MUSORO WO KUJIJA WO 35
NDUMBO 123 Kubesera Urongwa hwo Umwari Takagondeka
Vakuru Vangabeseresa Kudini Vaya Vanonga Vavhiswa mu Ungano?
“Kudenga kunozova no mudakaro wakakura ngo ndava yo mushaishi anokhauya, kupinda makumapfumbamwe na vapfumbamwe o vandhu vakarurama vacikadikani kukhauya.”—RUKA 15:7.
ZVATICAJIJA
Mu cijijo cino, tinozovona kuti ngenyi vandhu vamweni vangadikana kuvhiswa mu ungano, tinozovonazve kuti vakuru vangavabeseresa kudini kuti vakhauye no kuwanazve unyasha wa Jehovha.
1-2. (a) Jehovha anovona kudini vashaishi vacikadi kukhauya? (b) Jehovha anovetera kuti vashaishi vaitenyi?
JEHOVHA ndi Mwari acikadakariri mushovo wese wo zviro zvakashata. Iyena aadakariri cishaishi. (Nduyo 5:4-6) Iyena anoda kuti tireremeje ndhungamiriro jake jakarungama jaakadira mu Bhaibheri kuitira itusu. Ngo zvokadi kuti Jehovha aaveteri kukwana ko vandhu vacizivi kukwana. (Nduyo 130:3, 4) Pamukuvo umwewo, iyena anonyenya vandhu vakashata ngokuti: “Ivona vanophinduja unyasha hucikaezaniswi hwa Mwari wedu, vohuita inga thangwe ro kuita mufambiro unopseruja.” (Judha 4) Kunasa kunanga, Bhaibheri rinobhuya ngo pamusoro po “kuparajwa ko vandhu vakashata” pa hondo ya Mwari yo Armagedhoni.—2 Pedhru 3:7; Apokaripsi 16:16.
2 Asi Jehovha aadi kuti ari wese aparajwe. Inga zvatakavona mu zvijijo zvo Murindiri uwu, Bhaibheri rinonasa kujekesa kuti Jehovha “anoda kuti vese vakhauye.” (2 Pedhru 3:9) Vakuru vo ungano nyamasi uno vanotevejera kusengerera ka Jehovha pavanobesera mundhu wakaita cishaishi cikuru kuti acinje makwanja ake no kumubesera kuti akhwedere phedo na Jehovha. Mukusiyana, kazinji mundhu anoita cishaishi cikuru aakhauyi. (Isaya 6:9) Vamweni vanoenderera mberi veciita zviro zvakshata basi, pikija no kuvangisira kunonga kweciizwa ngo vakuru kuphinda no kuphinda kuti vavabesere kuti ivona vakhauye. Asi ngozvapi zvinoizwa pa mugariro wakadari?
“VHISANYI MUNDHU UWU WAKASHATARI”
3. (a) Kudari mundhu akatama kukhauya, ngozvapi zvinonangwa ngo Bhaibheri zvinodikana kuithwa? (b) Pa mugariro uwu, ngenyi tingananga kuti mundhuwo wakheta kuvhiswa mu ungano?
3 Mundhu wakaita cishaishi cikuru paanoenderera mberi eciita zviro zvakashata, acikakhauyi, vakuru apana ciro cimweni cavanosana kuciripi basi kuteverera ndhungamiriro yakatahwa pa 1 Vakorinte 5:13, inoti: “Vhisanyi mundhu uwu wakashatari pakati penyu.” Mushaishi anozviziva kuti kudari akatama kukhauya, iyena anozovhiswa mu ungano, ngo kudaro, zvinoita inga kuti iyena anonga atema civaringo cokuvhiswa mu ungano. Anonga a ecikotora zvaakasima. (Vagaratiya 6:7) Ngenyi tingananga izvi? Ngokuti iyena anonga aramba besero raaipuwa ngo vakuru kuphinda no kuphinda kuti iyena akhauye. (2 Majimambo 17:12-15) Mabasa ake anokhombija kuti iyena wakhombija kutama kuzwira ndhungamiriro ja Jehovha.—Dhotoronome 30:19, 20.
4. Ngenyi mushaishi acikakhauyi paanovhiswa mu ungano panoithwa ciziviso?
4 Mushaishi acikakhauyi paanovhiswa mu ungano, ciziviso cinoithwa mu ungano cokuti iyena aaciripizve umwe wo Zvapupu zva Jehovha. b Cinangwa co ciziviso ici, asipi cokupseruja mushaishiwo. Kunja kwa izvi, cinoithwa kuitira kuti ungano itevere ndhungamiriro yo mu Bhaibheri yo ‘kuima kuita ushamwari’ naye ‘ne kuha naye.’ (1 Vakorinte 5:9-11) Ndhungamiriro iyi inopekejwa no thangwe raushoni. Mupostori Pauro wakatara kudari: “Zvimbijo zvidoko zvinokukumusa upfu hwese.” (1 Vakorinte 5:6) Vashaishi vacikakhauyi vangarembesa cinangwa ca vaya vari kueja kupona mukuzwirana no ndhungamiriro jakarurama ja Jehovha.—Mazwi Akangwara 13:20; 1 Vakorinte 15:33.
5. Ngoapi anodikana kuva maitiro edu mundhu paanovhiswa mu ungano, ngenyi?
5 Waro, tinodikana kuvona kudini Mukristu anongaro avhiswa mu ungano? Pikija kuti itusu atishamwarijani naye, tinodikana kumuvona inga vhuta rasvejeka haiwa inga ciro casvejeka. Vhuta rinonga rasiyana no mushambi ringakwanisazve kuhwirira kumushambi. Ceukijanyi kuti vhuta rinongaro rasvejeka rakajipira kuna Jehovha. Zvinosuruvarisa ngozvokuti, iyena aaripi kukwanirisa mbhiko yaakagondesa kuna Jehovha yokwenderera mberi akagondeka kwaari. (Ezekiyeri 18:31) Mukusiyana, kudari pacino mukuvo, cimwenizve kudari Jehovha akanasiririka kuti amukhombijire unyasha, itusu tinovetera kuti mundhuwo acinje. Vakuru vangabeseresa kudini mushaishi anonga avhiswa mu ungano?
VAKURU VANOBESERESA KUDINI VANONGA VAVHISWA MU UNGANO?
6. Vakuru vanoitenyi kuti vabesere wiya anonga avhiswa mu ungano?
6 Ari wese paanovhiswa mu ungano, kureva kuti vakuru vanoima kumubesera kuti ahwirire kuna Jehovha? Haiwa. Dare ro vakuru parinobhuya no mushaishi acikakhauyi kuti iyena anozovhiswa mu ungano, ivona vanomusanangurira kuti ngozvapi zvaanodikana kuita kuti azokwanisa kuhwirira ku ungano. Asi vakuru vanozoita zvizinji kupinda zvondhozvo. Kazinji kwakona, ivona vanovhunja mushaishiwo kuti vanoda kuzobhuyazve naye pasure po mweji jakatikuti, kuitira kuti vazovona kuti mundhuwo wacinja kana kuti haiwa. Kudari iyena akatendera kuti anoda kuzobhuya navo, ivona vanoronga kuti vabhuye naye no kumubesera kuti akhauye no kuhwirira. Pikija iyena akatama kukhombija kucinja pa vhaza yondhoyo, vakuru vanovangisirazve kuti vazoeja kubhuya naye kumbejiyo.
7. Vakuru vanotevejeresa kudini pena ya Jehovha mundhu paanovhiswa mu ungano? (Jeremiya 3:12)
7 Vakuru vanovangisira maningi kuti vatevejere pena ya Jehovha pavanoenda kobhuya no mundhu wakavhiswa mu ungano. Inga muezaniso, Jehovha aazivi kuvetera kuzobesera Vaiziraeri vaingaya vapanduki pasure pokukhombija kwavo kuda kuhwirira kwaari. Kusiyapo zvondhozvo, iyena wakatanga ngokuvabesera vacito vakhombija kukhauya. Inga zvatakavona mu cijijo cocipiri co Murindiri uwu, Jehovha wakavhunja Ozeya kuti aregerere mukaji wake no kumutenderazve kuti agare naye pikija wainga eciposa. Ngo njira iyi, Jehovha wakakhombija ku vandhu vake kuti iyena wainga akanasiririka kuti avaregerere. (Ozeya 3:1; Marakiya 3:7) Kudari inga ndi Jehovha, vakuru vanoda kuti mushaishi akhauye no kuhwirira ku ungano. Ivona vanoita zvese zvavanokwanisa kuti izvi zvikwanisike. Ivona avaiti kuti zviro zvive zvecinesa ku mushaishiwo.—Verenganyi Jeremiya 3:12.
8. Muezaniso wo mwana mupanduki, unotibeseresa kudini kuti tinase kuzwisisa unyasha wa Jehovha? (Ruka 15:7)
8 Pa muezaniso wo mwana mupanduki, ceukijanyi kuti baba vaya vakaashirisa kudini mwana wavo. Pavakavona mwana wavo eciviya kumuzi, baba ava ‘vakagogoma kwenda komutandamija, vomukumbatira no kumubhejhari kamare.’ (Ruka 15:20) Baba ava avazivi kuvetera kuti mwana uwu avadeketerere kuti vamuregerere, kusiyapo zvondhozvo, ivona vakatotanga kugogoma kwenda komuashira. Izvi ndizvona zvinoithwa ndi baba ari wese ano rudo. Vakuru vanovangisira maningi kuti vakhombije mugariro uwu kuna vaya vanonga vagara ndhambo no ungano. Ivona vanoda kuti vaya vakasiya Jehovha vahwirirezve kwaari. (Ruka 15:22-24, 32) Kudari mushaishi akakhauya, Jehovha, Jesu no ngirozi vanodakara maningi. Cimwenizve, ungano yese inodikanavo kujizwa kudaro.—Verenganyi Ruka 15:7.
9. Jehovha anoda kuti vashaishi vaitenyi?
9 Inga zvatavona mbhera wari, zvakajeka kuti Jehovha aatenderi kuti mushaishi acikakhauyi aenderere mberi ari mu ungano. Izvo azvirevi kuti Jehovha wamusiya. Jehovha anoda kuti iyena ahwirirezve kwaari. Bhuku ra Ozeya 14:4, rinonasa kujekesa manera Jehovha anojizwa ngo pamusoro po mushaishi anokhauya. Irona rinoti: “Ndinozovabesera kuti vavezve vandhu vangu vakagondeka. Ndinozovada ngo mwoyo wangu wese, ngokuti andicavacamwiri.” Vakuru veciziva mazwiro a Jehovha, ivona vanogara vecisotesesa citatijo ciri cese cingatanga kukhombijwa ngo mundhuwo, cinovonesa kuti iyena ari kuda kukhauya. Kuna vaya vakasiya Jehovha, magama aya i citatijo kwavari cokuti iyena anovada maningi, cimwenizve anoda kuti ivona vahwirire ku ungano ngokukasika.
10-11. Vakuru vanobeseresa kudini vaya vaano makore akawanda na vavhiswa mu ungano?
10 Kudari ari wese waano makore akawanda naavhiswa mu ungano, vakuru vangamubeseresa kudini? Kangaije mundhuwo aaciripizve kuita zvakashata zvakamuitisaro kuti avhiswe mu ungano. Kangaije iyena aacatoceukiji kuti ngenyi wakavhiswa mu ungano. Azvinenyi kuti i thangwe rapi, vakuru vanoeja kumupsaka kuti vamubesere. Pavanonga vecibhuya naye, vakuru vanoita mukumbiro naye no kumuvangisa kuti ahwirirezve ku ungano. Ngozvokadi kuti mundhu ari kunja ko ungano ko makore akawanda iyena angarembejeka ku divi ro ku mujimu. Ngo kudaro, kudari iyena akananga kuti anoda kuhwirira ku ungano, vakuru vanoita urongwa wo kupsaka ari wese kuti atange kujija naye Bhaibheri pikija acito ahwirijihwa. Pa mugariro wakadari, vakuru kamare vangatomuitisa jijo yo Bhaibheri.
11 Vakuru vanoda kutevejera pena no rudo wa Jehovha, ndiyo ndava, vanopsaka vaya vakasiya Jehovha no kunasa kuvajekesera kuti kudari vecida kuhwirira kuna Jehovha musuvo jakashama. Kudari mushaishi akakhombija kuti wakhauya no kucinja mufambiro wake, iyena angahwijisihwa ngokukasika.—2 Vakorinte 2:6-8.
12. (a) Pa mugariro japi vakuru vanodikana kungwarira maningi? (b) Ngenyi atidikani kurangarira kuti vaya vakaita zvishaishi zvikuru avazoashiri unyasha hwa Jehovha? (Vonanyi masoko o pasi.)
12 Pa mugariro jimweni, vakuru vanodikana kungwarira maningi vacito vahwijisira ari wese. Inga muezaniso, kudari mundhuwo wakambojipa cimwana, kuva mupanduki kana kuronga mazano ari ese kuti apeje mucadho wake, vakuru vanodikana kuva no cokwadi cokuti iyena wakhauyadi kana kuti haiwa. (Marakiya 2:14; 2 Timoti 3:6) Ngozvokadi kuti vakuru vanodikana kujivirira mavhuta. Pa mukuvo umwewo, vakuru vanozviziva kuti Jehovha anotendera mushaishi kuti ahwirire kwaari kudari iyena wakhauyadi kamare no kusiya zvakashata zvaaitaya. Ngo kudaro, vakuru vanodikana kungwarira maningi pavanobhuya no vandhu vakambova vacengejeri kareko, cimwenizve, ivona avadikani kuguma pa mbhejiso yokuti mundhuwo aazoregerehwi ndi Jehovha. c—1 Pedhru 2:10.
UNGANO INODIKANA KUITENYI?
13. (a) Ari wese anonga apangihwa mu ungano, tingamutaja ngo njira yapi? (b) Ari wese anonga avhiswa mu ungano, tingamutaja ngo njira yapi?
13 Inga zvatakavona mu cijijo cakapera, mukuvo umweni panoithwa ciziviso cokuti Mukristu ari wese wapangihwa. Pa mugariro wakadari, itusu tingaenderera mberi tecishamwarijana naye ngokuti tinozviziva kuti iyena wakhauya, cimwenizve aacaitizve zvakashata zvaaitaya. (1 Timoti 5:20) Mundhu uwu anoenderera mberi eciita divi ro ungano, cimwenizve, anoda besero ro hama no hambzaji kuti akwanise kuenderera mberi eciita zviro zvakanaka. (Vahebheru 10:24, 25) Asi mugariro uwu wakasiyana no wo ari wese anonga avhiswa mu ungano. Pa mugariro wakadari, itusu ‘tinoima kushamwarijana’ naye ‘ne kuha naye.’—1 Vakorinte 5:11.
14. Mukristu angashandisisa kudini hana yake yakarovejwa ngo Bhaibheri kuti ataje ari wese wakavhiswa mu ungano? (Vonanyi foto.)
14 Izvi zvinoreva kuti vandhu vakavhiswaro mu ungano aticavadi? Atinganangi kudaro. Zvakajeka kuti itusu atizopeji mukuvo no mundhuwo. Asi kudari mundhuwo wainga umwe wo ukama hwedu kana kuti shamwari yedu yo phedo, tingamukoka kuti aviye kumusongano. Kudari iyena akatendera keni? Kareko itusu aticaicungamijanepi no mundhuwo. Asi wari, Mukristu umwe nga umwe angashandisa hana yake yakarovejwa ngo Bhaibheri kuti ateme civaringo co zvaangaita pa mugariro wondhowo. Kangaije vamweni vangada kucungamija mundhuwo no kumuvhunja kwaviya wakanaka. Pikija zvakadaro, zvinosisira maningi kuceukija kuti atidikani kupeja mukuvo wakareba maningi tecibhuya naye nee kupeja mukuvo teciita zviri zvese naye.
Mukristu umwe nga umwe anotema ega civaringo kuti anoda kukoka mundhu wakavhiswaya mu ungano kuti aviye kumusongano kana kuti anoda kumucungamija paanoviya kumusongano (Vonanyi ndima 14)
15. Mushaishi wapi anonangwa pana 2 Johani 9-11? (Vonanyi bhokiso rinoti: “Kureva Kuti Johani na Pauro Vaibhuya Ngo Cishaishi Cakafanana?”)
15 Kangaije vamweni vangajivhunjisa kudari: ‘Bhaibheri arinangi weya kuti atidikani kucungamijana no mushaishi?’ (Verenganyi 2 Johani 9-11.) Bhuku ro 2 Johani 9-11, rinokhombija kuti izvi zvinoshandiswa ku mundhu wiya waamupanduki kana ari kueja kucengeja vamweni kuti vaitevo zvakashata. (Apokaripsi 2:20) Ndiyo ndava, mundhu anonga ava mupanduki no anocengeja vamweni kuti vaitevo zvakashata, vakuru avadikani kumuvhakacira. Pikija zvakadaro, pacinovetero kuti mundhuwo akhauye no kucinja mufambiro wake. Kudari izvi zvikatama kuitika, itusu atizocungamijani no mundhuwo nee kumukoka kuti aviye kumusongano.
TEVEJERANYI PENA NO UNYASHA HWA JEHOVHA
16-17. (a) Jehovha anoda kuti vashaishi vaitenyi? (Ezekiyeri 18:32) (b) Vakuru vangashanda kudini pamwepo na Jehovha kuti vaeje kubesera mushaishi?
16 Ngozvapi zvatajija mu zvijijo zvinokwana kuita zvishanu zvo Murindiri uno? Tajija kuti Jehovha aadi kuti ari wese aparajwe. (Verenganyi Ezekiyeri 18:32.) Iyena anoda kuti vashaishi vese vahwirire kwaari. (2 Vakorinte 5:20) Ndiyo ndava Jehovha mukuvo wese anokumbira kuti vaya vakaita zviro zvakashata vakhauye no kuhwirira kwaari. Vakuru vanocidakajiso cokushanda pamwepo na Jehovha kuitira kubesera vaya vakaita zvishaishi zvikuru kuti vakhauye.—Varoma 2:4; 1 Vakorinte 3:9.
17 Kudenga kunova no mudakaro mukuru maningi mushaishi paanokhauya. Baba wedu vo kudenga Jehovha, vanodakara maningi pavanovona vhuta rakasvejeka recihwirira ku ungano. Rudo hwedu kuna Jehovha unoengejeka maningi paya patinorangarijisisa ngo pamusoro po pena, kunaka mwoyo no unyasha hwake ucikaezaniswi.—Ruka 1:78.
NDUMBO 111 Zvinotiita kuti Tidakare
a Cijijo ici no zvimweni, zvavonesa kuti tese tiri vandhu vanoposa, azvinenyi i hama kana hambzaji.
b Kutangira nyamasi aticashandisizve gama rokuti wajingwa. Mukuzwirana no magama a Pauro pa 1 Vakorinte 5:13, tinozoshandisa gama rokuti wavhiswa mu ungano.
c Bhaibheri rinonanga kuti vandhu vamweni avadikani kuregerehwa, izvi zviri kurevera vaya vanotema civaringo cokwenderera mberi vecihwisana no ndhungamiriro ja Jehovha. Ndi Jehovha basi na Jesu vangavona kuti mundhu uwu anodikana kuregerehwa kana kuti haiwa.—Marko 3:29; Vahebheru 10:26, 27.
