VASIKANE vaviri vainga vecifamba ku dhistritu yo Baguio, dhorobha ro Firipina. Ivona vakavona karinya yo mabhuku, asi avazivi kuikhwederera. Erena hambzaji yainga yakaima pondhopo, yakanyemwerera. Vasikane ava vakaenderera mberi no hwendo hwavo, asi ivona vakashamaisika maningi ngo manera akanyemwerera hambzaji iyi.

Perapo, povainga vacienda kanyi, ivona vakavona kwadhru huru yakatahwa jw.org pa Nyumba yo Umambo. Ivona vakazwisisa kuti ainga maretra ondhoo ovaingaya vavona pa karinya iyana. Ngo kukasika, vakabzuka mu karu, voenda kovona nguva inoitwa musongano yainga yakatahwa pa Nyumba yo Umambo.

Vovaviri vakaviya pa musongano wakatevera. Ndiani wo vakavona povainga vecinghwina mu Nyumba yo Umambo? Hambzaji Erena! Ngo kukasika, ivona vakaceukija kuti wainga mwanakaji wakavanyemwereraya. Hambzaji Erena vakati: “Povakatanga kundikhwederera, ndakamukira kuthya. Ndairangarira kuti ndaita ciri cese cakashata.” Asi vasikane ava, vakananga kuti vainga vakamuvona paainga ecicumaera ngo karinya.

Vasikane ava vakadakajihwa maningi ngo kuva pa musongano no kuva pamwepo no hama no hambzaji. Povakavona vamweni vecicenesa Nyumba yo Umambo musongano powakapera, ivona vakabeseravo. Wari, musikane umweni aacagarizve ku Firipina asi umweni wakatanga kwenda ku musongano no kutanga kujija Bhaibheri. Zvese zvakaitika ngo ndava yo kunyemwerera!