I COKWADI kuti imwimwi munobongesera maningi Jehovha ngo ndava yo cipo caakamupekeja. Kubatanija rusujunuko hwamunahwo hwokukheta no mashandisire amungaita zvipo izvi. Mukuzwirana no Bhaibheri: ‘Cokuha cakaitihwa kuti mundhu adakare, vhinyu inoita kuti upenyu uve unodakajisa.’ (Mucumaeri 10:19; Nduyo 104:​15, Sandujo yo Nyika Imbza) Kangaije imwimwi munovona kuti vamweni vano cineso ngo pamusoro po doro. Kunja kwa izvi, kusiyana ko nyika no zvirovejeso, vandhu vano mavonero akasiyana ngo pamusoro po shwiro iyi. Waro ngozvapi zvingabesera Mukristu kuti ateme civaringo caushoni ngo pamusoro po doro?

Azvinenyi ngo kwapi kwatinogara kana kuti kwatakakurira no zvirovejeso zvotakakura nazvo, itusu tinodikana kuthemba mbhangiro ja Mwari, tikaita kudaro, tinozova no upenyu unodakajisa.

Inga zvatiri kuvona vandhu vazinji mu nyika ino vanomwa maningi doro. Vamweni vanomwa maningi doro ngokuti vanoridakarira, vamweni vanomwa maningi doro kuti vatame kurangarira maningi zvineso zvavo. Mu ndau jimweni mundhu anomwa maningi doro anovoneka inga wakavanga maningi.

Zvinodakajisa ngozvokuti Makristu anovetera kuva no ndhungamiriro jo Musiki wavo. Inga muezaniso, Jehovha anobhuya ngo muviyo unovepo no vandhu vanomwa maningi doro. Pana Mazwi Akangwara 23:​29-35, tinoverenga ngo pamusoro po ciitiko co mundhu wainga cidhakwa no muviyo jakashata jakazovepo. a Hama Dhanyeri umwe mukuru wo ku Europa vanoceukija manera ainga akaita upenyu hwavo pavainga vacito vajija ngo pamusoro pa Jehovha no kushandisa ndhungamiriro jake. Ivona vakati: “Inini ndaimwa maningi doro, ngo kudaro, ndakatema zvivaringo zvainga zvakashata, muviyo jakona ajizivi kuva jaushoni, mbhera nyamasi pandinorangarira ngo pamusoro pazvo, ndino suruvara.”

Tingaitisa kudini kuti titeme zvivaringo ngo pamusoro po doro kuti tizotame kuva no muviyo jakashata ngo ndava yo kumwisa maningi doro? Tinodikana kutendera kuti uzivi hwa Mwari hutungamirire zvivaringo zvedu.

Ngatende tivone kuti Bhaibheri rinonangenyi ngo pamusoro po doro tivonezve kuti ngenyi vandhu vanomwa doro.

Bhaibheri rinonanga kuti azvizivi kushata kumwa no mudida. Kunasa kunanga irona rinonanga kuti kumwa vhinyu i ciro cinodakajisa. Bhaibheri rinoti: ‘Ihai mukate wako ngo kudakara, imwai wecibusa doro rako.’ (Mucumaeri 9:7) Jesu nguva jimweni waitomwavo vhinyu kubatanijavo no vashandiri vamweni vakagondeka va Jehovha.—Mateu 26:​27-29; Ruka 7:34; 1 Timoti 5:23.

Bhaibheri rinokhombija kuti pano musiyano wo kumwa padoko no kudhakwa. Irona rinonasa kujekesa parinoti: “Mucarejera ngo vhinyu.” (Vaefeso 5:18) Irona rinonangazve kuti: “Vanodhakwa . . . avazogari utaka mu Umambo hwa Mwari.” (1 Vakorinte 6:10) Zvinonasa kuvoneka kuti Jehovha aadi vanomwisa maningi doro no vanodhakwa. Kusiyapo kutevejera vandhu vakatitendeneja itusu tinoita zviro mukuzwirana no zvinodakajisa Mwari. Vamweni vanorangarira kuti vangamwa votama kurejera asi iyi i ngozi huru.

Bhaibheri rinonasa kujekesa kuti vaya vari “varanda vodoro” vangagumira pakuita cishaishi cakakura maningi pamberi pa Mwari. (Tito 2:3; Mazwi Akangwara 20:1) Jesu wakatojekesazve kuti ‘kumwisa’ maningi doro kungatora mundhu kuti  atame kunghwina mu nyika imbza ya Mwari. (Ruka 21:​34-36) Ngozvapi zvingabesera Mukristu kuti atame kuwana muviyo jinowanika ngo ndava yo kumwisa maningi doro?

Zvaizova zvakashata maningi kutendera kuti zvirovejeso zvo ku ndau kotakakurira zvipsase mavonero edu ngo pamusoro po doro. Inga Makristu, itusu tinoda kudakajisa Jehovha mu zvese, kubatanijavo pa zviro zvokuha no kumwa. Bhaibheri rinoticeukija kuti: “Meciha nokuti kumwa, dangani meciita zviri zvese hazvo, zviitenyi mecikuja Mwari.” (1 Vakorinte 10:31) Rangariranyi ngo pamusoro po muvhunjo iji:

Kureva kuti ndinomwa doro kuti ndidakarihwe ngo vandhu vamweni? Exodo 23:​2, inoti: ‘Mucatevera vandhu vazinji.’ Apa Jehovha wainga ecingwaja Vaiziraeri kuti vatame kutevejera vandhu vokuti avacaimudakajisa. Mbhangiro iyi inoshandavo kwatiri nyamasi uno. Kudari tikatendera kuti vandhu vamweni vapsase murangariro no mazwiro edu ngo pamusoro po doro zvingazotitora kuti tiparajane na Jehovha no ndhungamiriro jake.—Varoma 12:2.

Kureva kuti ndinomwa doro kuti ndikhombije kuti ndakavanga? Mu ndau jimweni ngo zvocirovejeso kumwa maningi doro. (1 Pedhru 4:3) Vonanyi basi zvinonanga 1 Vakorinte 16:13. Iyona inoti: “Garanyi makamuka, imanyi makavanga mu rutendo, ivanyi makacunga, ivanyi no simba.” Kureva kuti doro ringabesera mundhu kuti ave wakavanga? Haiwa andizvopi. Irona rinoita kuti mundhu atame kurangarira ushoni no kutama kutema zvivaringo zvaushoni. Kusiyapo kuti muve makavanga, kumwa maningi doro kunomuita kuti muve makaremba. Isaia 28:​7, inonanga kuti vandhu vanomwa maningi doro vanozoguma pakukhuvazika.

Simba rokadi rinovha kuna Jehovha nokutizve irona rinotiita kuti tirambe takamuka no kuvanga mu rutendo. (Nduyo 18:32) Itusu tingakwanisa kuita zvondhozvo ngo kuva vandhu vanongwarira mukuvo wese no kutema zvivaringo zvinojivirira ushamwari hwedu na Jehovha. Jesu wakakhombija simba rondhoro paainga pasi pano nokutizve vandhu vazinji vaimureremeja inga mwanarume wakavanga no wakacunga.

Kureva kuti inini ndinomwa doro kuti nditame kugara ndecithimwa-thimwa ngo pamusoro po  zvineso zvangu? Mutari wo nduyo wakafemehwa kuti atare masoko aya: ‘Imwimwi makandiembejera no kundinyaraja.’ (Nduyo 94:​19, Sandujo yo Nyika Imbza) Ngo kudaro, kudari imwimwi muri kuthimwa-thimwa ngo ndava yo zvineso zviri zvese thembanyi Jehovha haiwa doro. Njira imwe yokuita ndiyona izvi, ngo yokuita mukumbiro kuna Jehovha. Vamweni vanopsaka besero riri rese ku hama jakaivha mu ungano, zvondhozvo zvinovabesera maningi. Kunasa kunanga, kumwa maningi doro inga manera o kuhwisana no zvineso, kungasiya mundhu acina simba rokuita zviro zvakanaka. (Ozeya 4:11) Hama Dhanyeri vambonangwaya, ivona vakananga kudari: “Inini ndaitambujika ngo ndava yokugara ndecithimwa-thimwa no mazwiro o kujipa ndava, ndaimwa doro kuti ndihwisane no zvineso izvi, asi zvinesozvo zvaienderera mberi zveciengejeka zvoita kuti ndiruze shamwari jangu no kutotama nderemejo pacangu.” Asi ngozvapi zvakabesera hama Dhanyeri? Ivona vakati: “Inini ndakazwisisa kuti ndakadikana kuva na Jehovha padivi rangu haiwa doro. Pakupejisira ndakakwanisa kuhwisana no zvineso zvandaisonganari nazvo” no kuzvinyisa. Zvokadi ngo zvokuti Jehovha mukuvo wese wakanasiririka kuti atibesere pikija pazvinovoneka inga kuti zvineso zvedu azviperi.—Vafiripi 4:​6, 7; 1 Pedhru 5:7.

Kudari imwimwi munomwa doro, mungavona dangani munoda kuita cinjo iri yese mukuzwirana no muvhunjo iji: ‘Kureva kuti ari wese wo pambhuri yangu kana kuti shamwari yangu yo phedo yakakhombija kuneseka ngo pamusoro po cirovejeso cangu cokumwa doro?’ Kudari ndizvona, cingava citatijo cokuti imwimwi muri kuva no cirovejeso kana kuti cineso cokuti amuto mecizwisisa. ‘Kureva kuti ndiri kumwa kupinda kare?’ Ari wese angava pamugariro wakadari zvingaita kuti aato apindhwa ngo doro asi ari kwenda mugwanja rondhoro. ‘Kureva kuti inini ndinokwanisa kugara ndicikamwi doro ko njiku jakatikuti kana kuti jakatowanda?’ Kudari munorangarira kuti zvinonesa izvi zvinovonesa kuti imwimwi mapindhwa ngo doro. Kudari zvakadaro, munodikana kukumbira besero kuti munyise cineso ici.

Ngo ndava yo zvineso zvimweni zvingamuka ngo ndava yo kumwa doro vamweni vanotema civaringo  cokutama kumwa. Kangaije vamweni avamwi doro ngokuti avaridakariri. Zvaizova zvoungwaru kwatiri kureremeja civaringo co mundhu umwe nga umwe kusiyapo kumutonga.

Zvingaita kuti imwimwi makavona kuti ngo zvo ungwaru kuvona pamunodikana kuimira kana kuti imwimwi mungatovona kuti ngopapi pamunodikana kuti mumwe, kangaije kamwe pa sumana kana kumwa pese pamunonga meciha. Vamweni vakatema civaringo cokuvona kuti ndi doro rapi ravangadikana kumwa, inga muezaniso, kumwa basi vhinyu kana kuti serevhejha zvinomudida asi vomwa doro ricikadhakwisi no ricizivi kuvhengenganijwa. Kudari imwimwi mukadira mugano iji zvinozoreruka kuzojishandisa paya pamunoda kumwa. Mukristu wakaivha anodira mugano iji aatovi no nyowa ngo pamusoro po zvinozorangarihwa ngo vamweni.

Zvinosisira maningi kureremeja zvinorangarihwa ngo vamweni. Pana Varoma 14:21 inonanga kuti: “Zviri nane kutama kuha nyama no kumwa vhinyu kana kutama kuita ciri cese haco cinokhugunya hama yako.” Mungashandisisa kudini ndhungamiriro iyi? Khombijanyi rudo. Kudari mukazwisisa kuti hama iri yese ingakhugunyika kudari mukamwa doro rinodhakwisa azvicaizova zvaushoni kutama kumwa kuitira kureremeja mavonero o hama yenyu? Mu njira iyi tinokhombija kuneseka kwedu no nderemejo ngo pamusoro po mazwiro o vamweni tecipsakavo zvinovadakajisa haiwa zvinotidakajisa basi.—1 Vakorinte 10:24.

Kunja kwa zvondhozvo, zvingaita kuti utongi uno mutemo ngo pamusoro po doro, zvakajeka kuti Mukristu anozwira mutemo iji. Inga muezaniso, mutemo iji jingabatanija shwiro yokuti mundhu anodikana kumwa doro aanomupira wapi kana kuti pano mutemo unorambija kushandisa makina paunopeja kumwa doro.—Varoma 13:​1-5.

Jehovha wakatipa zvipo zvinoshamaisa, cimwe co zvipo izvi ngo cokukheta kuti toshandisisa kudini zvipo zvaakatipekejaro. Izvi zvinobatanija zvatinoda kuha no zvatinoda kumwa. Pacina kukana-kana, tinobongesera maningi ngo rusujunuko wokuzvikhetera, tinoda kubongesera ngokutema zvivaringo zvinodakajisa Jehovha.