MUSORO WO KUJIJA WO 7
NDUMBO 15 Kusimba Mwana wo Dangwe ra Jehovha!
Kuregerera ka Jehovha—Kunorevenyi Kwamuri?
“Ngokuti kuregerera ko cokwadi kuna imwimwi.”—NDUYO 130:4.
ZVATICAJIJA
Tiri kuda kuvona kuezanisira kunowanika mu Bhaibheri, kunovonesa manera Jehovha aanoregerera. Cijijo ici cinozoengejera kubongesera kwedu Jehovha ngo kutiregerera.
1. Mundhu paanonanga kuti watiregerera ngenyi zvinganesa kuziva zvaanonga ecinangira?
“NDAMUREGERERA.” Kuzwa gama iri kunodakajisa maningi, kudari tikaita kana kunanga zviri zvese zvanyangajisa umweni. Asi gama iri rinorevenyi? Mundhu paanobhuya gama iri, kureva kuti anonga ecivonesa kuti muciri shamwari no shamwari? Kana kuti anonga adira buwe pa shwiro yondhoyo wotokanganwa zvaitika? Kunasa kunanga, gama rokuti kuregerera rinonangira zviro zvakasiyana kuvhira pa mundhu umwe na umwe. Izvi zvingava zvecinesa maningi.
2. Bhaibheri rinonangenyi ngo pamusoro po kuregerera ka Jehovha? (Vonanyi masoko o pasi.)
2 Manera atinoregerera akasiyana maningi no manera aanoregerera Jehovha. Akuna mundhu anokwanisa kuregerera inga ndi Jehovha. Mutari wo nduyo wakananga kudari ngo pamusoro pa Jehovha: “Ngokuti kuregerera ko cokwadi kuna imwimwi, kuti vandhu vamureremeje.” a (Nduyo 130:4) Kunasa kunanga, kuregerera ka Jehovha, i “kuregerera ko cokwadi.” Ndiyena basi anokwanisa kuziva kuti kuregerera kunorevenyi kamare. Pa mugariro jimweni, vatari vo Bhaibheri, vakashandisa gama ro Cihebheru rokuti kuregerera kuti vasanangure manera arinoshandiswa ngo vandhu pa kuregerera.
3. Ngenyi kuregerera ka Jehovha kwakasiyana no kuregerera kwedu? (Isaia 55:6, 7)
3 Jehovha paanoregerera, iyena anopfujura mukuperera kamare zvishaishi zvo mundhuwo. Ngo njira iyi, iyena angavazve shamwari yo phedo ya Jehovha. Tinobonga maningi Jehovha ngo kutiregerera ngo njira iyi inoshamaisa.—Verenganyi Isaia 55:6, 7.
4. Jehovha anotibesera kudini kuti tizwisise kuti kuregerera kokadi kunorevenyi?
4 Kudari kuregerera ka Jehovha kwakasiyana no kwedu, kuitisa kudini itusu vandhu vacizivi kukwana tingaziva revo yo kuregerera kokadi? Jehovha anoshandisa muezaniso kuti atibese kuzwisisa manera aanotiregerera. Mu cijijo ici, tinozovona kuezanisira kumweni kunovonesa kuti iyena anovhisisa kudini zvishaishi zvedu. Kujija ngo kuezanisira uku, zvinozotibesera kuti tiengejere kuda kwatinoita Baba wedu vano rudo Jehovha no kuvabongesera.
JEHOVHA ANOVHISA CISHAISHI
5. Zvicinyi zvinoitika Jehovha paanoregerera zvishaishi zvedu?
5 Kazinji Bhaibheri, rinoezanisa cishaishi no mutoro. Mambo Dhavhidhi wakananga ngo pamusoro po zvishaishi zvake eciti: “Kuposa kwangu kwandiwandira mbhera kuguma pamusoro wangu; inga mutoro, kuri kundiremera maningi kuti ndikuthware.” (Nduyo 38:4) Asi Jehovha anoregerera zvishaishi zvo mundhu anokhauya. (Nduyo 25:18; 32:5) Gama rokuti “kuregerera,” rikambhera ngo kusandujwa ku ndumi yo Cihebheru, zvinoreva “kumuka” kana “kuthwara.” Tingavona Jehovha inga mwanarume wakavanga maningi, uwo anovhisa muthwaro pa mapfuji edu, muthwaro unorema maningi wo zvishaishi zvedu owuendesa ndhambo.
“Makaregerera” (Nduyo 32:5)
6. Jehovha anodira kwapi zvishaishi zvedu?
6 Bhaibheri rinoshandisazve kuezanisira kumweni kunovonesa kuti Jehovha anovhisa zvishaishi zvedu ozvidira ndhambo. Nduyo 103:12 inonanga kudari: “Inga kumavhazuva kuri ndhambo no kumavirira, ngo kudaro, iyena anodira ndhambo na itusu zvishaishi zvedu.” Kumavhazuva i ndhambo maningi no kumavirira. Ndau mbiri iji ajisongani. Ngo magama amweni, Jehovha anodira ndhambo zvishaishi zvedu zvokuti atikwanisi kuzvirangarira. Izvi zvinovonesa kuti Jehovha anotiregerera mukuperera. Kuziva izvi kunotiita kuti tigajane.
“Inga kumavhazuva kuri ndhambo no kumavirira” (Nduyo 103:12)
7. Jehovha anosanangurisa kudini zvaanoita no zvishaishi zvedu? (Mikeya 7:18, 19)
7 Pikija Jehovha ecitora zvishaishi zvedu ozvidira ndhambo, kureva kuti iyena anogara ecizviceukijazve? Haiwa. Mambo Ezekiya wakati: “Makakhandira zvishaishi zvangu zvese sure kwenyu.” (Isaia 38:9, 17) Izvi zvinoreva kuti Jehovha anodira ndhambo zvishaishi zvo ari wese, wotama kuzviceukijazve. Zvakabhuya Ezekiya, zvingasandujwa mu njira iyi : “Makaita kuti mundivone inga [ndicizivi kumboshaisha.]” Bhaibheri rinogogomejera shwiro iyi ngo kuezanisira kumweni kunowanika pa bhuku ra Mikeya 7:18, 19. (Verenganyi.) Mavhesi aya anonanga kuti Jehovha anokhandira zvishaishi zvedu pasi po jombe. Mu nguva yo kare, ciro caiwira pasi po jombe cainesa maningi kuti ciwanikezve.
“Makakhandira zvishaishi zvangu zvese sure kwenyu” (Isaia 38:17)
“Munozokhandira zvishaishi zvavo pasi po jombe” (Mikeya 7:19)
8. Ngozvapi zvatajija mbhera wari?
8 Kuezanisira uku, kunotijijisa kuti Jehovha paanoregerera, anovhisa muthwaro jinorema pa mapfuji edu jo cishaishi. Zvaiita inga kuti Dhavhidhi wainanga kudari: “Vanodakara vaya vakaregerehwa kuposa kwavo, zvishaishi zvavo zvakafukijwa. Anodakara mundhu anokanganihwa cishaishi cake ndi Jehovha.” (Varoma 4:7, 8) Zvokadi, uku i kuregerera kokadi.
JEHOVHA ANOPFUJURA ZVISHAISHI ZVEDU
9. Bhaibheri rinoshandisa kuezanisira kwapi kunotibesera kuvona kuti Jehovha anotiregerera?
9 Jehovha anoshandisa kuezanisira kumweni kuitira kutibesera kuti tireremeje muripo. Iyena anopukuta kana kupfujura zvishaishi zva vaya vanokhauya. Mukuezanisira, zvinoita inga kuti Jehovha anopaja kana kupukuta zvishaishi. Izvi zvinoita kuti mushaishi ave akacena nga papsa. (Nduyo 51:7; Isaia 4:4; Jeremia 33:8) Jehovha anonasa kusanangura izvi paanoti: “Viyanyi, titonge shwiro iri pakati pedu, izvi ndizvona zvinonanga Jehovha. Pikija zvishaishi zvenyu zvakapsukirikira, zvinozocena inga cando; pikija zvakapsuka inga sangi, zvinozocena inga nguvo yokucena.” (Isaia 1:18) Dimati parinophwatikira pa nguvo, zvinonesa maningi kuti pakhatikaro, pacene. Ndiyo ndava, Jehovha wakashandisa kuezanisira uku kuitira kutivonesa kuti zvishaishi zvedu zvingava zvakacena zvotoita inga kuti atizivi kumboshaisha.
“Pikija zvishaishi zvenyu zvakapsukirikira, zvinozocena inga cando” (Isaia 1:18)
10. Kuezanisirazve kwapi kunoshandisa Jehovha kuitira kuvonesa kuti kuregerera kwake kwakakura maningi?
10 Inga zvatakavona pa cijijo cakapera, zvishaishi zvedu zvinoezaniswa no magava. (Mateu 6:12; Ruka 11:4) Ngo kudaro, patinoshaishira Jehovha zvinoita inga kuti magava edu ari kuengejeka. Magava edu akawanda maningi. Jehovha paanotiregerera, zvinoita inga kuti watiregerera pa magava ese kamare. Iyena aatikhumbusi kuti tipagari zvishaishi zvedu zvaakapera kutiregerera. Mukufanana no mundhu anodakara maningi paanoregerehwa magava ake, itusu tinodakaravo maningi patinoziva kuti Jehovha watiregerera pa zvishaishi zvedu.
“Tiregererenyi zvishaishi zvedu” (Mateu 6:12)
11. Bhaibheri rinonga recinangenyi parinonanga kuti zvishaishi zvedu ‘zvapfujuhwa’? (Mabasa o Vapostori 3:19)
11 Jehovha anoita zvizinji kusiyapo basi kutama kutikhumbusa magava edu kana zvishaishi. Iyena anozvipfujura mukuperera kamare. (Verenganyi Mabasa o Vapostori 3:19.) Magava edu paanoregerehwa, tingarangarira ngo zishishi rakakura rinoriskahwi ngo panyezuru po mutengo watiri kudhevheri waro. Asi manumero anonga ari pasi po zishishi iri, anonga ecivoneka. Izvi zvakasiyana maningi no kupfujura ciri cese. Kuti tizwisise izvi, tinodikana kuceukija kuti mu nguva yokare, tinta yaiizwa ngo karbhono, goma rinoizwa ngo muti wo akasiya no kumwa. Mundhu waikwanisa kupukuta pakatahwa ngo tinta iyi, kudari akatora ciponja cakabira, wopukuta ndicona. Ngo kudaro, magava “paanopfujuhwa”, iwona anopera kamare. Zvaitahwa ngo tinta iyi pozvaipfujuhwa, azvicaivonekazve, zvoita inga kuti painga pacizivi kutahwa zviri zvese. Kuziva kuti Jehovha aatiregereri basi zvishaishi zvedu asi anozvipfujura mukuperera, ndi zviro zvinopsasa maningi mwoyo wedu.—Nduyo 51:9.
“Zvishaishi zvenyu zvipfujuhwe” (Mabasa o Vapostori 3:9)
12. Kuezanisira ko makwiti akakura kunorevenyi kwatiri?
12 Jehovha anoshandisa kuezanisira kumweni kuti avonese manera aanopfujura zvishaishi zvedu. Iyena anoti: “Ndinozopfujura kuposa kwako koita inga kwafukijwa ngo makore zvishaishi zvako zvoita inga zvafukijwa ngo makwiti.” (Isaia 44:22) Jehovha paanotiregerera, zvinoita inga kuti iyena anoshandisa makwiti kuti afukije zvishaishi zvedu, zvoita kuti mundhu kana itusu titame kuzvivona.
“Ndinozopfujura kuposa kwako koita inga kwafukijwa ngo makore” (Isaia 44:22)
13. Tinojizwa kudini Jehovha paanoregerera zvishaishi zvedu?
13 Izvi zvinotijijisenyi? Jehovha paanotiregerera, itusu atidikani kugarazve tecijidemba ngo zvishaishi zvedu. Kujipira ka Jesu Kristu, kwakapfujura mukuperera zvishaishi zvedu, zvoita inga kuti atizivi kumboshaisha. Kudari tikakhauya ngo mwoyo wese pa zvishaishi zvedu, Jehovha anotiregerera.
JEHOVHA ANOTITENDERAZVE KUTI TIVE SHAMWARI JAKE
Kuregerehwa kwatinoithwa ndi Baba wedu vo mugore kunotiita kuti tikwanise kuva shamwari jake (Vonanyi ndima 14)
14. Ngenyi tingathemba kuregerera ka Jehovha? (Vonanyi mafoto.)
14 Jehovha paanotiregerera, tingava no cokwadi cokuti tingavazve shamwari jake inga pakutanga. Izvi zvinotibesera kuti titame kugara tecijidemba no kujipa ndava. Cimwenizve, atidikani kugara tecithya tecirangarira kuti Jehovha wakaviga bundu ngo zvishaishi zvotakaita nokutizve ari kupsaka mukana kuti azotipanice. Izvi azvizoitiki. Waro ngenyi tingathemba Jehovha paanonanga kuti watiregerera kamare? Jehovha wakavhunja Jeremiya kudari: “Ngokuti ndinozoregerera kuposa kwavo, andizoceukijizve cishaishi cavo.” (Jeremia 31:34) Ecinangira magama aya, mupostori Pauro, wakabhuya magama akafanana eciti: “Andizoceukijizve zvishaishi zvavo.” (Vahebheru 8:12) Izvi zvinorevenyi?
“Andizoceukijizve cishaishi cavo” (Jeremia 31:34)
15. Mu njira yapi Jehovha aaceukijizve zvishaishi zvedu?
15 Mu Bhaibheri, gama rokuti “kuceukija,” asipi nguva jese rinonangira kuceukija zviro zvakaitika kare. Kusiyapo izvi, ringanangira ari wese eciita zviro. Phanga raingaya rakakohomehwa pa mutivi pa Jesu, rakavhunja Jesu kudari: “Jesu, ucandikanganwa paunozonghwina mu Umambo hwako.” (Ruka 23:42, 43) Mwanarume uwu, aacaikumbira basi kuti Jesu amurangarire, mupinguro wakapa Jesu, waivonesa kuti mwanarume uwu, waida kuti Jesu amubeserevo. Ngo kudaro, Jehovha paanonanga kuti aazoceukijizve zvishaishi zvedu, zvinoreva kuti aazoiti zviri zvese kuti atipanice. Jehovha aazotipanici kumbejiyo ngo ndava yo zvishaishi zvaakapera kuregerera kare.
16. Bhaibheri rinonangenyi ngo pamusoro po kusujunuhwa kunovepo ngo kuregerehwa kokadi?
16 Jehovha paanotiregerera itusu tinojizwa takasujunuka. Bhaibheri rinoshandisa kuezanisira kumweni kuti ritibesere kuzwisisa izvi. Itusu tiri “varanda vo ushaishi.” Asi ngo ndava yo kuregerera ka Jehovha, itusu ‘takasujunuhwa ku ushaishi.’ (Varoma 6:17, 18; Apokaripsi 1:5) Patinoziva kuti Jehovha watiregerera, zvinotiita kuti tidakare maningi, inga muranda wasujunuhwa.
“Makasujunuhwa ku ushaishi” (Varoma 6:18)
17. Mu njira yapi kuregerera kunoezaniswa no kuraphwa? (Isaia 53:5)
17 Verenganyi Isaia 53:5. Kuezanisira ko kupejisira kwatiri kuda kuvona, ngo ko mundhu ano ndhendha icikarapiki. Ngo ndava yo muripo wotakapuwa ndi Jehovha ecishandisa Mwana wake, zvakaita inga kuti itusu takaraphwa. (1 Pedhru 2:24) Kudari inga mundhu anodakara ngo kuraphwa ko ndhendha yake, itusu tinodakaravo ngo kukwanisa kuva shamwari ja Jehovha no kuregerehwa zvishaishi. Zvese izvi zvinokwanisika ngo ndava yo muripo. Muripo uwu, ndiwona unoitisa kuti Jehovha atiregerere no kuvazve shamwari jake.
“Ngo ndava yo zvivonje zvake itusu takaraphwa” (Isaia 53:5)
KUREGERERA KA JEHOVHA KUNOREVENYI KWATIRI?
18. Kuvha pa kuezanisira kwatavona mu Bhaibheri, tajijenyi ngo pamusoro po kuregerera ka Jehovha? (Vonanyi bhokiso rinoti: “Jehovha Anotiregereresa Kudini”?)
18 Tajijenyi ngo kuezanisira kunonangwa mu Bhaibheri ngo pamusoro po kuregerera ka Jehovha? Tajija kuti Jehovha paanotiregerera, zvinotoita inga kuti atizivi kumboshaisha. Jehovha aazotipanici ngo zvishaishi zvotakaita. Ngo ndava ya izvi, itusu tingava no ushamwari waushoni na Baba wedu vo mugore. Kuregerera kokadi ka Jehovha, ndi cipo cikuru. Ndi citatijo cokuti iyena anotida maningi no kukhombija unyasha ucikafaneri kuna itusu. Itusu tinotozviziva kuti atifaneri kuitihwa izvi.—Varoma 3: 24.
19. (a) Ngozvapi zvatinodikana kuita kudari tecida kuti zvishaishi zvedu zviregerehwe? (Varoma 4:8) (b) Ngozvapi zvatinozovona mu cijijo cinotevera?
19 Verenganyi Varoma 4:8. Kubongesera kwedu Jehovha Mwari wo “kuregerera ko cokwadi,” kunodikana kukura maningi. (Nduyo 130: 4) Kudari tinoda kuti Jehovha atiregerere, tinodikana kuita ciro cinosisira maningi. Jesu wakati: “Kudari mukatama kuregerera zvishaishi zvo vamweni, Baba wenyu avazomuregererivo.” (Mateu 6:14, 15) Zvakanasa kujeka kuti zvinosisira maningi kutevejera kuregerera ka Jehovha. Waro tingazviitisa kudini? Pa jijo inotevera, tinozobhuisana ngo pamusoro po shwiro iyi.
NDUMBO 46 Tobonga Jehovha
a Mu Cihebheru vanoshandisa gama rokuti “kuregerera,” izvo zvinovonesa kuti uku ndikona kuregerera kokadi pikija kuno njira jimweni jo kuregerera. Vasanduji vamweni vo Bhaibheri, vanosiya divi iri rinosisirari maningi. Asi vasanduji vo Sandujo yoNyika Imbza yo Matahwa Akacena, vanorangarira ngo pamusoro po shwiro iyi pavanosanduja Nduyo 130:4.
