wakananga kudari ku ungano iya: “Munodikana kumuregerera ngo mwoyo wese no kumutondhoja” “kuti muvangise rudo hwenyu kwaari.” Vonanyi kuti Pauro waida kuti ungano iite zvizinji kusiyapo basi kutendera kuti mwanarume uwu ahwirire kuna Jehovha. Pauro waida kuti hama no hambzaji jivangise mwanarume uwu waingari akhauya ngo magama avo, zviito no kuvonesa kwaari kuti ivona vainga vamuregerera, cimwenizve vaimuda. Inga muviyo, hama iyi yaizova no cokwadi cokuti hama no hambzaji jainga jadakara maningi ngokuhwirira kwayo kuna Jehovha.
9. Ngenyi ku vamweni zvaizova zvecinesa kuregerera hama iyi yaingari yakhauya?
9 Zvingaita kuti hama no hambzaji jimweni jo mu ungano iya ajizivi kudakara maningi pajakazwa masoko okuti hama iya yainga yahwijisihwa. Ngenyi tingananga zvondhozvo? Ngokuti zviito zvake zvakashata zvakabara zvineso mu ungano. Kangaije zvakatoita kuti vamweni vanyowejeke. Hama no hambzaji jo mu ungano iya, jakashanda ngo simba kuti jizwire ndhungamiriro ja Jehovha. Zvingaita kuti vamweni vakona vakarangarira kuti azvicaingepi zvakarurama kuti mundhu wainga akaita cishaishi cakakura kudari ahwirijihwezve mu ungano. (Ezanisanyi na Ruka 15:28-30) Ngenyi zvainga zviro zvinosisira maningi kuti hama no hambzaji jikhombije rudo ku hama yaingari yahwijisihwa?
10-11. Zvicinyi zvaizoitika kudari vakuru novakaramba kuregerera mushaishi waingari akhauya?
10 Amborangariranyi kuti mwanarume uwu waizojizwa kudini kudari vakuru navacizivi kumutendera kuti iyena ahwirire mu ungano pasure po kukhauya. Kana kuti waizojizwa kudini pasure po kuhwirira hama no hambzaji jotama kumukhombijira rudo. Iyena ‘waizonyiswa ngo kunyangajwa kwakakura.’ Iyena waizorangarira kuti narini aacaizoshandirepi Jehovha. Waizoguma pakusiya kuvangisira kuti avezve no ushamwari hwakavanga na Jehovha.
11 Zvaizoshata maningi kudari hama no hambzaji jo mu ungano jikaramba kuregerera mushaishi anonga akhauya, ngokuti jaizodira ushamwari hwajo na Jehovha pa ngozi. Ngenyi? Ngokuti ivona avacaizongepi vecitevejera Jehovha uwo anoregerera vashaishi vanokhauya, kusiyapo izvi, vaizonga vecitevejera Sathana uwo wakashata no acina unyasha. Ngokuita kwavo kudaro, vaizoita kuti Sathana avashandise kuti varembese hama iyi pakushandira Jehovha.—2 Vakorinte 2:10, 11; Vaefeso 4:27.
12. Ungano yaizotevejeresa kudini Jehovha?
12 Ungano yo ku Korinte yaizotevejeresa kudini Jehovha kusiyapo Sathana? Ngokutevejera manera a Jehovha pakutaja vashaishi vanokhauya. Vonanyi kuti vatari vamweni vo Bhaibheri vakanangenyi ngo pamusoro pa Jehovha. Dhavhidhi wakati: “Imwimwi Jehovha makanaka, nguva jese makanasiririka kuti muregerere.” (Nduyo 86:5) Mika wakatara kudari: “Ndiyani Mwari wakaezana na imwimwi, anoregerera kuposa no kushaisha kwakasara pakati po vandhu vake?” (Mikeya 7:18) Isaya wakananga kudari: “Mundhu wakashata ngaasiye gwanja rake, mundhu anoita zvakashata ngaasiye murangariro wake; ngaahwirire kuna Jehovha, iyena anozomuitira usizi, ngaahwirire kuna Mwari wedu ngokuti iyena anoregerera mukuperera.”—Isaya 55:7.
13. Ngenyi zvakava zvaushoni kutendera kuhwirijira mwanarume waingari akhauya? (Vonanyi bhokiso rinoti: “ Mwanarume wo ku Korinte Paakahwirijihwa.”)
13 Kuitira kutevejera Jehovha, ungano yo ku Korinte yakadikana kuashira mwanarume waingari akhauya no kumunyaraja ngo rudo hwavo. Ngokutevejera ndhungamiriro ya Pauro yokuashira mushaishi anonga akhauya, ungano yo ku Korinte ‘yakazwira pa zviro zvese.’ (2 Vakorinte 2:9) Pikija kuti mwanarume uwu wainga akaparajana no ungano ko mweji jakatikuti, iyena wakazokhauya. Ngo kudaro, painga pacina thangwe rokuti vakuru vanonoke kumuhwirijira.
TINGATEVEJERESA KUDINI KURURAMA NO UNYASHA HWA JEHOVHA?
14-15. Tajijenyi kuvha ku zvakaitika kare ku ungano yo ku Korinte? (2 Pedhru 3:9) (Vonanyi foto.)
14 Zvakaitikari kare ku ungano yo ku Korinte, zvakatahwa kuti “zvitijijise.” (Varoma 15:4) Zvakaitikari, zvinotijijisa kuti Jehovha aatenderi kuti vaya vanoita zvishaishi votama kukhauya, vaenderere mberi vari mu ungano. Vamweni vangarangarira kuti ngokuti Jehovha ano “unyasha” iyena waizotendera kuti ari wese acikakhauyi aenderere mberi ari mu ungano. Asi aya andiwopi manera Jehovha anokhombija unyasha. Pikija kuti Jehovha ano unyasha iyena aatenderi mushovo wese wo zvakashata. Ndhungamiriro jake jo zvakashata no zvakanaka, ajizivi kucinja. (Judha 4) Kudari Jehovha naaitendera kuti vashaishi vacikakhauyi vaenderere mberi vari mu ungano, aucaizovepi unyasha ngokuti ungano aicaizovepi yakajiviririka.—Mazwi Akangwara 13:20; 1 Vakorinte 15:33.
15 Pikija zvakadaro, tajijira kuti Jehovha aadi kuti ari wese aparajwe. Iyena anoda kuponesa vandhu pese pazvinokwanisika. Iyena anokhombija unyasha kuna vaya vanoita cinjo mu upenyu hwavo no kuvazve no ushamwari naye. (Ezekiyeri 33:11; verenganyi 2 Pedhru 3:9.) Ngo kudaro, mwanarume wiya wo ku ungano yo ku Korinte paakakhauya no kusiya zviro zvakashata zvaiinga eciita, Jehovha wakashandisa Pauro kuitira kusanangurira ungano yo ku Korinte kuti mwanarume uwu waidikana kuregerehwa no kuashihwazve.
Vecitevejera rudo no unyasha hwa Jehovha, ungano iri kuashira no kunaka mwoyo vaya vahwijisihwa (Vonanyi ndima 14-15)
16. Munojizwa kudini ngo pamusoro pa Jehovha pasure po kuziva zvakaitika ku ungano yo ku Korinte?
16 Muezaniso wo ungano yo ku Korinte watikhombija kuti Jehovha ano rudo maningi, cimwenizve, anoda urungami no ururami. (Nduyo 33:5) Kujija ngo pamusoro po zviro izvi kunotiita kuti tide maningi kukuja Jehovha. Kunasa kunanga, itusu tese tiri vashaishi, ngo kudaro tinoda kuregerehwa ndi Jehovha. Umwe nga umwe wedu ano thangwe ro kubongesera Jehovha ngo ndava yo muripo, ngokuti iwona unoita kuti itusu tiregerehwe. Tinodakara maningi no kuziva kuti Jehovha anoda maningi vandhu vake, cimwenizve, anoda zvaushoni kwavari.
17. Ngozvapi zvatinozovona mu zvijijo zvinotevera?
17 Ngozvapi zvatinodikana kuita kuti tihwisane no mugariro jakadari inga ndi iji nyamasi uno? Kudari ari wese akaita cishaishi cikuru nyamasi uno, vakuru vo ungano vangatevejeresa kudini rudo hwa Jehovha no kubesera mundhuwo kuti akhauye? Ungano inodikana kuitenyi vakuru pavanotema civaringo cokuvhisa kana kuhwirijira ari wese? Muvhunjo iji jinozodavihwa mu cijijo cinotevera.
NDUMBO 109 Rudo Unobva Mukati mo Mwoyo
