1-2. Mavonero api anodikana kuva no vabari, mwana wavo paanoita muvhunjo ngo pamusoro po zvatinotenda?

 VAZINJI vanotendera kuti kuva baba kana kuti mai i basa ro nguva yakazara. Kudari muri baba kana mai, muno mwana wenyu mudoko, tinomuvangisa kuti mushande ngo simba kuti muvangise rutendo hwake. (Dhotoronome 6:​6, 7) Mwana wenyu paanonga ecikura, iyena angatanga kuita muvhunjo jo zviro zvatinotenda zvakacijikira mu Bhaibheri kubatanijavo no ndhungamiriro jakacena jinowanika mu Bhaibheri.

² Imwimwi mungarangarira kuti mwana wenyu ari kuita muvhunjo iji ngokuti aana rutendo hwakavanga kuna Jehovha. Cimwenizve, aanasi kutenda zviro zvinonangwa mu Bhaibheri. Zvokadi, vana pavanonga vecikura, vanodikana kuita muvhunjo kuti vakwanise kuvangisa rutendo hwavo. (1 Vakorinte 13:11) Ngo kudaro, apana thangwe kuti muthye. Imwimwi, mungavona muvhunjo jese jinoithwa ngo mwana wenyu ngo pamusoro po zviro zvatinotenda inga mukana kuti mumubesere kuti ave no murangariro waushoni.

3. Ngozvapi zvatinozovona mu cijijo cino?

³ Mu cijijo cino, tiri kuda kuvona kuti vabari vangaitisa kudini kuti vabesere vana vavo. Cokutanga, kuti vavangise rutendo hwavo, cocipiri, kuti vareremeje ndhungamiriro jakacena jo mu Bhaibheri no cocitatu, kuti vajivirire zvavanotenda. Cimwenizve, tinozovona mathangwe aushoni ngo pamusoro po muvhunjo jinoithwa ngo vana no kuvona mabasa amweni angaithwa pa mbhuri angapekeja mukana vabari kuti vakwanise kubhuya no vana vavo ngo pamusoro po zviro zvavanotenda.

BESERANYI MWANA WENYU KUTI AVANGISE RUTENDO HWAKE

4. Mwana angava no muvhunjo japi, ngenyi?

⁴ Vabari vanozviziva kuti rutendo kuna Mwari asipi ciro cingagariwa utaka ngo mwana wavo. Imwimwi amuzivi kubahwa no rutendo  kuna Jehovha. Mu njira yakaezana, mwana wenyu aazivivo kubahwa no rutendo kuna Jehovha. Pakufamba ko nguva, mwana wenyu angajivhunjisa kudari: ‘Ndinozvizivisa kudini kuti Mwari ariyo? Ndingathembadi kamare zvinonangwa ngo Bhaibheri?’ Kunasa kunanga, Bhaibheri rinotivangisa kuti ‘tishandise murangariro wedu wese’ no ‘kuva no cokwadi pa zviro zvese.’ (Varoma 12:1; 1 Vatesaronika 5:21) Mungabesera kudini mwana wenyu kuti avangise rutendo hwake?

5. Vabari vangaitenyi kuti vabesere vana vavo kuti vavangise rutendo hwavo pa zviro zvinonangwa mu Bhaibheri? (Varoma 12:2)

⁵ Vangisanyi mwana wenyu kuti apsange mathangwe anovonesa kuti zvinojijiswa ngo Bhaibheri ngo zvokadi. (Verenganyi Varoma 12:2.) Mwana wenyu paanoita muvhunjo, shandisanyi mukana wondhowo kuti mumukhombije kuti angawanisa kudini mupinguro ecishandisa mathurusi akadari inga Índice das Publicações da Torre de Vigia no Bhuku ro Kupsakisisa ro Zvapupu zva Jehovha. Inga muezaniso, imwimwi mungamuvangisa kuti apsakisise mu musoro jinowanika mu saiti no vhidhiyo jingamubesera kuvona kuti Bhaibheri asipi ro vandhu, kunja kwa izvi irona i “Soko ra Mwari.” (1 Vatesaronika 2:13) Inga muezaniso, iyena angapsakisisa ngo pamusoro po dhorobha rokare ro Asiriya ro ku Ninivhe. Mu nguva yokare, vandhu vamweni vaiphikiza Bhaibheri, vainanga kuti dhorobha ro Ninivhe arizivi kumboveyo. Asi mu makore o 1850, vapsakisisi vakawana mathere o dhorobha iri pasi, votendera kuti zvinonangwaya ngo Bhaibheri kuti Ninivhe yakaveyo ngozvokadi. (Sofoniya 2:​13-15) Kuti azive kuti kuparajwa ko Ninivhe kwakakwanirisa zviporofita zvo mu Bhaibheri, iyena angavona musoro unoti: “Maizviziva Here?” mu Murindiri wa Novembro wo 2021. Vangisanyi mwana wenyu kuti aezanise zvinonangwa ngo mabhuku edu no referensiya jinothembeka. Zvondhozvo zvinozomubesera kuti avangise rutendo hwake ku zviro zvinonangwa ngo Bhaibheri kuti ngozvokadi.

6. Vabari vangabeseresa kudini vana vavo kuti vavone mathangwe anovonesa kuti Bhaibheri ngo rokadi? Ipanyi muezaniso. (Vonanyi foto.)

⁶ Beseranyi mwana wenyu kuti arangarire ngo pamusoro pokuti ngenyi zvinojijiswa ngo Bhaibheri ngozvokadi. Vabari vanomukana jakasiyana-siyana kuti vabhuisane no vana vavo ngo zviro zvinosisira ngo pamusoro po Bhaibheri no rutendo hwavo kuna Jehovha. Mukana iji jingawanika pamunoenda kovhakacira muzeu, mafirori akaseja no kwenda kovona Bheteri ro Zvapupu zva Jehovha. Inga muezaniso, ngokwenda kovona muzeu, imwimwi mungakwanisa kuvangisa rutendo hwo vana venyu pa zviitiko zvakaitika kare zvamunovona kondhoyo no kuvangisa kuthemba kwavo kuti zvinojijiswa ngo Bhaibheri ngo zvokadi. Kangaije mungajijisa mwana wenyu ngo pamusoro po Buwe ro Mowabhi, Buwe iri raano makore anokwana kuita 3.000, cimwenizve rakatahwa zina ra Jehovha. Buwe ro Mowabhi iri, ririyo nyamasi uno ku muzeu wo Rouvhri ku Paris nyika yo Fransa. Imwimwi no mwana wenyu mungakwanisa kuvona mafoto o mu nguva yokare akadari inga o Buwe ro Mowabhi mu saiti kana mu mabhuku edu. Kunja kwa izvo, foto yokuezanisira  yo Buwe ro Mowabhi inowanika nyamasi uno ku muzeu unozwi, “A Bíblia e o Nome de Deus” unowanika ku Bheteri ro Zvapupu zva Jehovha ku Worwiki ku Novha York. Buwe ro Mowabhi rinovonesa kuti Mambo Mexa wo ku Mowabhi wakapandukira Vaiziraeri. Izvi zvinozwirana no zvinonangwa ngo Bhaibheri. (2 Majimambo 3:​4, 5) Mwana wenyu paanozokwanisa kuvona ega ngo majiso ake mathangwe anovonesa kuti Bhaibheri ngo rokadi, rutendo hwake unozovanga maningi.—Ezanisanyi na 2 Kronika 9:6.

7-8. (a) Ngozvapi zvatinojija patinovona zviro zvakaseja zvakasikwa? Ipanyi muezaniso. (Vonanyi foto.) (b) Muvhunjo japi jingabesera mwana wenyu kuti avangise rutendo hwake?

⁷ Vangisanyi mwana wenyu kuti arangarijisise ngo pamusoro po zviro zvinoshamaisa zvakasikwa ndi Jehovha. Pamunonga mecifamba mu ndau yakaseja no mwana wenyu kana pa ndau ino mafirori, mubeserenyi kuzwisisa mugariro jinoshamaisa jinovoneka kuvha ku zviro zvakasikwa. Ngenyi? Mugariro iji ndijona jinozomubesera kuti azwisise kuti kuno mundhu ano uzivi wakaitaro zviro izvi. Inga muezaniso, zviro zvizinji zvakasikwa, zvakaithwa ngo njira inoshamaisa, zvondhozvo zvinoita kuti masientista ade kujija ngo pamusoro po kushamaisa kwazvinoitaro. Sientista umweni anozwi Nikorasi Fameri wakananga kuti pamunonga meciverenga mutengo wo zviro zvakasikwa zvinoshamaisa zvamunonga mecivona, mungazovona mutengo wo numero jakawanda kupinda jamunongaro maverenga. Mutengo wokuwanda ko numero iji unodanijwa kuti Fibhonasi. Mugariro jinoshamaisa, jingavoneka kuvha ku zviro zvakawanda zvakasikwa, zvakadari inga magaraxsiya, zvisikwa zvinomateme akaita ngo kutenderera kana kuti zvinogara mu jombe, masakani o mambuti no musoro jo maringa-bhera. a

⁸ Kucikora mwana wenyu anozojija ngo pamusoro po zviro zvimweni zvakasikwa. Inga muezaniso, mambuti mazinji akasikwa mu njira inoshamaisa. Manera akasikwari mambuti aya mu njira inoshamaisa tingatowanavo zviro zvimweni zvakasikwavo ngo njira yondhoyo. Asi ndiyani wakasika zviro zvese zvakaseja? Mwana wenyu paanorangarijijisa ngo pamusoro po zviro zvese izvi, kangaije iyena angazovangisa rutendo hwake pakuti Jehovha ndiyena wakasika zviro zvese. (Vahebheru 3:4) Pa mukuvo jimweni imwimwi mungamuitira muvhunjo wakadari inga uwu: “Kudari Jehovha ndiyena wakatisika, azvicaizova zvo hwiru kurangarira kuti iyena wakatipa ndhungamiriro jakacena ngo pamusoro po kuva vandhu vakadakara?” Imwimwi mungamusanangurira kuti Mwari wakatipa Bhaibheri rinotibesera kuvona kuti iyena anoda kuti tive vandhu vakadakara.

REREMEJANYI NDHUNGAMIRIRO JAKACENA JO MU BHAIBHERI

9. Ngenyi mwana wenyu angaita muvhunjo ngo pamusoro po ndhungamiriro jakacena jo mu Bhibheri?

⁹ Kazinji mwana wenyu angaita muvhunjo ngo pamusoro po zviro zvinonangwa ngo Bhaibheri  kuti zvakashata. Ejanyi kuvona kuti ngenyi anoita muvhunjo wondhowo. Kureva kuti mwana wenyu aatenderani no ndhungamiriro jakacena jo mu Bhaibheri kana kuti i ndava yokuti iyena aakwanisi kujivirira zvaanotenda paanonga ecibhuya no vamweni? Pa mugariro uri wese hawo, imwimwi munodikana kubesera mwana wenyu kuti areremeje ndhungamiriro jakacena jo mu Bhaibheri ngo kujija naye bhuku Dakaranyi Kwenda no Kwenda! b

10. Mungabeseresa kudini mwana wenyu kuti arangarijisise ngo pamusoro po ushamwari hwake na Jehovha?

¹⁰ Beseranyi mwana wenyu kuti avangise ushamwari hwake na Jehovha. Pamunonga mecijija no mwana wenyu ejanyi kumubesera mecishandisa muvhunjo no muezaniso jinowanika mu bhuku Dakaranyi Kwenda no Kwenda! (Mazwi Akangwara 20:5) Inga muezaniso, cijijo 8 co bhuku iri cinoezanisa Jehovha no shamwari ingatipa ngwajo jinotijivirira no kutibesera. Pamunopera kuvona naye pamwepo bhuku ra 1 Johani 5:​3, imwimwi mungamuvhunjisa kudari: “Zvecivoneka kuti Jehovha i shamwari yaushoni, waro tinodikana kuvona kudini zviro zvaanotivhunja kuti tiite?” Muvhunjo uwu ungaita inga wakareruka. Asi kuwuitira mwana wenyu kungazomubesera kuti avone kuti mutemo ja Jehovha jinovonesa kuti iyena anotida maningi.—Isaya 48:​17, 18.

11. Mungabeseresa kudini mwana wenyu kuti azwisise kuti kuzwira zvinojijiswa ngo Bhaibheri ngo zvaushoni? (Mazwi Akangwara 2:​10, 11)

¹¹ Vonanyi kuti kushandisa ndhungamiriro jo mu Bhaibheri kunotibeseresa kudini. Pamunoverenga Bhaibheri no kuverenga vhesi yo njiku ngo njiku muri pamwepo, bhuisananyi ngo kuti ndhungamiriro jo mu Bhaibheri jingabeseresa kudini mbhuri yenyu. Imwimwi mungashandisa mukana iji kuti mubesere mwana wenyu kuti azwisise kuti ngozvaushoni kwatiri kushanda ngo simba no kubhuya cokwadi. (Vahebheru 13:18) Cimwenizve, mungasanangurira mwana wenyu kuti kuzwira ndhungamiriro jo mu Bhaibheri kunobesera kuti muve no uhomi hwaushoni makadakara. (Mazwi Akangwara 14:​29, 30) Kusotesesa ndhungamiriro iji kangaije kungazobesera mwana wenyu kuti areremeje ndhungamiriro jo mu Bhaibheri.—Verenganyi Mazwi Akangwara 2:​10, 11.

12. Baba vamweni vakabeseresa kudini mwana wavo kuti areremeje ndhungamiriro jo mu Bhaibheri?

¹² Baba vamweni vanozwi Stevha vanogara ku Fransa, vanosanangura kuti ivona no mukaji wavo vanobesera mwana wavo wakura anozwi Etani kuti avone kuti Jehovha ano rudo wakakura maningi ngokuvapekeja kwake ndhungamiriro. Ivona vanoti: “Tinomuvhunjisa kuti ‘ngenyi Jehovha anoda kuti itusu tireremeje ndhungamiriro iyi? Zvondhozvo zvinokhombijisa kudini kuti iyena anotida? Ngozvapi zvaizoitika kudari iwewe no watama kushandisa ndhungamiriro iyi?’” Mabhuyo aya akabesera Etani kuti avangise rutendo hwake pakuti zviro zvinonangwa ndi Jehovha ngozvokadi. Hama Stevha vanoengejera veciti: “Cinangwa cedu ngocokubesera Etani kuti azive kuti Bhaibheri rino uzivi hwakakhwirira maningi.”

13. Vabari vangarovejesa kudini mwana wavo kuti ashandise ndhungamiriro jo mu Bhaibheri? Ipanyi muezaniso.

¹³ Rovejanyi mwana wenyu kuti ashandise ndhungamiriro jo mu Bhaibheri. Umwe mukana wamungaita ndiwona izvi, ndi paya pokuti mwana wenyu anonga apuwa bhuku riri rese kucikora kuti averenge. Vandhu vanonangwa mu bhuku raanongaro eciverenga, vanoita zviro zvinonangwa ndi Jehovha kuti zvakashata. Inga muezaniso, kuita uhure no uphanga. Cimwenizve, bhuku rondhoro rakatahwa mu njira inovonesa inga kuti zviro zvondhozvo azvizivi kushata. Imwimwi mungakumbira mwana wenyu kuti arangarire kuti Jehovha anozwa kudini ngo zviro zvinoithwari no kunangwa ngo vandhu ava. (Mazwi Akangwara 22:​24, 25; 1 Vakorinte 15:33; Vafiripi 4:8) Izvi zvingabesera mwana wenyu kuvona kuti ngenyi ngo zvo ungwaru kuzwira Jehovha. Cimwenizve, kudari prosori kana kuti vadoni  vake vaanojija navo vakamukumbira kuti abhuye mavonero ake ngo pamusoro po bhukuro, iyena anozobhuya ngo pamusoro po zvaanotenda.

JIJISANYI MWANA WENYU KUTI AJIVIRIRE ZVAANOTENDA

14. Ngozvapi zvingaita kuti mujaha wo Cikristu athye, ngenyi?

¹⁴ Mukuvo umweni majaha o Cikristu angathya kujivirira zvaanotenda. Inga muezaniso, ivona vangava no nyowa yokusanangura zvavanotenda ngo pamusoro po shwiro yokuti zviro zvakaita ngokuphinduka-phinduka. Ngenyi? Ngokuti majiporosori avo angananga kuti kuphinduka-phinguka ngokokadi. Kudari muri baba kana kuti mai, mungabeseresa kudini mwana wenyu kuti ave no rutendo no kwenderera mberi ecijivirira zvaanotenda?

15. Ngozvapi zvingabesera mujaha wo Cikristu kuti athembe zviya zvaanotenda?

¹⁵ Beseranyi mwana wenyu kuti athembe zviya zvaanotenda. Mwana wenyu aadikani kunyowejeka ngokuti anoziva cokwadi ngo pamusoro po zviro zvakasikwa. (2 Timoti 1:8) Ngenyi? Ngokuti masientista mazinji anozwisisa kuti upenyu auzivi kuvepo wega. Masientista aya anokwanisa kuvona mathangwe anovonesa kuti kuno mundhu anouzivi wakasika zviro zvese zvinopona. Inga muviyo, ivona avatendi kuti zviro zvakaita ngokuphinduka-phinduka inga zvinojijiswa mu zvikora zvese. Mwana wenyu angavangisa kuthemba kwake ngokurangarijisisa ngo pamusoro po mathangwe akaita kuti hama no hambzaji zinji jithembe kuti upenyu uno Musiki. c

16. Vabari vangabeseresa kudini mwana wavo kuti ajivirire zvaanotenda ngo pamusoro po Musiki? (1 Pedhru 3:15) (Vonanyi foto.)

¹⁶ Beseranyi mwana wenyu kuti akwanise kusanangurira vamweni kuti kuno Musiki. (Verenganyi 1 Pedhru 3:15.) Kangaije zvaizova zvaushoni kuhwirirazve koverenga pamwepo naye musoro jinowanika musaiti pa munda-nda-nda unoti: “Os Jovens Perguntam—Criação ou evolução?” Perapo, bhuisananyi no mwana wenyu kuti angaitisa kudini kuti abeserevo vamweni kuti vazwisise zvokadi ngo pamusoro po Musiki. Muceukijenyi kuti aadikani kuvereketesana no vadoni vake vokucikora. Vangisanyi mwana wenyu kuti mavereketero ake anodikana kuva akareruka no aushoni paya paanonga ecibhuya no mundhu anoda kuzwa ngo pamusoro po shwiroyo. Inga muezaniso, mudoni wokucikora angananga kudari: “Inini ndinotenda zvandinovona, andizivi kumbovona Mwari.” Mujaha wo Cikristu angadavira kudari: “Amborangarirai kuti uri kufamba pakati po gwasha wovona mwimbo wakaciwa wovakihwa  ngo mapuwe. Iwewe waizorangarira kudini? Izvi zvinovonesa kuti pano mundhu wakacaro mwimbowo. Mu njira yakaezana, nyika no zvese zvinopona zvirimo pano mundhu wakazvisika.”

17. Vabari vangavangisa kudini mwana wavo kuti apsake mukana jokuvhunja vamweni cokwadi co mu Bhaibheri? Ipanyi muezaniso.

¹⁷ Vangisanyi mwana wenyu kuti apsake mukana wokusanangurira vamweni cokwadi co mu Bhaibheri. (Varoma 10:10) Imwimwi mungaezanisa kuvangisira kwamunoita pakubhuya ngo pamusoro po rutendo hwenyu no kuvangisira kunodikana pakurija mumbo mecishandisa thurusi riri rese. Pakutanga mujiji angajijira kurija mumbo jakareruka. Pakufamba ko nguva, kurija mumbo kungazova kwakareruka maningi. Mu njira yakaezana, mujaha wo Cikristu angatanga kucumaera ecishandisa njira jakareruka kuti avhunje vamweni ngo pamusoro po rutendo hwake. Inga muezaniso, iyena angavhunjisa mudoni wake wokucikora kuti: “Iwewe waizviziva kuti mainjinyero anotevejera zviro zvakasikwa? Imai ndikukhombije vhidhiyo iyi.” Pamunopera kumukhombija vhidhiyo yo pamunda-nda-nda wo musoro unoti, Teve um Projeto? Imwimwi mungamuvhunjisa kudari: “Kudari sientista eciashira rukujo paanoita zviro ecitevejera zviro zvakasikwa, ndiani anodikana kuashira rukujo wo zviro zvakasikwaro?” Ngokuita kudaro, kangaije mudoni wenyu wo kucikora angada kujija zviro zvizinji ngo pamusoro pa Jehovha.

ENDERERANYI MBERI MECIBESERA MWANA WENYU KUTI AVANGISE RUTENDO HWAKE

18. Vabari vangaitisa kudini kuti vaenderere mberi vecivangisa rutendo hwo vana vavo?

¹⁸ Tiri kurarama mu nyika yakazara ngo vandhu vacina rutendo kuna Jehovha. (2 Pedhru 3:3) Majibaba, pamunonga mecijija no vana venyu, vavangisenyi kuti vanase kupsakisisa zviro zvinozovabesera kuti vareremeje maningi Soko ra Mwari no ndhungamiriro jake jakacena. Mubeserenyi kuti anase kurangarijisisa no kuvangisa rutendo hwake kuna Jehovha ngokubhuya naye ngo pamusoro po zviro zvakasikwa. Mubeserenyi kuti azwisise zviporofita zvakakwanirisika zvo mu Bhaibheri zvinoshamaisa. Kunja kwa zvese izvi, itanyi mukumbiro pamwepo naye no kumubatanijavo pa mukumbiro jamunoita. Pamunonga meciita izvi, imwimwi munozova no cokwadi cokuti Jehovha ari kukomborera kuvangisira kwamuri kuita kuti mubesere mwana wenyu kuti avangise rutendo hwake.—2 Kronika 15:7.