Imwimwi makambo thimwa-thimwa ngokuti mainga no cineso asi amucaizivepi ari wese waizomubesera? Tiri kupona mu “mukuvo unonesa kucungirira” ungatiita kuti tijizwe tecisuruvara no kujizwa tiri tega. (2 Timoti 3:1) Kusiyapo izvo, atidikani kuhwisana no zvineso zvo mu upenyu tiri tega. Bhaibheri rinovonesa kusisira ko kuva no shamwari jokadi “pa njiku jo matambujiko.”—Mazwi Akangwara 17:17.

Mupostori Pauro wakabesereka ngo ushamwari hwaainga nawo no vadoni vake vaakaita navo hwendo. (Vakorose 4:​7-11) Pauro paainga ku kadheya ku Roma, shamwari jake jakaita mabasa okuti Pauro aacaidepi kumaita ari ega. Inga muezaniso, Epafrodhito wakapa Pauro zviro zvaaida zvakatumihwa ngo hama no hambzaji jo ku Firipo. (Vafiripi 4:18) Tikiko wakapa karata ja Pauro ku ungano jakasiyana-siyana. (Vakorose 4:7) Ngo besero ro shamwari jake, Pauro wakakwanirisa basa rake pikija wainga mukadheya ari ega. Imwimwi mungaitisa kudini kuti muve shamwari yokadi nyamasi uno?

Muezaniso ja nyamasi uno jinokhombija kusisira ko kuva shamwari yokadi. Vonanyi muezaniso wo hambzaji imweni yakakhombija kuva shamwari ya hambzaji Erizabheti avo vanoshanda inga piyona wo nguva jese vanogara ku Espanya. Mai wavo po vakabathwa ngo ndhendha yo kanseri, hambzaji iyi yakatumira hambzaji Erizabheti mavhesi akawanda anovangisa akacijikira mu Bhaibheri. Hambzaji Erizabheti vanoti: “Mavhesi aya akandibesera maningi kuti ndihwisane no njiku imwe nga imwe ndicikajizwi ndiri ndega.”—Mazwi Akangwara 18:24.

Tingavangisa ushamwari hwedu no vatinonamata navo ngo kuvabesera pa mabasa o mu ungano. Inga muezaniso imwimwi mungajipira kuti mutore hama kana kuti hambzaji yaamusharuka kuti muende nayo ku musongano kana mu basa ro kucumaera? Kudari mukavabesera ngo njira iji imwimwi munozovavangisa ivona vozomuvangisavo. (Varoma 1:12) Ngo kudaro makristu amweni aakwanisi kubuda pa muzi. Tingaitisa kudini kuti tive shamwari yokadi kwavari?

Hama jimweni jino zvineso zvo uhomi no mugariro jinovaita kuti vakonehwe kuenda kumusongano. Vonanyi basi muezaniso wa Dhavhidhi uwo wakabathwa ngo ndhendha yo kanseri. Iyena wairapiwa ko mweji mutandhatu. Pamukuvo wo vairaphwari, hama Dhavhidhi no mukaji wavo Ridhiya vaipurukira musongano vecishandisa foni.

I besero rapi ro vakaashira recivha ku shamwari javo jo ku ungano? Pasure po musongano umwe nga umwe, hama jainga ku musongano ku Nyumba yo Umambo jaivangisira kuti jibhuye na hama Dhavhidhi na hambzaji Ridhiya vecishandisa vhidhiyo  shamada. Kusiyapo izvo hama Dhavhidhi no mukaji wavo, vaiashira mensajhi jo hama no hambzaji vecivavangisa ngo ndava yo mupinguro jovaipa pa musongano. Ngo wapi wakava muviyo? Hama Dhavhidhi no mukaji wavo avacaijizwepi vari vega.

Kangaije tingaita urongwa wo kubuda no hama kana hambzaji mu basa ro kucumaera vacikakwanisi kubuda pa muzi. Tingaita cinjo nganani mu urongwa hwedu kuti tikwanise kushanda na ivona. Ngo njira iyi tinokhombija kuti atizivi kuvakanganwa. (Mazwi Akangwara 3:27) Ngenyi amuiti urongwa pamwepo na ivona wokucumaera mecishandisa karata kana kuti foni? Vaya vacikakwanisi kubuda pa muzi vangavona musongano kuitira basa ro kucumaera ngo vhidhiyo shamadha. Hama Dhavhidhi no mukaji wavo Ridhiya vakadakarira urongwa uwu. Hama Dhavhidhi vakati: “Kuita musongano pamwepo no cikwata cedu co kuenda mu basa ro kucumaera no kuita mukumbiro pamwepo navo zvakativangisa maningi.” Kusiyapo izvo, kudari zveciva zvakangwaririka kana mugariro jenyu jecitendera, imwimwi mungatora mujiji wenyu wo Bhaibheri moenda ko mujijisa muri kumuzi ko hama ka hambzaji yondhoyo?

Kudari tikashanda no hama kana hambzaji jicikakwanisi kubuda pa muzi pakutanga tinodikana kusotesesa mugariro javo jo kuvangisira, no kukhwedera phedo na ivona. Inga muezaniso, pamunoenda mubasa ro kucumaera no hama jino mugariro jakadari, mojivona jecishandisa Soko ra Mwari kuti jibaye mwoyo wo ari wese, kangaije mungajizwa mecikwevejehwa kuti muvabesere. Imwimwi pa munobesera hama no hambzaji pa kuenda najo mu basa ro kucumaera no kuenda ku musongano munowana shamwari imbza.—2 Vakorinte 6:13.

Pauro wakatondhojwa ngo shamwari yake Tito. (2 Vakorinte 7:​5-7) Ciitiko ici cinoticeukija kuti tingatondhoja ari wese haiwa basi ngo kukhombija kunaka mwoyo ku vaya vari kuneseka, asi ngo kuva na ivona no kuita zvese zvatinokwanisa kuti tivabesere.—1 Johani 3:18.

Hama no hambzaji jedu jo ku Rusiya jakapa muezaniso waushoni pa kubesera vamweni. Vonanyi zvakaitika na Serjhi no mukaji wake Tatiyana. Pasure po kusecwa mumba mavo ngo maporicia, ivona vakatohwa voenda koovhunjiswa. Pakutanga, Tatiyana ndiyena wakabudiswa woenda ku muzi. Hama Serjhi vakananga kudari: “Tatiyana pakaenda kumuzi, hambzaji imweni inovangisa maningi yakaviya kotivhakacira. Hama no hambzaji jakaviya kuzotibesera pa kucenesa nyumba yedu.”

Serjhi anoengejera eciti: “Mukuvo wese ndinodakarira bhuku ra Mazwi Akangwara 17:​17, iro rinoti: “Shamwari yo cokwadi, ino rudo mukuvo wese, Iyona inova hama yakabahwa kuti ibesere pa njiku jo matambujiko.” Pa mukuvo uwu wokuteverehwa ndakada maningi besero ro shamwari jangu. Ndakavona kuti magama ari pa bhuku ra Mazwi Akangwara 17:17 ngo okadi. Jehovha wakandipekeja shamwari jakakhombija kucunga no kundibesera.” a

Patinonga tecihwisana no mugariro jinonesa maningi, tinoda besero ro shamwari jedu. Tinodazve besero ravo mukati mo dambujiko guru. Ngo kudaro tinoita zvese zvatinokwanisa kuti tive shamwari yokadi.—1 Pedhru 4:​7, 8.