Hambzaji Mariya no mwamuna wavo Joni, a vanogara ku divi rimweni ro nyika, ino kunowanika vandhu vakawanda vanoviyavo kuzogara kondhoyo no kushandireyo, cimwenizve, ivona vanodakara ngokuvacumaera. Mukati mo mutungu wo korona, hambzaji Mariya vakatangisa jijo jo Bhaibheri haiwa basi mu nyika yavaigara, asi mu ndau jimweni jo mu nyikeyo. Vakazviitisa kudini izvi?

Hambzaji Mariya vaivhunjisa vajiji vavo vo Bhaibheri kuti: “Imwimwi munoziva ari wese anodakarira kujija Bhaibheri?” Vajiji ava pavainanga kuti hina, hambzaji Mariya vaivhunjisa kudari: “Mungaenda na inini kwavari kuti ndizivane navo?” Kuita muvhunjo wakareruka inga ndi uwu kuno muviyo jaushoni. Ngenyi? Ngokuti vandhu vanodakarira Soko ra Mwari kazinji vanoda kubhuya zviya zvavajija no mbhuri pomwe no shamwari jiya jinodakarira. Ngowapi wakava muviyo wokuita muvhunjo wakadari?

Jhasmini mujiji wa hambzaji Mariya wakavapa vandhu varongomuna vapsa vaidakarira kujija Bhaibheri. Umwe wo mujiji wavo waizwi Kristina waidakarira maningi zviro zvaaijija zvokuti wakatokumbira hambzaji Mariya kuti vamujijise kaviri pa sumana. Hambzaji Mariya pavakamuvhunjisa kuti pano vamwenizve vanoda kujija Bhaibheri, Kristina wakati: “Hina, ndinozomukhombija shamwari jangu jimweni.” Ko sumana nganani, Kristina wakakhombija hambzaji Mariya shamwari jake murongomuna jaidakarira kujija Bhaibheri. Pa kufamba ko nguva, Kristina wakapekejazve hambzaji Mariya shamwari jake jimweni jaidakarira kujija, cimwenizve, shamwari jondhojo jakanangavo mazina o vandhu vokuti kangaije vaizodakariravo kujija Bhaibheri.

Kristina waida kuti mbhuri yake ku Firipina ijijevo ngo pamusoro po Bhaibheri. Ngo kudaro, iyena wakabhuya no mwana wake Andreya. Andreya wakarangarira kudari: ‘Zvapupu zva Jehovha asipi vandhu vaushoni, ivona avatendi Jesu cimwenizve vanoshandisa Sandujo Yokare.’ Pasure pokujija, wakazwisisa kuti zvaairangarira ngo pamusoro pa Jehovha zvainga zvakaposeka. Mukuvo wese paaijija iyena wainanga kudari: “Bhaibheri parinonanga izvi, zvinodikana kuva zvokadi.”

Pa kufamba ko nguva, Andreya wakakhombija hambzaji Mariya shamwari jake mbiri na umwe mudoni wake wo ku basa, pakupejisira vakatanga kujija. Kusiyapo zvondhozvo, hambzaji Mariya vacikazvibati, titiya wa Andreya vainga vari bofu vaizwi Anjera vaizwa zvese zvaijijwa ndi Andreya. Ngo kudaro, njiku imweni, Anjera wakakumbira Andreya kuti avhunje hambzaji mariya kuti ava vainga titiya wake, cimwenizve, ivona vakakumbira jijo yo Bhaibheri. Anjera waidakarira zviya zvaaijija.  Pa mweji umwe basi, iyena wakabatisisa zvakawanda zvaakajija mu Bhaibheri cimwenizve waida kujija karongomuna pa sumana. Anjera wakatanga kuvona musongano ecishandisa vhidhiyo shamadha ngo besero ra Andreya.

Hambzaji Mariya pavakaziva kuti mwamuna wa Kristina Joshuwa waigara ngo phedo ecipurukira zvaijijwa ngo mukaji wake, ivona vakamuvhunjisa dangani waidakariravo kujija. Joshuwa wakadavira kudari: “Ndingagara hangu ndecipurukira, asi mucadondiitira muvhunjo, kudari mukandiitira inini ndingabudepo.” Pa museswa mushanu basi vecijija, iyena wakatanga kuita muvhunjo jakawanda maningi kupinda Kristina, cimwenizve, waida kwenderera mberi ecijija Bhaibheri.

Muvhunjo jakareruka jaiithwa ndi hambzaji Mariya jakaita kuti vawane vajiji vakawanda. Ngo kuwanda kwavo, ivona vakaita nasiriro kuti vajiji ava vajije no hama no hambzaji jimweni. Mutengo wo jijo jakatangiswa ndi Hambzaji Maria, jinokwana kuita makumaviri na vasere mu nyika murongomuna jakasiyana.

Jhasmini mujiji wokutanga wanangwa mu ciitiko ici, wakabhabhatijwa mu gore ra 2021 mu mweji wa Abril. Kristina wakabhabhatijwa mu mweji wa Maio wo 2022 perapo wakazohwirira ku Firipina kogara no mbhuri yake. Vajiji vaviri vakapuwa hambzaji Mariya ndi Kristina, vakabhabhatijwavo. Anjera wakabhabhatijwa pa mweji munganani jakazotevera, cimwenizve, ari kushanda inga piyona wo nguva jese. Joshuwa mwamuna wa Kristina, no mwana wake Andreya, no vajiji vamweni vakawanda, vari kubudirira maningi.

Mu zana ro kutanga, masoko akanaka aicumaehwa ngo kukasika maningi-ningi ku ukama no shamwari. (Mabasa o Vapostori 10:​24, 27, 48; 16:​25-33) Ngenyi amuvhunjisi vajiji venyu no vamweni vanodakarira kuti: “Munozivavo ari wese anodakariravo kujija Bhaibheri?” Ndiyani anozviziva kuti maizotangisa jijo jo Bhaibheri jakawanda ngokuita muvhunjo uwu wakareruka?