Zvokadi kamare Jehovha anoda kuti vandhu vaviri vakarovorana vadakare no kuva no ushamwari wo cike ndi cikevo. (Mateu 19:4-6) Kudari munoda kucadha, mungamuwanisa kudini wokurovorana naye? Inga Musiki wedu, Jehovha anoziva zvatinodikana kuita kuti tive no mucadho unodakajisa. Ngokudaro, patinoshandisa ndhungamiriro jaanotipa, tinozovadi kamare no mudakaro. Vonanyi basi ndhungamiriro nganani jaanotipa.

Yokutanga, tinodikana kuzwisisa kuti: “Mwoyo unocengeja kupinda bzese, wakaxata kamare.” (Jeremia 17:9) Vandhu vaviri vanoda kucadha, povanosongana, votanga kunamorari, ivona vangakasika kuva no mazwiro akavanga umwe kuno umweni. Izvi pazvinoitika, zvinozonesa maningi kutema zvivaringo ngo ungwaru. Vandhu pavanotema civaringo co kuda kucadha, maningi-ningi vakacijikira pa mazwiro avanao, zvinozovaita kuti vasuruvare kumbejiyo. (Mazwi Akangwara 28:26) Ndizvona zvinoitisa kuti zvitame kuva zvo ungwaru kuti vandhu vaviri vacito vanasa kuzivana ushoni, vatange kunanga mazwiro avo o mukati kamare kana kutogondesana zviri zvese.

Mazwi Akangwara 22:3 inoti: “Muzivi anovona bzakaxata, wofindara; benji rinoenda mberi, rinotambujwa ndibzona.” Ngoyapi ngozi yaizovepo ngo kushandisa saiti jo mu interneti kuitira kunamorari? Zvinosuruvarisa ngo zvokuti, vandhu vamweni vanotanga kubhuya no vandhu vovacikazivi, votanga kunamorari, pejisire vozwisisa kuti mundhu wovainamorari waro naye, wainga ecivacengeja. Cimwenizve, vandhu vamweni vacikagondeki vanodira masoko o kunyepa ngo pamusoro pavo kuti vacengeje vandhu vamweni no kuvabira mare. Nguva jimweni, vandhu vanoitaro zviro zvakashata kudari, vanonanga kuti ivona ndi Zvapupu zva Jehovha.

Vonanyizve ngozi imweni yaizovepo. Saiti jimweni jinoshandiswa kuitira kunamorari, jinoshandisa porogarama yo komputadhori kuti vavone dangani vandhu vanodaro kunamorari vanofanera kana kuti haiwa. Asi, apana zvinovonesa kuti kushandisa zviro zvakadari kunoshanda. Waro, kunanga kuti zvaizova zvo ungwaru kuthemba vandhu vanoshandisa porogarama iji, kuti muteme civaringo cinosisira cakadari inga kuwana wo kucadha naye here? Kunanga kuti urongwa hwo mu komputadhori ungaezaniswa no ndhungamiriro jinowanika mu Bhaibheri here?—Mazwi Akangwara 1:7; 3:5-7.

 Ndhungamiriro inowanika pana Mazwi Akangwara 14:15, inoti: “Benji rinotenda bzese bzo rinozwa, mungwari anovonesesa gwanja rake.” Mucito mavona ari wese inga mundhu wamunoda kucadha naye, imwimwi munodikana kunasa kuziva mundhuwo. Asi amuzokwanisi kuita izvi ngo kushandisa saiti jo mu interneti kuitira kunamorari. Kunanga kuti munozonasa kuzivana ngo kutumirana foto kana kupeja mukuvo wakawanda mecibhuya mwese here? Vamweni vairangarira kuti vainga vawana rudo wokadi kadi, vakazosuruvara maningi ngo zvovakavona povakazivana no mundhu wiya hope ngo hope.

Mutari wo nduyo wakati: “Andigari pasi pamwepo no vanyepi, andifambi no vacengeji.” (Nduyo 26:4) Vandhu vazinji vanorangarira kuti apana cakashata kunanga masoko acikaripi o kadi, kuno mundhu wavari kunomorari naye ngo mu interneti kuti vavoneke inga mundhu waushoni. Ivona avakhombiji mugariro javo jakashata kana kuti mugariro jondhojo ajinasi kuvoneka pavanotumira mesajhi kuno vamweni. Pikija vandhu vamweni vanonanga kuti ivona ndi Zvapupu zva Jehovha, kunanga kuti ivona vakabhabhatijwadi kamare? Kunanga kuti ivona vano ushamwari wo phedo na Jehovha here? Kunanga kuti i vandhu vanoreremejwa mu ungano here? Vanoita zviro zvakashata kana kutova “ushamwari hwakashata” ku vamweni here? (1 VaKorinte 15:33; 2 Timoti 2:20, 21) Kunanga kuti ivona vanotendehwa kuti vacadhe mukuzwirana no zvinonanga Bhaibheri here? Imwimwi munodikana kuziva zviro zvese izvi. Asi zvinonesa maningi kuziva izvi mucikazivi kubhuya no vandhu vamweni vanonasa kumuziva. (Mazwi Akangwara 15:22) Zvokadi kamare, vashandiri vakagondeka va Jehovha avadikani kubatana no “vacikatendi pa kanga yondhoyo.”—2 VaKorinte 6:14; 1 VaKorinte 7:39.

Zvecivoneka kuti zvakashata maningi kushandisa saiti jo mu interneti kuti muwane mundhu wokunamorari naye, kuno manera akanakisisa omungashandisa kuti mukwanise kuzivana no mundhu wamungazocadha naye. Ngokwapi kwamungawana mudoni waushoni wamungazocadha naye? Potaikwanisa kuungana no hama jimweni pacina ciphingo ciri cese, taikwanisa kuzivana no hama jimweni patainga kumusongano jo ungano, magungano no musongano jimweni jotaiita.

Paya po kuti mugariro autitenderi kuti tiungane no hama jimweni, wakadari inga wo mutungu uwu wo koronavhiru, itusu tiri kushandisa foni, thabhureti no komputadhori kuti tiite musongano jedu jo ungano. Kondhoyo munozokwanisa kuziva hama kana hambzaji jicizivi kucadha. Imwimwi mungakwanisa kuvavona veciita hurukuru kana kutopa mupinguro. (1 Timoti 6:11, 12) Mungakwanisavo kubhuya no vamweni pakupera ko musongano, vandhu pavanopauhwa cikwata ngo cikwata. Pa musongano jatinoitari ngo cikwata no tiri ngo kanyi tecishandisa komputadhori, imwimwi mungakwanisa kuvona kuti mundhu wamunodakariraya anotajisa kudini vamweni no kutovona mugariro jake. (1 Pedhru 3:4) Pa kufamba ko nguva, munozonasa kumuziva no kuvona dangani iyena ano mugariro jakafanana no jenyu kana kuti haiwa. Cimwenizve, munozokwanisa kuvona dangani munofanera kucadha kana kuti haiwa.

Vaya vacikazivi kucadha pavanopsaka wokucadha naye mukuzwirana no ndhungamiriro jo Bhaibheri, ivona vanozova no mudakaro mu mucadho wavo. Mazwi Akangwara anoti: “Kuwana mwanakaji [kana mwamuna], ndikona kuwana kudakara; kuwana unyaxa hwa Tenji Mwari.”—Mazwi Akangwara 18:22.