1. Ngenyi Abhirahama wakava no rutendo kuti waizova no mwana?

 JEHOVHA wakagondesa shamwari yake Abhirahama kuti waizova no mwana. Wakamugondesazve kuti vandhu vo majinja ese vaizokomborehwa ngo ndava yake. (Genesi 15:5; 22:18) Abhirahama wainga no rutendo wakavanga maningi kuna Mwari, ngo iyo ndava wainga no cokwadi cokuti Mwari waizokwanirisa cigondiso cake. Asi pikija Abhirahama wainga no makore anokwana kuita 100, Sara wainga no makore anokwana kuita 90, vovaviri vainga vacito vaano mwana. (Genesi 21:​1-7) Bhaibheri rinonanga kudari: “[Abhirahama] wainga ano rutendo hwo vetero hwokuti njiku imweni anozova baba wo majinja mazinji, mukuzwirana no zvakanangwa.” (Varoma 4:18) Imwimwi munozviziva kuti zvaivetehwaya ndi Abhirahama zvakazoitika. Iyena wakava baba wa Izaki, mwana waivetera. Asi ngenyi Abhirahama waidikana kuva no vetero iyi kuna Jehovha?

2. Ngenyi Abhirahama wakava no cokwadi cokuti cigondiso ca Jehovha caizokwanirisika?

² Abhirahama wainasa kuziva Jehovha, ngo iyo ndava iyena wainga no “cokwadi co kuti Mwari waizokwanisa kuita zvaakagondesa.” (Varoma 4:21) Jehovha wakatendera Abhirahama, wonanga kuti iyena i mururami ngo ndava yo rutendo hwake. (Jakobo 2:23) Inga zvinovoneswa pana Varoma 4:18 rutendo no vetero zva Abhirahama zvainga zvakabatana. Mukuzwirana no Varoma cipauko co 5, ngatende tivone kuti Pauro wakabhuyenyi ngo pamusoro po vetero.

3. Pauro wakanangenyi ngo pamusoro po vetero?

³ Pauro anosanangura kuti ngenyi tingava no cokwadi cokuti “vetero aitiiti kuti ticamwe.” (Varoma 5:5) Iyena anotibeseravo kuzwisisa kuti tingavangisa kudini vetero yedu. Itusu tinoda kupopora zvinowanika pa bhuku ra Varoma  5:​1-5. Patinonga tecibhuisana ngo pamusoro po bhuku ra Varoma 5:​1-5, rangariranyi kuti vetero yenyu ngo pamusoro po kumbeji iri kuvangiswa kudini pa kufamba ko nguva. Pa kubhuisana uku, munozovonavo zvingamubesera kuti muenderere mberi mecivangisa vetero yenyu. Pakutanga, ngatende tivone ngo pamusoro po vetero inoshamaisa yakanangwa ndi mupostori Pauro icikaticamwisi.

4. Ngozvapi zvinobhuiwa pana Varoma 5:​1, 2?

⁴ Verenganyi Varoma 5:​1, 2. Pauro wakatara masoko aya ku ungano yo ku Roma. Hama jo ku ungano iyi, jakajija ngo pamusoro pa Jehovha na Jesu jovangisa rutendo hwajo ngo kuva Makristu. Ngo kudaro, Mwari wakananga kuti ivona vainga “varurami ngo ndava yo rutendo” hwavo perapo ovazoja ngo mujimu mucena. Ivona vaivetera kupocera mupocero unoshamaisa nokutizve vaidikana kuva no cokwadi co kuti izvi zvaizotika.

5. Ngoyapi vetero ino vokuzojwa?

⁵ Pauro wakatarira Makristu o kuzojwa o ku Efeso ngo pamusoro po vetero yavo yavainga vakaashira. Vetero iyi yaibatanija kuashira “zvaakagondesa ku vatendi doni.” (Vaefeso 1:18) Cimwenizve, Pauro paakatarira Vakorose iyena wakavavhunja kuti vaizoashira kwapi mupocero uwu. Pauro wakananga kuti ‘vetero yavo yainga yakavigwa ku denga.’ (Vakorose 1:​4, 5) Ngo kudaro, vetero yo Makristu okuzojwa ngo yo kuzomuswa kuti vaende korarama kudenga na Kristu.—1 Vatesaronika 4:​13-17; Apokaripsi 20:6.

6. Hama imweni yo kuzojwa yakabhuyenyi ngo pamusoro po vetero yayo?

⁶ Makristu okuzojwa, anoreremeja maningi vetero iyi. Hama imweni yo kuzojwa inozwi Fredherick Franz, njiku imweni yakananga kudari ngo manera o vaijizwa: “Vetero yedu yakagondeka inozokwanirisikadi kuna vese vaya vo 144.000 vo cikwata cidoko. Izvi zvinozoitika kamare kupinda zviya zvatairangarira.” Mu gore ra 1991, pasure po kushanda  no vakagondeka, hama Franz vakananga kudari: “[Itusu] tabata ngo nyara mbiri vetero iyi . . . Itusu tinoireremeja maningi patinoenderera mberi teciivetera. I zviro zvinosisira kuvetera pikija tikatodikana kuvetera makore anokwana kuita ciuru. Inini ndinobatisisa maningi kamare vetero iyi kupinda ciri cese.”

7-8. Ngoyapi vetero ino vashandiri vazinji va Jehovha? (Varoma 8:​20, 21)

⁷ Vazinji vanonamata Jehovha nyamasi uno vano vetero yakasiyana. Ndiyonavo vetero yainga na Abhirahama, kuwana upenyu ucikaperi pasi pano, tecitongwa ngo Umambo hwa Mwari. (Vahebheru 11:​8-10, 13) Pauro wakatara ngo pamusoro po vetero iyi inoshamaisa. (Verenganyi Varoma 8:​20, 21.) Ngozvapi zvamakadakarira maningi mu Bhaibheri pamakajija ngo pamusoro po vetero iyi? Kureva kuti i kuziva kuti njiku iri yese imwimwi maizova mundhu wakakwana motamazve kushaisha? Zvingaita kuti makadakara ngo kuziva kuti vadiwa venyu vakafaya, munozovonanazve navo mu paradhiso pasi pano. Itusu atikani-kani kuti zviro zvakawanda zvakanaka pasi pano zvinozoitika “ngo ndava yo vetero.”

⁸ Azvinenyi kuti vetero yedu ngo yo kuzorarama kudenga kana pasi pano, tese tino vetero inotipa mathangwe anotiita kuti tigare takadakara. Nokutizve vetero iyi inoshamaisa, inozotivangisa maningi. Pauro anosanangura kuti izvi zvinozoitikisa kudini. Zvaakatarari zvinotibesa kuti tinase kuthemba kamare kuti vetero yedu inozokwanirisikadi.

9-10. Inga zvinokhombijwa pa muezaniso wa Pauro, Makristu angaveterenyi? (Varoma 5:3) (Vonanyi foto.)

⁹ Verenganyi Varoma 5:3. Pauro wakananga kuti matambujiko antingasongana nawo angavangisa rutendo hwedu. Kangaije izvi zvingatikahamarisa. Vajiji vese va Jesu vanozosongana no matambujiko. Vonanyi muezaniso wa Pauro. Iyena wakavhunja kudari Makristu o ku Tesaronika: “Patainga na imwimwi, taimuvhunja kuti tinozotambujika, izvi  ndizvona zviri kuitika.” (1 Vatesaronika 3:4) Iyena wakavhunjazve kudari Makristu o ku Korinte: “Hama, itusu atidi kuti mugare mucikazivi matambujiko atakasongana nawo . . . Itusu takatambujika maningi kupinda simba redu, tainga toda kufa.”—2 VaKorinte 1:8; 11:​23-27.

¹⁰ Nyamasi uno, itusu tingaveteravo kusongana no matambujiko ari ese. (2 Timoti 3:12) Maizoitisa kudini kudari muri pa mugariro uwu? Makamboteverehwa no kushohwa ngo ndava yo rutendo wenyu kuna Jesu ngo ukama no shamwari? Zvingaita kuti shamwari jenyu no ukama vakatoshaisha kumutaja. Kureva kuti makambova no zvineso kubasa ngo ndava yo kugondeka kwenyu? (Vahebheru 13:18) Kana makamboteverehwa ngo utongi ngo kucumaera ngo pamusoro po vetero yenyu? Azvinenyi kuti mukhaindinyi wo matambujiko atiri kusongana nawo, mupostori Pauro wakananga kuti itusu tingadakara. Ngenyi?

11. Ngenyi tinodikana kuenderera mberi tecicungirira patinosongana no zvineso?

¹¹ Itusu tingava takadakara patinotambujika ngokuti izvi zvinotibesera kuti tive no mugariro umweni unosisira maningi. Varoma 5:2 inonanga kuti, “kutambujika kunotiita kuti ticungirire.” Makristu ese anozotambujika. Ngo kudaro, Makristu ese anodikana kucungirira. Tinodikana kutema civaringo co kucungirira, azvinenyi kuti mushovonyi wo matambujiko atiri kusongana nawo. Ngo kuita kudaro, tinokwanisa kuvona kukwanirisika ko vetero yedu. Itusu atidi kuita inga vaya vakaezanisihwa no mbeu jakanangwaya ndi Jesu jakawira pa mapuwe. Vandhu ava pa kutanga ivona vanotendera cokwadi ngo mudakaro asi “kudari pakamuka zvineso no kuteverehwa” ivona vanosiya. (Mateu 13:​5, 6, 20, 21) Ndizvonadi kuti kusongana no zvineso no kuteverehwa azvidakajisi asi kudari tikacungirira tinozova no makomborero akawanda. Mu njira yapi?

12. Ngoapi makomborero atinozova nawo pasure po kucungirira zvineso zvatinosongana nazvo?

¹² Jakobo wakananga kuti kucungirira kungatiita kuti tiashire makomborero. Iyena wakatara kudari: “Asi kucungirira ngakukwanirise basa rako, kuti muve makakwana, mucina ndava mu mativi ese, mucina cakaposeka.” (Jakobo 1:​2-4) Jehovha wakananga kuti kucungirira kwedu kuno cinangwa. Ngocapi cinangwa cakona? Kucungirira kwedu kungatibesera kuti tive vandhu vano rutendo, vanosengerera no vanothemba Jehovha. Asi kucungirira kwedu kungaviisa makomborero amweni anosisira maningi.

13-14. Ngozvapi zvinoitika patinocungirira, izvi zvinopsasisa kudini vetero yedu? (Varoma 5:4)

¹³ Verenganyi Varoma 5:4. Pauro wakananga kuti “kucungirira kunotiita kuti titendehwe.” Izvi zvinoda kunanga kuti patinocungirira, tinotendehwa ndi Jehovha. Izvi azvirevi kuti patinotambujika no kuteverehwa Jehovha anodakara. Asi iyena anodakara ndimwi. Kucungirira kwenyu ndikona kunomuita kuti mutendehwe. Aya ndi makomborero anoshamaisa.—Nduyo 5:12.

¹⁴ Ceukijanyi kuti Abhirahama wakacungirira matambujiko akawanda. Jehovha wakadakara ndizvona. Jehovha wakamuvona inga shamwari yake, otomuvona inga mururami. (Genesi 15:6; Varoma 4:​13, 22) Izvi zvingaitikavo na itusu. Kutendehwa kwatinoithwa ndi Jehovha, akuvhiri pa zviya zvatinokwanisa kuita nee no makomborero edu. Asi iyena anotitendera ngokuti tinocungirira ngo rutendo. Azvinenyi no mugariro wedu, mupira wedu, itusu tese tingakwanisa kucungirira.  Muri kucungirira cineso ciricese wari? Kudari ndizvona, ceukijanyi kuti muri kudakajisa Jehovha. Patinozwisisa kuti tinotendehwa ndi Jehovha, vetero yatinayo kwaari yokuti anozokwanirisa zvese zvaakagondesa kwatiri, inozovanga maningi.

15. Ngozvapi zvakananga Pauro pana Varoma 5:​4, 5, izvi zvinomusa muvhunjo wapi?

¹⁵ Inga zvakanangwa ndi Pauro, itusu tinotendehwa ndi Jehovha kudari tikava takagondeka kwaari no kucungirira zvineso. Pauro anoenderera mberi eciti: “Kutendehwa kondhoko kunotiita kuti tive no vetero, vetero aitiiti kuti ticamwe.” (Varoma 5:​4, 5) Izvi zvingatobararisa hwiru. Ngenyi? Ngokuti mukuzwirana no Varoma 5:​2, Pauro wainga wakananga kuti Makristu o ku Roma, ainga no “vetero yo kuashira rukujo hunovha kuna Mwari.” Ngo iyo ndava, ariwese angajivhunjisa kudari: ‘Kudari Makristu aya ainga no vetero, ngenyi Pauro ari kubhuyazve ngo pamusoro po vetero?’

16. Tingaitisa kudini kuti vetero yatinayo ikure? (Vonanyi foto.)

¹⁶ Itusu tingazwisisa magama a Pauro teciziva kuti vetero i ciro cinokura. Inga muezaniso, imwimwi mucaceukija pa makazwa pa vhaza yokutanga ngo pamusoro po vetero inoshamaisa yo Umambo hwa Mwari inowanika mu Bhaibheri? Zvingaita kuti makamborangarira kudari, kupona mu paradhiso pasi pano azvizoitiki. Perapo pa makajija ngo pamusoro pa Jehovha no zvigondiso zvo Bhaibheri, vetero yenyu yokuti Jehovha anozokwanirisa zvese zvaakagondesa yakazovanga.

17. Vetero yenyu ingaitisa kudini kuti ikure pikija pasure po kujipira no kubhabhatijwa?

¹⁷ Pikija pamunopera kubhabhatijwa, imwimwi munozoenderera mberi mecijijira ngo pamusoro pa Jehovha, rudo hwenyu kwaari unozoengejeka. Kunja kwa izvi, vetero yenyu inozoenderera mberi yecivanga. (Vahebheru 5:13–6:1) Imwimwi munozotenderana no zvinonangwa pa Varoma 5:​2-4. Kangaije  imwimwi makasongana no zvineso zvakawanda moenderera mberi mecicungirira, mozwa kutendehwa ndi Jehovha. Meciziva kuti Jehovha anomuda maningi, imwimwi muno mathangwe akawanda o kutenda kuti zvaakagondesa zvinozokwanirisika. Vetero yenyu yavanga maningi kupinda pamakatangaya kujija Bhaibheri. Wari vetero iyi yaa yokadi kamare kwamuri, iyona ino revo inosisira maningi kwamuri. Kunasa kunanga vetero inopsasa zvese zvamunoita mu upenyu hwenyu, inocinja manera a munotaja mbhuri yenyu, zvivaringo zvamunotema no mashandisire amunoita nguva yenyu.

18. Jehovha anotithembesenyi?

¹⁸ Pauro ari kwenderera mberi ecibhuya ngo pamusoro po vetero yatinayo no kutendehwa kwatinoithwa ndi Jehovha. Iyena anotigondesa kuti vetero yedu inozokwanirisika. Ngenyi tingava no cokwadi cese ici? Pauro wakathembesa kudari kuno Makristu: “Vetero aitiiti kuti ticamwe; ngokuti rudo hwa Mwari hwakadururihwa mu mwoyo mwedu ngo mujimu mucena watakapuwa.” (Varoma 5:5) Imwimwi muno mathangwe akanaka kuti muve no vetero iyi.

19. Ngocapi cokwadi camunaco ngo pamusoro po vetero yenyu?

¹⁹ Psakanyi mukuvo kuti murangarijisise ngo pamusoro po cigondiso cakapuwa Abhirahama ndi Jehovha, kutendehwa kwake no kudaninjwa kwaakaithwa ndi Jehovha kuti i shamwari yake. Abhirahama aazivi kuvetera zvabiresi. Bhaibheri rinoti: “Ngo kudaro, Abhirahama paakasengerera, wakawana cigondiso ici.” (Vahebheru 6:15; 11:​9, 18; Varoma 4:​20-22) Abhirahama aazivi kucamwa. Na imwimwivo amuzocamwivo. Kudari mukaenderera mberi makagondeka, vetero yenyu inozopfupwa. Vetero yenyu ngo yokadi, inomuita kuti mudakare kuciripi kumucamwisa. (Varoma 12:12) Pauro wakatara kudari: “Mwari anopa vetero, ngaamupe mudakaro no runyararo ngo kumuthemba kwamunomuita, kuti vetero iwande ngo simba ro mujimu mucena.”—Varoma 15:13.