Jesu wakajija kuva no mugariro jakanaka jo kuti pakufamba ko nguva jakazomubesera kuva muezaniso wo kushanda ushoni no vamweni paainga ari pasi pano. Waro tingabesereka kudini ngo muezaniso wa Jesu? Ngo kujija muezaniso wake, tinokwanisa kuwana ndhungamiriro ndhatu jinotibesera kuti tinase kushanda ushoni no vamweni. Ndhungamiriro iji jinozonasa kutibesera kuti tive vandhu vano mujimu wo kubatana no kuzwirana.

Mundhu anoshanda ushoni no vamweni anojidodokesa. Iyena anovona vadoni vake kuva vanosisira maningi kusiyapo kujivona ega pacake. Jesu wakajijira kujidodokesa kuvha kuna Baba wake. Jehovha ndiyena anofanera ega kudanijwa Musiki, asi iyena wakaita kuti vamweni vazive ngo basa rinosisira rakaitwa ngo Mwana wake. Tinokwanisa kuvona izvi ngo magama aakananga o kuti: “Ngatiite mundhu ngo muezaniso wedu.” (Genesi 1:26) Jehovha paakananga magama aya, Jesu wakaziva kamare kuti Jehovha anojidodokesa maningi.—Nduyo 18:36.

Paainga ari pasi pano, Jesu wakakhombijavo mugariro uwu wokujidodokesa. Vandhu pavakamusimba ngo zviro zvaakaita, iyena wakatora rukujo wondhowo ohupekeja Mwari. (Marko 10:17, 18; Johani 7:15, 16) Jesu waishanda ngo simba kuti arambe ano runyararo no vajiji vake no kuvavona inga shamwari haiwa inga varanda. (Johani 15:15) Iyena wakatosuka soka javo kuti avape cijijo co kujidodokesa. (Johani 13:5, 12-14) Inga ndi  Jesu itusu tinoreremejavo vadoni vedu vatinoshanda navo ngo kudira zvido zvavo pakutanga. Tikakhombija kuti ‘tinoreremejana ngocedu’ no kutama kuneseka kuti ndiyani anozowana rukujo pazviro zvatiri kuitaro, tinozonasa kubudirira ushoni.—Varoma 12:10.

Mundhu anojidodokesa anozivavo kuti “pano vapangiri vakawanda, mabasa anobuda uxoni.” (Mazwi Akangwara 15:22) Azvinenyi kuti tinoziva maningi kana kuti tinokwanisa kuita maningi zviro, tinodikana kuceukija kuti akuna mundhu anoziva zvese. Pikija Jesu waizvizivavo kuti painga no zviro zvaainga acikazivi. (Mateu 24:36) Cimwenizve, iyena waidakariravo kuziva kuti ngozvapi zvairangarihwa no kuzivika ngo vajiji vake vacizivi kukukwana. (Mateu 16:13-16) Pacina kukana-kana vayana vaaishanda navo vaijizwavo ushoni. Ngo njira yondhoyo, kudari tikajidodokesa toceukija kuti atizivi zviro zvese no kutendera mazano o vamweni, tinozomusijira runyararo perapo zvese zvatinoita zvinozobudirira “uxoni.”

Zvinosisira maningi kuti vakuru vatevejere mgariro wa Jesu wo kujidodokesa pavanonga vecishanda no vamweni. Ivona vanodikana kuceukija kuti mujimu mucena unokwanisa kubesera umwe nga umwe anonga ari pacikwata co vakuru. Pamusongano javanoita, vakuru vanodikana kuva no cokwadi co kuti umwe na umwe anonga aripo ave akasujunuka kunanga mavonero ake. Kudari vakaita kudaro, vanozotema zvivaringo zvinozobesera ungano yese.

Mundhu anoshanda ushoni no vamweni anonasa kuzwisisa vandhu vaanoshanda navo. Iyena mundhu wakapfava no anozwa mazano o vamweni. Jesu wakava no mukana jakawanda maningi jo kuvona kuzwisisa kwaiita Baba wake. Inga muezaniso Jehovha wakamutuma kuti aponese vandhu vakatongehwa rufu.—Johani 3:16.

Pazvaidikana weya kana pazvaikwanisika Jesu waitendera kuzwa zvainangwa ngo vamweni. Ceukijanyi manera aakabesera mwanakaji wo Fenisiya, pikija kuti iyena wainga wakatumihwa kujinja ro Vaziraeri. (Mateu 15:22-28) Iyena wakava mundhu anozwisisa pa zviro zvaaivetera kuti vajiji vake vaite. Pasure pokurambwa ngo shamwari yake yo phedo Pedhru, pambeji po vandhu vazinji, Jesu wainga wakanasiririka kuti amuregerere. Pakufamba ko nguva iyena wakapekeja Pedhru basa rinosisira maningi. (Ruka 22:32; Johani 21:17; Mabasa o Vapostori 2:14; 8:14-17; 10:44, 45) Muezaniso wa Jesu unonasa kukhombija kuti tinodikana kusiya kuti “kuzwisisa [kwedu] kuzivike  ngo vandhu vese” ngo kutendera zvinonangwa ngo vamweni.—Vafiripi 4:5.

Kuva vandhu vanozwisisa, kunotiita kuti tinase kushanda no mushovo wese wo vandhu ngo runyararo. Jesu wakataja ushoni vese vaimutendeneja zvokuti vandhu vakaguma pakumupumbha kuti iyena “ano ushamwari no vashabisi pomwe no vashaishi” vandhu vaiashiraya masoko ake. (Mateu 11:19) Kudari inga ndi Jesu, kureva kuti tingakwanisavo kushanda ushoni no vandhu vakasiyana na itusu? Hama Ruwijhi avo vakapeja nguva zinji vecishanda inga muvonereri wo ndharaundha no kushandazve pa Bheteri no vandhu vakasiyana-siyana, vakananga kuti: “Kushanda pamwepo no vandhu vamweni vacizivi kukwana zvakadari inga kuvaka mupfimbiji ngo mapuwe acizivi kuezana. Zvecivoneka kuti mapuwe aya aazivi kuezana zvinoda kuvangisira maningi, asi mupfimbiji uwu ungava wakarungama kamare. Ndakaeja kuita cinjo mu upenyu hwangu kuti ndikwanise kushanda no vamweni ngo runyararo. Ngo kudaro, basa raizobuda ushoni.” Uwu imugariro waushoni maningi.

Mukana japi jatinajo jatingakhombija ndijona kuti itusu tiri vandhu vanozwisisa ku vandhu vese vari mu ungano yedu? Tino mukana wokuita izvi patinonga tino cikwata cedu cokuita basa rokucumaera. Tingaenda kocumaera no vacumaeri vano mutoro jakasiyana-siyana pa mbhuri, jakasiyana no jedu kana vo mupira wakasiyana no wedu. Waro itusu tingakwanisa kucinja maitiro edu kuti tikwanise kuvadakajisa mu basa rokucumaera?

Mundhu anoshanda ushoni no vamweni, ano “cido cokukovana.” (1 Timoti 6:18) Paainga ecishanda na Baba wake, Jesu wakavona kuti ivona avacaivigepi zviro. Apo Jehovha “waivangisa denga” Jesu ‘wainga aripo’ ecijija zvakawanda na Baba wake. (Mazwi Akangwara 8:27) Pakufamba ko nguva, Jesu pacake wakazovhunja vajiji ‘zviro zvese [zvaainga] akazwa’ kuvha ka Baba wake. (Johani 15:15) Tingatevejera muezaniso wa Jehovha, ngo kuvhunja hama no hambzaji jedu zviya zvatakajija. Zvokadi, mundhu anoshanda ushoni no vamweni aaeji kuvatonga no kuregera kuvavhunja masoko aizovabesera. Iyena anodakara ngo kuvhunja vamweni zviro zvakanaka zvaakajijira.

Tinodikana kuvhunja vatinoshanda navo masoko anovangisa. Kudari mundhu akavona kuvangisira kwatiri kuita, osimba zvatiri kuitaro ngo mwoyo wese, zvondhozvo azvitiiti kuti tijizwe ushoni? Jesu waipsaka nguva yo kuvhunja vajiji vake zviro zvaushoni zvaaivona zvavainga veciita. (Ezanisanyi na Mateu 25:19-23; Ruka 10:17-20.) Atee iyena wakatovavhunja kuti ivona vaizoita “mabasa makuru kupinda” aakaita. (Johani 14:12) Pa usiku acito auraiwa, Jesu wakavhunja vapostori vake vakagondeka kuti: “Imwimwi ndimwi magara na inini pa muejo jangu.” (Ruka 22:28) Amborangariranyi manera avakavangiswa no kubeswa ngo masoko aya kuti vaite zviri zvese. Kudari tikasimbavo vatinoshanda navo, zvokadi kamare ivona vanozowana mudakaro no kunasa kubudirira.

Hama imweni inodanijwa Kayodhe, yakati: “Mundhu anoshanda ushoni no vamweni aadikani kuva wakakwana. Asi anoita kuti vaanoshanda navo vadakare no kuita kuti basero rireruke.” Imwimwi muri mundhu anoshanda kudeya no vamweni? Ngenyi amuvhunjisi hama no hambzaji jmweni jo Cikristu, kuti muzive kuti, ivona vanovonesa kudini manera amunoshanda no vamweni? Inga vajiji va Jesu vaidakajihwa ngo kushanda na iyena, imwimwi munganangavo masoko akanangwa ngo mupostori Pauro o kuti: “Tinoshanda pamwepo tese kuti muve no mudakaro.”—2 VaKorinte 1:24.