1. Jehovha wakanangenyi Adhamu na Evha pavakandopera kushaisha? (Genesi 3:15)

 ADHAMU na Evha pavakandopera kushaisha, Jehovha wakananga ciporofita cakapa vetero ku mubarihwana wavo. Zvaakanangaro zvakatahwa pana Genesi 3:15.—Verenganyi.

2. Ngenyi ciporofita cinowanika pana Genesi 3:15, cinosisira maningi?

² Ciporofita ici, cinowanika mu bhuku rokutanga ro Bhaibheri. Asi zvinonangwa mu mabhuku ese o Bhaibheri zvinozwirana kamare no zvinonangwa mu ciporofita ici. Kudari inga uruji unobatanija huni jakawanda pamwepo, masoko anowanika pana Genesi 3:15 anobatanijavo mabhuku ese o Bhaibheri kuti anangire masoko amwe basi, masoko okuti, Mwari waizotuma mundhu kuti aviye kotiponesa no kuparaja Sathana no vaya vanomubesera. Aya anozova makomborero makuru kuno vese vanoda Jehovha.

3. Muvhunjo japi jatinozodavira pa jijo iyi?

³ Pa jijo iyi, tinozodavira muvhunjo mutatu ngo pamusoro po ciporodita cinowanika pana Genesi 3:15: Mbhaani vanonangwari mu ciporofita ici? Ciporofita ici cakakwanirisika kudini? Waro tinobesereka kudini ngo ciporofita ici?

4. Ndiyani “nyoka,” tinozvizivisa kudini?

⁴ Vanonangwari mu ciporofita cinowanika pana Genesi 3:14, 15, nga ava: “Nyoka” no “jinja” ro nyoka, “mwanakaji” no “jinja” ro mwanakaji. Bhaibheri rinotibesera kuziva umwe nga umwe wavo. * Wari ngatitange kubhuya ngo pamusoro po nyoka. Apa Jehovha aacaengepi ecibhuya no nyoka kamare, ngokuti aicaizozwisisa zvaainga ecinanga. Ngo kudaro, Jehovha  wainga ecibhuya no cisikwa cino uzivi. Ndiyani cisikwa ici? Apokaripsi 12:9 inonasa kupa mupinguro wakajeka. Iyona inonanga kuti “zinyoka rokutanga riya” ndi Sathana Dhiyabhu. Waro ndiyani mubarihwana wo nyoka?

5. Ndiyani mubarihwana wo nyoka?

⁵ Nguva jimweni Bhaibheri rinoshandisa gama ro kuti mubarihwana, recida kunangira mundhu anonasa kutevejera mundhu umweni zvodari inga kuti imwana wake. Ngo kudaro, mubarihwana wo nyoka uri kunangira ngirozi jese jicikazivi kugondeka no vandhu vanotevejera Sathana avo vanohwisana na Jehovha no kuhwisa vandhu vake. Inga muezaniso, ngirozi iji jicikazivi kugondeka jinobatanija ngirozi jiya jakasiyaya basa rajo kumatenga joviya pasi pano mu njiku ja Nowa. Kubatanijavo vandhu vaya vano mugariro jakaezana no ja baba wavo Dhiyabhu.—Genesi 6:1, 2; Johani 8:44; 1 Johani 5:19; Judha 6.

6. Ngenyi azvingaiti kuti “mwanakaji” anonangwari mu ciporofita ici ave Evha?

⁶ Wari ngatende tivone kuti “mwanakaji” anonangwari mu ciporofita ici ndiyani. Azvingaiti kuti mwanakaji uwu ave Evha. Ngenyi? Ngativone thangwe rimwe basi. Ciporofita ici cinonanga kuti mubarihwana wo mwanakaji ‘waizocangaja’ musoro wo nyoka. Inga zvatavona, nyoka ndi Sathana, uwo ari cisikwa co kumujimu. Kudari mwanakaji uwu ndi Evha, azvicaizokwanisika kuti mubarihwana wake ucangaje musoro wo nyoka. Waro Sathana waizoparajiswa kudini?

7. Mukuzwirana na Apokaripsi 12:1, 2, 5, 10, ndiyani mwanakaji anonangwari pana Genesi 3:15?

⁷ Bhuku rokupejisira ro Bhaibheri rinonanga kuti ndiyani mwanakaji uwu anonangwari pa Genesi 3:15. (Verenganyi Apokaripsi 12:1, 2, 5, 10.) Mwanakaji uwu asipi mundhu! Iyena ano mweji mu soka jake no majunguja  anokwana kuita gumi na maviri mu musoro mwake. Iyena anova no mwana umwes wakasiyana maningi kamare, Umambo hwa Mwari. Zvecivoneka kuti Umambo hwa Mwari uri kumatenga, tingagumavo pa mbhejiso yokuti mwanakaji uwu anogara kondhoyo. Iyena anoimirira divi ro kudenga ro sangano ra Jehovha, rakaumbhwa ngo ngirozi jakagondeka.—Vagaratiya 4:26.

8. Ndiyani mundhu wokutanga anoita divi ro mubarihwana wo mwanakaji? Izvi zvakaitika rini? (Genesi 22:15-18)

⁸ Bhaibheri rinotibeserazve kuziva mundhu wokutanga anoita divi ro mubarihwana wo mwanakaji uwu. Irona rinonangazve kuti mubarihwana uwu waizovha ku mbhuri ya Abhirahama. (Verenganyi Genesi 22:15-18.) Inga zvakaporofitwa, Jesu ndiyena mubarihwana wo mwanarume uwu wakagondeka. (Ruka 3:23, 34) Asi mubarihwana wo mwanakaji uwu waidikana kuva no simba rakakura maningi kuti akwanise kucangaja Sathana. Ngo iyo ndava, Jesu paakava no 30 o makore iyena wakazojwa ngo mujimu mucena wa Mwari. Pondhopo iyena wakava mundhu wokutanga anoita divi ro mubarihwana wo mwanakaji. (Vagaratiya 3:16) Jesu paakapera kufa no kumuswa, Mwari ‘wakamusimija junguja rinoreremejwa no kukuja’ perapo ‘wakapuwa simba rese mudenga no pasi.’ Kubatanijavo no simba ro ‘kuvhisa mabasa a Dhiyabhu.’—Vahebheru 2:7; Mateu 28:18; 1 Johani 3:8.

9-10. (a) Ndiyanizve anoita divi ro mubarihwana wo mwanakaji, ngopapi pavanotanga kuita divi ro mubarihwana uwu? (b) Ngozvapi zvatinoda kuvona kuvhira wari?

⁹ Kusiyapo Jesu basi variyovo vandhu vamweni vanoita divi ro mubarihwana wo mwanakaji. Mupostori Pauro wakananga kuti vese vokuzojwa vaizoita divi ro mubarihwana uwu. Iyena wakati: “Kudari muri vandhu va Kristu, muri mubarihwana wa Abhirahama kamare, munozowana utaka hwakagondeswa Abhirahama.” (Vagaratiya 3:28, 29) Jehovha paanozoja Mukristu ngo mujimu mucena, iyena anotanga kuita divi ro mubarihwana wo mwanakaji. Ngo kudaro, Jesu pamwepo no 144.000 vaanozotonga naye, vanoita divi ro mubarihwana wo mwanakaji. (Apokaripsi 14:1) Vese vanoita divi ro mubarihwana uwu, vanovangisira kuti varangarire inga manera anorangarira Baba wavo Jehovha Mwari.

¹⁰ Zvecivoneka kuti wari taziva kuti ndiyani anoita divi ro vaya vanonangwa mu ciporofita cinowanika pana Genesi 3:15, ngatende tivone kuti Jehovha ari kukwanirisa kudini ciporofita ici padoko ngo padoko no kuvona manera atingabesereka ndicona nyamasi uno.

11. Mu njira yapi mubarihwana wo mwanakaji wakarumwa pa “cisisinindho”?

¹¹ Mukuzwirana no ciporofita ciri pana Genesi 3:15, nyoka yaizoruma “cisisinindho” co mubarihwana wo mwanakaji. Divi iri ro ciporofita rakatanga kukwanirisika Sathana paakaita kuti Vajudha no Varoma, vauraye Mwana wa Mwari. (Ruka 23:13, 20-24) Mundhu paanokhuvazika pa cisisinindho, angatogara mukuvo wakati kuti acikakwanisi kufamba ushoni. Mukufananavo, Jesu wainga akafa ko njiku ndhatu zvoita kuti akonehwe kuita ciri cese pa mukuvo wakati kuti.—Mateu 16:21.

12. Musoro wo nyoka, unozocangajiswa kudini? Izvi zvinozoitika rini?

¹² Kuti ciporofita cinowanika pana Genesi 3:15 cikwanirisike, Jesu aacaidikana kwenderera mberi ari mu guva. Ngenyi? Ngokuti  mukuzwirana no ciporofita ici, mubarihwana wo mwanakaji waizocangaja musoro wo nyoka. Izvi zvinoreva kuti Jesu waidikana kuita nane pa cisisinindho caakarumwaya. Izvi ndizvona kamare zvakaitika. Pasure po njiku ndhatu naafa, Jesu wakamuswa inga cisikwa co mugore cicikafi. Pa nguva kwayo ya Jehovha, anozocangaja musoro wo nyoka. (Vahebheru 2:14) Jesu pamwepo no vo 144.000 vanozoparaja vavengi va Mwari vari pasi pano, avo vanoita divi ro mubarihwana wo nyoka.—Apokaripsi 17:14; 20:4, 10. *

13. Kukwanirisika ko ciporofita ici, kunotibeseresa kudini?

¹³ Kudari imwimwi muri mushandiri wakajipira wa Mwari, ciporofita ici ciri kumubesera maningi. Ciri kumubeseresa kudini? Jesu paakaviya pasi pano inga mundhu, iyena wakanasa kutevejera mugariro ja Baba wake. (Johani 14:9) Ngo kudaro, tikajija maningi ngo pamusoro pa Jesu, tinoguma pakuziva Jehovha Mwari no kumuda. Kusiyapo izvo, manera anojijisa Jesu no kutungamirira ungano nyamasi uno, zvinotibesera kamare. Jesu anotijijisa kuti tipone mu njira inodakajisa Jehovha. Cimwenizve, kufa ka Jesu kunoimirihwa ngo kurumwa pa cisisinindho, kunobesera itusu tese. Kuitisa kudini? Jesu paakamuswa, wakapa ngazi yake yakakwana kuti atisuke “ku zvishaishi zvese.”—1 Johani 1:7.

14. Kuitisa kudini ciporofita cakananga Jehovha mu munda wo Edheni, acizivi kukwanirisika pondhopo kamare? Sananguranyi.

¹⁴ Ciporofita caakananga Jehovha mu munda wo Edheni, caivonesa kuti acicaizokwanirisika mondhomo kamare. Ciporofita ici cinovonesa kuti mwanakaji waizova no mubarihwana, Sathana waizounganija vabeseri vake. Zvikwata zviviri izvi zvaizovengana maningi. Asi kuti izvi zvikwanirisike zvaizotora mukuvo wakati kuti. Kuzwisisa zvese zvinonangwa mu ciporofita ici, zvinozotibesera kuti tivone kuti taizovengwa ndi Sathana no nyika yake. Izvi ndizvona zvaakazonanga Jesu kuno vajiji vake. (Marko 13:13; Johani 17:14) Pacina kukana-kana, itusu tiri kukwanisa kuvona kukwanirisika co ciporofita ici, maningi-ningi mu mazana o makore aperari. Kuitisa kudini?

15. Ngenyi nyika iri kutivenga maningi? Asi ngenyi atidikani kuthya Sathana?

¹⁵ No papera mukuvo mushoma Jesu naagajwa inga Mambo mu gore ro 1914, Sathana wakagogomehwa kumatenga. Kuvhira pa mukuwo wondhowo, Sathana ari pasi pano ecivetera kuparajwa. (Apokaripsi 12:9, 12) Asi aazivi kutogaravo hake acikaiti ciri cese. Iyena wakanyangajwa ecihwisa vandhu va Mwari. (Apokaripsi 12:13, 17) Izvi ndizvona zvinoitisa kuti vandhu va Mwari vavengwe ngo nyika ino. Asi itusu atina thangwe rokuthya Sathana no vateveri vake. Kunasa kunanga, itusu tino mazwiro akafanana no ainga no mupostori Pauro, paakati: “Kudari Mwari ana itusu, ndiyani angazohwisana na itusu?” (Varoma 8:31) Tinothemba maningi Jehovha, ngokuti iyena ari kukwanirisa zvese zvaakananga pana Genesi 3:15.

16-18. Ciporofita cinowanika pana Genesi 3:15, cakabesera kudini hama Kutis, hambzaji Ursura na hambzaji Jhesika?

¹⁶ Ciporofita ca Jehovha cinowanika pana Genesi 3:15, cingatibesera kuti tihwisane no zvineso zvatinosongana nazvo njiku no njiku. Hama imweni inodanwa Kutis inoshanda inga misiyonariyo ku nyika yo Gwamu, yakati: “Pa vhaza imweni ndakasongana no zvineso zvakaeja kugondeka kwangu  kuna Jehovha. Asi kurangarijisisa ciporofita cinowanika pana Genesi 3:15, kwakandibesera kuti ndienderere mberi ndecithemba Baba wangu vo kudenga.” Hama Kutis vari kuvetera mukuvo wokuti Jehovha anozopeja zvineso zvedu zvese.

¹⁷ Hambzaji imweni inogara ku Aremanya inodanwa Ursura, yakananga kuti kuzwisisa ciporofita cinowanika pana Genesi 3:15, kwakaibesera kuti ithembe kuti Bhaibheri rakafemehwa ndi Mwari. Iyona, yakavona kuti zviporofita zvimweni zvese zvinonangwa mu Bhaibheri, zvinozwirana no ciporofita ici. Izvi zvakaishamaisa maningi kamare. Iyona yakanangazve kudari: “Pandakajija kuti Jehovha wakaita ciri cese ngo kukasika kuti atipe vetero, zvakandiita kuti ndimude maningi.”

¹⁸ Hambzaji imweni yo ku Mikroneziya inodanwa Jhesika, yakati: “Ndicaceukija manera ondakajizwa pondakazwisisa kuti ndainga ndawana cokwadi. Ciporofita cinowanika pana Genesi 3:15, cainga cecikwanirisika. Kurangarira izvi, kunondibesera kuceukija kuti atito tawana upenyu hwokadi. Ciporofita ici cinovangisa kuthemba kwangu kuti kushandira Jehovha iciro caushoni maningi catingaita wari no kutipa vetero yo kuzova no upenyu unodakajisa kumbejiyo.”

19. Ngenyi tingava no cokwadi cokuti divi ro kupejisira ro ciporofita ici, rinozokwanirisika?

¹⁹ Inga zvatavona, ciporofita cinowanika pana Genesi 3:15, ciri kukwanirisika mbhera na nyamasi uno. Wari, taakunasa kuziva kuti ndiyani mubarihwana wo mwanakaji no wo nyoka. Jesu uwo ari mubarihwana wokutanga wo mwanakaji, waita nane pa cisisinindho caakarumwaya. Wari, iyena waamambo anosimba no acikafi. Jehovha wasana vazinji vanozotonga na iyena kumatenga. Zvecivoneka kuti divi rokutanga ro ciporofita ici rapera kukwanirisika, tinothemba kamare kuti divi rokupejisira rinozokwanirisikavo. Pacina kukana-kana, musoro wo nyoka unozocangajwa. Vashandiri vese va Jehovha vanozodakara pavanozovona Sathana wapera kuparajwa. Asi nguva iyi icito yaguma, mucadoremba. Thembanyi Jehovha. Ivanyi no cokwadi cokuti iyena anozoshandisa mubarihwana wo mwanakaji kuti uviise makomborero ku “majinja ese o nyika.”—Genesi 22:18.