MUSORO WO KUJIJA WO 6
NDUMBO 18 Kubonga ngo Muripo
Kuregerehwa ko Takaithwa Ndi Jehovha—Ndi Cipo Cikuru Kwatiri
“Mwari wakadisa vandhu vo nyika ino, ngo kudaro, wakavapa Mwana wake.”—JOHANI 3:16
ZVATICAJIJA
Tinoda kujija kuti tingaitisa kudini kuti tiengejere kubongesera kwedu ngo kuregerehwa kotakaithwa ndi Jehovha, no kujija kuti Jehovha anoitenyi kuti atiregerere.
1-2. Kuitisa kudini mugariro wo vandhu, wakaezana no wo mujaha wanangwaya pa ndima yokutanga?
AMBORANGARIRANYI basi ngo mujaha wakarehwa pa mbhuri yakakhupuka. Asi pa njiku iri yese, panoitika ngozi, vabari vake vanoita asidhenti, vofa. Mujaha uwu anosuruvara maningi ngo zvaitikaro. Asi panoitikazve zviro zvimweni zvakashata. Iyena anoguma pakuziva kuti vabari vake vakashandisa mare yese, vosara no magava akawanda. Kusiyapo kusara no zviro zvo vabari vaya, iyena wakazosara no magava akawanda maningi. Vandhu vanotanga kumukhumbusa ngo kukasika kuti apagari magava ese aya. Asi mujaha uwu, aana zviri zvese kuti akwanise kupagari magava aya.
2 Mu njira yakaezana, mugariro wedu wakadari inga wo mujaha uwu. Vabari vedu vokutanga Adhamu na Evha,vainga vakakwana, vairarama mu paradhiso yainga yakaseja maningi. (Genesi 1:27; 2:7-9) Ivona vainga no mukana wo kupona kwenda no kwenda vecidakara, asi zviro zvakacinja. Ivona vakaruza muzi wavo mu paradhiso no vetero yo kupona kwenda no kwenda. Ngoyapi ndhaka yovakasiira vana vavo? Bhaibheri rinoti: “Ngokuti cishaishi cakanghwina mu nyika ngo ndava yo mundhu umwe basi, [Adhamu] rufu hwonghwinavo ngo ndava yo cishaishi. Ngo maitiro ondhowo, rufu hwakagumira vandhu vese ngokuti vese vakashaisha.” (Varoma 5:12) Ngo kudaro, takagara utaka wocishaishi ca Adhamu, inga muviyo, tiri kufa. Cishaishi cotakagara utaka, cakadari inga zigava rakakura maningi, zvokuti apana na umwe wedu angakwanisa kuripagari.—Nduyo 49:8.
3. Ngenyi zvishaishi zvedu zvinoezaniswa no ‘magava’?
3 Jesu wakaezanisa zvishaishi no ‘magava.’ (Mateu 6:12; Ruka 11:4) Patinoshaisha, tinoita inga kuti tino magava kuna Jehovha, nokutizve tinodikana kupagari mutengo wo magavewo. Kudari tikatama kupagari magava aya, patinofa, anonga apagahwi.—Varoma 6:7, 23.
4. (a) Kudari apazivi kuwanika besero, ngozvapi zvaizoitika no vashaishi vese? (Nduyo 49:7-9) (b) Mu Bhaibheri, gama rokuti “cishaishi” rinorevenyi? (Vonanyi bhokiso rinoti: “ Cishaishi.”)
4 Itusu tega, atikwanisi kuwana zvese zvakaruzwa ndi Adhamu na Evha. (Verenganyi Nduyo 49:7-9.) Ticina besero riri rese, itusu aticaizova no vetero yo kumbeji nee yo rumuko. Kunasa kunanga, itusu taizofa basi totamazve vetero yo kuzoraramazve kudari inga zvinyama.—Mucumaeri 3:19; 2 Pedhru 2:12.
5. Baba wedu vano rudo Jehovha, vakatibesera kudini pa kupagari zigava ro zvishaishi zvedu?
5 Rangariranyi ngo pamusoro po mujaha wanangwaya pakutanga. Ngozvapi zvaizoitika kudari mwanarume wakakhupuka wojipira kuti apagari magava ese akasiiwari ngo vabari vake? Pacina kukana-kana, mujaha uwu waizobongesera maningi no kutendera cipo ici. Mukuezanavo, Baba wedu Jehovha avo vano rudo, vakatipa cipo, ico cinokwanisa kupagari magava ese otakagara utaka a Adhamu. Jesu wakasanangura cipo ici ngo njira iyi: “Mwari wakadisa vandhu vo nyika ino, ngo kudaro, wakavapa Mwana wake, wakabahwa ari ega, kuti vese vanomutenda vatame kuparajwa, asi vawane upenyu hucikaperi.” (Johani 3:16) Kusiyapo izvi, cipo ici, cinotipa mukana wo kuva shamwari ja Jehovha.
Jesu wakacumaera nasoko akanaka ngo pamusoro po kuregerera ka Jehovha akacijikira pa mupiro wo muripo. (Johani 3:16) Iyena wakapira upenyu hwake kuitira muripo uwu (Vonanyi ndima 5)
6. Ngoapi magama anoshandiswa mu Bhaibheri atinoda kuzwisisa mu cijijo cino, ngenyi?
6 Tingabesereka kudini ngo cipo ici cotakapuwari ndi Jehovha ngo kuregerehwa zvishaishi zvedu kana ‘magava’? Bhaibheri rinodavira muvhunjo uwu recishandisa magama akadari inga aya: Kuviiranisa, mupiro wo kupfujura zvishaishi, cipo co kuviiranisa, muripo, mutengo no kudaninjwa inga varurami. Mu cijijo cino, tiri kuda kubhuisana maningi ngo pamusoro po zviro izvi, no kubhuisanavo ngo zviro zvakaizwa ndi Jehovha kuti atiregerere. Patinorangarijisisa ngo manera Jehovha wakatiregerera, kubongesera kwedu kunoengejeka.
JEHOVHA ANODA KUTI TIVE SHAMWARI JAKE
7. (a) Ngozvapizve zvimweni zvakaruzwa ndi Adhamu na Evha? (b) Ngo kuva mubarihwana wa Adhamu na Evha, ngozvapi zvatinoda? (Varoma 5:10, 11)
7 Kusiyapo basi kuruza mukana wo kupona kwenda no kwenda, Adhamu na Evha vakaruza ushamwari hwavo na Jehovha. Pakutanga, ivona vaiita divi ro mbhuri ya Jehovha. (Ruka 3:38) Asi povakandotama kuzwira Jehovha, vakagogomehwa pakati po mbhuri iyi, vacito vaano vana. (Genesi 3:23, 24; 4:1) Ndiyo ndava, itusu tiri mubarihwana wavo, tinodikana kuviiraniswa ndi Jehovha. (Verenganyi Varoma 5:10, 11.) Ngo magama amweni, tingati tinodikana kuvangisa ushamwari hwedu na Jehovha. Mu Cigiriki, gama rokuti “kuviiranisa,” rikasandujwa, rinoreva “muvengi wova shamwari yedu.” Zvinoshamaisa ngozvokuti Jehovha ndiyena kamare wakatanga kuti izvi zviitike. Kuitisa kudini?
JEHOVHA WAKAITA KUTI ITUSU TIVE SHAMWARI JAKE
8. (a) Icinyi mupiro wo kufukija zvishaishi? (b) Icinyi cipo co kuviiranisa?
8 Jehovha wakaita kuti vandhu vacizivi kukwana vakwanise kuva shamwari jake. Bhaibheri rinonanga kuti zvaakaitari Jehovha ndi mupiro wokufukija zvishaishi. Mupiro wokufukija zvishaishi, zvinoreva kucinja ciro ngo ciro cimweni asi cino mutengo wondhowo. Ngo kudaro, Jehovha wakaita kuti zvakaruzwaya ndi Adhamu zviwanikezve, ngo kupira mundhu wakakwana waidarivo inga ndi Adhamu. Matahwa o Cikristu o Cigiriki, anoshandisa gama rokuti “muviiranisi” rino revo yakaezana no gama rokuti mupiro wokufukija zvishaishi. (Varoma 3:25) Cipo cokuti muviirani ndicona cinoitisa kuti mundhu ave no runyararo na Jehovha no kuva no ushamwari naye.
9. Ngozvapi zvaakaita Jehovha kuti zvishaishi zvo Vaiziraeri zviregerehwe?
9 Jehovha wakaita kuti zvishaishi zvo Vaiziraeri zviregerehwe, no kuva shamwari jake. Mu makore ese, Vaiziraeri vaiviisa zvipo zvo kuviiranisa. Pa njiku iyi, mupiri waipira zvinyama kuitira zvishaishi zvo vandhu. Zvakajeka kuti mupiro iji jo zvinyama ajicaizokwanisa kupfujura zvishaishi zvo vandhu ngokuti zvinyama zvakaderera maningi tikazvienisa no vandhu. Asi Vaiziraeri vainga vakhauya voenda koita mupiro, vaiva no cokwadi cokuti Jehovha wainga aregerera zvishaishi zvavo. (Vahebheru 10:1-4) Kusiyapo izvi, kuita mupiro mukuwo wese kwaiizwari ngo Vaiziraeri, kwaivaceukija kuti ivona vainga vashaishi, cimwenizve, kuti zvishaishi zvavo zviregerehwe, paidikana mupiro wakakura.
10. Jehovha wakaitenyi kuti zvishaishi zvo vandhu zviregerehwe mukuperera?
10 Jehovha wakaitenyi kuti zvishaishi zvo vandhu zviregerehwe kwenda no kwenda? Iyena wakaita kuti Mwana wake Jesu Kristu, ape cipo “kamwe basi kuti atore zvishaishi zvo vazinji.” (Vahebheru 9:28) Jesu wakapira “upenyu hwake kuti aponese vandhu vazinji.” (Mateu 20:28) Asi muripo icinyi?
MURIPO WA JESU WAKAPAGARI MUTENGO
11. (a) Mukuzwirana no Bhaibheri, muripo icinyi? (b) Ndiyani basi waizokwanisa kupagari muripo?
11 Bhaibheri rinonanga kuti Jehovha wakavona zvecifanera kuti apagari muripo kuti zvishaishi zvedu zviregerehwe no kuva shamwari jake. a Asi ngowapi mutengo wo muripo waizokwanisa kupagari zvakaruzwa ndi Adhamu? Ceukijanyi kuti Adhamu na Evha vakaruza upenyu hwakakwana no mukana wokupona kwenda no kwenda. Ngo iyo ndava, mutengo wo muripo waidikana kuva wakaezana no mutengo wo zviro zviya zvakaruzikaya. (1 Timoti 2:6) Mutengo uwu, waizopagahwi ngo mwanarume wainga waadhodha. Cokutanga, wainga wakakwana, cocipiri, wainga no mukana wo kupona pasi pano kwenda no kwenda no cocitatu, wainga akanasiririka kuti ape upenyu hwake kuti aripe zvishaishi zvedu. Ngo njira iyi, upenyu hwake waizokwanisa kupagari zviro zviya zvakaruzikaya.
12. Ngenyi Jesu waizokwanisa kupagari muripo?
12 Ngenyi Jesu waizokwanisa kupagari muripo? Vonanyi mathangwe matatu. Rokutanga, wainga akakwana, “iyena aazivi kuita cishaishi.” (1 Pedhru 2:22) Rocipiri, iyena waizokwanisa kurarama kwenda no kwenda pasi pano, no rocitatu, wainga akanasiririka kuti afe no kupira upenyu hwake kwatiri. (Vahebheru 10:9, 10) Jesu wainga akakwana kudari inga ndi Adhamu paainga acito ashaisha. (1 Vakorinte 15:45) Ngo iyo ndava, ngo kufa kwake, Jesu wakakwanisa kupagari zvese zvakaruzwa ndi Adhamu ngo mutengo wakakwana. (Varoma 5:19) Ngo njira yakaezana, Jesu wakava “Adhamu wokupejisira.” Apanazve dikano kuti paviye mundhu umweni wakakwana kuti apagari zvakaruzwa ndi Adhamu. Jesu paakafa, “wakaita mupiro kamwe basi paakajipira.”—Vahebheru 7:27; 10:12.
13. Ngowapi musiyano wo mupiro wo kufukija zvishaishi no muripo?
13 Ngowapi musiyano wo mupiro wokufukija zvishaishi, no muripo? Mupiro wokufukija zvishaishi, ndiwona unoithwa ndi Mwari kuti tive shamwari jake. Muripo ndi mutengo wakapagahwi kuitira kuti mupiro wo kufukija zvishaishi ushande kuitira vandhu vanoshaisha. Mutengo wo muripo unoimirira ngazi yakapopomejwa ngo ndava yedu.—Vaefeso 1:7; Vahebheru 9:14.
JEHOVHA WAKATISUJUNURA KU CISHAISHI NO RUFU NO KUTIDANINJA VARURAMI
14. Wari uno tiri kuda kuvonenyi, ngenyi?
14 Tinobesereka kudini ngo zvatakaitihwa ndi Jehovha? Kuti tidavire muvhunjo uwu, ngatende tivone revo yo magama maviri anowanika mu Bhaibheri anotibesera kuzwisisa kuti tinobesereka kudini ngo kuregerehwa kotakaithwa ndi Jehovha.
15-16. (a) Mu Bhaibheri, gama rokuti “mutengo,” rinoda kurevenyi? (b) Tinojizwa kudini patinoziva kuti takasujunuhwa ku cishaishi no rufu?
15 Mu Bhaibheri, gama rokuti mutengo, rinoreva kusujunuhwa kotakaithwa ngo ndava yo kupagahwi ko muripo. Mupostori Pedhru wakabhuya ngo pamusoro po kusujunuhwa uku. Iyena wakati: “Ngokuti munozviziva kuti asipi ngo zviro zvinopera inga sirivha no goridhi zvamakasununguhwa ndizvona mu maitiro enyu akashata, amakasiihwa ngo majicekuru enyu. Asi makaponeswa ngo ngazi ya Kristu ino mutengo mukuru, yakaezana no yo vhuta ricina vara no ricizivi kuremara.”—1 Pedhru 1:18, 19.
16 Ngo ndava yo muripo, itusu tese tingasujunuhwa ku cishaishi no rufu no zvineso zvese zvinoviiswa ngo zviro izvi. (Varoma 5:21) Atikani-kani kuti tino zigava rakakura maningi kuna Jehovha na Jesu ngo kutisujunura ngo ngazi inosisira maningi kana upenyu hwa Jesu.—1 Vakorinte 15:22.
17-18. (a) Zvinorevenyi kudaninjwa mururami? (b) Izvi zvinorevenyi ku umwe na umwe wedu?
17 Bhaibheri rinonanga kuti Jehovha anovona vashandiri vake inga vakarurama. Izvi zvinoreva kuti Jehovha, aatikhumbusi kuti tipagari zvishaishi zvatinoita. Asi izvi azvirevi kuti Jehovha aareremeji ndhungamiriro jake jakarurama. Iyena aatidaniji varurami ngokuti tinofanera. Aatizvukiri majiso patinoshaisha. Jehovha wakanasiririka kuti akanganwe magava edu, ngokuti itusu tinotenda muripo wakapagahwi ndi Jesu.—Varoma 3:24; Vagaratiya 2:16.
18 Izvi zvinopsasa kudini umwe na umwe wedu? Vaya vakasanwa kuti vaende kootonga na Jesu kumatenga, vanodanijwa vakarurama inga vana va Mwari. (Tito 3:7; 1 Johani 3:1) Zvishaishi zvavo zvakaregerehwa, zvoita inga kuti avazivi kumboshaisha. Ngo kudaro, ivona vanotendehwa kuti vazove mu Umambo. (Varoma 8:1, 2, 30) Vaya vano vetero yo kupona pasi pano kwenda no kwenda, vanodaninjwa varurami inga shamwari ja Mwari, cimwenizve, zvishaishi zvavo zvapera kuregerehwa. (Jakobo 2:21-23) Vandhu vazinji vanozopona pa Armagedhoni, vanozova no mukana wo kuzotamazve kufa. (Johani 11:26) “Vakarurama no vandhu vacizivi kururama” vakafaya, vanozomuswa. (Mabasa o Vapostori 24:15; Johani 5:28, 29) Pa kufamba ko nguva, vashandiri vese va Jehovha vanozopona pasi pano vaya vanozozwira, vanozova no “rusujunuko hukuru hwo vana va Mwari.” (Varoma 8:21) Tinodakara maningi ngo kurangarijisisa mukuwo wokuti tinozova vana vakakwana va Baba wedu, Jehovha.
19. Mugariro wedu wacinjisa kudini? (Vonanyi bhokiso rinoti: “ Zvinorevenyi Kwatiri”?)
19 Icokwadi kuti mugariro wedu wakaezana no wo mujaha wanangwaya pa jijo iyi, uwo wakaruza zvese, wosara no magava akawanda okuti aacaizokwanisa kumapagari. Asi ngo rudo hwa Jehovha itusu takakwanisa kubesehwa. Mugariro wedu wakacinja ngo ndava yo mupiro wo kufukija zvishaishi no kupagahwi ko muripo. Rutendo hwedu kuna Jesu Kristu hunotiita kuti tisujunuhwe ku cishaishi no rufu. Zvishaishi zvedu zvinoregerehwa, Jehovha paanoita izvi, zvinoita inga kuti atizivi kumboshaisha. Cinosisira maningi pa zvese ngocokuti wari, tinokwanisa kuva shamwari ya Baba wedu vano rudo, Jehovha.
20. Ngozvapi zvatinozojija mu cijijo cinotevera?
20 Itusu tinobongesera maningi Jehovha na Jesu patinorangarijisisa ngo zvese zvavakatiitira. (2 Vakorinte 5:15) Pacina besero ravo, itusu aticaizova no vetero iri yese. Kuna umwe na umwe wedu, zvinorevenyi kuregerera ka Jehovha? Izvi ndizvona zvatinozovona pa jijo inotevera.
NDUMBO 10 Ngaakujwe Jehovha, Mwari Wedu
a Mu ndumi jimweni, gama rokuti “muripo,” rikasandujwa gama ngo gama, rinoreva “mutengo wo upenyu” kana kuti “mutengo wakapagahwi.”
