1. Ngozvapi zviro zvingatisiya tecithya?

 VANDHU vese vanothya kazinji. Zvakajeka kuti jijo yedu yo Bhaibheri yakatisujunura pakuthya kwedu rufu, kuthya zviro zvokuti asipi zvocibarihwe no kuthya ngo pamusoro po kumbeji. Asi itusu tiri kupona mu njiku jokuti jinoitika zviro zvinothyisa zvakadari inga hondo, ngozi no ndhendha. (Ruka 21:11) Itusu tingatogumazve pakuthya vandhu, kubatanijavo utongi pikija no ukama hwedu hwokuti unoshora manamatiro edu ocokwadi. Vamweni vanogara vecineseka maningi vecirangarira kuti avazokwanisi kucungirira cineso cavari kusongana naco kana zvinozoitika kumbejiyo.

2. Zvicinyi zvakaitika na Dhavhidhi paainga ku Gati?

² Dhavhidhi waithyavo. Inga muezaniso, Mambo Sauri paakamupsaka ecida kumuuraya, Dhavhidhi wakatema civaringo co kuda kutizira ku dhorobha ro ku Firisti ku Gati. Mambo wo ku Gati Akishi ngokukasika iyena wakaziva kuti Dhavhidhi wainga mundhu ano simba maningi kuvhira kuzvainangwa ngo vandhu kuti iyena “wakauraya gumi ro bziuru” zvo Vafiristi. Paakazwa izvi Dhavhidhi ‘wakathya maningi.’ (1 Samueli 21:10-12) Dhavhidhi wakagara ecineseka ngo pamusoro po zviro zvaaizoitihwa ndi Akishi. Ngozvapi zvakaithwa ndi Dhavhidhi kuti anyise kuthya uku?

3. Mukuzwirana no bhuku ra Nduyo 56:2-4, 12; Dhavhidhi wakaitenyi kuti akwanise kunyisa kuthya kwake?

³ Pana Nduyo 56, Dhavhidhi anosanangura manera aainga ecizwa painga ku Gati. Pa nduyo iyi, Dhavhidhi wakananga zvaimuitisaro kuti athye, wakanangazve zvaakaita kuti akwanise kuhwisana nako. Paainga ecithya iyena wakathemba Jehovha. (Verenganyi Nduyo 56:2-4, 12.) Kuthemba kwakaita Dhavhidhi kuna Jehovha akuzivi kuva kwabiresi. Ngo makomborero a Jehovha, Dhavhidhi wakaronga zano raidari inga rakapeama asi raishanda.  Iyena wakajiita inga benji. Akishi paakavona Dhavhidhi ecijiita inga Benji, iyena wakathya kuda kumuraya wotomusiya. Ngo kudaro, Dhavhidhi wakakwanisa kupona.—1 Samueli 21:13–22:1.

4. Tingavangisa kudini kuthemba kwedu kuna Jehovha? Ezanisiranyi.

⁴ Tinganyisavo kuthya kwedu ngo kuthemba Jehovha. Tingaitisa kudini kuti tivangise kuthemba kwedu Jehovha patinonga tecithya? Rangariranyi ngo pamusoro po muezaniso unoteverari. Rangariranyi kuti imwimwi mavona kuti muno ndhendha, ngozvokadi kuti maizothya. Asi mungapungura kuthya kwenyu ngo kubhuya na medhiko wamunothemba. Zvingaita kuti iyena wakarapa vandhu vazinji vaingavo no ndhendha yondhoyo. Iyena anozonasa kumupurutana, imwimwi muzokwanisa kuvona kuti iyena ari kuzwisisa zvamuri kusongana nazvo. Kangaije. angatomuvhunja mutombo jokuti jakatobeseravo ushoni vamweni. Ngo njira yakafanana, itusu tingavangisavo kuthemba kwedu Jehovha patinoima torangarijisisa ngo zviro zvese zvaakaita, zvaarikuita nyamasi uno no zvanozotiitira kumbejiyo. Ndizvonavo zvakaita Dhavhidhi. Pamunonga meciverenga magama a Dhavhidhi pana Nduyo 56, rangariranyivo ngo manera amungavangisa kuthemba kwenyu Jehovha no kunyisa kuthya kwamunako.

JEHOVHA WAPERA KUITENYI?

5. Kuti akwanise kunyisa kuthya kwake Dhavhidhi wairangarijisisa ngo pamusoro penyi? (Nduyo 56:13, 14)

⁵ Pikija upenyu hwake hwainga pangozi, Dhavhidhi waibatikana pa zviya zvakapera kuithwa ndi Jehovha. (Verenganyi Nduyo 56:13, 14.) Izvi ndizvona zvaaindoita Dhavhidhi mu upenyu hwake hwese. Inga muezaniso, mukuvo umweni Dhavhidhi waiima kuti arangarijisise ngo pamusoro po zviro zvakasikwa ndi Jehovha. Izvi zvaizomubesera kuceukija kuti Jehovha anosimba maningi nokutizve iyena anoda maningi vandhu. (Nduyo 65:7-10) Cimwenizve, Dhavhidhi wairangarijisisa ngo zvakaitihwa vamweni ndi Jehovha. (Nduyo 31:20; 37:25, 26) Wairangarijisisazve maningi-ningi ngo zviya zvaainga akaitihwa ndi Jehovha pacake. Jehovha wakabesera no kungwarira Dhavhidhi pikija paainga aciri mujaha. (Nduyo 22:10, 11) Pacina kukana-kana, paakarangarira ngo pamusoro po zvese izvi zvakavangisa kuthemba kwake kuna Jehovha.

6. Pamunonga mecithya, ngozvapi zvinozomubesera kuthemba Jehovha?

 ⁶ Pamunonga mecithya, jivhunjisenyi kudari: ‘Ngozvapi Jehovha zvaapera kuita?’ Rangarijisisanyi ngo pamusoro po zviro zvaakasika. Inga muezaniso, “ringisanyi” manera Jehovha anotaja shiri no mafirori, pikija izvona azvizivi kuithwa ngo muezaniso wa Mwari nokutotama kukwanisa kumunamata, izvi zvinonasa kutivonesa kuti Jehovha anotitaja maningi kupinda zviro izvi. Kurangarijisisa ngo pamusoro pa izvi zvinozomuita kuti muthembe maningi Jehovha. (Mateu 6:25-32) Rangariranyivo ngo zvakaitira Jehovha vashandiri vake. Imwimwi mungajija ngo pamusoro po mundhu anonangwa mu Bhaibheri wainga no rutendo wakavanga kana mungaverenga ngo pamusoro po zviitiko zvo upenyu zvo vashandiri va Jehovha vo mu njiku jedu jino. a Kunja kwa zvondhozvo rangariranyivo ngo manera Jehovha ari kumutaja. Wakaitenyi kuti imwimwi mugumire pakuziva cokwadi? (Johani 6:44) Iyena wakadavirisa kudini mukumbiro jenyu? (1 Johani 5:14) Ngozvapi zviro zvaushoni zvamunazvo mu upenyu hwenyu zvamunovona kuti Jehovha wakamupa ngo ndava yo muripo?—Vaefeso 1:7; Vahebheru 4:14-16.

7. Kuitisa kudini zviitiko zva Dhanyeri zvakabesa hambzaji Vhanesa kuti vanyise kuthya kwavo?

⁷ Hambzaji imweni inodanijwa Vhanesa, b inogara ku Haiti, yakasongana no mugariro umweni unonesa maningi. Mwanarume umweni waigara pa mutundhupo waindogara eciyifonera no kuitarira mensajhe njiku jese, mwanarume uwu waindovangirija hambzaji Vhanesa kuti vaite ushamwari naye. Ivona vakanasa kujekesa kuti avacaizoitepi izvi. Mwanarume uwu waindovangirira no kuvathyisijira. Hambzaji Vhanesa vakatonanga kuti “vakathya maningi.” Ivona vakanyisisa kudini kuthya uku? Ivona vakaita zvavaikwanisa kuti vajijivirire. Mukuru umweni wakavabesera ngo kwenda kovhunja vatongi ngo pamusoro po shwiro iyi. Kusiyapo izvo ivona vakabatikana pakuvona manera Jehovha wakabesera vashandiri vake vokare. Hambzaji Vhanesa vakanaga kudari: “Mundhu wokutanga wandakatanga kurangarira ndi muporofeti Dhanyeri, iyena azivi kuita ciri cese cakashata.” “Asi wakasongana no mugariro unonesa maningi, zvokuti wakatogumira pakutokhandihwa mu gomba mainga no mbhondoro jakanyangajwa maningi. Pikija zvakadaro Jehovha wakamujivirira. Inini ndakakumbira Jehovha kuti andibesere kuhwisana no cineso candaisongana naco. Pandakapera kuita mukumbiro andizivi kuthyazve.”—Dhanyeri 6:12-22.

NGOZVAPI ZVIRI KUITA JEHOVHA WARI?

8. Dhavhidhi wainga no cokwadi capi? (Nduyo 56:9)

⁸ Pikija Dhavhidhi upenyu hwake hwainga pa ngozi paainga ku Gati, aazivi kutendera kuti kuthya kumunyise. Kusiyapo izvo, iyena wakarangarira ngo zvaimuitira Jehovha pa mukuvo wondhowo. Dhavhidhi waikwanisa kuvona kuti waitungamirihwa no kujivirihwa ndi Jehovha, waizivazve kuti Jehovha waizwisisa mazwiro ake. (Verenganyi Nduyo 56:9.) Dhavhidhi waikwanisazve kuvona besero raaipuwa ngo shamwari jake, jakadari inga Jonatani na Abhimereki Mupiri Mukuru. (1 Samueli 20:41, 42; 21:6, 8, 9) Pikija no kuteverehwa kwaiithwa na Mambo Sauri iyena wakakwanisa kupona. Dhavhidhi wainasa kuthemba kuti Jehovha waizviziva kuti iyena waisongana no mugariro jinonesa nokutizve izvi zvaipsasa mazwiro ake.

9. Jehovha anozivenyi kuno umwe na umwe wedu?

⁹ Pamunosongana no mugariro jokuti jinomusiya mecithya, ceukijanyi kuti Jehovha ari kuzwisisa zvamuri kusongana nazvo anotozivazve manera amuri kujizwa. Inga muezaniso,  Vaiziraeri pavaitambujika ku Ejipita, Jehovha wakananga kuti: “Ndinoziva matambujiko avo.” (Exodo 3:7) Pa ndumbo yaakaimba, Dhavhidhi wakananga kudari, makavona “urombo hwangu” no ‘kushuphwa kwangu.’ (Nduyo 31:8) Vandhu va Mwari pavaitambujika ngo ndava yo zvishaishi zvavo “iyena wakatambujikavo.” (Isaia 63:9) Pamunonga mecithya, zivanyi kuti Jehovha anozwisisa mazwiro enyu anodazve kumubesera kuti munyise kuthya kwenyu.

10. Ngenyi munganasa kuthemba kuti Jehovha anoziva zvamuri kusongana nazvo no kuthemba kuti iyena anozomubesera kuti muzvinyise?

¹⁰ Imwimwi mungajivhunjisa kuti Jehovha ari kuitisa kudini kuti amubesere pamunonga mecihwisana no zvineso. Munovona kudini kumuvhunja no kumukumbira kuti amubesere kuti muhwisane no zvineso zvamuri kusongana nazvo. (2 Majimambo 6:15-17) Amborangariranyi basi: Kureva kuti mupinguro wo hama kana hambzaji iri yese wakamubesera kuti muvangise kuthemba kwenyu? Makambovangiswa ngo mabhuku, vhidhiyo no mumbo? Ari wese wakambomuverengera vhesi kana kumuvhunjanyi magama anovangisa? Atizokanganwi rudo watinokhombijihwa ngo hama no hambzaji kubatanijavo no vangiso yatinoashira yecivha mu Soko ra Mwari inotibesera maningi. Asi izvi ndi zvipo zvinoshamaisa zvatinopuwa ndi Jehovha. (Isaia 65:13; Marko 10:29, 30) Ici ndi citatijo cokuti Jehovha anoneseka maningi ndisu. (Isaia 49:14-16) Ndicitatijozve cokuti Jehovha anoda kuti timuthembe.

11. Ngozvapi zvakabesera hambzaji Aidha kuti vanyise zvineso zvavo?

¹¹ Hambzaji imweni inogara ku Senegari inodanijwa kuti Aidha, yakavona manera Jehovha wakaibesera payaisongana no zvineso. Zvecivoneka kuti ivona mwana wakakura pamuzi pavopo, vabari vavo vaivetera kuti ivona vawane mare yakawanda kuti vajisapote pomwe nokuvasapotavo. Pavakatema civaringo cokushanda inga piyona, mbhuri yavo yakanyangajwa no kutanga kuvashora. Ivona vakati: “Ndakathya maningi ngo kutama kukwanisazve kusapota vabari vangu no kuvoneka mu njira icikaripi yaushoni ngo vese.” Ivona vakatizve: “Inini ndakapekeja ndava Jehovha ngo kusiya kwake zvese izvi zveciitika.” Tevere ndakapurukira hurukuro yakaizwa pa musongano. Ivona vakananga kuti hama yaiitaro hurukuro yakananga kudari: “Azvinenyi no zvivonje zvatinazvo mu mwoyo mwedu Jehovha anonasa kuzviziva. Padoko ngo padoko no besero ro vakuru no hama jimweni,  ndakakwanisa kuvona kuti Jehovha anondida maningi. Ndakatanga kuita mukumbiro kuna Jehovha ndecimuthembazve nga papsa. Cimwenizve, pandaivona kuti Jehovha waidavira mukumbiro jangu ndaiwana runyararo.” Nopapera mukuvo mushomani basi hambzaji Aidha vakawana basa raivabesera kuti vajisapote inga piyona no kubeseravo mbhuri yavo kubatanijavo no vamweni. Ivona vakati: “Wari ndiri kuthemba Jehovha mukuperera.” Vakaengejera veciti: “Pandinoita mukumbiro kuna Jehovha kuthya kwangu kwese kunopera.”

JEHOVHA ANOZOITENYI?

12. Mukuzwirana no bhuku ra Nduyo 56:10, Dhavhidhi waithembeyi?

¹² Verenganyi Nduyo 56:10. Pavhesi iyi tinovona ciro cimweni cakabesera Dhavhidhi painga ecithya. Pikija upenyu hwake wainga pangozi iyena wairangarijisisa ngo zvese zvaaizoitihwa ndi Jehova. Dhavhidhi waizviziva kuti Jehovha waizomubesera pa nguva kwayo. Jehovha wainga akananga kuti Dhavhidhi waizova mambo anotevera wo Vaiziraeri. (1 Samueli 16:1, 13) Kuna Dhavhidhi, zvese zvaainga akagondeswa ndi Jehovha waitozvivona inga zvatopera kuitika.

13. Tingathembesa kudini Jehovha?

¹³ Ngozvapi zvaakagondesa Jehovha kumuitira? Ativeteri kuti Jehovha atijivirire ku zvineso zvese zvatinosongana nazvo. c Pikija zvakadaro, pa zvineso zvese zvatinosongana nazvo mu upenyu hwedu Jehovha anozozvipeja zvese mu nyika imbza. (Isaia 25:7-9) Tingava no cokwadi cokuti Musiki wedu anosimba rokupeja kufa, ndhendha jese no kupeja vavengi vedu vese.—1 Johani 4:4.

14. Tingarangarijisisa ngo pamusoro penyi?

¹⁴ Pamunonga mecithya rangarijisisanyi zvinozoita Jehovha kumbejiyo. Rangariranyi kuti mucazojizwa kudini Sathana akazoparajwa, apo vandhu vakashata avacazovipozve pozowanika vandhu vakarurama basi no kuva vandhu vakakwana. Kukhombijihwa kumweni kwakaithwa pa gungano ro muthundhu mu gore ro 2014 kwakakhombija manera atingarangarijisisa ngo pamusoro po vetero yedu. Mbhuri imweni yakabhuya masoko anowanika mu bhuku ra 2 Timoti 3:1-5 ngo njira yakasiana ngo pamusoro po manera aunozova upenyu mu nyika imbza. Iyona yakati: “Mu nyika imbza tinozova no mukuvo jinozodakajisa maningi. Vandhu vanozodanana ngo cavo, vanozodisisa zviro zvokumujimu, vanozova vanojidodokesa, vanozwira vabari, vanobonga, vakagondeka, vanoda ukama, vanozwirana no vamweni, vanobhuya zvaushoni kuno vamweni, vanojibata, vandhu vakanaka, vanoda zvaushoni, vanothemba vamweni, vandhu vacikajikuji, vanodisisa zvinodakajisa Mwari, vanonamata Jehovha, vanorarama mukuzwirana no zvaanoda iwewe garai phedo navo.” Imwimwi munobhuya no ukama hwenyu kana kuti hama no hambzaji jenyu ngo pamusoro po manera unozova upenyu mu paradhiso?

15. Ngozvapi zvakabesera hambzaji Tanja kuti vahwisane no kuthya kwavo?

¹⁵ Hambzaji imweni inogara Kanjikazi ko Masedhonia inodaninjwa Tanja yakanyisa kuthya kwayo ngo kurangarijisisa makomborero atinozowana kumbejiyo. Vabari vayo vainga vacikadi kuti iyona ijije Bhaibheri, ivona vakaiteverera maningi. Iyona vakati: “Zviro zvandaithya maningi zvakazoitika. Pandaivha ku musongano vabari vangu vainditaka. Vabari vangu vakandigondesa kundiuraya kudari ndikava umwe wo Zvapupu zva Jehovha.” Pakupejisira hambzaji Tanja vakagogomehwa pa muzi. Ivona vakahwisana kudini no mugariro uwu? Ivona vakati: “Ndakabatikana no mudakaro wandaizova nawo kumbejiyo ngo kuva kwangu ndakagondeka. Inini ndakarangarira manera Jehovha  anozondipfupa mu nyika imbza ngo zviro zvese zvandaruza nyamasi uno no manera andinozokanganwa zviro zvakashata zviri kuitikari.” Hambzaji Tanja vakaendera mberi vakagondeka. Ngo besero ra Jehovha ivona vakazowana ndau yokugara. Ivona vakazorovohwa ngo mwanarume wakagondeka, vese vo vaviri vakadakara ngo kushanda mu nguva yakazara.

VANGISANYI KUTHEMBA KWENYU JEHOVHA NYAMASI UNO

16. Ngozvapi zvinozotibesera kuti tive no cicunge patinovona magama akadari inga anowanika pana Ruka 21:26-28?

¹⁶ Mukati mo dambujiko guru, vandhu “vanozopera simba ngo kuthya.” Vandhu va Mwari vanozoramba vakaima novakacunga. (Verenganyi Ruka 21:26-28.) Ngenyi itusu atizothyi? Ngokuti itusu tajija kuthemba Jehovha. Hambzaji Tanja vambonangwaya pakutanga vakananga kudari: “Zviitiko zvakandiitikiraya pakutanga zvakandibesera kuvona kuti apana mugariro uri wese ucazoitisa kuti Jehovha atame kundibesera no kundikomborera. Njiku jimweni zvingavoneka inga kuti ndi vandhu vari kutungamirira zvese, asi ivona vanovonerera basi zviya zvokuti Jehovha anovatendera kuti ivona vavonerere. Pikija zviro zvingavoneka inga kuti zvinonesa, asi iyena anozozvipeja.”

17. Kuitisa kudini vhesi yedu yo gore ro 2024 inozotibesera? (Vonanyi foto yo pakapa.)

¹⁷ Nyamasi uno kungawanika zviro zvizinji zvingatisiya tecithya. Asi inga ndi Dhavhidhi, itusu atidi kusiya kuti kuthya kutirembese. Vhesi yedu yo gore kuitira 2024 ndi mukumbiro wakaithwa ndi Dhavhidhi kuna Jehovha eciti: “Pa njiku yo ndinothya, ndinozogonda komuri.” (Nduyo 56:4) Bhuku rimweni rinobhuya ngo pamusoro po Bhaibheri rakananga kudari ngo pamusoro po vhesi iyi: “Dhavhidhi aacaigara ecirangarira ngo pamuso po zviro zvaizomuita kuti agare ecithya nee ngo pamusoro po zvineso zvake. Asi kunja kwa izvi, iyena wairangarira ngo pamusoro po wiya waizoviya kumubesera.” Rangariranyi ngo pamusoro po vhesi yedu yo gore pa mweji jinotevera maningi-ningi pamunonga mecihwisana no mugariro jinomuitisa kuti muthye. Psakanyi nguva kuti murangarire ngo zviro zvakapera kuithwa ndi Jehovha kare, zvaarikuita wari uno no zvaanozoita kumbejiyo. Inga ndi Dhavhidhi, imwimwi munozoti: “Kuna Mwari ndinogonda, andizothi.”—Nduyo 56:5.