MUSORO WO KUJIJA WO 4
Ngenyi Tinoenda ku Cirangarijo?
“Endereranyi mberi meciita izvi mucindiceukijira.”—RUKA 22:19.
NDUMBO 20 Makapa Mwana Wenyu Anosisira
ZVATICAJIJA *
1-2. (a) Ndirini patinorangarira maningi vadiwa vedu vakafaya? (b) Jesu wakarongenyi pa usiku hwokupejisira acito afa?
AZVINENYI kuti vandhu vatinoda vafa ko makore akawanda, itusu ticiri kuvarangarira basi. Tinorangarira maningi ngo pamusoro pavo pa njiku yo vakafa.
2 Makore ese tinobatana no zviuru zvo vandhu kutenderera pasi pese, kuti ticeukije kufa ko mundhu watinoda maningi, Jesu Kristu. (1 Pedhru 1:8) Tinobatana pamwepo kuti ticeukije mundhu wakapa upenyu hwake inga muripo kuti atiponese ku rufu no cishaishi. (Mateu 20:28) Zvokadi kamare, Jesu anoda kuti vateveri vake vaceukije kufa kwake. Pa usiku acito afa, iyena wakaronga majisa o cirariro anosisira, wonanga kudari: “Endereranyi mberi meciita izvi mucindiceukijira.” *—Ruka 22:19.
3. Ngozvapi zvatinozovona pa musoro uno?
3 Pa vaya vanoenda ku Cirangarijo co kufa kwa Kristu, vashoma basi ngo vano vetero yo kwenda kudenga. Asi zviuru zvizinji zvino vetero yo kupona pasi pano, zvinoendavo ku Cirangarijo. Pa musoro uno, tinozovona kuti ngenyi zvikwata zvo zviviri zvinoenda ku Cirangarijo makore ese. Tinozovonazve kuti tinobesereka kudini ngo kwendeyo. Asi ngatitange ngo kuvona kuti ngenyi vokuzojwa vanoenda ku Cirangarijo.
NGENYI VOKUZOJWA VANOENDA KU CIRANGARIJO?
4. Ngenyi vokuzojwa vanoha pau no kumwa vhinyu pa Cirangarijo?
4 Makore ese vokuzojwa vanoenda ku Cirangarijo vanoha pau no kumwa vhinyu. Ngenyi zvinodikana kuti ivona vahe pau no kumwa vhinyu? Kuti tidavire, ngativone kuti ngozvapi zvakaitika pa usiku hwo kupejisira wo upenyu hwa Jesu pasi pano. Pasure po kuha Phasika, Jesu wakatangisa Majisa o Cirariro ca Mambo. Iyena wakapa pau no vhinyu kuno gumi na umwe wo vapostori vake vakagondeka, wovavhunja kuti vahe no kumwa. Jesu wakabhuya navo ngo pamusoro po zvitenderano zviviri. Citenderano cipsa no citenderano co Umambo. * (Ruka 22:19, 20, 28-30) Zvitenderano zviviri izvi zvakaita kuti zvikwanisike kuti vapostori no vandhu vamweni vashoma, vave majimambo no vapiri kudenga. (Apokaripsi 5:10; 14:1) Vokuzojwa vakasara * vanoita divi ro zvitenderano izvi, ndivona basi vangaha pau no kumwa vhinyu pa Cirangarijo.
5. Vokuzojwa vanozivenyi ngo pamusoro po vetero yovakapuwa?
5 Thangwe rimweni rinoita kuti vokuzojwa vaende ku Cirangarijo ngo rokuti: Kwendeyo kunovapa mukana wo kurangarira ngo pamusoro po vetero yavo. Jehovha wakavapa vetero inoshamaisa, yo kuva no upenyu ucikafi no muviri ucikavori kudenga. Wovapazve mukana wo kushanda pamwepo na Mambo wavo Jesu Kristu no vamweni vo 144.000. Kusiyapo zvese izvi, vano cidakajiso co kuva pamwepo na Jehovha Mwari! (1 VaKorinte 15:51-53; 1 Johani 3:2) Vokuzojwa vanoziva kuti ivona vakakokwa kuti vabuse zviro izvi kudenga. Kuti vatendehwe kwenda kudenga, ivona vanodikana kuramba vakagondeka mbhera kufa kwavo. (2 Timoti 4:7, 8) Ivona vanodakara maningi pavanorangarira ngo vetero yavo yo kwenda kudenga. (Tito 2:13) Tingativo kudini ngo vo “mavhuta amweni”? (Johani 10:16) Ngoapi mathangwe anoita kuti ivona vaende ku Cirangarijo?
NGENYI VO MAVHUTA AMWENI VANOENDA KU CIRANGARIJO?
6. Ngenyi vo mavhuta amweni vanoenda ku Cirangarijo makore ese?
6 Vo mavhuta amweni pavanoenda kucirangarijo avahi pau no kumwa vhinyu, asi vanodakara ngo kwendeyo. Mu gore ro 1938 vaya vano vetero yo kurarama pasi pano, vakakokwa ko vhaza yokutanga kuti vaendevo ku Cirangarijo. Murindiri wo 1 wa Março wo 1938, mu Cingezi, wakananga kudari: “Zvaizova zvaushoni kuti mavhuta amweni vaendevo ku Cirangarijo no kuvona zvinoithwepo. . . . Uwu unodikanavo kuva mukuvo unodakajisa kwavari.” Kudari inga vakokwi vanodakara ngo kwenda ku mucadho, vo mavhuta amweni vanodakaravo ngo kwenda ku Cirangarijo.
7. Ngenyi vo mavhuta amweni vanoenda kozwa hurukuro yo Cirangarijo?
7 Vo mavhuta amweni vanorangariravo ngo vetero yavo. Hurukuro painonga yeciitwa, ivona vanosotesesa maningi zviya zvinozoitwa ndi Kristu no vo 144.000, kuno vandhu vakagondeka mukati mo Ciuru co Makore co Kutonga kwa Kristu. Vecitungamirihwa ndi Mambo wavo Jesu Kristu, majimambo aya o kudenga anozobesera pa kucinja nyika kuti ive paradhiso no kuita kuti vandhu vave vakakwana. Zvinodakajisa kuno zviuru zvo vandhu vano vetero yo kupona pasi pano kwenda ku Cirangarijo, ngokuti vanokwanisa kurangarira manera azvinozokwanirisika zviporofita zvo Bhaibheri kumbejiyo. Zvakadari inga zvinowanika pana Isaia 35:5, 6; 65:21-23 na Apokaripsi 21:3, 4. Ngo kujivona pacavo no vadiwa vavo vari mu nyika imbza, vanovangisa vetero yavo yo kumbeji no kuvangisa cido cavo co kutama kusiya kushandira Jehovha.—Mateu 24:13; Vagaratiya 6:9.
8. Ngorapi thangwe rimweni rinoita kuti vo mavhuta amweni vaende ku Cirangarijo?
8 Vonanyi thangwe rimweni rinoita kuti vo mavhuta amweni vaende ku Cirangarijo. Ivona vanoda kutatija rudo hwavo no kubesera vokuzojwa. Bhaibheri rakananga kare kuti vokuzojwa no vano vetero yo kupona pasi pano vanozoshanda vese vakabatana. Kuitisa kudini? Ngatende tivone muezaniso munganani.
9. Ciporofita cinowanika pana Zakaria 8:23, cinovonesa kudini mazwiro ano mavhuta amweni ngo pamusoro po vokuzojwa?
9 Verenganyi Zakaria 8:23. Ciporofita ici cinovonesa kamare mazwiro ano mavhuta amweni ngo pamusoro po hama no hambzaji javo jo kuzojwa. Magama okuti “muJuda” no “anemwi” anonangira cikwata condhoco, vokuzojwa vakasara. (Varoma 2:28, 29) “Gumi ro vandhu vo majinja no vo ndumi jese,” vanoimirira vo mavhuta amweni. Ivona ‘vanobata’ kana kuva vakagondeka kuno vokuzojwa vecibatana navo pa kunamata kwakacena. Ngo kudaro, pa usiku hwo Cirangarijo, vo mavhuta amweni vanokhombija kubatana kwavo no vokuzojwa ngo kuva navo pa Cirangarijo.
10. Jehovha wakaitenyi kuti akwanirise ciporofita cinowanika pana Ezekieli 37:15-19, 24, 25?
10 Verenganyi Ezekieli 37:15-19, 24, 25. Jehovha wakakwanirisa ciporofita ici, ngo kuita kuti vokuzojwa no vo mavhuta amweni vashande pamwepo vakabatana. Ciporofita ici cinobhuya ngo ndonga mbiri. Vaya vano vetero yo kwenda kudenga vanoimirira ndonga yo “VaJuda” (jinja raisanwa majimambo ese o Vaiziraeri). Kuveni vaya vano vetero yo kurarama pasi pano vanoimirira ndonga ya “Efraimi.” * Jehovha waizobatanija zvikwata zviviri izvi zvozogumira pa kuva ‘cimwe.’ Izvi zvinoreva kuti ivona vanoshanda vakabatana vecitungamirihwa ndi Mambo wavo, Jesu Kristu. Makore ese, vokuzojwa no vo mavhuta amweni vanoenda ku Cirangarijo kuciripi inga zvikwata zviviri zvakaparajana asi inga “mushambi umwe” wecitungamirihwa ngo “muhavisi umwe.”—Johani 10:16.
11. “Mavhuta” akanangwari pana Mateu 25:31-36, 40, anobeseresa kudini hama ja Kristu?
11 Verenganyi Mateu 25:31-36, 40. “Mavhuta” akanagwari ndi Jesu anoimirira varurami vo mukuvo uno wo kugumisira vano vetero yo kupona pasi pano, kana kuti vo mavhuta amweni. Ivona vanobesera ngo kugondeka kwese vokuzojwa vakasara kuti vakwanirise basa guru rovakapuwa ro kucumaera pasi pese no kuita kuti vandhu vave vajiji.—Mateu 24:14; 28:19, 20.
12-13. Vo mavhuta amweni vangabesera hama ja Kristu ngo njira japi?
12 Makore ese, sumana nganani njiku yo Cirangarijo icito yaguma, vo mavhuta amweni vanobesera hama ja Kristu ngo kubatikana pa kuita fafanya yo kukoka vanodakarira, kuti vaviye ku Cirangarijo. (Vonanyi bhokiso rinoti: “ Muri Kuita Urongwa kuti Munase Kubatikana pa Mukuvo wo Cirangarijo?”) Ivona vanoita nasiriro jese jinodikana kuti Cirangarijo ciithwe mu ungano jese kutenderera pasi pese, pikija hazvo ungano zinji ajina mundhu anoha pau no kumwa vhinyu. Vo mavhuta amweni vanodakara ngo kubesera hama ja Kristu ngo njira iyi. Ivona vanoziva kuti Jesu ari kuvona zvavari kuitirari hama jake jo kuzojwa, inga vari kutoitira iyena kamare.—Mateu 25:37-40.
13 Ngoapi mathagwe amweni anoita kuti itusu tese azvinenyi kuti ngoyapi vetero yedu, tiyende ku Cirangarijo?
NGENYI ITUSU TESE TINOENDA KU CIRANGARIJO?
14. Jehovha na Jesu vakakhombijisa kudini rudo kwatiri?
14 Tinobonga maningi ngo rudo hwotakakhombijihwa ndi Jehovha na Jesu. Jehovha wakakhombija rudo hwake kotiri ngo njira jakawanda. Asi njira huru yaakakhombija rudo uhu ngo yo kutumira Mwana wake anodiwa kuti atambujike no kufa. (Johani 3:16) Jesu wakakhombijavo rudo hwake ngo kutendera kuviya kotifira. (Johani 15:13) Atingakwanisi kupagari Jehovha na Jesu ngo rudo wo vakatikhombijirari. Asi tingakhombija kobongesera kwedu ngo manera atinopona njiku no njiku. (Vakorose 3:15) Ngo kudaro, itusu tinoenda ku Cirangarijo ngokuti tinoda kurangarira ngo pamusoro po rudo wovakatikhombijira no kukhombijavo rudo hwedu kwavari.
15. Ngenyi vokuzojwa no vo mavhuta amweni vanodikana kubongesera ngo cipo co muripo?
15 Itusu tinobonga maningi ngo cipo co muripo. (Mateu 20:28) Muripo unosisira maningi kuno vokuzojwa ngokuti unoita kuti vetero yavo inoshamaisa ikwanisike. Ngo ndava yo rutendo hwavo ku muripo hwa Kristu, Jehovha anovavona kuva varurami, vovazve vana vake. (Varoma 5:1; 8:15-17, 23) Vo mavhuta amweni vanobongavo maningi ngo ndava yo muripo. Ngo ndava yo rutendo hwavo ku muripo hwa Kristu ivona vanokwanisa kuima pamberi pa Mwari, vomuitira basa rakacena, vova no vetero yo kuzopona “pa dambujiko guru.” (Apokaripsi 7:13-15) Njira imweni yo kuti vokuzojwa no vo mavhuta amweni vanotatija kubongesera kwavo ngo muripo, ngo yo kuva pa Cirangarijo makore ese.
16. Ngorapi thangwe rimweni rinotiita kuti tiende ku Cirangarijo?
16 Thangwe rimweni rinotiita kuti tiende ku Cirangarijo ngo ro kuti itusu tinoda kuzwira Jesu. Azvinenyi kuti ngoyapi vetero yedu kuitira kumbeji, tinodikana kuzwira zvakananga Jesu pa usiku waakatangisa Cirangarijo. Paakati: “Endereranyi mberi meciita izvi mecindiceukija.”—1 VaKorinte 11:23, 24.
TESE TINOBESEREKA KUDINI NGO KUVA PA CIRANGARIJO?
17. Cirangarijo cinotibesera kudini kuti tive phedo na Jehovha?
17 Tinokhwedera phedo kuna Jehovha. (Jakobo 4:8) Inga zvatavona, cirangariro cinotipa mukana wo kurangarira ngo pamusoro po vetero yotakapuwa ndi Jehovha no kurangarijisisa ngo pamusoro po rudo hwaakakhombija kwatiri. (Jeremia 29:11; 1 Johani 4:8-10) Patinorangarira ngo pamusoro po vetero yedu yo kumbeji no rudo wokadi una Mwari kwatiri, tinoengejera kumuda kwatinomuita no kuvangisa ushamwari hwedu naye.—Varoma 8:38, 39.
18. Kurangarijisisa ngo pamusoro po rudo wa Jesu kunotindundira kuti tiitenyi?
18 Tinondundihwa kuti titevejere muezaniso wa Jesu. (1 Pedhru 2:21) Njiku nganani Cirangarijo cicito caitika, tinobatikana ngo kuverenga zviitiko zvo Bhaibheri ngo pamusoro po sumana yo kupejisira ya Jesu, kufa kwake no kumuswa kwake. Perapo pa usiku hwo Cirangarijo, hurukuro inoticeukija rudo una Jesu kwatiri. (Vaefeso 5:2; 1 Johani 3:16) Patinoverenga ngo pamusoro po rudo wo kujipira wa Jesu no kurangarijisisa ngo pamusoro pawo, tinondundihwavo kuti ‘tifambe inga ndiyena.’—1 Johani 2:6.
19. Tingaitisa kudini kuti tienderere mberi tiri mu rudo hwa Jehovha?
19 Tinovangisa cido cedu co kuda kwenderera mberi tiri mu rudo hwa Jehovha. (Judha 20, 21) Tinoenderera mberi tiri mu rudo hwa Jehovha, ngo kuita zvese zvatinokwanisa kuti timuzwire, ticenese zina rake no kumudakajisa. (Mazwi Akangwara 27:11; Mateu 6:9; 1 Johani 5:3) Kwenda kwedu ku Cirangarijo kunotiita kuti tiengejere cido cedu co kuda kupona njiku imwe nga imwe mu njira yo kuti tinokwanisa kuvhunja Jehovha kudari: ‘Inini ndinoda kwenderera mberi ndiri mu rudo hwenyu mbhera narini!’
20. Mathangwe api atinawo anotiita kuti tiende ku Cirangarijo?
20 Azvinenyi dangani vetero yedu ngo yo kwenda kudenga kana kurarama pasi pano, itusu tino mathangwe akawanda anotiita kuti tiende ku Cirangarijo. Gore rimwe nga rimwe itusu patinosongana pa njiku iyi, tinoceukija kufa ko mundhu watinoda maningi, Jesu Kristu. Kusiyapo zvese izvi, tinoceukija rudo hukuru hwotakakhombijihwa ndi Jehovha, wo kupa Mwana wake kuti aviye kotifira. Gore rino Cirangarijo cinozoitwa mu usiku hwo Cishanu hwo njiku 15 ya Abril yo 2022. Itusu tinoda maningi Jehovha no Mwana wake. Ngo kudaro, apana cinodikana kuva cinosisira maningi kwatiri kusiyapo kwenda ku Cirangarijo.
NDUMBO 16 Simbanyi Jehovha ngo Mwana Wake, Wokuzojwa
^ ndim. 5 Azvinenyi kuti vetero yedu ngo yo kupona ku kudenga kana mu paradhiso pasi pano, makore ese itusu tinovetera kwenda ku Cirangarijo. Musoro uwu, unozobhuya ngo Mavhesi anovonesa kuti ngenyi tinodikana kwenda ku Cirangarijo no manera atinobesereka ngo kwendeyo.
^ ndim. 2 Mu Bíblia na Linguagem de Hoje magama aya akasandujwa kudari: “Itanyi izvi mucindiceukijira.” Kuveni A Bíblia de Jerusalém rakasanduja kudari: “Itanyi izvi inga kuti muri kundiceukijira.”
^ ndim. 4 Kuti muwane masoko mazinji ngo pamusoro po citenderano cipsa no citenderano co Umambo, vonanyi musoro unoti: “Muchava ‘Umambo hweVapristi’” mu Murindiri wa 15 wa Outubro wo 2014, mapheji 15-17, mu Cishona.
^ ndim. 4 MAGAMA AKASANANGUHWA: Gama ro kuti vokuzojwa vakasara rinonangira Makristu okuzojwa aciri kurarama pasi pano.
^ ndim. 10 Kuti muwane masoko mazinji ngo pamusoro po ciporofita co ndonga mbiri cinowanika pana Ezekieli cipauko 37, vonanyi bhuku rinozwi Jehovha Anodzorera Kunamata Kwakachena!, mapheji 130-135, ndima 3-17, mu Cishona.
