Baba wangu na mai wangu, vainga vo ciara co Katorika. Asi pavakajija mu Bhaibheri kuti zina ra Mwari ndi Jehovha, vese vo vaviri vakatanga kuva Zvapupu zva Jehovha zvinovangisira maningi. Baba wangu vakaima kuveza zvithombe zva Jesu. Kusiyapo zvondhozvo, ivona vakashandisa kukwanisa kwavo kuveza kuti vatinasirire nyumba yedu yataigara, no Nyumba yo Umambo yokutanga ku San Juan del Monte ku Philippines.

Pasure po kubahwa kwangu mu gore ro 1952, vabari vangu vakatanga kundijijisa ngo pamusoro pa Jehovha, zviro zvavainga veciita ku majinevanji angu aikwana marongomuna no majiyaya angu matatu. Pondainga ndecikura, baba wangu vakandivangisa kuti ndiverenge cipauko cimwe co Bhaibheri njiku imwe nga imwe, no kuverenga mabhuku akacijikira mu Bhaibheri. Pa mukuvo jimweni, vabari vangu vaikoka vavonereri vo ndharaundha no hama jaishandira pa Bheteri kuti jiviye kumuzi kwedu. Inga mbhuri, itusu takawana mudakaro wakakura maningi no kuvangiswa maningi ngo zviitiko zvo hama no hambzaji jondhojo jaiviyaro kumuzi kwedu. Zvondhozvo zvakativangisa kuti tidire basa ra Jehovha pakutanga mu upenyu hwedu.

Ndakajijira maningi ngo muezaniso wo vabari vangu. Ngokuti ivona vainga vakagondeka kuna Jehovha. Pasure pokutamika ka mai wangu ngo ndava yo ndhendha yo vainga nayo, inini na baba wangu takatanga kushanda inga mapiyona mu gore ra 1971. Asi mu gore ra 1973 pandainga no makore aikwana kuita 20, baba wangu vakatamikavo. Kuruza vabari vangu, kwakandiita kuti ndisuruvare no kujizwa ndiri ndega. Kuva mundhu ‘wakacijikira no kuvanga,’ zvakandibesera kuti ndienderere mberi ndino mavonero akanaka kusiyapo kugara ndecisuruvara mukuvo wese. Zvakandibeserazve kuti ndirambe ndecikhwedera phedo na Jehovha. (Vahebheru 6:19) No papera mukuvo mushomani baba wangu novatamika, ndakatendera basa randakagajwa ro kushanda inga piyona anosisira ku citundhu co Coron ku provhinsiya yo Palawan.

Pondakaguma ku Coron, ndainga ndino makore aikwana kuita 21. Zvecivoneka kuti inini ndaigara ku dhorobha, ndakashamisika maningi pandakaziva kuti mu mutundhu mandakagumari mainga mucina marujhu  inga manera kwainga kwakaita ku dhorobha kwandaigara, kwainga kucina kumwa inga kwandaigara, cimwenizve, karu no zvifambiso zvimweni zvainga zvishoma. Pikija kwainga no hama no hambzaji, akucaingepi no hama iri yese yaishanda inga piyona kuti ipinde na inini mu basa ro kucumaera. Kazinji ndaienda ndega mu basa ro kucumaera. Pa mweji wokutanga, ndairangarira maningi mbhuri yangu no shamwari jangu. Cousiku, ndaisotesesa mudenga ndecivona ndhondho jakawanda musoji jangu jecibuda. Ndakarangarira kusiya basa randaingari ndakagajwa kuti ndihwirire kwenda ku muzi.

Mu mukuvo uwu wandaijizwari ndiri ndega, ndaiita mukumbiro kuna Jehovha. Ndiciri kuceukija zviro zvinovangisa zvandakaverenga mu Bhaibheri no mu mabhuku akacijikira mu Bhaibheri. Bhuku ra Nduyo 19:14 mukuvo wese ndairirangarijisisa. Inini ndakavona kuti Jehovha waizova “buwe rangu no muponesi wangu,” kudari ndikarangarijisisa zviro zvinomudakajisa zvakadari inga mabasa ake no mugariro jake jaushoni. Murindiri umweni wainga no musoro waiti: “Imwimwi Amuripi Mega” a wakandibesera maningi. Inini ndaiuverenga ndaverengazve. Mu njira iri yese hayo, inini ndaigara ndega pamwepo na Jehovha pa mukuvo jese, zvondhozvo zvaindipekeja mukana jo kuita mukumbiro, kujija no kurangarijisisa.

Pasure po mukuvo mushomani no ndaguma ku Coron, ndakagajwa inga mukuru wo ungano. Zvecivoneka kuti mukuru wo ungano wainga inini basi konayo, sumana ngo sumana ndaiitisa musongano wo Escola de Ministerio Teocratico, Musongano wo Basa, kuitisa Jijo yo Bhaibheri yo Ungano, no kuitisa Jijo yo Murindiri. Ndaiitisazve hurukuru ya vese sumana ngo sumana. Kunasa kunanga, andicaingepizve no mukuvo kuti ndijizwe ndiri ndega.

Ndakava no basa rakabudirira maningi ku Coron, vazinji vo vajiji vangu vo Bhaibheri vakagumira pakubhabhatijwa. Asi kwakavavo no zvineso. Mukuvo muzinji, ndaidikana kufamba mutengo waikhwedeja njiku yese kuti ndikwanise kuguma ku ndima yangu, ndicikazivi kuti ndaizovatira kwapi pondaizogumeyo. Ndima yo ungano yedu, yaibatanijavo zvimatundhu zvakawanda zvidoko. Kazinji ndaidikana kuita hwendo ndecishandisa bharko, kuveni kwaaita maningi mavimbi akakura no mbhepo, zvese izvi kwainga kuitira kuti ndikwanise kuguma ku ndima yangu, pikija ndainga ndicikakwanisi kusambirira. Pakati po zvineso zvese izvi, Jehovha wakandijivirira no kundisapota. Pakufamba ko nguva, ndakazozwisisa kuti Jehovha wainga ecindinasirira kuitira zvineso zvakawanda maningi zvandaizosongana nazvo pa basa rimweni randaizogajwa ndiyena.

Mu gore ro 1978, ndakagajwa kuti ndiende koshandira ku Papua New Guinea kanjikazi ko Australia. Ku Papua New Guinea, i nyika ino matundhu akaezana no o ku Spain. Ndakashamaisika maningi pandakaziva kuti vandhu vanokwana kuita 3.000, vaibhuya ndumi jinopindirija 800. Zvinodakajisa ngozvokuti vazinji vakona, vaibhuya ndumi yo Melanesian Pidgin inodaninjwa maningi kuti Tok Pisin.

Ndakagajwa ko mukuvo mushomani mu ungano yaibhuya Cingezi mu dhorobha guru ku Port Moresby. Asi ndakazocinja ndoenda ku ungano yaibhuya Tok Pisin. Ndakadikana kujijira kuti ndikwanise kubhuya ndumi jondhojo. Ndaishandisa manera andaijijiraro kuti ndibhuye no vandhu mu basa ro kucumaera. Zvondhozvo zvakandibesera kuti ndikwanise kuvereketa ndumi iyi gokukasika. Ko mukuvo mushomani ndakakwanisa kuita hurukuro ndecishandisa ndumi yo Tok Pisin. Ndakadakara maningi ko mukuvo mushomani pasure po kuguma ku Papua New Guinea, pandakagajwa kuti ndishande inga muvonereri wo ndharaundha ku ungano jaibhuya Tok Pisin ku provhinsiya jakasiyana-siyna jaikura maningi.

 Zvecivoneka kuti ungano jainga ndhambo no ndhambo, ndakadikana kunasirira magungano akawanda o ndharaundha no kuita hwendo kakawanda. Pakutanga ndaijizwa ndiri ndega ngokuva ku ndau yandainga ndicikazivi, nyika imbza, ndumi imbza no zvirovejeso zvipsa. Inini andicaikwanisepi kuita hwendo kwenda ku ungano iji ndecifamba ngo pasi, ngo ndava yokuti kwainga no matundhu. Ngo ndava yazvo, ndaidikana kuita hwendo ndecishandisa ndeki sumana jese. Kazinji, mu ndekimo maiwanika basi inini ngokuti ndeki yondhoyo aicaingepi yaushoni. Ndakaenda kovona kuti kuita hwendo ndecishandisa ndeki zvaindinyangajisa maningi kusiyapo kutoshandisa bharko.

Vandhu vaishandisa foni vainga vashoma basi, zvokuti kudari ndecida kubhuya no hama ndaidikana kutara karata. Kazinji ndaizoguma kondhoyo karata jangu jicito jaashihwa. Zvondhozvo zvaindiita kuti ndivhunjise vandhu kuti Zvapupu zva Jehovha ngozvapi. Asi vhaza imwe nga imwe yandaisongana no hama, ivona vaindiashira no nderemejo yese. Zvondhozvo zvaindiita kuti ndiceukije kuti kuvangisira kwangu akucaingepi kwa biresi. Ndakavona besero ra Jehovha ngo njira jakawanda, ushamwari hwangu naye hwaikura maningi.

Pa hwendo hwokutanga hwandakasongana no hama ku citundhu cinodanijwa kuti Bougainville, varovorani vamweni vakatanga kunyemwerera vondikhwederera vondivhunjisa kudari, “Muciri kutiziva?” Ndakaceukija kuti varovorani ava ndakavacumaera pandakaguma ku Porto Moresby. Inini ndakatanga kujija navo Bhaibheri ndicito ndavapekeja hama imweni yaigara mu ndharaundha yondhoyo. Vese vo vaviri vakagumira pa kubhabhatijwa. Aya akava amwe o makomborero andakaashira mukati mo makore matatu ndecishandira ku Papua New Guinea.

Ndicito ndabuda mu Coron mu gore ro 1978, ndakaziva hambzaji imweni yaiseja maningi, cimwenizve yaikova yaidanijwa Adel. Iyona yaishanda inga piyona wo nguva jese no kurera vana vayo vaviri Samuel na Shirley. Pamukuvo wondhowo hambzaji iyi yaitaja mai wayo vainga vaamusharuka. Mu mweji wa Maio mu gore ro 1981, ndakahwirira ku Philippines kwenda kocadha na Adel. Pasure po mucadho wedu tese tovaviri takashanda inga mapiyona no kutaja tiri pamwepo mbhuri jedu.

Pikija tainga tino mbhuri, mu gore ra 1983, ndakagajwa inga piyona anosisira kuti ndiende koshandira ku Cirundu co Linapacan ku provhinsiya yo Palawan. Mbhuri yese yakacinja kwenda kogara ku ndau iyi kwaingari kucina Zvapupu zva Jehovha. Mai wa Adel vakatamika no papera gore rimwe. Ngo kudaro, takaenderera mberi takabatikana mu basa ra Jehovha izvi ndizvona zvakatibesera pa mukuvo uwu wokunesa. Takatangisa jijo jo Bhaibheri jakawanda no vandhu vaida kuvona musongano. Itusu taidazve Nyumba yo Umambo yakaita doko. Itusu takavaka Nyumba yo Umambo imwe. Ko makore matatu basi pasure po kuguma kwedu ku mutundhu uwu takadakara maningi ngo kuvona vandhu vanokwana kuita 110 vakavona Cirangarijo, vazinji vakona vakavangisira maningi kuti vagume pa kubhabhatijiwa pasure po kubuda kwedu ku ndau yondhoyo.

Mu gore ro 1986, ndakagajwa kuti ndiende koshanda ku cirundu co Culion mu ndau yaigara basi vandhu vainga no mapere. Pasure pa izvi, mukaji wangu Adel wakagajwavo kuti ashande inga piyona anosisira. Pakutanga, itusu taineseka maningi ngo kucumaera vandhu vainga no mabzanga ngo ndava yo mapere. Vacumaeri vo mu ndau jondhojo vakatigondesa kuti vandhu vaingari no mabzanga o ndhendha iyi yo mapere, vainga vakapera kurapiwa nokutizve ndhendha iyi aicaipairirana. Vamweni vakona vaihwajari ndhendha iyi vaivona musongano pamuzi po hambzaji imweni. Ngo kukasika takarovejana no cinjo iyi, cimwenizve takavona kuti  ngozvaushoni maningi kucumaera masoko akanaka tecivavhunja ngo pamusoro po vetero yedu inowanika mu Bhaibheri, vandhu vokuti vaijizwa inga kuti Jehovha aacaivadepi kubatanijavo no vamweni vo munyika yondhoyo. Zvainga zviro zvinodakajisa maningi kuvona vandhu vainga vecihwaja vecidakara ngo kuziva kuti njiku iriyese vanozova no uhomi hwakakwana vacikahwajizve.—Ruka 5:​12, 13.

Vana vedu vakarovejana kudini no cinjo iyi ku Culion? Kunasa kunanga inini no mukaji wangu Adel takakoka hambzaji mbiri kuti jigare na itusu pamwepo no vana vedu vaviri kuti vana vedu vawanevo vandhu vaushoni vokutamba navo. Vana vedu Samuel na Shirliy no hambzaji mbiri iji vakavangisira maningi mu basa ra Jehovha, cimwenizve vaijija Bhaibheri no zvivana zvokuti vabari vakona itusu taijija navo Bhaibheri. Kunasa kunanga, pa mukuvo umweni tainga tecijija no mbhuri jinokwana kuita gumi na imwe. Ko mukuvo mushomani basi tainga tecijija no vandhu vakawanda, cimwenizve vandhu vondhovo vaivangisira maningi zvokuti takatogumira pakuda kuumba ungano imweni imbza.

Pakutanga mukuru wainga inini basi. Bheteri rakandikumbira kuti ndiitise musongano sumana ngo sumana ku vacumaeri vaikwana kuita 8 ku Culion, perapo, ndaidikanazve kuitisa musongano ku vacumaeri vaikwana 9 ku mutundhu umweni waidanijwa kuti Marily. Kuitira kuguma kondhoyo, taidikana kupeja nguva ndhatu tiri mu bharko. Pasure po kuita musongano kondhoyo inini no mbhuri yangu taipeja nguva yakawanda teifamba ngo mumatundhu kuti tikwanise koitisa jijo jo Bhaibheri kumutundhu waidanijwa kuti Halsey.

Pakufamba ko nguva, takakwanisa kuvona kuti vandhu vakawanda ku Marily no ku Halsey vakatendera kujija cokwadi. Cimwenizve kondhoyo takavaka Nyumba jo Umambo mu ndau jakasiyana-siyana. Kudari inga ku Linapacan, hama no hambzaji jaikwanisa jaipa zviro zvajinazvo no kubesera pa basa ro kuvaka. Nyumba yo Umambo yo ku Marily yainghwina vandhu vanokwana kuita 200 iyona yainga yakakura maningi zvokuti taizokwanisa kuitiremo magungano o mutundhu.

Mu gore ra 1993 vana vedu pavakakura, inini no mukaji wangu takatanga kushanda inga vavonereri vo ndharaundha ku Philippines. Ngo kudaro, mu gore ra 2000, ndakakurusari cikora co treinamento ministeriari kuti ndirovejwe pakuva inga mujijisi pa cikora condhoco. Inini ndaijizwa inga ndicikakwanisi kuita basa riya, asi mukaji wangu Adel mukuvo wese waindivangisa. Iyena waindiceukija kuti Jehovha mukuvo wese waizondipekeja simba kuti ndikwanirise basa raakandigaja imbza. (Vafiripi 4:13) Mukaji wangu Adel wakandibesera ecishandisa ciitiko cake kamare ngokuti iyena waikwanirisa  basa rake kuveni wainga ecihwisana no zvineso zvakawanda zvo uhomi.

Mu gore ra 2006 pandainga ndecijijisa inga mujijisi ku cikora ciya, mukaji wangu wakabathwa ngo ndhedha yo Parkinson. Izvi zvakatipsasa maningi. Patakatema civaringo cokuti ngatiime basa kuti ndikwanise kumutaja, iyena wakadavira kudari: “Ndapota ngatiende kopsaka medhiko angakwanisa kundibesera no ndhendha yangu iyi pa kundirapa, ndinozviziva kuti Jehovha anozotibesera kuti tienderere mberi tiri pa basa iri.” Pa makore 6 akazotevera mukaji wangu Adel wakaenderera mberi ecishandira Jehovha pacinazve cimweni caainanga caimunesa. Paainga acikakwanisizve kufamba, iyena waicumaera naari pakadera yake yomarodha. Paaikwanisavo kuvereketa, iyena waipekeja mupinguro pa musongano ngo gama rimwe kana maviri. Mukaji wangu Adel mukuvo wese waiashira mensajhi jo hama no hambzaji vecimubongesera ngo muezaniso wake waushoni wo kucungirira mbhera paakazofa mu gore ra 2013. Inini ndakapeja makore anokwana kuita 30 ndinomudoni wakagondeka no ano rudo Adel, asi kuvhira paakafa, mazwiro o kusuruvara no kujizwa ndiri ndega akandipsasazve.

Mukaji wangu Adel waida kuti mukuvo wese ndienderere mberi ndiri pa basa iri, ngo kudaro, ndakaita zvondhozvo. Mukuvo wese ndaindoramba ndakabatikana mu basa ra Jehovha zvondhozvo zvaindibesera kuti ndihwisane no mazwiro o kujizwa ndiri ndega. Mugore ra 2014 mbhera 2017, ndakagajwa kuti ndivhakacire ungano jaibhuya ndumi yo Tagalog-speaking mu nyika yokuti hama no hambzaji ajicaikwanisepi kunamata Jehovha jakasujunuka. Pasure pa zvondhozvo, ndakavhakacira ungano jo ku Tagalog-speaking ku Taiwan, ku Estadhus Unidhus no ku Canada. Mu gore ra 2019 ndakajijisa ngo cingezi ku Cikora co Vavhangeri vo Umambo ku Indiya no ku Thailand. Ndakawana mudakaro mukuru maningi mu mabasa ese andaiitari. Ndinojizwa ndakadakara maningi pandinopeja mukuvo wese ndiri mu basa ra Jehovha.

Basa rimwe nga rimwe randinogajwa ndi Jehovha, rinondibesera kuti ndidisane no hama no hambzaji no kunasa kujiziva, zvondhozvo zvinondiita kuti ndivone zvecinesa kujisiya. Pa mugariro iji jese ndakajijira kuthemba kamare Jehovha. Mukuvo wese ndakavona kuti Jehovha waindibesera, zvondhozvo zvakandibeseravo kuti nditendere ngo mwoyo wese cinjo iriyese yaiitika. Nyamasi uno, ndiri kushanda inga piyona anosisira ku Philippines. Inini ndiri kujizwa ndakangwaririka mu ungano yandiri wari iyi imbza, iyona iri kuva mbhuri yangu kamare. Ndiri kudada maningi ngo kuvona Samuel na Shirley vana vangu vaviri vecitevejera muezaniso wa mai wavo ngo kuva no rutendo wakavanga.—3 Johani 4.

Hina, ndakasongana no muejo jakawanda maningi mu upenyu hwangu, kubatanijavo no kuvona mukaji wangu wandaida maningi ecitambujika mbhera kufa ngo ndhendha yainesa maningi. Cimwenizve, ndakadikana kurovejana no mugariro jakasiyana-siyana. Ngo kudaro, ndakakwanisa kuvona kamare kuti Jehovha “iyena aaripi ndhambo na itusu.” (Mabasa o Vapostori 17:27) Nyara ya Jehovha “aizivi kufupika maningi” kuti akonehwe kubesera vashandiri vake pikija vari mu ndau jicina maningi vacumaeri. (Isaya 59:1) Jehovha i buwe rangu, iyena wakava na inini mukati mo upenyu hwangu hwese, ndinobongesera maningi kwaari. Narini andizivi kumbova ndega.