Kunanga kuti makanasa kuverenga musoro jo kujija jo Murindiri jo gore iri here? Kudari makajiverenga, vonanyi dangani mungakwanisa kudavira muvhunjo iji:

Zvinoda kunangenyi ‘kucinja murangariro wenyu’? (Varoma 12:2)

Atidikani basi kuvonesa inga kuti tino zviito zvakanaka mu upenyu wedu. Asi tinodikana kujipopora ngo mukati, toiita cinjo jinodiwa kuti tidakajise Jehovha.—Murindiri wa 01/23 pheji 8-9.

Tingaitisa kudini kuti tive takaezanana patinozwa zvinoitika mu nyika?

Itusu tinoda kuzwa zvinoitika mu nyika ngokuti zvizinji zvakona zviri kukwanirisa zviporofita zvo mu Bhaibheri. Asi kusiyapo kugara tecirangarira ngo zviro zvinozoitika zvingatiparajanisa, tinodikana kuziva masoko anovha ku sangano ra Jehovha. (1 Vakorinte 1:10) —Murindiri wa 02/23 pheji 16.

Kuitisa kudini rubhabhatijo hwa Jesu wakasiyana no wo vajiji vake?

Iyena aazivi kudikana kuzvipira kuna Jehovha ngokuti wakabahwa mu jinja rakazvipira kuna Mwari. Iyena wainga mundhu wakakwana, ngo kudaro wainga acina dikano yokucinyuka pa zvishaishi zviri zvese.—Murindiri wa 03/23 pheji 5.

Mungabeseresa kudini vamweni kuti vadavire pa musongano?

Tingapa mupinguro jakafupika. Tikaita kudaro vamweni vanozowanavo mukana kuti vadavireyo. Kusiapo izvi, patinodavira atidikani kunanga mafundo mazinji. Kudari mukadavira ndima yese, zvinozonesa kuti vamweni vadavirevo.—Murindiri wa 04/23 pheji 23.

Icinyi “Gwanja ro Uceni” rinonangwa pana Isaia 35:8?

Gwanja iri rokuezanisira rainangira hwendo waiizwa ngo Vajudha kuvha ku Bhabhironiya kwenda ku Jerusarema. Asi gwanja iri rinorevenyi kwatiri nyamasi uno? Ko makore mazinji akapera ricito raguma gore ra 1919, ngo njira yokuezanisira, tingati kuno gwanja rakanasirihwa, pecibatanijwa kusanduja, kuimprimihwi ko Mabhaibheri no zviro zvimwenivo. Vandhu va Mwari vari kufamba mu “Gwanja ro Uceni” vakasota mu paradhiso yo kumujimu, inozotibesera kuti tiwane makomborero o Umambo.—Murindiri wa 05/23 pheji 15-19.

Mazwi Akangwara cipauko 9 cinopa mbhangiro yapi ngo pamusoro po vanakaji vaviri vokuezanisira?

Mazwi Akangwara anobhuya ngo ‘mwanakaji ari benji’ mukoka wake unoendesa mu “Iba” asi “uzivi hwo cokwadi,” unoendesa mu “gwanja ro uzivi” no upenyu. (Mazwi Akangwara 9:​1, 6, 13, 18)—Murindiri wa 06/23 pheji 22-24.

Mwari wakazvikhombijisa kudini kuti anojidodokesa no kuva wakaezanana ku shamwari yake Roti?

Jehovha wakavhunja Roti kuti atize ku Sodhoma kuenda ku matundhu. Iyena paakakumbira kutizira ku Zowari Jehovha wakatendera cikumbiro cake.—Murindiri wa 07/23 pheji 21.

Mukaji angaitenyi paanovona mwamuna wake ecivona zvoumitumitu?

Iyena anodikana kuceukija kuti aana ndava. Iyena anodikana kubatikana pa ushamwari hwake na Mwari no kurangarijisisa ngo pamusoro po zviitiko zvinowanika mu Bhaibheri zvinobhuya ngo pamusoro po vanakaji vaingavo no zvineso zvondhozvo no manera avakawana vangiso yaivha kuna Jehovha. Iyena angabesera mwamuna wake kuti atame kuvona zviro zvinoviisa ngozi.— Murindiri wa 08/23 pheji 14-17.

Patinovhunjiswa ngo pamusoro po zvatinotenda, zviitiko zvingatibeseresa kudini kuti tive vandhu vakanaka mwoyo pakudavira?

Munodikana kuvona muvhunjo kana cineso inga njira yokujija zvinorangarihwa ngo vamweni no zvavanoneseka ndizvona. Ngo kudaro, tinova takanasiririka kuti tidavire ngo njira yokunaka mwoyo.— Murindiri wa 09/23 pheji 17.

Ngozvapi zvatingajija kuvha kuna Mariya ngo pamusoro po kuwana simba?

Eciziva kuti waizova mai wa Mesiya, Mariya wakawana simba kuvha ku vamweni. Gabhirieri na Erizabheti vakapa Mariya vangiso yaivha mu Bhaibheri. Itusu tingawanavo simba kuvha kuvanamatidoni vedu.—Murindiri wa 10/23 pheji 15.

Jehovha anodavirisa kudini mukumbiro jedu?

Iyena anogondesa kuzwa mukumbiro jedu no kuvona kuti jinobatana papi no kuda kwake. (Jeremia 29:12) Iyena anodavira mukumbiro jedu ngo manera akasiyana-siyana, asi anoenderera mberi ecitibesera mukuvo wese.—Murindiri wa 11/23 pheji 21-22.

Varoma 5:2 inobhuya ngo “vetero,” kuveni vetero iyi inobhuiwazve mu cipauko 4, ngenyi?

Mundhu paanozwa masoko akanaka, anowana vetero yo kubusa upenyu mu Paradhiso pasi pano. Asi paanohwisana no matambujiko, ocungirira ovona kuti ari kutendehwa ndi Mwari, vetero yake kangaije inozovanga maningi, yozova yake pacake.—Murindiri wa 12/23 pheji 12-13.