1. Munorangarira kuti Jehovha wakagarisa kudini?

 IMWIMWI makamborangarira manera Jehovha aari? Pamunoita mukumbiro kwaari makamborangarira kuti iyena wakagarisa kudini? Ngozvokadi kuti atingakwanisi kuvona Jehovha asi Bhaibheri rinomubhuya ngo njira jakawanda. Ngokuti Jehovha ndi “zuva no muthavo” cimwenizve “muriro unopisa.” (Nduyo 84:12; Vahebheru 12:29) Mucivoniso caakavoneswa Ezekiya wakasanangura Jehovha inga buwe rino mutengo, simbi inomonikira no murarabungu. (Ezekieli 1:26-28) Manera Jehovha anosananguhwa mu Bhaibheri angatikahamarisa nokuita kuti tijivone inga ticina mutengo.

2. Ngenyi zvinganesa kukhwedera phedo na Jehovha?

² Zvecivoneka kuti Jehovha atimuvoni zvinotinesera kuthemba kuti iyena anotida. Vamweni vakatambujika maningi mu upenyu hwavo zvokuti vakatogumira pakurangarira kuti Jehovha narini aazombovadizve. Kangaije ivona avato vakambova na baba vanovada. Jehovha anozwisisa mazwiro edu, iyena anonasa kuziva manera atinonesehwa kuti tikhwedere phedo na iyena. Kuitira kutibesera iyena anoshandisa Bhaibheri kuitira kukhombija kuti iyena anotida maningi.

3. Ngenyi zvinosisira kugara phedo na Jehovha?

³ Gama rimwe rinosisira maningi ngo rokuti Jehovha rudo. (1 Johani 4:8) Bhaibheri rinonanga kuti Mwari rudo. Cimwenizve, rudo unomutungamirira pazvese zvaanoita. Rudo hwa Jehovha wakakura maningi nokutizve unosimba, zvokuti unotobesera na vaya vacikamudi. (Mateu 5:44, 45) Mu cijijo ici, tinoda kujija ngo pamusoro pa Jehovha no rudo hwake. Patinojija maningi ngo pamusoro pa Jehovha tinozomuda maningi.

JEHOVHA ANOTIDA MANINGI

4. Rudo hwa Jehovha unomuita kuti mujizwe kudini? (Vonanyi foto.)

⁴ “Jehovha wakazara ngo pena.” (Jakobo 5:11) Mu Bhaibheri Jehovha anoezanisihwa na mai vano rudo no mwana  wavo. (Isaia 66:12, 13) Rangariranyi ndi mai vanotaja mwana wavo aciri mudoko ngo rudo hwese ivona vanomubereka nokubhuya naye ngo izwi rakapfava. Paanonga ecihwajihwa ivona vanoita zvese kuti vamupe zvaanoda. Patinonga tecitambujika tingava no cokwadi cokuti Jehovha anotida. Mutari wo nduyo wakatara kudari: “Apo kuthimwa-thimwa kunoengejeka kondiri, maembejero enyu anondidakajisa.”—Nduyo 94:19.

5. Rudo hwo kugondeka hwa Jehovha unorevenyi kwamuri?

⁵ Jehovha wakagondeka. (Nduyo 103:8) Iyena aazotisiyi pikija paya patinoita zviro zvakashata. Vaiziraeri ko vhaza jakawanda ivona vakanyangajisa Jehovha pikija zvakadaro, pavaikhauya Jehovha wakakhombija rudo hwake kwavari paakati: “Iwewe wakava no mutengo mukuru pamberi pangu, iwewe wakakujwa, inini ndakakuda.” (Isaia 43:4, 5) Rudo wa Jehovha auzivi kucinja. Nguva jese tinodikana kumuthemba. Pikija patinoita zviro zvakashata Jehovha aazotisiyi. Kudari tikakhauya tohwirira kuna Jehovha tinozovona kuti iyena anotiregerera. Iyena anogondesa ‘kutiregerera mukuperera.’ (Isaia 55:7) Bhaibheri rinonanga kuti Jehovha ‘anozotitondhoja.’—Mabasa o Vapostori 3:19.

6. Bhuku ra Zakaria 2:​8, rinotijijisenyi ngo pamusoro pa Jehovha?

⁶ Verenganyi Zakaria 2:8. Jehovha anotiezanisa no cimundhu ciri mujiso rake. Iyena anohwajihwa maningi paya patinokhuvazika. Inga muviyo, tingaita mukumbiro tecinanga kudari: ‘Ndingwarirenyi kudari inga cimundhu co jiso renyu.’ (Nduyo 17:8) Jiso ndi ciro cicikanesi kukhuvazika pa muviri nokutizve ndi ciro cinosisira maningi. Ngo kudaro, zvinoda kunanga kuti Jehovha anonanga kudari: ‘Ndiani anozokhuvaza vandhu vangu anonga eciitiravo zvondhozvo kwandiri.’

7. Ngenyi tinodikana kuvangisa kuthemba kwedu rudo hwa Jehovh?

⁷ Jehovha anoda kuti imwimwi mutame kukana-kana kuti iyena anomuda pacenyu. Iyena anozivazve kuti ngo ndava yo zviro zvakatiitikira kareko tingatokana-kana kuti iyena anotida kana kuti haiwa. Kangaije, muri kuhwisana no mugariro unonesa ungamusiya mucikathembizve kuti Jehovha anomuda. Waro ngozvapi zvingavangisa kuthemba kwenyu? Wari ngatende tivone kuti Jehovha  anokhombijisa kudini rudo hwake kuna Jesu, vokuzojwa kubatanijavo na itusu tese.

JEHOVHA ANOKHOMBIJISA KUDINI RUDO HWAKE?

8. Ngenyi Jesu waithemba kuti Baba wake vaimuda?

⁸ Ko mazana o makore Jehovha na Jesu vakapona vese kudenga no kukhombijirana rudo hwakakura maningi. Jehovha na Jesu vakagara vese ko mukuvo wakareba maningi kupinda ari wese hake. Jehovha wakanasa kujekesa kuti iyena waida Jesu inga zvatinoverenga pana Mateu 17:5. Jehovha wakatonanga kamare kuti: ‘Uwu ndiyena wandinotendera.’ Asi iyena anodavo kuti tizive kuti iyena anoda maningi Jesu. Iyena wakatonanga kuti: “Nga uwu Mwana wangu anodiwa.” Jehovha waidada ngo kuziva kuti mwana wake wainga akanasiririka kuti apire upenyu hwake. (Vaefeso 1:7) Jesu acaikanakanepi kuti Baba wake vaimuda. Iyena wainga no cokwadi cokuti rudo hwa Jehovha kwaari hwainga hwokadi. Zvokuti iyena wakatogumira pakubhuya kuphinda no kuphinda no kuthemba kwese kuti Baba wake vaimuda.—Johani 3:35; 10:17; 17:24.

9. Ndi gama rapi rinosanangura rudo hwa Jehovha kuno vokuzojwa? Sananguranyi. (Varoma 5:5)

⁹ Jehovha anokhombija rudo hwake kuno vokuzojwa. (Verenganyi Varoma 5:5.) Vonanyi gama rokuti “hwakadururihwa.” Bhuku rimweni rinosanangura gama iri inga “cimurambo ciri kupopomera kwatiri.” Muezaniso uwu unonasa kukhombija kamare manera Jehovha anoda vokuzojwa. Iyena anoziva kuti ivona “vakadiwa . . . ndi Mwari.” (Judha 1) Mupostori Johani wakananga mazwiro ake paakatara kuti: “Vonanyi kuti i rudo hwakadini hwatakaitihwa ndi Baba, kuti tidanijwe vana va Mwari.” (1 Johani 3:1) Kureva kuti Jehovha anoda basi vokuzojwa? Haiwa. Jehovha wakananga kuti anoda itusu tese.

10. Ngocapi citatijo cikuru co rudo hwa Jehovha kwamuri?

¹⁰ Ngocapi citatijo cikuru co rudo hwa Jehovha? Muripo ndicona citatijo cikuru co rudo hwa Jehovha pasi pese. (Johani 3:16; Varoma 5:8) Jehovha wakapekeja Mwana wake anosisira kuti afire vandhu vese, kuitira kuti zvishaishi zvedu zviregerehwe no kuva shamwari jake. (1 Johani 4:10) Patinorangarijisisa maningi ngo muripo wakariphwa ndi Jehovha na Jesu, tinozonasa kuzwisisa kamare manera avanoda umwe nga umwe wedu. (Vagaratiya 2:20) Muripo auzivi kuriphwa basi ngo ndava yo kurungama kwa Jehovha, asi iwona wakariphwa ngo ndava yo rudo. Jehovha wakakhombija rudo hwake kwatiri ngo kupekeja zviya zvaisisira zvaainga nazvo mwana wake Jesu. Jehovha wakatendera kuti mwana wake atambujike no kufa ngo ndava yedu.

11. Ngozvapi zvatinojija pana Jeremia 31:3?

¹¹ Inga zvatavona, Jehovha anoita zvese zvaanokwanisa kuti atiponese no kukhombija kuti anotida maningi. (Verenganyi Jeremia 31:3.) Jehovha wakatikwevera kwaari ngokuti anotida. (Ezanisiranyi na Deuteronòmio 7:7, 8) Apana ari wese angakwanisa kutiparajanisa no rudo hwake. (Varoma 8:38, 39) Rudo hwa Jehovha unomuita kuti muzwe kudini? Ngatende tivone Nduyo 23, tivone kuti Dhavhidhi waijizwa kudini ngo rudo no kutajwa ndi Jehovha no kuvona kuti imwimwi mungaitisa kudini kuti mujizwevo kudaro.

RUDO HWA JEHOVHA UNOMUITA KUTI MUJIZWE KUDINI?

12. Maizosanangurisa kudini vhesi ya Nduyo 23?

¹² Verenganyi Nduyo 23:1-6. Pana Nduyo 23, Dhavhidhi wakakhombija kuthemba  kwake kuti Jehovha waimuda no kumutaja. Iyena wakatotara ngo pamusoro po ushamwari hwophedo hwaainga nahwo no Muhavisi wake Jehovha. Dhavhidhi waijizwa akajiviririka ecisiya kuti Jehovha amutungamirire, nokutizve iyena Waimuthemba mukuperera. Dhavhidhi waiziva kuti Jehovha waizomukhombijira rudo hwake njiku jese. Ngenyi Dhavhidhi wainga nokuthemba uku?

13. Ngenyi Dhavhidhi waithemba kuti Jehovha waizomutaja?

¹³ “Avazotami no ciro.” Dhavhidhi wakavona kuti Jehovha waimutaja nguva jese ngokuti zvese zvaaida waizviwana. Ngo ndava ya zvondhozvo, Dhavhidhi waiziva kuti Jehovha wainga shamwari yake nokutizve waimutendera. Ndiyo ndava, iyena waizviziva kuti azvinenyi no zvaizoitika kumbejiyo, Jehovha mukuvo wese waizomutaja. Kuthemba kwainga na Dhavhidhi ku rudo hwa Jehovha kwainga no simba guru maningi kupinda kuneseka kuri kwese hako, cimwenizve, Jehovha waida kuti agare akadakara mukuvo wese.—Nduyo 16:11.

14. Jehovha anotitajisa kudini?

¹⁴ Jehovha anotitaja ngo rudo maningi-ningi paya patinodhivana no zvakashata mu upenyu hwedu. Hambzaji Kraire, a vanoshanda ku Bheteri ko makore anokwana kuita makumaviri, vakanyangajwa maningi mbhuri yavo poyakasongana no zvineso zvakatevererana. Baba vakona vakasongana no cineso cinorembesa maningi ngo ndava yo kuti umwe wo mwana wavo wakajingwa, vovazve no cineso co mare no kuruza nyumba yavo. Jehovha wakavatajisa kudini? Hambzaji Kraire vakati: “Jehovha wakaita kuti mbhuri yangu iwane zvayaida njiku ngo njiku.  Ko vhaza jakawanda zvese zvataipuwa ndi Jehovha zvainga zvakawanda kupindirija zvatairangarira. Nguva jimweni, ndinorangarira mukuvo jaakanditaja Jehovha inini pamwepo no mbhuri yangu. Inini andizokanganwi mukuvo iji. Zvondhozvo zvinondiita kuti ndienderere mberi ndecishandira Jehovha ndakadakara pikija paya pandinosongana no zvineso zvimweni mu upenyu.”

15. Ngenyi Dhavhidhi waizviha mwoyo? (Vonanyi foto.)

¹⁵ “Iyena anomutondhoja.” Mukuvo jimweni Dhavhidhi waizviha mwoyo ngo zvineso zvaihwisana nazvo. (Nduyo 18:5-7) Pikija zvakadaro caimudakajisa ndi rudo hwa Jehovha no kutajwa ndiyena. Zvaidari inga kuti Jehovha ari kutora Dhavhidhi kwenda naye ku “mahavo mavixi” no “kuno kumwa yakatondhora.” Ngo njira yondhoyo, Dhavhidhi waiwana simba no kukwanisa kwenderera mberi ecishandira Jehovha no mudakaro.—Nduyo 18:29-33.

16. Kuitisa kudini rudo hwa Jehovha unomudakajisa?

¹⁶ Nyamasi unovo, itusu atizivi ‘kuparajwa ngo ndava yo unyasha hwa Mwari.’ Itusu tinokwanisa kuhwisana no zvineso zvatiri kusongana nazvo ngo ndava yo besero ra Jehovha. (Macumbiro 3:22; Vakorose 1:11; Sandujo yo Nyika Imbza.) Vonanyi muezaniso wa hambzaji Rakeri. Ivona vakasara vacina no cokubhuya mwamunavo paakasiya ivona no kusiya Jehovha. Izvi zvakaitika pamukuvo wo mutungu wo korona vhiru. Jehovha wakavabeseresa kudini? Hambzaji Rakeri vakati: “Jehovha wakaita zvese kuti ndijizwe ndecidiwa. Iyena wakaita kuti shamwari zinji jipeje mukuvo wakawanda na inini, kundivisira zvokuha, kutumira mensajhem kana vhesi inondivangisa, vaiseka na inini no kundiceukija kuti Jehovha wainditaja no kundida. Mukuvo wese ndinobongesera Jehovha ngokundipekeja mbhuri iyi yakakura no ino rudo.”

17. Ngenyi Dhavhidhi “aacaithya ciri cese cakashata”?

¹⁷ “Andizothyi cakashata ciri cese ngokuti imwimwi muna inini.” Dhavhidhi upenyu hwake hwakava pangozi ko vhaza jakawanda. Cimwenizve, vavengi vake vainga no simba maningi. Pikija zvakadaro iyena waijizwa akajiviririka ngo ndava yo rudo hwa Jehovha. Zvondhozvo zvakaita kuti Dhavhidhi anange kuti: “[Jehovha] wakandisujunura mo bzese bzondaithya.” (Nduyo 34:5) Mukuvo jimweni Dhavhidhi waithya asi iyena wainyisa kuthya ngo kuziva kuti Jehovha waimuda.

18. Kuitisa kudini kuziva kuti Jehovha anotida kungativangisa paya patinonga tecithya?

¹⁸ Tingazvizivisa kudini kuti Jehovha anotida  no kutipekeja simba patinonga tiri pamugariro unonesa? Hambzaji imweni iri piyona inodanijwa kuti Suzi, iyona no mwamuna wayo yakananga manera avakajizwa mwana wavo paakajiuraya: “Kudari cikaitika ciro cakashatisisa no cinozizimusa mu upenyu hwenyu zvingamupsasa no kumubararisa hwiru. Asi rudo hwa Jehovha hwakavaita kuti vajizwe vakajiviririka no kungwaririka.” Hambzaji Rakeri vanangwaya pakutanga vanoceukija kuti: “Pausiku hwumweni ndainga ndakasuruvara ndaineseka no kuthya ndakaita maningi mukumbiro ngo izwi guru pamukuvo wondhowo kamare ndakazwa kuti iyena wakanditondhoja no kundinyaraja inga zvinoita mai kuno mwana wavo. Pondhopo ndakavata. Inini andizokanganwi mukuvo wondhowo.” Hama imweni inodanijwa kuti Taso yakapeja makore marongomuna iri mukadheya ngo ndava yo kuramba kubatana pamwepo no masoca. Yakavonesa kudini rudo hwa Jehovha no kutajwa ndiyena? Iyona yakati: “Jehovha wakandipekeja zvese zvandaida no zvimweni. Zvondhozvo zvakandiita kuti ndithembe maningi Jehovha. Pikija mukadheya i ndau icikadakajisi, Jehovha wakandipekeja mudakaro ecishandisa mujimu mucena. Izvi zvakandibesera kuvona kuti pandinothemba maningi Jehovha ndinozokwanisa kuvona rudo hwake kwandiri. Ndakatotanga kushanda inga piyona wo nguva jese pandainga mukadheya.”

GARANYI PHEDO NA MWARI WENYU WO RUDO

19. (a) Ngenyi kuziva kuti Jehovha anotida zvinopsasa zvatinobhuya pa mukumbiro jedu? (b) Ndi vhesi yapi yo mu Bhaibheri inobhuya ngo pamusoro po undhu hwa Jehovha inobaya mwoyo wenyu? (Vonanyi bokiso rinoti: “Mazano Anotibesera Kuti Tivone Rudo Hwa Jehovha.”)

¹⁹ Zviitiko zvese zvataperari kuvona mu cijijo cino, zvinotiita kuti tithembe kuti Jehovha, “Mwari wo rudo,” ana itusu. (2 Vakorinte 13:11) Iyena ano rudo kuna umwe na umwe wedu. Tingava no cokwadi kuti ‘takatendenejwa ngo rudo hwake.’ (Nduyo 32:10) Patinorangarijisisa ngo manera Jehovha aakakhombija rudo hwake kwatiri, tinojizwa tiri phedo naye nokutizve anozova akagondeka kwatiri. Tingaita mukumbiro kuna Jehovha panguva iri yese nokumuvhunjazve kuti tinoda maningi rudo hwake. Cimwenizve, tinodikana kuvhunja Jehovha ngo zvese zviri kutinesa, tingava no cokwadi cokuti iyena anotizwa no kuda kutibesera.—Nduyo 145:18, 19.

20. Kuitisa kudini rudo hwa Jehovha unotiita kuti tikhwedere phedo naye?

²⁰ Inga zvatinokhwederera muriro pa njiku yakunonga kwecitondhora, tinodikanavo kukhwedera phedo na Jehovha. Rudo hwa Jehovha hwakavanga maningi nokutizve uno simba. Ngo kudaro, fununguranyi mwoyo wenyu kuti muvone rudo hwa Jehovha mu upenyu hwenyu. Patinonga tecivona rudo uhu itusu tese tingananga kudari: “Ndinoda Tenji Mwari.”—Nduyo 116:1.