1-2. (a) Cishaishi i cinyi, tingaitenyi kuti tikwanise kucinyisa? (Vonanyi “Kusananguhwa ko Magama.”) (b) Tinozovonenyi mu cijijo cino no mu zvijijo zvimweni zvo Murindiri uwu? (Vonanyizve “Masoko Kuitira Vaverengi” mu Murindiri uno.)

 IMWIMWI maidakarira kuziva kuti Jehovha anomuda zvakadini? Njira imwe yatingavona ndiyona izvi ngo yokujija ngo pamusoro po zviro zvakaithwa ndi Jehovha no zvaari kwenderera mberi eciita kuti atisujunure mu cishaishi no rufu. Cishaishi a ndi muvengi umweni wakashata maningi waticikakwanisi kunyisa tiri tega. Itusu tinoshaisha njiku jese, cimwenizve rufu i muviyo wo cishaishi. (Varoma 5:12) Asi izvi azvidi kureva kuti itusu taruza zvese. Ngo besero ra Jehovha itusu tingakwanisa kunyisa muvengi uwu wakashatari maningi. Kunasa kunanga, Jehovha anotigondesa kuti anozotisujunura mu cishaishi no rufu.

² Ko makore anokwana kuita 6.000, Jehovha ari kubesera vandhu kuti vakwanise kuenderera mberi vecimushandira no kuva shamwari jake pikija vari vandhu vacizivi kukwana. Ngenyi? Ngokuti iyena anotida. Kuvhira paakatisika, iyena ari kutikhombijira rudo, iyena wakaita zvese zvaaikwanisa kuti atibesere kuti tive shamwari jake pikija tiri vandhu vanoposa. Jehovha anozviziva kuti cishaishi cinoendesa ku rufu, cimwenizve iyena aadi kuti itusu tife. Iyena anoda kuti itusu tipone kwenda no kwenda. (Varoma 6:23) Iyena anodavo kuti imwimwi mupone no kucikaperi. Mu cijijo cino, tinozovona mupinguro jo muvhunjo mutatu: Wokutanga,  Jehovha wakapa vetero yapi ku vandhu vese vakabahwari no ushaishi? Wocipiri, vandhu vo mu nguva yokare, vakaitenyi kuti vadakajise Jehovha no kuva shamwari jake? Wocitatu, Jesu wakaitenyi kuti asujunure vandhu ku cishaishi no rufu?

JEHOVHA WAKAPA VETERO YAPI KU VANDHU VESE VAKABAHWARI NO USHAISHI?

3. Zvakaitisa kudini kuti varovorani vokutanga vave vashaishi?

³ Jehovha paakasika mwanarume no mwanakaji vokutanga, iyena waida kuti ivona vadakare. Jehovha wakavapekeja ndau yakaseja kuti vagare, ovapa cipo co mucadho no basa rinoshamaisa. Ivona vaizova no cidakajiso cokuzaja nyika no mubarihwana wavo no kucinja nyikeyo yese kuti ive paradhiso yakatojana no munda wo Edheni. Asi Jehovha wakarambisa Adhamu na Evha ciro cimwe. Condhoco cainga ciro cakareruka. Ciro cimweni cinosisira maningi ngocokuti Jehovha wakakhombija rudo kwavari ngokuvavhunja kuti ngozvapi zvaizovaitikira paya pavaizotama kureremeja vosana kutama kuzwira ngo kuita ciro cavaingaro vakarambijwa. Ico caizova cishaishi, zvoita kuti vapejisire ngokufa. Itusu tinozviziva zvakaitika. Ngirozi imweni yakashata, yainga icikadi Mwari, yakaeja Adhamu na Evha kuti ivona vatame kuzwira Jehovha. Adhamu na Evha vakatendera kucengejwa ngo ngirozi iyi yakashata. Kusiyapo kuthemba Baba wavo vano rudo Jehovha, ivona vakashaisha. Inga zvatinoziva, zvakanangwa ndi Jehovha zvakazovonekadi kuti zvainga zvokadi. Kuvhira njiku yondhoyo yavakatamaro kuzwira Jehovha, Adhamu na Evha vakaita zvikarahwa vopejisira ngokufa.—Genesisi 1:​28, 29; 2:​8, 9, 16-18; 3:​1-6, 17-19, 24; 5:5.

4. Ngenyi Jehovha anonyenya cishaishi, nokutizve anotibeseresa kudini kuti tihwisane naco? (Varoma 8:​20, 21)

⁴ Ici cakava ciitiko cinosuruvarisa maningi. Asi Jehovha wakaita kuti citahwe mu Bhaibheri kuitira kuti itusu tibesereke ndicona. Ciitiko ici cinotibesera kuzwisisa kuti ngenyi Jehovha anonyenya zvakashata. Cishaishi cinotiparajanisa pamwepo na Baba wedu vano rudo Jehovha, pejisire tofa. (Isaya 59:2) Ndiyo ndava ngirozi iya yakashata inozwi Sathana yakacengejaya Adhamu na Evha, inodisisa zvakashata mukuvo wese. Cimwenizve, iri kundocengeja vandhu kuti vaite zvakashata nyamasi uno. Adhamu na Evha pavakaposa zvingaita kuti Sathana wakarangarira kuti wainga akwanisa kuparaja cidisiso ca Mwari kuno vandhu. Asi iyena aacaizwisisepi kuti Jehovha ndi Baba vano rudo maningi, narini Jehovha aacaizocinjepi cidisiso cake ku mubarihwana wa Adhamu na Evha. Ngokuti iyena anoda maningi vandhu. Ndiyo ndava Adhamu na Evha pavakandoposa, Jehovha wakapekeja vetero ku mubarihwana wavo wese. (Verenganyi Varoma 8:​20, 21.) Jehovha waizviziva kuti vamweni vo vana va Adhamu na Evha vaizotema civaringo cokumuda no kumuzwira. Ndiyo ndava Jehovha wakatema civaringo kuti asujunure vandhu ku cishaishi no kuvapa mukana wokuva no ushamwari wophedo naye. Jehovha wakaitenyi kamare kuti zvese izvi zvikwanisike?

5. Jehovha wakanangenyi paakapa vetero ngokukasika ku vandhu vainga vashaishi? Sananguranyi. (Genesisi 3:15)

⁵ Verenganyi Genesisi 3:15. Ngokukasika Jehovha wakananga kuti waizoparaja Sathana no kupa vetero vandhu vese. Jehovha wakananga kuti kwaizowanika “mubarihwana” waaizoshandisa kuitira kuponesa vandhu. Mubarihwana uwu waizoparaja Sathana no kutonga zvineso zvese zvakamuka mu munda wo Edheni. (1 Johani 3:8) Asi kuti mubarihwana uwu ukwanise kuita zviro izvi waizotambujika. Asi pakutanga Sathana waizokhuvaza mubarihwana uwu. Zvokadi izvi zvaizohwaja maningi Jehovha. Asi iyena wainga akanasiririka kuti atambujike ngokuti paaizoita kudaro zviuru no zviuru zvo vandhu zvaizosujunuhwa kuvha ku ushaishi no rufu.

 KUITISA KUDINI VANDHU VACIZIVI KUKWANA VANGAKWANISA KUDAKAJISA JEHOVHA NO KUVA SHAMWARI JAKE?

6. Vanarume vainga no rutendo vakadari inga ndi Abheri na Nowa, vakaitenyi kuti vave shamwari ja Jehovha?

⁶ Pa makore akazotevera, Jehovha waindonanga kuti ngozvapi zvaidikana kuithwa ngo vandhu vacizivi kukwana kuti vave shamwari jake. Inga muezaniso, Abheri mwana wo cipiri wa Adhamu na Evha, ndiyena wakava mundhu wokutanga kukhombija rutendo kuna Jehovha pasure po ciitiko cakaitikaya mu munda wo Edheni. Abheri waida Jehovha, cimwenizve waida kumudakajisa no kuva shamwari yake. Iyena waida kupa cipo Jehovha. Abheri wainga muhavisi wo mavhuta, ngo kudaro wakatora vhuta rimwe woita mupiro kuitira Jehovha. Jehovha wakavona kudini ngo mupiro uwu? “Jehovha wakadakarira maningi zvipo zvaiithwa ndi Abheri.” (Genesisi 4:4) Jehovha wakakhombijavo rudo ku vamweni vakapavo zvipo kwaari, vaimuda no kumuthemba vakadari inga ndi Nowa. (Genesisi 8:​20, 21) Ngo kutendera mupiro iji, Jehovha wakakhombija kuti vandhu vacizivi kukwana vangakwanisa kumudakajisa no kuva shamwari jake. b

7. Ngozvapi zvatinojija kuvha ku cikumbiro cakaita Jehovha kuna Abhirahama?

⁷ Pakufamba ko nguva, Jehovha wakakumbira Abhirahama mwanarume wainga no rutendo wakavanga maningi, kuti aite ciro cainesa, kupira mwana wake Izaki. Kunasa kunanga ici cakava cikumbiro cainesa maningi kuna Abhirahama mu upenyu hwake hwese. Pikija zvakadaro, Abhirahama wakatema civaringo co kuzwira Jehovha. Abhirahama paainga anasiririka kuti apire mwana wake, Jehovha wakamurambija. Jehovha waizviziva kuti Abhirahama waizohwajihwa maningi kudari naakauraya mwana wake. Cikumbiro ca Jehovha ici cinotijijisa ciro cinosisira maningi. Jehovha waizova wakanasiririka kuti ape mwana wake inga muripo kwatiri. Izvi zvinokhombija kuti Jehovha anoda maningi vandhu.—Genesisi 22:​1-18.

8. Mupiro jainangwa ngo Mutemo wa Mosi jaimirirenyi? (Varevhi 4:​27-29; 17:11)

⁸ Pa makore akazotevera, Jehovha wakapekeja mutemo ku jinja ro Vaiziraeri, Mutemo uwu wainanga kuti ivona vaidikana kuita mupiro wo zvinyama kuti zvishaishi zvavo zviregerehwe. (Verenganyi Varevhi 4:​27-29; 17:11.) Mupiro iji jaiimirira mupiro umweni waisisira maningi, uwo waizosujunura vandhu vese kuvha ku cishaishi. Jehovha wakafemera vaporofita vakawanda, kuti vabhuye ngo pamusoro po mubarihwana uwu. Ivona vakananga kuti mubarihwana uwu waizovari unosisira maningi, Mwana wa Mwari waizodikana kutambujika no kufa. Mubarihwana uwu waizopihwa inga civhuta. (Isaya 53:​1-12) Ngo kudaro, Jehovha wakagondesa kupekeja mwana wake inga mupiro kuti asujunure vandhu ku cishaishi no rufu. Ici iciro cinoshamaisa maningi cakaithwa ndi Jehovha. Zvondhozvo zvinobatanijavo na itusu.

NGENYI JESU WAKAPA MURIPO?

9. Johani Mubhabhatiji wakabhuyenyi ngo pamusoro pa Jesu? (Vahebheru 9:22; 10:​1-4, 12)

⁹ Mugore ra 29 Jesu Aviya, Johani mubhabhatiji wakavona Jesu wo Nazareta wo muvhunja kudari: “Nga iri Vhuta ra Mwari rinovhisa zvishaishi zvo nyika!” (Johani 1:29) Magama aya akavonesa kuti Jesu ndiyena mubarihwana wainga wakagondeswa ndi Mwari. Jesu waizopa upenyu hwake inga muripo ku vandhu, paaizoita izvi, vetero yakapuwa vandhu ndi Jehovha kuti avasujunure kuvha ku cishaishi, yaizonasa kujeka.—Verenganyi Vahebheru 9:22; 10:​1-4, 12.

10. Jesu wakakhombijisa kudini kuti wakaviya “kuzodanija” vashaishi?

¹⁰ Jesu wakabatikana pa kubesera vandhu vainga vacikajizwi ushoni ngo kuva kwavo vashaishi, ngo kuvakoka kuti vave vateveri vake. Jesu waizviziva  kuti thangwe guru rinoita kuti vandhu vatambujike icishaishi. Iyena waiita zvese zvaaikwanisa kuti abesere vanarume no vanakaji vaineseka ngo ndava yo zvishaishi zvovainga vakaita kare. Pa vhaza imweni iyena wakasanangura izvi ecishandisa muezaniso. Iyena wakati: “Vandhu vakavanga avadi murapi, asi vanohwaja vanoda murapi.” Ngo kudaro iyena wakapejisa eciti: “Ngokuti andizivi kuviya kuzodanija vandhu vakarurama, asi ndakaviira vashaishi.” (Mateu 9:​12, 13) Izvi ndizvona kamare zvakazoithwa ndi Jesu. Iyena wakakhombija kunaka mwoyo, no kuregerera zvishaishi zvo mwanakaji wiya wakasukaya soka jake ngo musoji. (Ruka 7:​37-50) Iyena wakajijisa cokwadi cinosisira ku mwanakaji wainga Musamaria, uwo wainga no mwamuna waainga acizivi kucadha naye. (Johani 4:​7, 17-19, 25, 26) Jehovha wakapekeja Jesu simba rokuparaja rufu, uwo uri muviyo wo cishashi. Kuitisa kudini? Jesu wakaita izvi ngo kumusa vanarume no vanakaji pamwepo no vana.—Mateu 11:5.

11. Ngenyi vandhu vacizivi kukwana vaijizwa vakasujunuka kugara phedo na Jesu?

¹¹ Izvi zvinotibesera kuzwisisa kuti ngenyi vandhu vaiita zvishaishi zvakakura, vaijizwa vakasujunuka kukhwedera phedo na Jesu. Jesu waikhombija kunaka mwoyo ku vandhu ava. Iyena waizwisisa mazwiro avo. Ndiyo ndava ivona avacaithyepi kubhuya naye. (Ruka 15:​1, 2) Jesu waivangisa no kupfupa vandhu vaya vaikhombija rutendo kwaari. (Ruka 19:​1-10) Ngo kuita zvese izvi, Jesu wakavonesa ngo njira yakakwana kuti Jehovha ndi Baba vano unyasha. (Johani 14:9) Zviro zvakanangwa no kuithwa ndi Jesu zvaikhombija kuti Baba wake vano unyasha vanoda vandhu, cimwenizve vanoda kutibesera kuti tinyise  ushaishi. Kusiyapo zvondhozvo, Jesu wakabesera vandhu kuti vave no cido cokuita cinjo, kuti vamutevere.—Ruka 5:​27, 28.

12. Jesu wakajijisenyi ngo pamusoro po rufu wake?

¹² Jesu waizviziva kuti iyena waizopira upenyu hwake. Pa vhaza imweni, iyena wakatovhunja vajiji vake kuti waizotengeswa no kukohomehwa pa mutanda. (Mateu 17:22; 20:​18, 19) Iyena waizviziva kuti muripo uwu waizoshanda kuti uvhise cishishi mu nyika inga zvainga zvakanangwa ndi Johani no vaporofeti vamweni. Cimwenizve, Jesu wakananga kuti pasure po kufa kwake ‘waizokwevera vandhu vo mushovo wese.’ (Johani 12:32) Izvi zvaivonesa kuti wese waizova no rutendo muna Jesu no kuva muteveri wake, waizodakajisa Jehovha. Vaya vaizoita izvi ‘vaizosujunuhwa mu ushaishi.’ (Varoma 6:​14, 18, 22; Johani 8:32) Ndiyo ndava Jesu wainga no cicunge, cimwenizve wainga akanasiririka kuti afe ngo njira inohwaja maningi.—Johani 10:​17, 18.

13. Mafire api akaita Jesu, rufu wake unotijijisenyi ngo pamusoro pa Jehovha? (Vonanyi foto.)

¹³ Jesu wakatengeswa ngo umwe wo shamwari jake, cimwenizve, vavengi va Jesu vakamusunga, vomutuka no kumupumbha zviro zvaainga acizivi kuita. Pejisire masoca akakohomera Jesu kuti vamuuraye. Zvokadi, zvese izvi zvakaita kuti Jesu atambujike maningi. Asi Jehovha wakatambujikavo maningi ndizvona. Jehovha wainga no simba ro kuimisa matambujiko aisonganari no Mwana wake. Asi iyena aazivi kuita zvondhozvo. Ngenyi? Ngozvapi zvakaitisa kuti Jehovha atendere kuti mwana wake atambujike no kufa? Ngo ndava yo rudo hwake. Jesu wakati: “Mwari wakadisa vandhu vo nyika ino, ngo kudaro, wakavapa Mwana wake, wakabahwa ari ega, kuti vese vanomutenda vatame kuparajwa, asi vawane upenyu hucikaperi.”—Johani 3:16.

14. Muripo wa Jesu unovonesenyi kwamuri?

¹⁴ Muripo wa Jesu Kristu, i citatijo co rudo hwa Jehovha ku mubarihwana wa Adhamu na Evha. Muripo uwu unovonesa kuti Jehovha anomuda maningi, maningi kamare. Jehovha wakaita zvese zvaaikwanisa zvokuti wakatogumira pakuhwajihwa maningi kuti amusujunure ku ushaishi no rufu. (1 Johani 4:​9, 10) Kunasa kunanga, Jehovha ari kubesera umwe nga umwe wedu kuti ahwisane no kutama kukwana no ku kunyisa.

15. Tinodikana kuitenyi kuti zvishaishi zvedu zviregerehwe?

¹⁵ Cipo catakapuwa ndi Jesu Kristu cakaita kuti zvishaishi zvedu zviregerehwe. Asi kuti tikwanise kuregerehwa ndi Jehovha, tinodikana kuita zviri zvese. Johani Mubhabhatiji na Jesu Kristu vakativhunja kuti ngozvapi zvatinodikana kuita. Ivona vakati: “Khauyanyi, ngokuti Umambo hwo kudenga hwaaphedo.” (Mateu 3:​1, 2; 4:17) Ngo kudaro, kukhauya ndi khiya kuitira kuhwisana no kutama kukwana no kuva shamwari ja Baba wedu vano rudo Jehovha. Asi zvinoda kurevenyi kukhauya? Cijijo cinotevera cinozodavira muvhunjo uwu.