Mupostori Pauro wakatarira mukuru doni wake Timoti kuti: “Ndinokukumbira pamberi pa Mwari na Kristu Jesu no ngirozi jakasanwa, kuti uteveje mupango uwu ucikaiti ciricese ngo mukheto kana ngo kusana mundhu.”—1 Timoti 5:21.

Kuitira kutibesera kuziva kuti ngojapi ngirozi iji, tinozobhuya kuti ngojapi ngirozi jicikabatanijwi pa cikwata co ngirozi iji. Zvakajeka kuti asipi vo 144.000. Pauro paakatarira Timoti, rumuko wo Makristu okuzojwa kuti aende kudenga wainga ucito watanga. Vapostori no vamweni vainga vakasanwa vainga vacito vava zvisikwa zvo kumujimu, ngo kudaro “ngirozi jakasanwa” ajicaireverepi ivona.—1 Vakorinte 15:​50-54; 1 Vatesaronika 4:​13-17; 1 Johani 3:2.

Kunja kwa izvi “ngirozi jakasanwa” ajicainangirepi ngirozi jicizivi kuzwira pa mukuvo wo Ndambi. Ngirozi iji jakava kudivi ra Sathana no kuva madhimoni awo akashohwa ndi Jesu. (Genesisi 6:2; Ruka 8:​30, 31; 2 Pedhru 2:4) Sambiri pano, madhimoni aya anozofungihwa mu rindi rakajika ko ciuru co makore.—Judha 6; Apokaripsi 20:​1-3, 10.

“Ngirozi jakasanwa” jakanangwari ndi Pauro jairevera ngirozi jo kumatenga ijo jinobesera “Mwari na Kristu Jesu” avo vanonangwa pa vhesi yondhoyo.

Kuno zviuru no zviuru zvo ngirozi jakagondeka. (Vahebheru 12:​22, 23) Atidikani kurangarira kuti Jehovha anojipekeja mabasa akaezana. (Apokaripsi 14:​17, 18) Ceukijanyi kuti ngirozi imwe yakagajwa kuti iparaje 185.000 zvo masoca o Vaasiriya. (2 Majimambo 19:35) Ngirozi jimweni jinozogajwa basa ‘rokuzounganija zviro zvese zvinokhugunya no vandhu vacikazwiri mutemo vanonga vari pakati po Umambo hwake.’ (Mateu 13:​39-41) Ngirozi jimweni “jinozounganija vakasanwa vake” kuti vazoende kudenga. (Mateu 24:31) Jimweni jinovhunjwa kuti ‘jitingwarire mu makwanja edu ese.’—Nduyo 91:11; Mateu 18:10 ezanisanyi na Mateu 4:11; Ruka 22:43.

“Ngirozi jakasanwa” jinonangwa pa 1 Timoti 5:21 jainga jakapekejwa mabasa kuitira vandhu va Mwari. Ngo kudaro, Pauro wakapa mbhangiro yo rudo ku vakuru, avo vanofanera kureremejwa ngo ungano. Ngo divi rimweni, vakuru vanodikana kuita basa ravo ‘vacikaiti ciricese ngo mukheto kana ngo kusana mundhu,’ avadikani kutemera vamweni zvivaringo kana kuvatonga. Pauro wakananga kuti vakuru vari kushandira hama no hambzaji “pamberi pa Mwari na Kristu Jesu no ngirozi jakasanwa,” izvo zvinoreva kuti Jehovha, Jesu no “ngirozi jakasanwa” vari kuvona manera vakuru vari kutaja ungano. Zvakajeka kuti ngirozi jimweni jinoashira mabasa kuitira ungano akadari inga kujivirira ungano, kuvonerera basa ro kucumaera, jecizivisa Jehovha ngo pamusoro pazvo.—Mateu 18:10; Apokaripsi 14:6