Jehovha wakavhunja Vaiziraeri kuti vaidikana kuva vakacena. Kuti avabesere kuva vakacena iyena wakavavhunja kuti: “Ucazotokotesa bzakaxata bzo hama jako wecinyepa; ucazoitira mudoni wako ndava yo ngazi. Ndini Tenji Mwari.”—VaLevi 19:2, 16.

Magama o kuti “ucazoitira mudoni wako ndava” anonasa kudurujira zvakatahwa pakutanga ngo ndumi yo Cihebheru. Asi iwona anoda kurevenyi? Bhuku rimweni ro Vajudha rinobhuya ngo pamusoro po bhuku ro Varevhi, rakananga kuti: “Divi iri ro vhesi iyi . . . rinonesa maningi kurizwisisa ngo kuti zvinonesa kamare kuda kuziva zvaida kunangwa ngo ndumi iyi yo Cihebheru. Kudari akasandujwa gama ngo gama, magama aya anoda kureva kuti ‘ucadoima phedo na phedo.’”

Vazivi vamweni vanorangarira kuti magama aya anozwirana no magama anowanika pa vhesi 15, inonanga kuti: “Mucazoita bzicikazivi kururama pa kutonga. Ucazokheta mundhu, wecisia murombo; ucazothya ukuru hwo mundhu; unozotonga mudoni wako ngo kururama.” (VaLevi 19:15) Ngo kudaro, mutemo unowanika pa vhesi 16 wo kuti ‘ucadoitira ndava mudoni wako,’ waireva kuti vandhu va Mwari avacaidikana kukhuvaza mudoni wavo pakutonga, pakuita nyagoso, pa shwiro jo mbhuri no kusiya kuita zviro zvokutama kugondeka kuitira kujibesera. Zvokadi kamare atidikani kuita zviro izvi. Asi pano manera akanakisisa o kuti tinase kuzwisisa magama aya anowanikari pa vhesi 16.

Ngativone divi ro kutanga ro vhesi iyi. Mwari wakavhunja vandhu vake kuti avacaidikana kundhandhanisa manyepo. Zvokadi mundhu anoenda koreva umweni anomusa zvineso, asi mundhu anonyepa zvinoshatisisa maningi kamare. (Mazwi Akangwara 10:19; Mucumaeri 10:12-14; 1 Timoti 5:11-15; Jakobo 3:6) Kazinji manyepo ikunangira zviro zvakashata ngo cabomo no cinangwa cokuda kupsipisa mufambiro wo mundhu. Manyepo ikuita ucapupu hwakashata hwokunyepera mundhu pikija kuti zvondhozvo zvingatoita kuti mundhuwo afe. Ceukijanyi ngo vanarume vakananga manyepo ngo pamusoro pa Nabhoti, zvoita kuti afuhwe ngo mapuwe. (1 Majimambo 21:8-13) Hina, munyepi angava no ndava yo ngazi no mudoni wake inga zvinonangwa pa divi ro cipiri ro bhuku ra VaLevi 19:16.

Cimwenizve, cinoita kuti mundhu aende konyepera umweni ngo cokuti iyena anonga ecimuzonda. Pana 1 Johani 3:15, tinoverenga kudari: “Wiya anozonda hama yake, muurayi, imwimwi munozviziva kuti apana muurayi anowana upenyu hucikaperi.” Jehovha paakapera kunanga magama anowanika pa vhesi 16 wakaengejera eciti: “Ucazonyenya mu mwoyo wako hama yako.”—VaLevi 19:17.

Ngo kudaro, magama anowanika pana VaLevi 19:16, anotipa mbhangiro yakavanga kamare itusu Makristu. Itusu tinodikana kuramba kamare murangariro wakashata no kunyepera vandhu vamweni. Mukugurisira, kudari ‘tikaitira ndava mudoni wedu’ tomunyepera ngo kuti atimudakariri kana tino thima na iyena, zvondhozvo zvinonasa kuvonesa kuti tinomuzonda. Makristu aadikani kamare kuita zviro izvi.—Mateu 12:36, 37.