MAKWANISA kuvona kuti vandhu vazinji mu nyika nyamasi uno vanojizwa kuti vanodikana kutajwa mu njira inosisira maningi kupinda vamweni? Pikija vecitotajwa mu njira inosisira, ivona vanovona kuti vanodikana kubudirira maningi kupinda pondhopo. Vandhu vanorangarira kudari i vandhu vanodisa zvavo basi no vacikabongi ngo zvavanazvo. Izvi ndizvona zvinonanga Bhaibheri kuti mu njiku jokupejisira vandhu vaizova vakadaro.—2 Timoti 3:2.

Zvakajeka kuti kuvhira kare vainga variyo vandhu vanodisisa zvavo basi. Adhamu na Evha vakatema civaringo cokujisanira pacavo zviro zvakanaka no zvakashata no kuwana muviyo jakashatisisa. Pa makore akazotevera, Mambo Uziya wo ku Judha wakarangarira kuti wainga no citendehwa cokuita mupiro mu themberi asi wainga ecijicengejera maningi. (2 Kronika 26:​18, 19) Mu njira yakaezana, Vafarisi no Vasadhusi vairangarira kuti vaidikana kutajwa mu njira inosisira maningi kupinda vamweni ngokuti vainga vo mubarihwana wa Abhirahama.—Mateu 3:9.

Takatendenejwa ngo vandhu vanodisisa zvavo basi, cimwenizve, zvirovejeso zvavo zvingatipsasavo. (Vagaratiya 5:26) Tingatotanga kurangarira kuti tinodikana kuashira basa riri rese kana kutajwa mu njira inosisira maningi. Tingaitisa kudini kuti tingwarire kuti titame kurangarira ngo njira yakadari? Kuti tikwanise kuita izvi tinodikana kuzwisisa manera o kurangarira a Jehovha ngo pamusoro po shwiroyo. Ndhungamiriro mbiri jo mu Bhaibheri jingatibesera.

 Jehovha ndiyena anotema civaringo cokuti ngozvapi zvatinodikana kuashira. Vonanyi muezaniso jimweni.

• Mu urongwa wo mbhuri, mwamuna anodikana kujizwa ecireremejwa ngo mukaji wake, cimwenizve, mukaji anodikana kujizwa ecidiwa ngo mwamuna wake. (Vaefeso 5:33) Vandhu vakacadha vanodikana kukhombijirana zvo rudo basi kuna wiya wovakacadha naye. (1 Vakorinte 7:3) Majibaba no thangwe raushoni vanoda kuti vana vavo vavazwire, cimwenizve, vana vanodikana kuashira rudo wakakura no besero rinovha ku vabari vavo.—2 Vakorinte 12:14; Vaefeso 6:2.

• Jehovha anonanga kuti vakuru vo ungano vanodikana kuashira nderemejo ngo ndava yo kushanda kwavanoita ngo simba. (1 Vatesaronika 5:12) Ngo kudaro, ivona avana citendehwa co kutonga no kubatikana pa zviro zvinoithwa ngo hama no hambzaji.—1 Pedhru 5:​2, 3.

• Mwari wakapa vatongi vo nyika citendehwa cokuvhunja vandhu kuti vapagari mushabo, cimwenizve, wakavapa citendehwa cokuashira rukujo unovha ku vandhu.—Varoma 13:​1, 6, 7.

Jehovha ngo rudo hwese anotipekeja zvakawanda kupinda zvataifanera. Ngokuti takabahwa tiri vashaishi, tinofanera kufa. (Varoma 6:23) Mukusiyana, Jehovha anotipa makomborero akawanda maningi ngo ndava yo rudo hwake hwokugondeka kwatiri. (Nduyo 103:​10, 11) Makomborero ese kana mabasa ese atinoashira ecivha kwaari tinomapuwa ngo ndava yo unyasha hucikaezaniswi.—Varoma 12:​6-8; Vaefeso 2:8.

Bhasopanyi ku mugariro jo nyika ino. Ticikazvibati, tingatanga kurangarira kuti tinofanera maningi kupinda vamweni. Jesu wakakhombija ngo njira yakareruka manera mundhu angatanga kurangarira ngo njira iyi ecishandisa muezaniso wo vashandi vaiashira dhenariyo rimwe. Vashandi vamweni vakatanga kushanda comangwanani vopeja njiku yese vecishanda, vecipsa ngo zuva kuveni vamweni vakashanda nguva imwe. Cikwata cokutanga cakavona kuti cainga no citendehwa cokuashira mutengo wakakhwirira ngo ndava yo basa ravainga veciita. (Mateu 20:​1-16) Pakushandisa muezaniso uwu, Jesu wakakhombija kuti vateveri vake, vanodikana kukwana ngo zvavanopuwa ndi Mwari.

Ivanyi vanobongesera ngo zvamunazvo mucikadisisi zvo vamweni. (1 Vatesaronika 5:18)  Tevejeranyi mupostori Pauro uwo acizivi kukumbira zviro zvo kunyama ku hama jo ku Korinte, pikija wainga no citendehwa co kuzviita. (1 Vakorinte 9:​11-14) Tinodikana kubongesera makomborero ese atinoashira tongwarira kuti titame kuva vandhu vanodisisa zvo vamweni.

Ivanyi vanojidodokesa. Mundhu paanorangarira maningi ngo zvake, kazinji anotanga kujizwa ecifanera zvizinji kupinda zvaanazvo. Kudari tikava vanojidodokesa, izvi zvinozotibesera kuti titame kurangarira ngo njira yakashata.

Muporofita Dhanyeri wakapa muezaniso waushoni wokukhombija kujidodokesa. Mbhuri yake, kuseja kwake, uzivi hwake no kukwanisa kwake, zvingaita kuti zvakamuita kuti ajizwe ecifanera kutajwa mu njira inosisira no mabasa aakashira. (Dhanyeri 1:​3, 4, 19, 20) Mukusiyana, Dhanyeri wakaenderera mberi ecijidodokesa, cimwenizve, mugariro uwu wakamuita kuti ave anosisira pa mberi pa Jehovha.—Dhanyeri 2:30; 10:​11, 12.

Atidikani kudisisa maningi zvedu, uwo uri mugariro unowanika maningi mu nyika ino. Kusiyapo izvi, tinodikana kwenderera mberi tecidakara ngo makomborero atinopuwa ndi Jehovha ngo ndava yo unyasha hwake hucikaezaniswi.