1. Ngowapi mugariro unonesa wakasongana na Dhavhidhi?

 DHAVHIDHI wainga ecitiza kuti aponese upenyu hwake. Sauri mambo ano simba wo Iziraeri, wainga atema civaringo co kuda kumuuraya. Dhavhidhi paaida zvokuha, wakaima ku dhorobha ro Nobhe, kwaakakumbira pau shanu jicina mbijo. (1 Samueli 21:2, 4) Pa kufamba ko nguva, iyena no masoca ake vakatizira mu bambha. (1 Samueli 22:1) Dhavhidhi wakagumisa kudini pa mugariro uwu?

2. Sauri wakajidirisa kudini pa mugariro wo ngozi? (1 Samueli 23:16, 17)

² Sauri wainga no usanje na Dhavhidhi ngokuti vandhu vazinji vaimudakarira no kumusimba, zvecivoneka kuti iyena wainga akawina hondo jakawanda. Sauri waizviziva kuti ngo kutama kuzwira kwake, Jehovha wakamuramba inga mambo wo Iziraeri. Waizivazve kuti Jehovha wainga wakasana Dhavhidhi kuti ave mambo. (Verenganyi 1 Samueli 23:16, 17.) Asi inga mambo wo Iziraeri, Sauri wainga no masoca akawanda no vandhu vazinji vaizomubesera. Ngo kudaro, Dhavhidhi waidikana kutiza kuti aponese upenyu hwake. Kunanga kuti Sauri wairangarira kuti iyena waizokwanisa kuimisa cinangwa ca Mwari co kuita kuti Dhavhidhi ave mambo? (Isaia 55:11) Bhaibheri arinangi, asi tinoziva ciro cimwe cokuti: Sauri wainga ecijidira pa mugariro wo ngozi. Vese vanohwisana na Mwari, nguva jese vanoruza!

3. Dhavhidhi waijizwa kudini pikija no mugariro wake?

³ Dhavhidhi aacaiengepi mundhu anojikuja. Iyena aazivi kujisana ega kuti ave mambo wo Iziraeri. Jehovha ndiyena wakamupa basa iri. (1 Samueli 16:1, 12, 13) Sauri wakaguma pa kuvona Dhavhidhi inga mundhu anofanera kufa. Asi Dhavhidhi  aazivi kupa ndava Jehovha ngo mugariro wakashata waaingari nawo. Nee aazivizve kumun’gun’gutira ngo kuva kwake no zvokuha zvishoma no kufindara kwaakaita mu bambha. Mukusiyana, zvingaita kuti paainga akafindara mu bambha iri ndipona paakatara nduyo iyi inodakajisa inobatanija magama o musoro o vhesi yedu. Anoti: ‘Vaya vanopsaka Jehovha, avazotami na cimwe ciro cakanaka.’—Nduyo 34:10.

4. Muvhunjo japi jatiri kuda kudavira, ngenyi ijona jinosisira?

⁴ Nyamasi uno, vashandiri vazinji va Jehovha avatonavo zvokuha zvakawanda no zviro zvimweni zvavanoda kuti vapone. * Izvi zviri kuitika maningi mu mukuvo uno wo mutungu. Cimwenizve, pa “dambujiko guru” riri kuviyari, zviro zvinodoguma pa kushatisisa kamare. (Mateu 24:21) Tecirangarira zviro izvi, ngatende tidavire muvhunjo murongomuna. Mu njira yapi Dhavhidhi ‘aacaizotama na cimwe ciro cakanaka’? Ngenyi tinodikana kujijira kudakara ngo zvatinazvo? Ngenyi tingathemba kuti Jehovha anozotitaja? Tingajinasiririsa kudini wari kuitira kumbeji?

5-6. Nduyo 23:1-6 inotibeseresa kudini kuzwisisa zvaida kunanga Dhavhidhi, paakananga kuti vashandiri va Jehovha ‘avazotami na cimwe ciro cakanaka’?

⁵ Ngozvapi zvaida kunangwa ndi Dhavhidhi paakananga kuti vashandiri va Jehovha ‘avazotami na cimwe ciro cakanaka’? Tinganasa kuzwisisa zvaaidari kunanga ngo kuvona magama akafanana anowanika pa nduyo 23. (Verenganyi Nduyo 23:1-6.) Dhavhidhi wakatanga nduyo iyi ngo magama aya: “Tenji Mwari muhavisi wangu, anditami Ciro.” Pa mavhesi amweni o nduyo iyi, Dhavhidhi wakananga zviro zvinosisira maningi, zvakadari inga makomborero o kumujimu aakava nao ngo kutendera kwake Jehovha inga muhavisi wake. Jehovha wakamutungamirira mu “makwanja akarungama.” Cimwenizve no kugondeka kwese Jehovha wakabesera Dhavhidhi mu  nguva jakanaka no jakashata. Dhavhidhi waiziva kuti upenyu hwake “mu mahavo mavixi” a Jehovha aucaizova no zvineso. Nguva jimweni waitojizwa akasuruvara, zvaitodari inga kuti ari kufamba “mu gwanja ro cidima co rufu” naano vavengi vakawanda. Asi na Jehovha muhavisi wake, Dhavhidhi ‘aacaizothya bzakaxata.’

⁶ Ngo kudaro, uwu ndiwona mupinguro wo muvhunjo wedu unoti: Mu njira yapi Dhavhidhi ‘aacaizotama na cimwe ciro cakanaka’? Iyena wainga no zvese zvaaida kuti aenderere mberi ari phedo na Jehovha. Mudakaro wake aaucaifira pa kuva no zviro zvakawanda zvo kunyama. Dhavhidhi waidakara ngo zviya zvaaipuwa ndi Jehovha. Ciro caisisira maningi kwaari cainga co kuti Jehovha wakamupfupa no kumujivirira.

7. Mukuzwirana na Ruka 21:20-24, ngowapi mugariro unonesa wakasongana no Makristu o muzana ro kutanga o ku Judheya?

⁷ Kuvha pa magama a Dhavhidhi, tinokwanisa kuvona kuti zvinosisira maningi kuva no mavonero akaezanana ngo pamusoro po zviro zvokunyama. Itusu tingadakara ngo zviro zvokunyama zvatinazvo, asi atidikani kuita kuti izvona zvive zvinosisira maningi mu upenyu hwedu. Izvi ndizvona kamare zvakazwisiswa ngo Makristu o muzana ro kutanga aigara ku Judheya. (Verenganyi Ruka 21:20-24.) Jesu wainga ecivangwaja kuti waizoguma mukuvo wo kuti dhorobha ro Jerusarema, ‘raizotendenejwa ngo zvikwata zvo masoca.’ Izvi pazvaizoitika ivona vaidikana ‘kutizira mu matundhu.’ Kubuda kwavo mu dhorobha zvaizoita kuti ivona vaponese upenyu hwavo, asi vaizodikana kusiya zviro zvakawanda. Makore manganani akhirira Murindiri wakananga izvi ngo njira iyi: “Ivona vakasiya munda no muzi, nee avazivi kutokwanisa kuvhisa zviro zvainga mu nyumba javo. Vecithemba jiviriro no besero ra Jehovha ivona vakadira kunamata kwavo Jehovha pa ndau yokutanga, kupinda zviro zvavaivona kuti zvinosisira maningi.”

8. Ngocapi cijijo cinosisira catinowana kuvha ku zvakaitika no Makristu o muzana ro kutanga aigara mu Judheya?

⁸ Ngocapi cijijo cinosisira maningi catinowana kuvha ku zvakaitika no Makristu o muzana ro kutanga aigara ku Judheya? Murindiri wanangwaya wakaengejera weciti: “Kumbejiyo tinozosongana no muejo jinozovonesa kuti zviro zvokunyama zvinosisira zvakadini kwatiri. Kunanga kuti izvona izviro zvinosisira maningi kana kuti cinosisira maningi ikuponeswa ngo kuva kwedu takagondeka kuna Jehovha? Mugumo paunonga waguma, tinodikana kucungirira zvineso zvakati kuti no kutotama kuwana zviro zvimweni. Tinodikana kuva takanasiririka kuti tiite zviri zvese hazvo zvinodiwaro, inga zvakaitwa ngo Makristu o muzana ro kutanga awo akatiza kuvha mu Judheya.” *

9. Vangiso yapi yamunowana kuvha ku mbhangiro yakapa mupostori Pauro ku Vahebheru?

⁹ Munokwanisa kurangarira zvineso zvakava no Makristu aya paakasiya zvese zvaainga nazvo no kutangazve upenyu mu ndau imbza? Ivona vaidikana kuva no rutendo kuti Jehovha waizovabesera kuti vawane zviya zvavainga vecida. Asi painga no ciro caizovabesera. Makore mashanu Varoma vacito vatendeneja Jerusarema, mupostori Pauro wainga wakapa Vahebheru ngwajo inosisira maningi, yokuti: “Mucadisisa maningi mare mu upenyu hwenyu. Asi dakaranyi ngo zvamunazvo. Ngokuti iyena wakati: ‘Inini andizokusiyi. Inini andizokuregeri.’ Ngative takanasa kucunga tecinanga kuti: ‘Jehovha ndiyena mubeseri wangu. Andizothyi. Mundhu angandiitenyi?’” (Vahebheru 13:5, 6) Pacina kukana-kana, vaya vakabatisisa ngwajo yo mupostori Pauro Varoma  vacito vaphwanya Jerusarema, zvakavarerukira maningi kuti vazwiranise upenyu hwovainga nahwo wo kurarama ngo zviro zvishoma. Ivona vainga no cokwadi co kuti Jehovha waizovapa zviro zvavaida. Magama a Pauro anotithembesa kuti Jehovha anozotipavo zviya zvatinoda.

10. Ngozvapi ‘zvakaitwa’ ndi Pauro zvaakativhunjavo kuti tiite?

¹⁰ Pauro wakapavo ngwajo yakaezana kuna Timoti, iyona inoshandavo nyamasi uno kwatiri. Iyena wakatara kudari: “Ngo kudaro, tinozodakara ngo kuwana zvokuha no zvokusimira.” (1 Timoti 6:8) Waro izvi zvinoda kureva kuti atidikani kuha zviro zvaushoni, kuva no nyumba yaushoni kana kutotenga nguvo imbza nguva ngo nguva? Izvo andizvopi zvaida kunanga Pauro. Pauro wainga ecinanga kuti tinodikana kudakara ngo zviro zvatinazvo ku divi ro kunyama. (Vafiripi 4:12) Izvo ndizvona ‘zvakaitwa’ ndi Pauro. Ciro cinosisira maningi catinaco i ushamwari hwedu na Mwari kuciripi zviro zvedu zvo kunyama.—Habakuki 3:17, 18.

11. Magama a Mosi kuno Vaiziraeri anotijijisenyi ngo pamusoro po kudakara ngo zvatinazvo?

¹¹ Zviro zvatinorangarira kuti itusu tinozvida, azvizivi kuezana no zvinorangarihwa ndi Jehovha. Vonanyi zvakananga Mosi kuno Vaiziraeri pasure po kupeja makumarongomuna o makore vari mu zvipare. Iyena wakati: “Tenji Mwari wako wakakukomborera mu muxando yese yo nyara jako: Yena wakakuperekeja  mu mufambo wako ngo bani guru iri. Makumarongomuna o makore Tenji Mwari wako wainga newe, auzivi kutama ciro.” (Deuteronòmio 2:7) Pa makumarongomuna o makore aya, Jehovha wakapa Vaiziraeri manaa kuti vahe. Jehovha wakaita kuti nguvo javo jitame kumweka. Ngo kudaro, ivona vakakwanisa kugara no nguvo jiya javakavhaya najo ku Ejipita. (Deuteronòmio 8:3, 4) Vamweni vairangarira kuti zvavaingaro nazvo azvicaikwana. Asi Mosi wakaceukija Vaiziraeri kuti ivona vainga no zvese zvavaida. Jehovha anozodakara maningi kudari itusu tikajijira kudakara ngo zviro zvishoma zvatinazvo. Iyena anoda kuti itusu tibongesere ngo zviro zvishoma zvaanotiparo, tozwisisa kuti izvona imakomborero anovha kwaari.

12. Zvicinyi zvinokhombija kuti Dhavhidhi waithemba Jehovha haiwa iyena pacake?

¹² Dhavhidhi waiziva kuti Jehovha wakagondeka nokutizve anonasa kukorondha vaya vanomuda. Pikija upenyu hwake hwainga pa ngozi paakatara Nduyo 34, ngo meso o rutendo, Dhavhidhi wakakwanisa kuvona ‘ngirozi ya Tenji Mwari yecigara phedo’ naye. (Nduyo 34:8) Zvingaita kuti Dhavhidhi ari kuezanisa ngirozi ya Jehovha no musoca anogara pa bhazi, naakangwarira mukuvo wese ecisota muvengi. Dhavhidhi wainga musoca ano cicunge, Jehovha wainga wakagondesa kuti iyena waizova mambo. Asi Dhavhidhi aazivi kuthemba kukwanisa kwake kukhandira buwe ngo nvhungamurara nee kukwanisa kwake kushandisa banga kuti ahwise vavengi. (1 Samueli 16:13; 24:12) Iyena waithemba Jehovha, wova no cokwadi co kuti ngirozi yake ‘yaizoponesa’ vaya vanomuthya. Zvokadi kamare, nyamasi uno itusu ativeteri kujivirihwa ngo njira yo mushamaiso. Asi tinoziva kuti vaya vanothemba Jehovha, vanozoashira upenyu ucingaperi pikija vakafa wari uno.

13. Goge wo Magoge paanozotihwisa ngenyi tinozovoneka inga atina jiviriro? Ngenyi itusu atidikani kuthya? (Vonanyi foto yo pakapa.)

¹³ Sambiri pano, kuthemba kwedu Jehovha kunozova pa muejo. Apo Goge wo Magoge, kubatana ko majinja, pavanozohwisa vandhu va Mwari, upenyu hwedu unozovoneka inga uri pa ngozi. Tinodikana kuva no cokwadi co kuti Jehovha anokwanisa nokutizve anoda kutiponesa. Kuno majinja itusu tinozovoneka inga tiri mavhuta acikakwanisi kujijivirira no acina mujiviriri. (Ezekieli 38:10-12) Itusu atizovi no nvhuti. Cimwenizve, tinonga ticina rovejo iri yese kuti tihwisane. Majinja anozotivona inga vandhu vacikanesi kuhwisa. Ivona avazvizivi kuti ngirozi ja Jehovha jinonga jakanasiririka kuti jitijivirire. Asi itusu tinozviziva ngokuti tino rutendo. Majinja aana rutendo kuna Mwari. Ivona vanozokahamara maningi masoca o kudenga paanozoviya kuhwa pa ndau pedu.—Apokaripsi 19:11, 14, 15.

14. Ngozvapi zvatingaita wari kuti tijinasirire kuitira kumbeji?

¹⁴ Ngozvapi zvatingaita wari kuti tijinasirire kuitira kumbeji? Cokutanga pa zvese, tinodikana kuva no mavonero akaezanana ngo pamusoro po zviro zvokunyama. Tozwisisa kuti njiku imweni tinodikana kusiya zviro zvese izvi. Cimwenizve, tinodikana kudakara ngo zviya zvatinazvo, todakarazve maningi ngokuti tino ushamwari na Jehovha. Patinonasa kuziva Mwari wedu, tinozoengejeravo kuthemba kwedu kuti iyena anozokwanisa kutijivirira Goge wo Magoge paanozotihwisa.

15. Ngozvapi zvakaitika na Dhavhidhi paainga ari mujaha zvakamujijisa kuti Jehovha narini aacaizomusiya?

¹⁵ Vonanyi ciro cimweni cakabesera Dhavhidhi, cingatibeseravo kuti tijinasirire kuitira  muejo jatingasongana najo. Dhavhidhi wakati: “Ejanyi, munozovona unaki hwa Tenji Mwari; anomucena mundhu anojiviga mwaari.” (Nduyo 34:9) Magama aya, anovonesa kuti ngenyi Dhavhidhi waiziva kuti Jehovha ndiyena basi waizomubesera. Kazinji Dhavhidhi waithemba Jehovha, perapo Jehovha aazivi kumbomusiya. Dhavhidhi paainga mujaha wakadikana kuhwisana no gakanyara Goriati, worivhunja kudari: “Nyamasi kamare Tenji Mwari anozokupa mu nyara jangu.” (1 Samueli 17:46) Pa kufamba ko nguva, Dhavhidhi paainga ecishandira mambo Sauri, Sauri wakaeja ko vhaza jakawanda kuti amuuraye. Asi “Tenji Mwari wainga” na Dhavhidhi. (1 Samueli 18:12) Zvecivoneka kuti Dhavhidhi wainga wakambobesehwa ndi Jehovha, iyena waiziva kuti Jehovha waizomubeserazve pa zvineso zvaaingari ecisongana nazvo.

16. Injira japi jatingaeja ndijona “unaki” hwa Jehovha?

¹⁶ Tikaengejera kuthemba ndhungamiriro ja Jehovha wari uno, tinozoengejeravo kuthemba kwedu kuti iyena anozokwanisa kutiponesa kumbejiyo. Tinodikana kuva no rutendo pomwe no cido co kukumbira patarau wedu nguva kuti tikwanise kwenda ku magungano edu o ndharaundha no o mutundhu. Kana kutokumbira kucinja nguva jimweni jataishanda kuti tikwanise kwenda ku musongano jese no kupeja nguva yakawanda tecicumaera. Ngatiti patarau wedu varamba zvatakumbiraya, toruza basa, tinozova no rutendo hwokuti Jehovha narini aazotisii nokutizve iyena nguva jese anozotipa zvese zvatinoda? (Vahebheru 13:5) Vazinji vari mu nguva yakazara, vanonanga zvakavaitikira zvinovonesa kuti Jehovha wakavabesera paya pavaida maningi besero. Jehovha wakagondeka.

17. Ngoyapi vhesi yo gore ro 2022, ngenyi iyona inosisira?

¹⁷ Na Jehovha ku divi redu atina thangwe ro kuthya zvinozoitika kumbejiyo. Mwari wedu narini aazotisii, kudari tikaenderera mberi tecidira Umambo hwake pa ndau yokutanga mu upenyu hwedu. Kuitira kuticeukija dikano yatinayo yo kuzvinasirira wari kuitira zvineso zvatinozosonganazvo kumbejiyo no kuthemba kuti Jehovha narini aazotisii, Mukhumbi Unotonga wasana bhuku ra Nduyo 34:10, kuti ive vhesi yedu yo gore ro 2022. Inonanga kuti: ‘Vaya vanopsaka Jehovha, avazotami na cimwe ciro cakanaka.’