1. Jehovha anodenyi nyamasi uno?

 NYAMASI uno Jehovha anoda kuti masoko akanaka acumaehwe pasi pese. (Marko 13:10; 1 Timoti 2:3, 4) Iri ibasa ra Jehovha, irona rinosisira maningi kwaari zvokuti wakatosana Mwana wake kuti aritungamirire. Tingava no cokwadi co kuti tecitungamirihwa ndi Jesu, basa ro kucumaera rinoitwa inga manera Jehovha anoda, mugumo ucito waviya.—Mateu 24:14.

2. Zvicinyi zvatinozovona pa musoro uwu?

² Pa musoro uwu, tinozovona kuti Jesu ari kushandisa kudini “muranda wakagondeka no wakangwara” kuti ape zvokuha kuno vajiji vake no kuvabesera kuronga basa ro kucumaera riri kuitwa pasi pese. (Mateu 24:45) Tinozovonazve kuti zvicinyi zvatingaita kuti tibesere Jesu no muranda wakagondeka no wakangwara.

3. Jesu wakapuwa simba rokuitenyi?

³ Zvicinyi zvinotikhohwesa kuti Jesu ari kutungamirira basa ro kucumaera? Acito ahwirira kudenga iyena wakasongana no vajiji vake vakagondeka pa dundhu ro Garireya. Iyena wakavavhunja kudari: “Ndakapuwa simba rese mudenga no pasi.” Vonanyi basi zvaakazonanga: “Ngo kudaro, endanyi, jijisanyi vandhu vo majinja ese kuti vave vateveri vangu.” (Mateu 28:18, 19) Ngo kudaro, Simba raakapuwari raibatanijavo kutungamirira basa ro kucumaera.

4. Ngenyi tingava no cokwadi co kuti Jesu aciri kutungamirira basa ro kucumaera?

⁴ Jesu wakagondesa kuti basa ro kucumaera no kubesera  vandhu kuti vave vajiji, raizoitwa ku “majinja ese.” Iyena wakatovhunjavo vajiji vake kuti waizova naivona njiku jese “mbhera pa kupera ko nyika.” (Mateu 28:20) Magama aya a Jesu aivonesa kuti iyena waizotungamirira basa ro kucumaera mbhera njiku jedu jino.

5. Tingaitisa kudini divi redu pa kukwanirisa ciporofita cinowanika pana Nduyo 110:3?

⁵ Jesu wainga no cokwadi co kuti mu njiku jo kupejisira kwaizova no vandhu vakawanda vaizoita basa ro kucumaera. Waiziva kuti magama akatahwa ngo mutari wo nduyo okuti, ‘vandhu vako vanozozvipira ngo mwoyo wese pa njiku yenyu yo hondo’ aizokwanirisika. (Nduyo 110:3, Sandujo yo Nyika Imbza) Kudari imwimwi muri kucumaera masoko akanaka, muri kubesera Jesu pamwepo no muranda wakagondeka no wakangwara. Cimwenizve, muri kubesera pa kukwanirisa ciporofita ici. Asi pamunonga meciita basa iri munosongana no zvineso.

6. Cineso capi catiri kusongana naco nyamasi uno?

⁶ Cineso cimwe catinosongana naco, ikuteverehwa. Vapanduki, vatungamiriri vo zviyara pamwepo no vatungamiriri vo zvo puritika, vanondhandhanisa manyepo ngo pamusoro po basa redu. Zvingaita kuti ukama, shamwari jo kubasa kana vandhu vamweni vatinoziva vanoguma pa kutenda manyepo aya, vototivangirija kuti tisiye kushandira Jehovha no kucumaera. Mu nyika jimweni, vandhu vanotevereraya hama no hambzaji jedu, vanovathyisijira, kuvataka no kuvadira mu kadheya. Izvo azvitikahamaji. Jesu wakati: “Munozonyenywa ngo majinja ese ngo ndava yo zina rangu.” (Mateu 24:9) Kunasa kunanga, zviro zvese zviri kuitikari zvinovonesa kuti itusu tiri vandhu vanotendehwa ndi Jehovha. (Mateu 5:11, 12) Sathana ndiyena ari kuitisari kuti titeverehwe ngo njira yakadari. Asi Jesu ano simba rakakura maningi kupinda rake. Ngo besero ra Jesu, masoko akanaka ari kucumaehwa ku majinja ese. Ngatitende tivone zviro zvinganani zvinovonesa zvondhozvo.

7. Ngozvapi zvinovonesa kuti Apokaripsi 14:6, 7, iri kukwanirisika?

⁷ Zvecivoneka kuti mu nyika munobhuiwa ndumi jakawanda, kucumaera kuno vandhu vese, icineso. Ecishandisa mupostori Johani, Jesu wakananga kuti mu njiku jedu jino, masoko akanaka aizocumaehwa pikija no cineso ici. (Verenganyi Apokaripsi 14:6, 7.) Izvi zviri kukwanirisika kudini? Nyamasi uno, masoko akanaka ari kucumaehwa mu nyika jakawanda no mu ndumi jakawanda. Inga muezaniso, mu saiti yedu vandhu vangaverenga mabhuku akacijikira mu Bhaibheri mu ndumi jinodarika 1000. Cimwenizve, bhuku redu ratinoshandisa pa kujijisa vandhu Mungadakara Kwenda no Kwenda, rakasandujwa mu ndumi jinodakarika 700. Kusiyapo zvondhozvo, kuno mavhidhiyo kuitira vandhu vacikazwi no mabhuku o Cibharairi kuitira mapofu. “Vandhu vo majinja no vo ndumi jese” vari kujijira kubhuya ‘ndumi yakacena’ kana kuti vari kujijira zvokadi zvo Bhaibheri. (Zakaria 8:23; Sofonia 3:9, Sandujo yo Nyika Imbza) Itusu tino cidakajiso co kuvona zviporofita zvakadari inga izvi zvecikwanirisika. Zvese izvi zviri kuitwa tecitungamirihwa ngo mutungamiriri wedu Jesu Kristu.

8. Basa ro kucumaera riri kuva no muviyo wapi?

⁸ Nyamasi uno, zviuru zvinopindirija zvisere zvo vandhu mu nyika jinokwana kuita 240 vanoita divi ro sangano ra Jehovha. Pa gore rimwe nga rimwe mamiriyoni o vandhu anobhabhatijwa. Asi cinosisira maningi kupinda kuengejeka uku, ngo cokuti vari kuvangisira kuti vasimire “undhu hupsa.” Kana kuti ivona vano mugariro jo umwari. (Vakorose 3: 8-10) Vazinji vakasiya kuva no mufambiro wakashata, kuva maphanga pomwe no kuva no mukheto. Ciporofita cinowanika pana Isaia 2:4 ciri kukwanirisika. Vandhu va Jehovha avacaripi ‘kujijirazve kuita hondo.’ Patinovangisira kuti tisimire undhu hupsa, tinobesera kuti vandhu vaviye mu sangano ra Jehovha. Tinovonesazve kuti tiri kutevera mutungamiriri wedu Jesu Kristu. (Johani 13:35; 1 Pedhru 2:12) Izvi azviripi kuitikavo zvega hazvo. Jesu ndiyena ari kupa besero rese ratinoda.

9. Mukuzwirana na Mateu 24:45-47, Jesu wakananga kuti waizoitenyi mu njiku jokupejisira?

⁹ Verenganyi Mateu 24:45-47. Jesu wakananga kuti mu njiku jo jokupejisira, iyena waizogaja “muranda wakagondeka no wakangwara” kuti upe zvokuha zvoumwari ku vandhu va Mwari. Ngo kudaro, tingatoguma pa mbhejiso yokuti muranda uwu ari kushanda maningi nyamasi uno. Izvo ndizvona zviri kuitika kamare. Mutungamiriri wedu Jesu ari kushandisa cikwata cidokowane co vanarume vakazojwa, kuti ape zvokuha zvoumwari pa “nguva kwayo” kuno vandhu va Mwari no kuno vamweni vanokhombija kudakarira masoko akanaka. Vanarume ava avajivoni inga kuti iveno vo rutendo hwo vamweni. (2 Vakorinte 1:24) Kusiyapo zvondhozvo, ivona vanoziva kuti Jesu Kristu ndiyena “mutungamiriri no mutongi” wo vandhu vake.—Isaia 55:4.

10. Bhuku rapi rinovoneswa pa foto rakamubesera kuti mujije cokwadi?

¹⁰ Kuvhira mu gore ro 1919, muranda wakagondeka uri kubudisa mabhuku akawanda kuti ubesere vandhu vanokhombija kudakarira kuti vajiji cokwadi ciri mu Bhaibheri. Mu gore ro 1921, kwakabudiswa bhuku raizwi A Harpa de Deus. Irona rakabesera vandhu vakawanda kuti vajiji zvokadi zvinosisira zvo  Bhaibheri. Pa kufamba ko makore kwakabudiswavo mabhuku amweni. Ibhuku rapi rakamubesera kuziva no kuda Jehovha? Kunanga kuti ibhuku “Seja Deus Verdadeiro,” A Verdade Que Conduz à Vida Eterna, Poderá Viver Para Sempre no Paraíso na Terra, Zivo Inotungamirira Kuupenyu Husingaperi, Bhaibheri Rinojijisenyi Kamare?, Bhaibheri Ringatijijisenyi?, kana kuti bhuku redu imbza Mungadakara Kwenda no Kwenda! Mabhuku ese aya akatibesera kuti tijijise vandhu cokwadi. Cimwenizve, akanasa kushanda kamare pa mukuvo oakavhiswaro.

11. Ngenyi zvinosisira maningi kwenderera mberi tecijija ngo pamusoro pa Jehovha?

¹¹ Asi asipi vapsa basi mu cokwadi vanoda zvokuha zvo umwari. Itusu tese tinozvida. Mupostori Pauro wakatara kudari: “Zvokuha zvakavanga ngo zvo vandhu vakura.” Pauro wakananga kuti kushandisa zvatinojija mu Bhaibheri kunotibeseravo “kusiyanisa zvakanaka no zvakashata.” (Vahebheru 5:14) Azvizivi kureruka kuita zvinoda Jehovha nyamasi uno, ngokuti vandhu vari kuita zviro zvakashatisisa kamare. Asi Jesu anonasa kutitaja ngo kutipa zvokuha zvinoita kuti tive no rutendo hwakavanga. Iyena anoshandisa muranda wakagondeka kuti unasirire no kupa zvokuha izvi zvakacijikira mu Bhaibheri.

12. Tinokhombijsa kudini kuti tinoreremeja zina ra Mwari inga ndi Jesu?

¹² Inga ndi Jesu, itusu tinoreremeja maningi zina ra Mwari. (Johani 17:6, 26) Inga muezaniso, mu gore ro 1931 itusu takatanga kushandisa zina rinowanika mu Bhaibheri rokuti, Zvapupu zva Jehohva. Takaita zvondhozvo ngokuti tinoda kuzivika ngo zina ra Jehovha no kumukuja. (Isaia 43:10-12) Kuvhira mu mweji wa Outubro wo gore rondhoro, zina ra Jehovha rinoviya rakatahwa pa kapa yo revhista Murindiri. Kusiyapo zvondhozvo, magerejha amweni paanoenderera mberi ecivhisa zina ra Jehovha mu sandujo javo jo  Bhaibheri, Sandujo yo Nyika Imbza inoshandisa zina ra Jehovha mu ndau jese jarinowanika mu matahwa okutanga.

13. Zvicinyi zvinomukhohwesa kuti Jesu ari kushandisa “muranda wakagondeka no wakangwara” nyamasi uno? (Johani 6:68)

¹³ Jesu ari kushandisa “muranda wakagondeka no wakangwara” kuti aumbe pasi pano, sangano rinomusijira kunamata kwakacena. Munojizwa kudini ngo kuita divi ro sangano iri? Mungatoceukija magama a Pedhru, okuti: “Mambo, tingaendazve kuna ani? Imwimwi ndimwi muno masoko o upenyu hucikaperi.” (Johani 6:68) Munokwanisa kurangarira kuti maizova kwapi, kudari nomucainga mu sangano ra Jehovha? Jesu anoshandisa sangano iri kuti atipe zvokuha zvoumwari no kutijijisa kuti tinase kuita basa ro kucumaera. Kusiyapo zvondhozvo, anotibesera kuti tive no “undhu hupsa” kuti tidakajise Jehovha.—Vaefeso 4:24.

14. Ndhungamiriro jatinoashira kuvha ku sangano ra Jehovha pa mukuvo uno wo mutungu wo koronavhiru, jiri kutibeseresa kudini?

¹⁴ Jesu anopa ndhungamiriro jatinoda pa mukuvo wokunesa. Izvi zvakanasa kuvoneka mutungu wo koronavhiru powakatanga. Pa mukuvo wokuti vandhu vazinji avacaizviziva zvokuita, Jesu wakatipa ndhungamiriro ecishandisa sangano rake. Takavhunjwa kuti tinodikana kusimira maskara panonga pakawanda vandhu no kugara ndhambo na ndhambo. Vakuru vakavhunjwa kuti vaidikana kugara mukuvo wese vecibhuya no vacumaeri vo ungano no kuvona manera ovangavabesera ndiwona pa zvese zvavanoda. (Isaia 32:1, 2) Kusiyapo zvondhozvo, takaashirazve ndhungamiriro no vangiso ngo masoko mapsa o Mukhumbi Unotonga.

15. Ndhungamiriro japi jatiri kuashira mu mukuvo uno wo mutungu ngo pamusoro po manera okuita musongano no kucumaera? Ngowapi uri kuva muviyo wakona?

 ¹⁵ Pa mukuvo uno wo mutungu, takaashiravo ndhungamiriro ngo pamusoro po manera okwenderera mberi teciita musongano no kucumaera. Ngo kukasika, takatanga kuita musongano jedu no magungano tecishandisa zoom. Takatangavo kucumaera tecishandisa foni no kutara karata. Jehovha ari kukomborera maningi kuvangisira kwatiri kuitari. Mabheteri akawanda ari kuripota kuti vacumaeri vari kuengejeka maningi. Hama zinji jiri kunasa kubudirira pa kuita basa iri.—Vonanyi bhokiso rinoti: “ Jehovha Ari Kukomborera Basa Redu ro Kucumaera.”

16. Tingava no cokwadi cenyi?

¹⁶ Vamweni vangatorangarira kuti sangano riri kunyanyisa maningi pa ndhungamiriro jariri kupa pa mukuvo uno. Asi zviri kunasa kujeka kuti ndhungamiriro jatiri kupuwa ngo jo ungwaru. (Mateu 11:19) Patinorangarira manera Jesu ari kutungamirira vandhu vake, tingatova no cokwadi co kuti azvinenyi kuti ngozvapi zvinozoitika kumbejiyo, Jehovha pamwepo no Mwana wake anodiwa vanozova nesu.—Verenganyi Vahebheru 13:5, 6.

17. Munojizwa kudini ngo kuva na Jesu inga mutungamiriri wenyu?

¹⁷ Tinodakara maningi ngo kuva na Jesu inga mutungamiriri wedu. Itusu tinoita divi ro sangano rakabatana, azvinenyi no zvirovejeso zvedu, kwatinovha no ndumi yatinobhuya. Tino zvese zvatinoda ku divi ro umwari no kupuwa ndhungamiriro kuti tiite basa ro kucumaera. Tese tiri kujijiswa kuva no undhu hupsa no kudisana ngocedu. Pacina kukana-kana, tinodakara maningi ngo kuva na Jesu inga mutungamiriri wedu.