1-2. Ngozvapi zvineso zvinosongana no vashandiri va Jehovha?

 ZVIRO zvakashata zvikaitika upenyu hwedu ungacinja ngo kukasika. Inga muezaniso, hama imweni inodanijwa Ruis a vakahwaja ndhendha yo kanseri. Medhiko wakananga kuti ndhendha iyi yaizovauraisa ngo kukasika. Hambzaji Monika no mwamuna wavo vaibatikana maningi ngo mabasa akawanda o umwari. Asi njiku imweni hambzaji Monika vakazoziva kuti mwamuna wavo vainga vari mukuru vainga veciita zvakashata ko makore akawanda. Hambzaji icizivi kucadha inozwi Orivhiya, yakadikana kuvha pa muzi payo ngo ndava yo ngozi jinoitika jega. Poyakahwirira yakakhanda nyumba yayo yese yapera kuphwanyika. Ngo civhumbu upenyu wo vandhu ava wakacinja kamare. Imwimwi makambosongana no mugariro wakadari? Makambosongana no mugariro wokuti ngo kukasika upenyu hwenyu hwakacinja?

² Pikija kuti itusu tiri vashandiri vakagondeka va Jehovha tinosonganavo no zvineso zvo uhomi inga vandhu vamweni. Kusiyapo izvo, tinohwisanazve no kuteverehwa nga vaya vanozonda vandhu va Mwari. Jehovha aaiti kuti zviro izvi zvitame kutiitikira asi iyena anogondesa kutibesera mukuvo wese. (Isaia 41:10) Tecibesehwa ndiyena itusu tingava no mudakaro totema zvivaringo zvaushoni no kwenderera mberi takagondeka kwaari pikija pa mukuvo wo kunesa. Mu cijijo ici, tinozovona njira murongomuna jinoshandisa Jehovha kuti atibesere patinonga tiri pamukuvo unonesa. Tiri kudazve kuvona kuti tinodikana kuitenyi kuti tikwanise kuashira besero ratinopuwa ndi Jehovha.

 JEHOVHA ANOZOMUJIVIRIRA

3. Ngozvapi zvinozotinesera kuita paya patinosongana no zvineso mu upenyu?

³ Zvineso. Patinosongana no mugariro unonesa zvinotinesera kurangarira ushoni no kutema zvivaringo zvakanaka. Ngenyi? Kangaije mungahwajihwa maningi mu mwoyo menyu no kutothimwa-thimwa maningi. Kangaije munojizwa inga muri kufamba pakati po mbhute mucikazivi ko kwenda. Vonanyi kuti hambzaji mbiri janangwaya pakutanga jakajizwa kudini. Hambzaji Orivhiya vakati: “Mudhuma ngo pasi pawakapera kuphwanya nyumba yangu inini ndakahwajihwa maningi ndopera no simba.” Hambzaji Monika pavakaziva kuti mwamuna wavo waiita basa ro kuhura ivona vakati: “Inini ndakahwajihwa maningi ndokonehwa no zvokuita. Ndaizviha mwoyo. Zvaitondinesera kuita zviro zvakareruka zvo njiku ngo njiku. Zvakandiitirari mwamunangu andicaizvirangarira kuti zvaizoitika na itusu.” Jehovha anogondesa kuti anozotibeseresa kudini patinozosongana no zvineso zvakadari?

4. Mukuzwirana na Vafiripi 4:6, 7; Jehovha anotigondesenyi?

⁴ Zvinoithwa ndi Jehovha. Iyena anogondesa kuti anozotipa zvinonangwaya ngo Bhaibheri kuti: “Runyararo hwa Mwari.” (Verenganyi Vafiripi 4:6, 7.) Runyararo uhu unowanika basi nga vaya vano ushamwari na iyena. Runyararo uhu “hunopinda kurangarira kwese” iwona uno simba maningi kupinda zvatinorangarira. Imwimwi makambojizwa kurerukihwa pasure pokuita mukumbiro wokudeketera kuna Jehovha? Kudari ndizvona imwimwi makazwa “runyararo hwaMwari.”

5. Runyararo hwa Mwari unozongwaririsa kudini mwoyo no murangariro wedu?

⁵ Bhuku ra Vafiripi 4:7 rinonangazve kuti runyararo hwa Mwari “hunozongwarira” no kujivirira “mwoyo no murangariro yenyu.” Gama ro Cigiriki rakasandujwa kuti “kungwarira” raishandiswa recinangira masoca aingwarira dhorobha no kurijivirira ku vavengi. Ngo kudaro, vagari vo dhorobha iri vaivata vacikathyi veciziva kuti masoca akangwarira musuvo jese. Mu njira yakaezana, runyararo pahunongwarira mwoyo no murangariro jedu tinojizwa takajiviririka teciziva kuti takangwaririka. (Nduyo 4:9) Ndizvona zvakaitikavo na Ana, pikija kuti mugariro wake auzivi kucica ngokukasika iyena wakava no runyararo. (1 Samueli 1:16-18) Patinova takathiva tinozokwanisa kurangarira ushoni no kutema zvivaringo zvakanaka.

6. Tinodikana kuitenyi kuti tizwe runyararo hwa Mwari? (Vonanyi foto.)

⁶ Ngozvapi zvatinodikana kuita. Pamunohwisana no mugariro unonesa maningi daninjanyi “mungwariri” mu njira yo kuezanisira. Kuitisa kudini? Itanyi mukumbiro kuna Jehovha mbhera muzwe runyararo hwake. (Ruka 11:9; 1 Vatesaronika 5:17) Hama Ruis vanangwaya  pakutanga ivona no mukaji wavo Ana, vakasanangura manera avakaita kuti vahwisane no cineso ici caingari na hama Ruis co ndhendha yo kanseri zvecivoneka kuti vainga vacicina mukuwo wakareba vecipona. Ivona vakati: “Pamukuvo wakadari inga uwu zvinonesa maningi kutema civaringo ngo pamusoro po kukheta marapihwe no shwiro jimweni. Asi mukumbiro jakavabesera kuti vave no runyararo pa mukuvo uwu.” Hama Ruis no mukaji wavo vakananga kuti vaiita mukumbiro mukuvo wese kuphinda no kuphinda, vecikumbira kuti Jehovha avape runyararo, mwoyo wakagajana no uzivi kuti vateme zvivaringo zvaushoni. Jehovha wakavabesera. Pamunonga mecisongana no mugariro jinonesa maningi mu upenyu hwenyu itanyi mukumbiro. Mukaita kudaro munozovona runyararo hwa Jehovha no kungwarira kwaanoita mwoyo wenyu no murangariro.—Varoma 12:12.

JEHOVHA ANOZOMUBESERA KUTI MUVE MAKAEZANANA

7. Ngoapi mazwiro atingava nawo paya patinosongana no mugariro unonesa?

⁷ Zvineso. Mukasongana no zvineso imwimwi mungatanga kurangarira no kuita ngo njira yokuti amucaizozviita kudaro. Kudari inga ngarava iri kutakwa ngo mbhepo mu jombe iyona inotohwa ngo mavimbi yeciendeswa ku mativi akasiyana-siyana. Itusu tingazwa kuti tiri kuhwisana no mazwiro akasiyana-siyana. Hambzaji Ana vanangwaya pakutanga vakananga kuti pakafa mwamunavo ivona vakava no mazwiro akasiyana-siyana. Ivona vakananga kuti: “Njiku jimweni ndaijizwa ndakasuruvara maningi ndecirangarira kuti andicaidikana kusongana na zvese izvi. Mukuvo umweni ndaijivhunjisa kuti ngenyi mwamuna wangu wakafa.” Ivona kazinji vaijizwa vari vega, ngokuti avacaikwanisepi kuita zviro zvimweni zvaikwaniswa kuithwa ngo mwamunavo kareko. Nguva jimweni, vaijizwa inga vari mu jombe vecitakwa ngo mavimbi. Jehovha anotibeseresa kudini patinonga tino mazwiro akadari inga aya?

8. Isaia 33:6; inokhombijisa kudini kuti Jehovha anotingwarira?

⁸ Zvinoithwa ndi Jehovha. Jehovha anogondesa kuti anozotibesera kuti tive vakaezanana. (Verenganyi Isaia 33:6.) Panoitika mavimbi mu jombe ngarava inoendeswa kumativi akasiyana-siyana. Kuti vakwanise kuhwisana no mavimbi aya vafambisi vo ngarava vano zvavanoshandisa kuti vatame kundondomera. Zviro izvi vanozvidira mu mativi ese o ngarava kuti ngarava itame kotohwa ngo mavimbi. Ngo kuita kudaro, vanongaro vari mu ngarava vanonga vakangwaririka votoita hwendo vakagajana. Zvinoshamaisa ngo zvokuti zviro izvi zvinonasa kushanda ushoni ngarava painonga yecifamba. Mu njira yakafanana, Jehovha anozotibeseravo kudari tikaenderera mberi tecimushandira  takagondeka pikija pamukuvo jokunesa.

9. Mathurusi edu okupsakisisa anotibesera kudini kuti tive vakaezanana? (Vonanyi foto.)

⁹ Ngozvapi zvatinodikana kuita. Kudari mukasongana no zvineso zvinopsasa murangariro wenyu itanyi zvese zvamunokwanisa kuti muenderere mberi makabatikana mu mabasa o umwari. Ndizvona kuti imwimwi amuzokwanisi kuita zvamaiita kare asi ceukijanyi kuti Jehovha aaveteri kuti imwimwi muite zviro zvamucikakwanisi. (Ezanisanyi na Ruka 21:1-4) Psakanyi nguva yokuita jijo yo mundhu ega no kurangarijisisa zvamunojijaro. Ngenyi tinodikan kuita izvi? Ecishandisa sangano rake, Jehovha anotipa mabhuku no mavhidhiyo akasiyana-siyana anotibesera maningi patinohwisana no zvineso. Kuti muwane masoko angamubesera mungapsakisisa mabhuku amunawo mu ndumi yenyu, inga muezaniso, mu BHIBHIRIOTEKA RO MU INTERNETI^® ro Torre de Vigia no Bhuku ro Kupsakisisa ro Zvapupu zva Jehovha. Hambzaji Monika ivona vanonanga kuti mukuvo wese wavanova no mazwiro akashata vanopsakisisa mu mabhuku okupsakisisa. Inga muezaniso, ivona vaipsakisisa gama rokuti “ushungu.” Nguva jimweni vaipsakisisa gama rokuti “kusiya” kana “kugondeka.” Ivona vakaenderera mberi veciverenga mbhera vojizwa ushoni. Ivona vakananga kudari: “Inini ndaipsakisisa maningi ngo shwiro jakafanana no mugariro wangu, perapo, ndaiverenga masoko aibudari padoko ngo padoko ndakatanga kuzwa kuti Jehovha waindikumbatira. Pandaienderera mberi ndeciverenga ndakazwisisa kuti Jehovha waiziva zvineso zvangu nokutizve waindibesera.” Pamunozwa kuti muri kubesehwa ndi Jehovha izvi zvinozomubeseravo kuti mukwanise kuhwisana no zvineso zvenyu.—Nduyo 119:143, 144.

JEHOVHA ANOZOMUBESERA

10. Tingajizwa kudini pasure pokusongana no mugariro unonesa maningi?

¹⁰ Zvineso. Kudari zviro zvinotiita kuti tive takasuruvara zvikaitika mu upenyu hwedu zvingaita kuti njiku jimweni tijizwe takaremba maningi kudivi ro ku nyama no mu mazwiro. Zvingaitazve kuti makambojizwa inga mugogomi wakhuvazika, kuveni acito akhuvazika iyena waigogoma maningi kamare. Asi wari anodikana kufamba padoko-padoko. Wari zvingatomunesera kuita zviro zvakareruka zvamaitoita kare, mungatotamazve no cidaka-daka cokuzviita. Inga ndi Eriya mungatokonehwa kumuka moda kugara makavata. (1 Majimambo 19:5-7) Jehovha anogondesa kutiitirenyi paanotivona takadaro?

11. Ngojapi njira jimweni jinoshandiswa ndi Jehovha kuti atibesere? (Nduyo 94:18)

 ¹¹ Zvinoithwa ndi Jehovha. Iyena anogondesa kuti anozomubesera. (Verenganyi Nduyo 94:18.) Kudari inga mugogomi wakhuvazika, itusu tinoda besero kuti tienderere mberi takavanga mu basa ra Jehovha. Mukuvo uwu Jehovha anotigondesa kuti: “Inini Jehovha Mwari wako, ndakabata nyara yako yo muho, Ndiri wiya anokuvhunja kudari: Ucathya. Ndinozokubesa.” (Isaia 41:13) Mambo Dhavhidhi wakaashira besero iri ra Jehovha. Paakasongana no kuteverehwa ngo vavengi vake iyena wakavhunja Jehovha kuti: “Nyara yenyu yo muho inondivangisa.” (Nduyo 18:36) Jehovha anotibeseresa kudini?

12. Jehovha anoshandisenyizve kuti atibesere patinonga takasuruvara?

¹² Kazinji Jehovha anoshandisa vandhu vamweni kuti vatibesere. Inga muezaniso, pa vhaza imweni Dhavhidhi paakajizwa akaremba shamwari yake Jonatani yakamuvhakacira kuti imubesere no kumuvangisa ngo magama. (1 Samueli 23:16, 17) Mu njira yakafanana, Jehovha wakashandisa Erizeu kuti aende kobesera Eriya. (1 Majimambo 19:16, 21; 2 Majimambo 2:2) Nyamasi uno Jehovha anoshandisa vo pa mbhuri, shamwari no vakuru kuti vatibesere. Mukuvo umweni patinonga tecihwajihwa tingada kugara patega. Izvi ngo zvocibarihwe. Waro ngozvapi zvatingaita kuti tiashire besero ra Jehovha?

13. Tinodikana kuitenyi kuti tiashire besero ra Jehovha? (Vonanyi foto.)

¹³ Ngozvapi zvatinodikana kuita. Hwisananyi no mazwiro okuda kugara mega. Ngokuti patinonga tiri tega tinonga tecirangarira basi zvineso zvedu. Kurangarira izvi basi kunotiita kuti titeme zvivaringo zvakashata. (Mazwi Akangwara 18:1) Ndizvona kuti itusu tese mukuvo umweni tinoda kugara tega, maningi-ningi patinosongana no mugariro unonesa. Asi tikagara tega pamukuvo wakareba zvinotiita kuti tigare ndhambo no vamweni kuveni vandhu ava ndivona vanoshandiswa ndi Jehovha kuti atibesere. Pikija kuita izvi nguva jimweni zvinonesa tinodikana kutendera kuashira besero ro ukama, shamwari no vakuru. Ngativone kamare kuti ivona vashandiswa ndi Jehovha kuti vatibesere.—Mazwi Akangwara 17:17; Isaia 32:1, 2.

JEHOVHA ANOZOMUEMBEZERA

14. Mugariro japi jingatiita kuti tithye?

¹⁴ Zvineso. Nguva jimweni tinosongana no mugariro unothyisa. Bhaibheri rinobhuya ngo vashandiri va Jehovha vakagondeka vakambothyavo ngo ndava yo kuteverehwa no zvineso zvimweni. (Nduyo 18:5; 55:2, 6) Ngo njira  yakafanana, itusu tingathyavo kuteverehwa ngo vadoni vo kucikora, vo kubasa, ukama hwedu no utongi. Itusu tingathyavo kufa ngo ndava yo zvineso zvo uhomi. Pa mugariro wakadari tingajizwa inga ticizivi kungwaririka inga mwana mudoko. Jehovha anotibeseresa kudini pa mugariro jakadari?

15. Ngocapi cigondiso catinowana mu bhuku ra Nduyo 94:19?

¹⁵ Zvinoithwa ndi Jehovha. Jehovha anotiembezera no kutinyaraja. (Verenganyi Nduyo 94:19.) Bhuku ra nduyo iri kangaije rinomuita kuti murangarire ngo mwana mudoko wamuka okonehwa no kuvata ngo ndava yo zidutu ziguruwane. Tingakwanisa kurangarira baba vo mwana uwu veciguma vomubata no kumukumbatira mbhera ovata. Pikija kuti dutu arito rapera, baba ava vanoembezera mwana wavo mbhera iyena ajizwe akangwaririka. Patinosonganavo no mugariro jinotithyisa, kangaije tinodavo besero ra Baba wedu vo kudenga Jehovha kuti vatingwaririre mbhera mugariro uwu unothyisa upere. Waro itusu tingaembezereswa kudini ndi Jehovha?

16. Itusu tinodikana kuitenyi kuti tikwanise kubesehwa ndi Jehovha? (Vonanyi foto.)

¹⁶ Ngozvapi zvatinodikana kuita. Munodikana kupsaka nguva yokubhuya na Jehovha ngo kuita mukumbiro no kuverenga Bhaibheri. (Nduyo 77:2, 13-15) Kudari imwimwi munocirovejeso cokuita izvi, ciro cokutanga kangaije camunozoita pamunonga muri pa mugariro unonesa ngo cokupsaka besero ra Jehovha. Vhunjanyi Jehovha kuthya kwenyu no zvamuri kuneseka ndizvona. Siyanyi kuti iyena amuvhunje no kumutondhoja ecishandisa Bhaibheri. (Nduyo 119:28) Imwimwi mungarangarira kuti kuverenga mabhuku akacijikira mu Bhaibheri kungamuthondhoja paya pamunonga mecithya. Inga muezaniso, mungaverenga bhuku ra Jobe, Nduyo, Mazwi Akangwara no masoko a Jesu anowanika mu cipauko co 6 co bhuku ra Mateu. Kuita izvi zvingamubesera. Pamunoita mukumbiro no kuverenga Bhaibheri imwimwi munozozwa embezero ya Jehovha.

17. Kuthemba kwapi kwatingava nako?

¹⁷ Itusu tingathemba kuti Jehovha mukuvo wese anozotibesera patinozosongana no zvineso. Itusu atizovi tiri tega. (Nduyo 23:4; 94:14) Jehovha anogondesa kutingwarira, kutibesera kuti tive takaezanana no kutiembezera. Bhuku ra Isaia 26:3 rinotigondesazve zvimweni ngo pamusoro pa Jehovha. Ipona panoti: “Imwimwi munozongwarira vaya vanonasa kumuthemba munoenderera mberi mecivapa runyararo ngokuti ivona vanothemba imwimwi.” Ngo kudaro, thembanyi Jehovha kuti mubesereke ngo zvese zvaanomuitira. Kudari mukaita izvi munozoenderera mberi makavanga pikija mukasongana no zvineso.