MUSORO WO KUJIJA WO 31
Reremejanyi Cidakajiso Cenyu co Kuita Mukumbiro
“Munamato wangu ngaukhwire inga rubani pambeji penyu.” —NDUYO 141:2.
NDUMBO 47 Kumbiranyi Jehovha Njiku ngo Njiku
ZVATICAJIJA *
1. Tinodikana kuvona kudini mukana watinawo wokuita mukumbiro kuna Jehovha?
ITUSU tino cidakajiso cakakura maningi, kuita mukumbiro ku mundhu wakaita denga no nyika. Amborangariranyi basi: Tingabhuya zvese zvatinoda mu mukumbiro pa nguva iri yese, mu ndumi iri yese, ticikadikani kuamba kukumbira kutendehwa kuti tiite zvondhozvo. Tingaita mukumbiro kwaari azvinenyi dangani tiri kushipitari kana mukadheya, tecithemba kuti Baba wedu vano rudo vanozotipurukira. Tinobonga maningi ngo cipo ici.
2. Mambo Dhavhidhi wakakhombijisa kudini kuti waireremeja cidakajiso co kuita mukumbiro?
2 Mambo Dhavhidhi waireremeja maningi cidakajiso co kuita mukumbiro. Iyena wakaimba kudari: “Munamato wangu ngaukhwire inga rubani pambeji penyu.” (Nduyo 141:1, 2) Mu nguva ja Mambo Dhavhidhi, rubani waishandiswa kuitira kunamata ko cokwadi ngo vapiri mu themberi, wainasirihwa ngo kungwarira kwese. (Exodo 30:34, 35) Dhavhidhi waidikana kunasa kurangarira zvaaida kunanga mu mukumbiro kuna Jehovha, kudari inga vapiri vainasa kungwarira pa kunasirira rubani. Izvo ndizvonavo zvatinodikana kuita. Tinoda kuti mukumbiro jedu jidakajise Jehovha.
3. Patinoita mukumbiro kuna Jehovha tinodikana kuzviita ngo njira yapi? Ngenyi?
3 Patinoita mukumbiro kuna Jehovha, tinodikana kuzviita ngo nderemejo. Amborangariranyi basi zvivoniso zvakavona Isaya, Ezekieri, Dhanyeri na Johani. Zvivoniso izvi zvainga zvakasiyana asi zvainga zvino mativi amweni akaezana. Vese vakavona kuti Jehovha wainga pa ndau inoshamaisa. Isaya wakavona Jehovha “akagara pa dendemaro rakakhwira no rakareba.” (Isaia 6:1-3) Ezekieri wakavona Jehovha wakagara pa karu yake kudenga, wakatendenejwa ngo ‘ruvheneko . . . waiezana no murarabungu.’ (Ezekieli 1:26-28) Dhanyeri wakavona “Doda” rakasimira nguvo jakacena, dendemaro raro rainga ro murazvu wo muriro. (Danieli 7:9, 10) Johani wakavona Jehovha wakagara pa dendemaro rakatendenejwa ngo zviro zvakadari inga uta wa humbe waitojana no esmerardha. (Apokaripsi 4:2-4) Patinorangarira ngo pamusoro po goja ricikaezaniswi rina Jehovha, tinoceukija kuti tinodikana kuita mukumbiro kwaari ngo nderemejo.
“MUNODIKANA KUKUMBIRA KUDARI”
4. Tinojijenyi ngo magama okutanga anowanika pa mukumbiro wo kuezanisira uri pana Mateu 6:9, 10?
4 Verenganyi Mateu 6:9, 10. Pa hurukuro yo pa dundhu, Jesu wakajijisa vajiji vake manera ovaidikana kuita mukumbiro mu njira inodakajisa Mwari. Pakupera kunanga kuti “munodikana kukumbira kudari,” Jesu wakatanga kundandanisa zviro zvinozwirana kamare no cidisiso ca Jehovha. Zvakadari inga kucenesa zina ra Mwari, kuviya ko Umambo, uwo unozopeja vavengi vese va Mwari pomwe no makomborero aairangarira kuitira nyika no vandhu. Ngo kunanga zviro izvi mu mukumbiro jedu, tinokhombija kuti cidisiso ca Mwari cinosisira maningi kwatiri.
5. Kureva kuti zvakashata kukumbira zviro zvatinoda?
5 Pa divi rocipiri ro mukumbiro uwu, Jesu wakakhombija kuti azvizivi kushata kuita mukumbiro ngo pamusoro po zviro zvatinoda. Tingakumbira kuti Jehovha atipe zvokuha zvo njiku no njiku, kuti atiregerere zvishaishi zvedu, kuti atijivirire pa muejo jatinosongana najo no kutiponesa mu nyara jo wakashata. (Mateu 6:11-13) Patinokumbira Jehovha zviro izvi, tinokhombija kuti itusu tinoziva kuti tinoda besero rake nokutizve tinoda kumudakajisa.
Mwamuna vanganangenyi pavanonga veciita mukumbiro no mukaji wavo? (Vonanyi ndima 6) *
6. Patinonga teciita mukumbiro tinodikana basi kunanga zviro zviri pa mukumbiro wokuezanisira? Durujiranyi.
6 Jesu aacaivetera kuti vajiji vake vatevere kamare magama ese ari pa mukumbiro wo kuezanisira. Pa mukumbiro jimweni jaakaita, iyena wakananga zviro zvaaida pa nguva yondhoyo. (Mateu 26:39, 42; Johani 17:1-26) Mukufananavo, tingatoitavo mukumbiro ngo pamusoro po zviro zvinotithimwathimwisa. Patinoda kutema zvivaringo, tingaita mukumbiro tecikumbira uzivi. (Nduyo 119:33, 34) Patinoda kutanga kuita basa rinonesa, tingakumbira Jehovha kuti atibesere kuzwisisa manera okuriita. (Mazwi Akangwara 2:6) Vabari vangakumbirira vana vavo. Vana vangakumbirira vabari vavo. Cimwenizve, tese hedu tinodikana kuita mukumbiro ngo pamusoro po vajiji vedu vo Bhaibheri no vaya vatinocumaera. Asi patinoita mukumbiro atidikani kukumbira basi kuti Jehovha atibesere.
Ngenyi tinodikana kukuja no kubonga Jehovha mu mukumbiro jedu? (Vonanyi ndima 7-9) *
7. Ngenyi tinodikana kukuja Jehovha mu mukumbiro jedu?
7 Tinodikana kuceukija kukuja Jehovha patinoita mukumbiro jedu. Apana mundhu umweni anofanera kukujwa kupinda Jehovha. Iyena ‘wakanaka no anokungurira.’ Iyenazve ano ‘unyaxa no usizi, anononoka kuceneka, wakazara ngo rudo no ugondeki.’ (Nduyo 86:5, 15) Pacina kukana-kana, tina thangwe raushoni ro kukuja Jehovha ngo zviya zvaari no zvaanotiitira.
8. Ngozvapi zviro zvinganani zvatinazvo zvinotiita kuti tibonge Jehovha? (Nduyo 104:12-15, 24)
8 Kusiyapo basi kukuja Jehovha mu mukumbiro jedu, tinodikana kumubonga ngo zviro zvinoshamaisa zvaanotipa. Inga muezaniso, tingamubonga ngo kori jinoshamaisa jatinovona mu mafirori, zvokuha zvakawanda zvinonaka pomwe no shamwari jaushoni jatinajo. Baba wedu vano rudo vanotipa zvese izvi kuti tidakajihwe. (Verenganyi Nduyo 104:12-15, 24.) Kusiyapo kubonga Jehovha ngo ndava yo zvese izvi, tinodikana kumubonga ngokuti anotipa zvokuha zvo umwari pamwepo no vetero inoshamaisa kuitira kumbeji.
9. Zvicinyi zvingatibesera kuceukija kubonga Jehovha? (1 Vatesaronika 5:17, 18)
9 Zvakareruka maningi kukanganwa kubonga Jehovha ngo zvese zvakanaka zvaanotiitira. Waro, zvicinyi zvingamubesera kubonga Jehovha? Mungaita rista yo zviro zvomakakumbira, nguva ngo nguva mosota kuti muvone manera Jehovha wadavira zvomakakumbiraya. Perapo, moita mukumbiro mecimubonga ngo besero raakamupa. (Verenganyi 1 Vatesaronika 5:17, 18.) Amborangariranyi izvi basi: Itusu tinodakara maningi no kujizwa kuti tinodiwa paya patinobongwa ngo vamweni. Mukufananavo, patinoceukija kubonga Jehovha ngo kudavira mukumbiro jedu, iyena anodakaravo maningi. (Vakorose 3:15) Asi pano ciro cimweni cinosisira cinotiita kuti tibonge Jehovha.
BONGANYI JEHOVHA NGO MWANA WAKE ANODIWA
10. Mukuzwirana na 1 Pedhru 2:21, ngenyi tino thangwe ro kubonga Jehovha ngo kutumira Jesu kuti aviye pasi pano?
10 Verenganyi 1 Pedhru 2:21. Tinodikana kubonga Jehovha ngo kutumira mwana wake anodiwa kuti aviye kotijijisa. Tinojija zvakawanda maningi ngo pamusoro pa Jehovha no manera okumudakajisa ngo kujija ngo pamusoro po upenyu hwa Jesu. Kudari tikakhombija rutendo ku muripo wa Jesu, tinova no ushamwari wo phedo na Jehovha Mwari no kuva no runyararo naye.—Varoma 5:1.
11. Ngenyi tinoita mukumbiro ngo zina ra Jesu?
11 Tingabonga Jehovha ngokuti tingaita mukumbiro ngo zina ro Mwana wake. Jehovha anoshandisa Jesu kuti adavire mukumbiro jedu. Iyena anopurukira no kudavira mukumbiro jatinoita ngo zina ra Jesu. Jesu wakati: “Ciri cese camunokumbira ngo zina rangu, ndinozociita, kuti Baba vakujwe ngo ndava yo Mwana.”—Johani 14:13, 14.
12. Ngorapi thangwe rimweni ratinaro rinotiita kuti tibonge Jehovha ngo Mwana wake?
12 Jehovha anoregerera zvishaishi zvedu ecishandisa muripo wa Jesu. Bhaibheri rinosanangura Jesu inga “mupiri mukuru [wedu] . . . wakagara pa mukono muho wo cigaro ca Mambo kumatenga.” (Vahebheru 8:1) Jesu ndi “mubeseri [wedu] ari pamwepo na Baba.” (1 Johani 2:1) Tinobonga maningi Jehovha ngo kutipa Mupiri Mukuru wakanaka, anozwisisa kurembejeka kwedu, uwo arizve “muimiriri wedu.” (Varoma 8:34; Vahebheru 4:15) Zvecivoneka kuti atizivi kukwana, aticaizokwanisa kuita mukumbiro kuna Jehovha pacina besero ro muripo wa Jesu. Pacina kukana-kana, imwimwi munotenda kuti itusu atingakwanisi kubonga Jehovha mukuperera ngo cipo caakatipa co Mwana wake anodiwa.
KUMBIRIRANYI HAMA NO HAMBZAJI JENYU
13. Pa usiku acito afa, Jesu wakakhombijisa kudini kuti waida maningi vajiji vake?
13 Pa usiku acito afa, Jesu wakapeja mukuvo wakareba eciita mukumbiro ngo pamusoro po vajiji vake. Iyena wakakumbira Baba wake kudari: ‘Vavonererenyi ngo ndava yo mushati.’ (Johani 17:15) Izvi zvakakhombija kuti Jesu waivada maningi. Pikija iyena waiziva kuti waizotambujika mu njira yakashata maningi, wakaenderera mberi ecineseka ngo pamusoro po vapostori vake.
Ngenyi tinodikana kukumbirira hama no hambzaji jedu?(Vonanyi ndima 14-16) *
14. Tingakhombijisa kudini kuti tinoda hama no hambzaji jedu?
14 Mukutevejera Jesu, itusu atibatikani basi pa zviya zvatinoda. Mukusiyana, tinoita mukumbiro njiku jese kuitira hama no hambzaji jedu. Patinoita zvondhozvo, tinonga tecizwira mupango wa Jesu wokudisana ngocedu no kukhombija Jehovha kuti tinoda maningi hama no hambzaji jedu. (Johani 13:34) Kuitira mukumbiro hama no hambzaji jedu zvinovabesera maningi. Soko ra Mwari rinotivhunja kudari: “Mukumbiro wo mururami uno simba guru.”—Jakobo 5:16.
15. Ngenyi hama no hambzaji jedu jinoda kuti tijiitire mukumbiro?
15 Hama no hambzaji jedu jinoda kuti tijiitire mukumbiro ngokuti jiri kusongana no zvineso zvakawanda. Tingakumbira Jehovha kuti avabesere kucungirira pavanohwaja, pavanosongana no ngozi jinoitika jega, hondo, kuteverehwa pomwe no zvineso zvimweni. Tingatoitiravo mukumbiro hama no hambzaji jinoshanda ngo simba kuti jibesere vamweni. Kangaije munotoziva vamweni vari kusongana no zvineso zvakadari. Madini kuvananga ngo mazina pa mukumbiro jenyu? Tinokhombija kuti tinoda hama jedu ngo kukumbira kuti Jehovha avabesere kucungirira.
16. Ngenyi tinodikana kuitira mukumbiro hama jinotitungamirira?
16 Vaya vanotungamirira mu ungano vanobongesera maningi ngo mukumbiro jatinovaitira ngokuti jinovabesera. Mupostori Pauro waizviziva kuti iyena waidavo kuitihwa mukumbiro ngo vamweni. Iyena wakatara kudari: “Ndiitirenyivo mukumbiro, kuti ndipuwe masoko o kunanga pandinofunungura muromo, kuti ndikwanise kuvereketa ngo kucunga pa kuzivisa cakafisika ca Mwari co masoko akanaka.” (Vaefeso 6:19) Nyamasi unovo tino hama jakawanda jinoshanda ngo simba pakutitungamirira. Tinokhombija kuti tinojida ngo kukumbira kuti Jehovha akomborere basa ravanoita.
PATINOITA MUKUMBIRO PAMBERI PO VAMWENI
17-18. Ngopapi patingakumbihwa kuti tiite mukumbiro pamberi po vamweni, ngozvapi zvatinodikana kuceukija?
17 Nguva jimweni, tingatokumbihwa kuti tiite mukumbiro pamberi po vamweni. Inga muezaniso, hambzaji iri kuitisa jijo yo Bhaibheri ingakumbira hambzaji iri kuiperekeja kuti iite mukumbiro. Zvingaita kuti hambzaji iri kuperekejaro hambzaji imweni ainasi kuziva ushoni mujijiwo, ngo kudaro, ingakheta kuita mukumbiro wokupejisira. Ngo kuita kudaro, iyona inozoziva zvokunanga pa mukumbiro uwu.
18 Hama ingakumbihwa kuita mukumbiro pa musongano wo basa ro kucumaera kana pa musongano jo ungano. Hama jinoitari mukumbiro, jinodikana kuceukija cinangwa co musongano. Mukuvo wo kuita mukumbiro audikani kushandiswa kuitira kupangira ungano kana kuita zviziviso. Pa musongano jese jo ungano, museswa mushanu jokutanga, jakadihwa kuitira ndumbo no mukumbiro. Ngo kudaro, hama inonga yeciita mukumbiro aidikani kushandisa “magama akawanda,” maningi-ningi pa mukumbiro wokutanga.—Mateu 6:7.
VONANYI MUKUMBIRO KUVA CIRO CINOSISIRA MU UPENYU HWENYU
19. Zvicinyi zvinozotibesera kuti tive takanasiririka njiku yo rutongeso ya Jehovha painonga yecikhwedera?
19 Tinodikana kuvona mukumbiro kuva ciro cinosisira maningi mu upenyu hwedu, njiku yo rutongeso ya Jehovha ecito yaguma. Ngo pamusoro po shwiro iyi Jesu wakati: “Waro garanyi makamuka mecideketera mu mukumbiro mukuvo wese, kuti mupone pa zviro zvese zvinodari kuitika.” (Ruka 21:36) Kudari tikaita mukumbiro mukuvo wese, rutendo hwedu unozovanga, tinozova takangwaririka njiku yo rutongeso ya Jehovha painozoguma.
20. Kuitisa kudini mukumbiro jedu jakadari inga rubani unonuhira?
20 Ngozvapi zvatabhuya mbhera wari? Itusu tinoreremeja maningi cipo ici co kuita mukumbiro. Zviro zvinosisira maningi zvatinodikana kunanga pa mukumbiro zvinodikana kuzwirana no cidisiso ca Jehovha. Tingatobongavo ngo Mwana wa Mwari, Umambo hwake no kukumbirira hama no hambzaji jedu. Cimwenizve, tingatokumbiravo zvatinoda ku divi ro kunyama no kumujimu. Patinonasa kurangarira zvatinoda kunanga mu mukumbiro jedu, tinokhombija kuti tireremeja cipo ici cinoshamaisa. Magama edu anozodari inga rubani unonuhira unodakajisa Jehovha.—Mazwi Akangwara 15:8.
NDUMBO 45 Kurangarijisisa ko Mwoyo Wangu
^ Itusu tinoreremeja maningi cidakajiso catinaco co kuita mukumbiro kuna Jehovha. Tinoda kuti mukumbiro jedu jidari inga rubani unonuhira, unomudakajisa. Pa musoro uwu, tinozovona kuti ngozvapi zvatinodikana kunanga pa mukumbiro jedu. Tinozovonazve zviro zvinganani zvatinodikana kurangarira patinokokwa kuti tiite mukumbiro pamberi po vamweni.
^ KUDURUJIHWA KO PIKICA: Mwamuna vari kuita mukumbiro no mukaji wavo kuti vana vavo vari kushikora vave vakajiviririka, vari kukumbirira ukama hwavo uri kuhwaja pomwe no mujiji wo Bhaibheri kuti aenderere mberi ecikura mu divi ro zvokunamata.
^ KUDURUJIHWA KO PIKICA: Hama iri mujaha iri kubonga Jehovha ngo ndava yo muripo wa Jesu, nyika yedu yakaseja no zvokuha zvinonaka.
^ KUDURUJIHWA KO PIKICA: Hambzaji iri kuita mukumbiro yecikumbira kuti Jehovha ashandise mujimu mucena wake kuti ubesere Mukhumbi Unotonga, vaya vari kusongana no ngozi jinoitika jega no kuteverehwa
