MUSORO WO KUJIJA WO 8
NDUMBO 130 Ivanyi Munoregerera
Tingatevejeresa Kudini—Kuregerera ka Jehovha?
“Inga zvamakaregerehwa ngo mwoyo wese ndi Jehovha, imwimwi munodikana kuitavo zvondhozvo.”—VAKOROSE 3:13.
ZVATICAJIJA
Pa jijo iyi, tinozovona zviro zvatingaita kuti tiregerere ari wese watiitira zviro zvakashata.
1-2. (a) Pamugariro wapi ungatinesera maningi kuregerera ari wese? (b) Hambzaji Dhenise vakaitenyi kuti varegerere?
IMWIMWI munovona zvecimunesera kuregerera vamweni? Vazinji vedu, azvizivi kureruka kuregerera ari wese anonga atinyangajisa maningi. Asi zvinokwanisika kuita ciri cese kuti titame kuviga bundu, toregerera. Inga muezaniso, vonanyi zvakaitika na hambzaji inodaninjwa Dhenise. a Ivona vakakwanisa kuregerera mu njira inoshamaisa. Mu gore ra 2017, hambzaji Dhenise no mbhuri yavo, vakaenda kovhizitari cine ro pasi pese ro Zvapupu zva Jehovha rainga ravha kuvakwa. Povainga vecihwirira kanyi, motorista umweni wakaposa dhiresau wotaka karu yainga na hambzaji Dhenise no mbhuri yavo. Hambzaji Dhenise, vakakomoka ngo ndava yo asidhenti iyi. Povakamuka, vakavona kuti vana vavo vainga vakhuvazika maningi, cimwenizve, mwamuna wavo Bhiriyani wainga atamika. Hambzaji Dhenise veciceukija zvakaitika, vakati: “Ndakamukira kupera simba no kubararika hwiru.” Ivona vakazovona kuti motorista wiya, waifambisa karu naakavaraihwa, nokutizve aacainga pa mugariro unotendehwa kuti afambise karu. Ivona vakaita mukumbiro kuna Jehovha vecikumbira runyararo.
2 Motorista uwu, wakaendeswa mu kadheya no kuwana ndava yo kuuraya mundhu. Iyena naakavoneka kuti wainga no ndava, waizogara mu kadheya. Asi tiribhunari yakavhunja hambzaji Dhenise kuti mwanarume uwu waizogara mukadheya, kuvhira pa zviya zvovaizonanga. Hambzaji Dhenise vakati: “Ndakajizwa inga mundhu wandifunungura pa civonje kakudira munyu ngokuti izvi zvakandiita kuti ndiceukijezve zvese zvainga zvapera kuitika.” Pasure po sumana imwe, hambzaji Dhenise vainga vakanasiririka kuti vaende koodavijana no mwanarume wiya waingaya waviisa zvineso zvikuru pa mbhuri yavo. Hambzaji Dhenise vakanangenyi? Ivona vakakumbira mundhu waitongari shwiro iyi kuti aregerere mwanarume uwu. b Povakapera kunanga izvi, mutongi wiya wakatanga kucema. Iyena wakati: “Pa makore anokwana kuita 25 ndecishanda, izvi azvizivi kumboitika mu tiribhunari yangu. Inini andizivi kumbozwa kuti mundhu waitihwa zviro zvakashata, wokumbira kuti mundhu wamushaishiraro atajwe ngo njira yaushoni. Andito ndikambovona mundhu ecikhombijihwa rudo no kuregerehwa.”
3. Icinyi cakabesera hambzaji Dhenise kuti varegerere?
3 Zvicinyi zvakabesera hambzaji Dhenise kuti varegerere? Ivona vakarangarijisisa ngo pamusoro po kuregerera ka Jehovha. (Mikeya 7:18) Patinobongesera Jehovha ngo manera aanotiregerera, zvinotindundira kuti tidevo kuregerera vamweni.
4. Jehovha anoda kuti tiitenyi? (Vaefeso 4:32)
4 Jehovha anoda kuti tive takanasiririka kuti tiregerere vamweni inga manera aanotiregerera. (Verenganyi Vaefeso 4:32.) Jehovha anoda kuti tiregerere vaya vanotishaishira no kutibhuira zviro zvakashata. (Nduyo 86:5; Ruka 17:4) Mu cijijo ici, tinozovona zviro zvitatu zvinozotibesera kuti tiregerere vamweni.
MUCAITA INGA KUTI ZVAITIKARO, AZVIZIVI KUPSASA MAZWIRO ENYU
5. Mukuzwirana na Mazwi Akangwara 12:18, tinojizwa kudini ari wese paanotinyangajisa?
5 Nguva jimweni, tinohwajihwa maningi kudari tikaitihwa zvakashata, maningi-ningi watiitiraro zvakashata ndi shamwari yo phedo kana umwe wo paukama hwedu. (Nduyo 55:12-14) Nguva jimweni, kuhwajihwa kwatinonga tecizwa mu murangariro, kungaita inga kuti tabaiwa ngo cipanga. (Verenganyi Mazwi Akangwara 12:18.) Nguva jimweni, tingatovonesa kuti apana ciri cese caitika, tototama kuvonesa kuti tahwajihwa. Asi kuita kudari, kunoezaniswa no kubaiwa ngo cipanga, tocisiya ciripo. Bundu redu arizoperi basi kudari tikavonesa kuti zvaitikaro azvizivi kutinyangajisa.
6. Tinodikana kuitenyi ari wese paanotinyangajisa?
6 Kazinji mundhu paanotinyangajisa, kangaije tingada kumunyangajwira. Bhaibheri rinovonesa kuti pa mugariro jimweni, azvizivi kushata kunyangajwa. Asi irona rinotingwajazve kuti mugariro uwu ucizivi wari kunaka, audikani kutitungamirira. (Nduyo 4:4; Vaefeso 4: 26) Ngenyi? Ngokuti mazwiro edu, angatiita kuti tiite ciri cese. Ushungu, auvisi muviyo jaushoni. (Jakobo 1:20) Ceukijanyi kuti kuva no ushungu kungaitika, asi kwenderera mberi tinako, kukheta kwedu.
Kuva no ushungu, kungaitika, asi kwenderera mberi tinawo, ikukheta kwedu
7. Murangariro japi jatingava najo kudari ari wese akatinyangajisa?
7 Ari wese paanoshaisha kutitaja, tingagumihwa ngo murangariro jicizivi kudakaja. Inga muezaniso, hambzaji Ana vakati: “Pandainga mwana mudoko, baba wangu vakasiya mai wangu voenda kocadha na makayaya wangu. Ndakajizwa ndiri ndenga. Povakabara mwana, ndakajizwa inga ndacinjaniswa. Ndakakura ndecijizwa inga kuti ndainga ndiri ndega.” Hambzaji imweni inodaninjwa kuti Jeojeti yakananga manera oyakajizwa poyakaziva kuti mwamuna wayo wainga waicengeja. Ivona vakati: “Inini no mwamuna wangu tainga shamwari no shamwari kuvhira potainga vana vadoko, taitoshandazve tese inga mapiyona. Ngo kudaro, ndakapera simba.” Hambzaji imweni inodaninjwa Naomi yakati: “Andicaizvirangarirepi kuti mwamuna wangu waizondinyangajisa. Paakananga kuti waivona zvoumitu-mitu no kundifisira, ndakajizwa inga kuti ndacengejwa.”
8. (a) Ngoapi mathangwe atinawo anotiita kuti tiregerere vamweni? (b) Ngenyi zvinosisira maningi kwatiri kuva vandhu vanoregerera? (Vonanyi bhokiso rinoti “ Tingaitenyi Kudari Tikaitihwa Zvakashata?”)
8 Itusu atikwanisi kungwarira zvinoithwa no zvinonangwa ngo vandhu ngo pamusoro pedu. Asi pasure po kuzwa zvirozvo, tingakwanisa kungwarira zviro zvatinozoita. Kazinji ciro caushoni catinodikana kuita, i kuregerera. Ngenyi? Ngokuti itusu tinoda Jehovha, iyena anoda kuti tive vandhu vanoregerera. Kudari tikaenderera mberi takanyangajwa totama kuregerera, zvinozova zvakareruka maningi kuti titeme zvivaringo zvakashata no kutoita kuti tikhuvaze uhomi hwedu. (Mazwi Akangwara 14:17, 29, 30) Vonanyi muezaniso wa hambzaji Kristina. Ivona vakati: “Pandinonga ndakazara ngo ushungu no kujizwa kuti ndanyangajiswa, andiseki maningi, andikwanisi kuha ushoni, andikwanisi kuvata ushoni, cimwenizve, andikwanisi kungwarira mazwiro angu. Izvi zvinopsasa mucadho wangu no ushamwari hwangu no vamweni.”
9. Ngenyi atidikani kuviga bundu?
9 Pikija mundhu anongaro atinyangajisa aakumbiri kuregerehwa, itusu tingaita zviri zvese kuti zvaaitaro zvitame kutihwaja maningi. Kuitisa kudini? Hambzaji Jeojeti vanangwaya vakati: “Azvizivi kureruka, asi pa kufamba ko nguva ushungu wandainga nawo no mwamunangu wo kare, wakatanga kupunguka. Inga muviyo, ndakava no runyararo.” Patinosiya kuviga bundu, tinozova mundhu waushoni, no kuitisa nane pa manera atinotaja vamweni. Patinotama kuviga bundu, zvinoita inga kuti tiri kutojipekeja tega cipo no kwenderera mberi tino upenyu unodakajisa. (Mazwi Akangwara 11:17) Asi tingati kudini kudari imwimwi amuto manasiririka kuti muregerere?
KUHWISANA NO MAZWIRO ENYU
10. Ngenyi zvingatora nguva kuti tirapike mu mazwiro edu? (Vonanyi foto.)
10 Ngozvapi zvamunodikana kuita kuti mutame kugara no ushungu? Inga muezaniso, mundhu paanokhuvazika, anodikana kupeja mukuvo kuti aite nane. Mukufananavo, zvinoda mukuvo kuti tijizwe nane mu murangariro ticito tanasiririka kuti tiregerere mundhu anonga atikhuvaza.—Mucumaeri 3:3; 1 Pedhru 1:22.
Patinokhuvazika pari pese, zvinotora nguva kuti paite nane. Izvi ndizvona zvinoitikavo no mumazwiro (Vonanyi ndima 10)
11. Kuitisa kudini mukumbiro ungamubesera kuti muregerere?
11 Kumbiranyi Jehovha kuti amubesere kuti mukwanise kuregerera. c Hambzaji Ana vakananga manera mukumbiro wakavabesera. Ivona vakati: “Ndakakumbira Jehovha kuti andibesere kuregerera vo pambhuri pangu ngo zvese zvovakaita no zvovakabhuya zvainga zvicizivi kunaka. Pasure pazvo, ndakatara karata kuna babangu no mukaji wavo ndecivavhunja kuti ndainga ndavaregerera pa zvese zvovakaita.” Hambzaji Ana vakananga kuti kuita izvi azvicaingepi zvakareruka. Ivona vakati: “Zvandainga ndecida, zvainga zvo kutevejera Jehovha no kuita kuti babangu no mukaji wavo, vade kwenderera mberi vecijija ngo pamusoro pa Jehovha.”
12. Ngenyi tinodikana kuthemba Jehovha kusiyapo kuthemba murangariro wedu? (Mazwi Akangwara 3:5, 6)
12 Thembanyi kuti Jehovha nguva jese wakarungama. (Verenganyi Mazwi Akangwara 3:5, 6.) Jehovha nguva jese anoziva zvakatinakira. (Isaia 55:8, 9) Iyena aazotikumbiri kuti tiite zviro zvinozotikhuvaza. Ngo kudaro, paanotivangisa kuti tinodikana kuva vandhu vanoregerera, tingava no cokwadi cokuti izvi zvinobeserazve itusu. (Nduyo 40:4; Isaia 48:17, 18) Ngo divi rimweni, patinobatikana basi pa mazwiro edu, atizokwanisi kuregerera. (Mazwi Akangwara 14:12; Jeremia 17:9) Hambzaji Naomi vambonangwaya vakati: “Ndakavona kuti andina mathangwe okuregerera mwamuna wangu uwo waiitaya basa ro kuvona zvoumitu-mitu. Inini ndaithya kumuregerera ndecirangarira kuti waizozviitazve kana anozokanganwa kuti wakandinyangajisa. Ndaijivhunja ndega kuti Jehovha ari kunasa kuzwisisa mazwiro angu. Perapo ndakarangarira kuti, pikija Jehovha waizwisisa mazwiro angu, izvi azvirevi kuti waitenderana nawo. Jehovha anozwisisa mazwiro angu, cimwenizve, anozwisisa kuti zvinotora nguva kuti ndiite nane pa mazwiro angu. Asi iyena anodavo kuti ndive mundhu anoregerera.” d
TINGAITENYI KUTI TIVE NO MURANGARIRO JAUSHONI?
13. Mukuzwirana na Varoma 12:18-21, tinodikana kuitenyi?
13 Patinoregerera ari wese anonga atinyangajisa maningi, atidi basi kutama kubhuya zvinongaro zvaitika. Kudari watinyangajisaro ndi hama kana hambzaji, tinodikana kuita zvese zvatinokwanisa kuti tiite runyararo ngokuti cinangwa cedu ngo co kuita runyararo. (Mateu 5:23, 24) Tinodikana kufakeya ushungu ngo kuzwira pena, kuviga bundu ngo kuregerera. (Verenganyi Varoma 12:18-21; 1 Pedhru 3:9) Ngozvapi zvinozotibesera kuti tiite izvi?
14. Kuvangisira kwapi kwatinodikana kuita, ngenyi?
14 Itusu tinodikana kuvangisira kuti tivone mundhu anonga atishaishira inga manera Jehovha aanomuvona. Jehovha anovona zviro zvaushoni ku vandhu. (2 Kronike 16:9; Nduyo 130:3) Kazinji mundhu anopsaka ciri cese pa mundhu, anociwana azvinenyi dangani ndi zviro zvakashata kana zvakanaka. Kudari tikapsaka kuvona mugariro jakanaka jino vamweni, zvinozotirerukira kuti tiregerere. Inga muezaniso, hama inodaninjwa kuti Jaroti yakati: “Kwandiri zvakandirerukira maningi kuregerera hama, kudari ndikaezanisa zviro zvaandiitiraro no zviro zvakanaka zvaakaita ko mukuvo wakareba.”
15. Ngenyi zvinosisira kuvhunja mundhu watishaishira kuti tamuregerera?
15 Ciro cimweni cinosisira catinodikana kuita, ngo cokuvhunja mundhuwo kuti tamuregerera. Ngenyi? Hambzaji Naomi vakati: “Mwamunangu vakandivhunjisa kuti: ‘Iwewe wandiregerera’? Pandaida kunanga kuti: ‘Hina ndakuregerera,’ zvakandinesera. Ndakavona kuti ndainga ndicizivi kuregerera mwamuna wangu zvecivha pa mwoyo. Pa kufamba ko nguva, ndakakwanisa kuvavhunja kuti: ‘Ndamuregerera.’ Pandakaregerera mwamunangu, ivona vakatanga kucema. Ndakashamaisika maningi ngo kuvona kusujunuka kovainga vaita. Ininivo, ndakava no runyararo, ndakazojijira kuvathembazve. Wari, taashamwari jo phedo inga zvotainga kare.”
16. Majijenyi ngo pamusoro po kuregerera?
16 Jehovha anoda kuti tive vandhu vanoregerera. (Vakorose 3:13) Pikija zvakadaro, zvingatinesera kuti tiregerere vamweni. Itusu tingakwanisa kuregerera kudari tikatama kuita inga kuti zvaitikaro azvizivi kutihwaja, no kuvangisira kuti titame kuva no ushungu. Tikadaro, tinozokwanisa kuregerera. Vonanyi bhokiso rinoti: “ Zviro Zvitatu Zvatingaita Kuti Tiregerere.”
RANGARIRANYI NGO MAKOMBORERO AMUNOZOVA NAWO NGO NDAVA YO KUREGERERA
17. Makomborero api atinova nawo patinoregerera vamweni?
17 Itusu tino mathangwe akawanda maningi kuti tiregerere vamweni. Cokutanga, patinoregerera, tinonga tecitevejera Baba wedu Jehovha, cimwenizve, zvinomudakajisa maningi. (Ruka 6:36) Cocipiri, tinonga tecibongesera ngo manera Jehovha aanotiregerera. (Mateu 6:12) Kusiyapo izvi, tinozova no uhomi waushoni, cimwenizve, ushamwari hwedu no vamweni unozovanga maningi.
18-19. Hambzaji Dhenise povakaregerera, ngozvapi zvakaitika?
18 Patinoregerera, tinoashira makomborero okuti aticaimavetera. Vonanyi zvakaitika na hambzaji Dhenise vambonangwaya. Ivona avacaizviziva kuti mwanarume wakaitisaya asidhenti, waironga kuda kujisungira pasure po kutongwa ko shwiro iyi. Iyena wakadakara maningi ngo kuregerehwa uku zvotoita kuti ade kujija Bhaibheri no Zvapupu zva Jehovha.
19 Tingatorangarira kuti kuregerera ndi ciro cinonesa maningi—asi kuregerera, ndi ciro cinosisira maningi. (Mateu 5:7) Ngatiite zvese zvatinokwanisa kuti titevejere kuregerera ka Jehovha.
NDUMBO 125 Vanomudakaro Vano Unyaxa!
a Mazina amweni akacinjwa.
b Pa mugariro wakadari, Mukristu umwe na umwe anodikana kutema ega civaringo no kuita zviri zvese.
c Vonanyi mumbo jedu jinoti: “Kanganwiranai,” “Ndibeserenyi Kuregerera,” no “Tovazve Shamwari.” Jinowanika mu saiti jw.org.
d Pikija kuti kuvona zvoumitu-mitu i cishaishi nokutizve zvinokhuvaza, iro asipi thangwe rokurambana rinonangwaya mu Bhaibheri ringashandiswa ngo mudoni anongaro aitihwa zvondhozvo kuti varambane.
