1. Ngenyi vandhu vazinji vanorangarira kuti azvikwanisiki kupona kwenda no kwenda?

 VANDHU vazinji vanoita zvese zvavanokwanisa kuti vahe zvokuha zvaushoni, kudamura-damura muviri kuti vakwanise kuva no uhomi waushoni no kupona mukuvo wakareba. Pikija zvakadaro, ivona avaveteri kupona kwenda no kwenda. Kangaije ngokuti ivona vanorangarira kuti azvikwanisiki kupona kwenda no kwenda. Pikija zvakadaro, pana Johani 3:16; 5:​24, Jesu wakananga kuti zvinokwanisika kuwana “upenyu hucikaperi.”

2. Johani cipauko 6 cinonangenyi ngo pamusoro po upenyu ucikaperi? (Johani 6:​39, 40)

² Njiku imweni, Jesu wakaita mushamaiso wo pau no hove, zviuru no zviuru zvo vandhu zvakaha zvoguta. a Izvi zvakashamaisa maningi vandhu. Asi zvakazonangwa ndi Jesu pa njiku yakatevera ndizvona zvakazoshamaisa maningi kupinda izvi. Mbhungano iyi yakatevera Jesu mbhera Kafarnaumi, kondhoyo Jesu wakavavhunja kuti vandhu vaizomuswa kuti vararame kwenda no kwenda. (Verenganyi Johani 6:​39, 40.) Rangariranyi kuti izvi zvinorevenyi kuno shamwari no ukama hwenyu hwakaperaya kufa. Zvakabhuya Jesu, zvinotipa cokwadi cokuti vandhu vakafaya vanozomuswa, cimwenizve, itusu no vadiwa vedu vakafaya tinozorarama kwenda no kwenda. Asi zvakazonangwa ndi Jesu pa mavhesi anotevera o cipauko 6 co bhuku ra Johani, zvakanesa kuti vandhu vazvizwisise, cimwenizve, zviri kuvavo zvinonesa ku vandhu vo mazuva ano kuti vazvizwisise. Waro, Jesu wakanangenyi?

3. Jesu wakanangenyi pa bhuku ra Johani 6:51?

³ Mbhungano iya payakapera kupuwa zvokuha ndi Jesu, iyona  yakaceukija manaa akapuwaya Vaiziraeri ndi Jehovha muzvipare. Matahwa anodanija manaa inga “zvokuha zvo kudenga.” (Nduyo 105:40; Johani 6:31) Jesu wakasanangura zviro zvimweni zvokuti mbhungano iya yaizviziva ngo pamusoro po manaa, kuitira kuvajijisa ciro caisisira maningi. Pikija kuti manaa zvainga zvokuha zvavakapuwa ndi Jehovha ngo mushamaiso, vakamaharo pakufamba ko nguva vakazofa. (Johani 6:49) Asi ngo divi rimweni, Jesu wakajinangira kamare inga “zvokuha zvinovha kudenga,” “pau ya Mwari” no “pau yo upenyu.” (Johani 6:​32, 33, 35) Jesu wakananga kusiyana kumweni kunosisira maningi kuri pakati pake no manaa. Iyena wakati: “Inini ndiri pau inopona yakavha kudenga. Mundhu ariwese akaha pau iyi, anozova no upenyu hucikaperi.” (Verenganyi Johani 6:51.) Ngo magama aya, Vajudha vaya vakabararika hwiru. Ivona avazivi kuzwisisa kuti kuitisa kudini Jesu wainga “pau” yaivha kudenga nokutizve pau iyi yainga yaushoni maningi kupinda manaa akapuwaya Vaiziraeri mu nguva yokare ndi Jehovha. Jesu wakapa zano raushoni maningi paakananga kudari: “Pau yandiri kumupari, i pau yo muviri wangu.” Iyena waida kurevenyi? Zvinosisira kuda kuziva revo yo zviro zvaakanangari, ngokuti mupinguro wakona unozotibesera kuzwisisa kuti tingaitisa kudini kuti tiwane upenyu ucikaperi kubatanijavo no vadiwa vedu. Ngatende tizwisise magama a Jesu.

MAGAMA OKUTI PAU INOPONA NO MUVIRI WANGU ANODA KUREVENYI?

4. Ngenyi vamweni vakashamaisika ngo magama akanangwa ndi Jesu?

⁴ Vandhu vakazwa Jesu ecibhuya masoko aya vakashamaisika maningi paakananga kuti ndinopa “muviri wangu kuti vandhu vaponeswe.” Kangaije ivona vakarangarira kuti vaidikana kuha muviri wake kamare. (Johani 6:51) Asi pasure pa izvi, Jesu wakazonangazve zviro zvimweni zvakavashamaisa maningi, iyena wakati: “Kudari mukatama kuha muviri wo Mwana wo mundhu no kumwa ngazi yake, mukati menyu amuna upenyu.”—Johani 6:53.

5. Ngenyi tino cokwadi cokuti Jesu aacainangirepi kuti vandhu vaidikana kumwa ngazi yake kamare?

⁵ Mu njiku ja Nowa, Jehovha wakarambija vandhu kuti vacaha ngazi. (Genesisi 9:​3, 4) Pakufamba ko nguva Jehovha wakarambija Vaiziraeri kuti vatamevo kuha ngazi. Ari wese waizoha ngazi ‘waizourawa.’ (Varevhi 7:27) Jesu waizwira mutemo. (Mateu 5:​17-19) Ngozvokadi kuti Jesu aacaizokumbirepi Vajudha kuti vahe muviri wake no kumwa ngazi yake. Asi ngokunanga magama anoshamaisa, Jesu wainga ecijijisa vandhu kuti vangawanisa kudini “upenyu hucikaperi.”—Johani 6:54.

6. Tinozvizivisa kudini kuti Jesu waibhuya mu njira yo kuezanisira pana Johani 6:53?

⁶ Jesu waida kurevenyi? Kunasa kunanga Jesu wainga ecibhuya mu njira yokuezanisira inga manera aakabhuyaya no mwanakaji Musamariya, paakati: “Mundhu anomwa kumwa yandinopa aazovizve no nyota. Asi kumwa yandinomupa inozova cinyuke co kumwa inopopoma kuti ipe upenyu hucikaperi.” (Johani 4:​7, 14) b Jesu aacainangepi kuti mwanakaji Musamariya wiya waidikana kuti amwe kumwa iri yese otowana upenyu ucikaperi. Mu njira yakafanana, Jesu aazivi kuvhunja mbhungano yaaingaya nayo ku Kafarnaumi kuti yaidikana kuhavo muviri wake no kumwa ngazi yake kuti iwane upenyu ucikaperi.

VHAZA IMWENI YOKUTI JESU WAKASHANDISA MAGAMA AKAEZANA

7. Vamweni vanoti kudini ngo magama a Jesu anowanika pana Johani 6:53?

⁷ Vandhu vazinji vanoti pana Johani 6:​53, Jesu wainga ecinanga zviro zvaidikana  kuithwa ngo vandhu pa Cirariro ca Mambo ngokuti iyena wakashandisa magama akaezana. (Johani 6:53; Mateu 26:​26-28) Vandhu vazinji vanonanga kuti vandhu vese vanonga vari pa Cirariro ca Mambo vanodikana kuha pau no kumwa vhinyu. Kureva kuti izvi ngo zvokadi? Zvinosisira kuziva mupinguro wo muvhunjo uwu ngokuti gore ngo gore zviuru no zviuru zvo vandhu zvinoungana kuti zvivone ciitiko ici. Tiri kuda kunasa kusotesesa musiyano uripo pa ciitiko cinonangwa pana Johani 6:53 no Cirariro ca Mambo.

8. Ngojapi musiyano jiripo pa zviitiko zviviri izvi? (Vonanyi foto.)

⁸ Ngatimbovona musiyano muviri. Wokutanga, ndirini nokutizve ngokwapi Jesu paakananga masoko anowanika pana Johani 6:​53-56? Iyena wakabhuya magama aya mu gore ra 32 Kristu Aviya ku Garireya ecivhunja mbhungano huru yo Vajudha. Izvi zvakaitika pecicota gore rimwe kuti aite Cirariro ca Mambo ku Jerusarema. Wocipiri, magama aya waimavhunja ani? Iyena wakananga masoko aya ku vandhu vaineseka basi ngo zviro zvokuha haiwa kuda kujija ngo pamusoro pa Jehovha no Umambo hwake. (Johani 6:26) Kunasa kunanga, Jesu paakananga zviro zvimweni zvokuti zvainesa kuti ivona vazwisise, ngokukasika vakasiya kumuthemba. Pikija vajiji vake vamweni vakatosiyavo kumuthemba. (Johani 6:​14, 36, 42, 60, 64, 66) Vandhu ava vainga vakasiyana maningi no vajiji va Jesu vanokwana kuita 11 avo vaakazova navo pasure po Cirariro ca Mambo. Vandhu ava vainga vakasiyana  maningi no vapostori vaikwana kuita 11 vakagondeka vainga na Jesu pecicota gore rimwe kuti Cirariro ca Mambo ciithwe. Pa mukuvo wiya, gumi na umwe vo vapostori vakagondeka, vainga na iyena, pikija vainga vacikanasi kuzwisisa ushoni zvese zvaainga ecijijisa. Mukusiyana no vandhu vazinji vainga ku Garireya, vapostori ava vainga no cokwadi cokuti Jesu wainga Mwana wa Mwari wakavha kudenga. (Mateu 16:16) Jesu wakavangisa vapostori vake ecivavhunja kudari: “Imwimwi ndimwi magara na inini pa muejo jangu.” (Ruka 22:28) Musiyano iji jinonasa kukhombija kuti pana Johani 6:​53, Jesu aacaiejepi kusanangura kuti ngozvapi zvaizoitika pa Cirariro ca Mambo. Asi pacino musiyano jakawanda pakati po zviitiko zviviri izvi.

MAGAMA A JESU ANOREVENYI KWAMURI?

9. I cikwata capi cainangira Jesu pa Cirariro ca Mambo?

⁹ Pa mukuvo wovaiita Cirariro ca Mambo, Jesu wakapekeja pau icina mbijo vajiji vake ecivavhunja kuti pau yondhoyo yaiimirira muviri wake. Perapo iyena wakavavhunja kuti vhinyu yaiimirira ‘ngazi yake yo citenderano.’ (Marko 14:​22-25; Ruka 22:20; 1 Vakorinte 11:24) Zvaakanangari zvinosisira maningi. Cinozwi citenderano ngokuti i ‘citenderano cakaithwa ndi Jehovha no Vaziraeri’ kana kuti na vayani basi vanozotonga na Jesu mu “Umambo hwa Mwari.” (Vahebheru 8:​6, 10; 9:15) Vapostori pa mukuvo wiya, avacaizwisisepi zvese ngo pamusoro po citenderano ici, asi pa mukuvo mushomani waizotevera, ivona vaizozojwa ngo mujimu mucena voita divi ro citenderano ici pamwepo na Jesu ku matenga.—Johani 14:​2, 3.

10. Ngowapizve musiyano uripo pa zviro zvakanangwa ndi Jesu pa Cirariro ca Mambo no zvaakananga ku Garireya? (Vonanyi foto.)

¹⁰ Zvakanangwa ndi Jesu pa Cirariro ca Mambo, zvinoshanda ku cikwata cidoko cinodanijwa kuti “mushambi mudoko.” Vapostori vaaingari navo, vainga vari vokutanga kuita divi mu mushambi uwu mudoko. (Ruka 12:32) Ava ndivona vaakakumbira Jesu kuti vahe pau no kumwa vhinyu. Vamweni vaizoitavo divi ro mushambi uwu, pakufamba ko nguva, vaizohavo pau no kumwa vhinyu pa Cirariro ca Mambo. Ava ndivona vanozowana ndau pamwepo na Jesu ku matenga. Ngo kudaro, uwu ndi musiyano umweni wo Cirariro ca Mambo no zviro zvakaitika ku Garireya. Ngokuti magama akabhuiwa ndi Jesu pa Cirariro ca Mambo, anoshanda ku cikwata cidoko co vandhu, kuveni magama aakabhuya ku Kafarnaumi anoshanda ku vandhu vese.

11. Ngozvapi zvakanangwa ndi Jesu ku Garireya zvaivonesa kuti aacainangirepi cikwata cido?

¹¹ Jesu paainga ku Garireya mu gore ra 32, vandhu vazinji vaainga ecibhuya navo, vaida zvokuha basi. Asi Jesu wakavabesera kuzwisisa kuti kwainga no ciro cimweni caisisira maningi kupinda zvokuha. Ciro condhoco, caizovapa upenyu ucikaperi. Jesu wakatonanga kuti pikija vandhu vakafaya vanozomuswa pa njiku yo kupejisira vorarama kwenda no kwenda. Mukusiyana no Cirariro ca Mambo, pa cipauko 6 co bhuku ra Johani, Jesu aacaibhuyepi ngo makomborero aizowanika ngo vandhu vashoma basi. Asi, iyena wakabhuya ngo makomborero okuti mushovo wese wo vandhu waizokwanisa kumawana. Zvokadi iyena wakati: “Mundhu ariwese akaha pau iyi, anozova no upenyu hucikaperi; . . . Pau yandiri kumupari, i pau yo muviri wangu kuti vandhu vaponeswe.”—Johani 6:51. c

12. Ngozvapi zvinodikana kuti tiwane upenyu ucikaperi?

¹² Kunanga kuti Jesu waida kunanga kuti  vandhu vese vakamborarama pasi pano vaizowana upenyu ucikaperi? Haiwa. Vaizowana upenyu ucikaperi ndi vayani basi vaizoha pau iyi kana kuti vaya vaizova no rutendo kuna Jesu. Vandhu vazinji vanoti i Makristu, vanorangarira kuti vanozoponeswa kudari ‘vakatenda Jesu’ no kumuvona inga muponesi wavo pacavo. (Johani 6:29) Hina, izvi ndizvona ngokuti ku Garireya kwainga no vandhu vaitenda Jesu ngokukasika. Perapo vandhu ava pakufamba ko nguva vakaima kumutevera.

13. Ngozvapi zvinodikana kuti tive mujiji wa Jesu?

¹³ Vandhu vazinji vo pa mbhungano iya, vaitevera Jesu ngokuti waivapa zviya zvavaida. Ivona vaida kuti Jesu avarape, kuvapa zvokuha no kubhuya zviro zvavaida. Asi Jesu wakakhombija kuti zvaizonesa kuti ivona vave vajiji vake. Jesu wakanasa kujekesa kuti aazivi kuviya pa nyika kuti azopa vandhu zviya zvavanoda basi, asi iyena waida kuti vandhu ‘vaende kwaari,’ kumuzwira no kumupurukira.—Johani 5:40; 6:44.

14. Ngozvapi zvatinodikana kuita kuti tibesereke ngo muviri no ngazi ya Jesu?

¹⁴ Jesu wakananga kuti ngokupira ngazi yake no muviri wake zvaizokwanisika kuti vandhu vararame kwenda no kwenda. Asi vandhu vaidikana kutenda cokwadi ici no kuva no rutendo  kwaari. Zvecivoneka kuti ivona vaidikana kuva no rutendo, na itusu tinodikanavo kuva no rutendo nyamasi uno. (Johani 6:40) Ngo kudaro, zvakanangwa ndi Jesu pana Johani 6:​53, zvinovonesa kuti tinodikana kuva no rutendo kuti tikwanise kuwana upenyu ucikaperi. Makomborero aya angawanika ngo vandhu vazinji.—Vaefeso 1:7.

15-16. Ngozvapi zviro zvinosisira zvatajija pana Johani cipauko 6?

¹⁵ Zvakatahwa pa cipauko 6 ca Johani zvinosisira maningi kuna itusu tese. Mondhomo tajija kuti Jesu anoda maningi vandhu. Ku Garireya, iyena wakarapa vandhu, kuvajijisa ngo pamusoro po Umambo no kuvapa zvokuha. (Ruka 9:11; Johani 6:​2, 11, 12) Cinosisira maningi caakavajijisa ngocokuti iyena wakavavhunja kuti iyena i “pau yo upenyu.”—Johani 6:​35, 48.

¹⁶ Ngozvokadi kuti vandhu vakadanijwari ndi Jesu kuti vo “mavhuta amweni” avadikani kuha pau no kumwa vhinyu pa Cirariro ca Mambo. (Johani 10:16) Pikija zvakadaro, ivona vanobesereka ngo ngazi no muviri zva Jesu Kristu. Kuitisa kudini? Ivona vanobesereka ngo kukhombija rutendo ku muripo wa Jesu no kukhombija rutendo ku zviro zvinoshamaisa zvavakapuwa ngo ndava yo muripo uwu. (Johani 6:53) Ngo divi rimweni, vaya vanoha pau no kumwa vhinyu vanokhombija kuti vanoita divi ro citenderano cipsa, cimwenizve vano vetero yo kuzotonga mu Umambo wo kumatenga. Ngo kudaro, azvinenyi kuti itusu tiri Makristu okuzojwa kana kuti vo mavhuta amweni, zvakatahwa pa cipauko 6 zvinosisira maningi kwatiri. Icona cinotijijisa kuti tinodikana kuva no rutendo hwakavanga kuti tikwanise kupona kwenda no kwenda.