1. Ngenyi ngo zvo ungwaru kugara makanasiririka kuitira ngozi?

 KUDARI tikanasirira mukuvo uciripo, tinozokwanisa kuponesa upenyu hwedu. Inga muezaniso, panoitika ngozi, vandhu vanonga vakanasiririka vanokwanisa kupona no kubeseravo vamweni. Sangano rimweni ro ku Europa rinoeja kubesera vandhu vawihwa ngo ngozi, rakananga kudari: “Kugara wakanasiririka kunoponesa upenyu.”

2. Ngenyi tinodikana kugara takanasiririka kuitira dambujiko guru? (Mateu 24:44)

² “Dambujiko guru” rinozotanga ngo civhumbu. (Mateu 24:21) Dambujiko guru rinozosiyana no ngozi jimweni jinoitika nyamasi uno, ngokuti tinonga tecizviziva kuti irona riri kuguma. Paano makore anokwana kuita 2.000 adarika, Jesu paakavhunja vajiji vake vanasirire kuitira njiku iyi. (Verenganyi Mateu 24:44.) Kudari tikagara takanasiririka, zvinozova zvakareruka pa mukuvo wondhowo unonesa nokutizve zvinozotibesera kuti tibesere vamweni.—Ruka 21:36.

3. Kuitisa kudini kucungirira, pena no rudo zvinozotibesera kuti tive takanasiririka kuitira dambujiko guru?

³ Vonanyi mugariro mutatu jingatibesera kuti tive takanasiririka kuitira dambujiko guru. Ngozvapi zvatinodikana kuita kudari tikavhunjwa kuti ticumaere masoko o rutongeso, vandhu vacikanamati votanga kutiteverera? (Apokaripsi 16:21) Tinozodikana kucungirira kuti tizwire Jehovha no kuthemba kuti iyena anozotijivirira. Taizoitenyi kudari hama jedu jikaruza zviro zvajo zvokunyama? (Abhakuki 3:17, 18) Ngo ndava yo pena yatinayo navo, tingavabesera pa zviro zvavanoda. Ngozvapi zvataizoita kudari tikahwiswa ngo mubatanijwa wo majinja, todikana kugara pamwepo no hama no hambzaji jedu ko mukuvo wakatikuti? (Ezekieli 38:10-12) Tinozodikana kuvada maningi kuti tizovabesere pa mukuvo uwu unonesa.

4. Bhaibheri rinovonesa kudini kuti tinodikana kuenderera mberi tecisakurira mugariro wo kucungirira, pena no rudo?

 ⁴ Soko ra Mwari rinotivangisa kuti tienderere mberi tecisakurira mugariro wo kucungirira, pena no rudo. Ruka 21:19 inoti: “Munozoponesa upenyu hwenyu ngo kucungirira kwamunoita.” Vakorose 3:12 inoti: “Tatijirananyi . . . pena.” No 1 Vatesaronika 4:9, 10 inoti: “Imwimwi kamare munojijiswa kudisana ngo cenyu ndi Mwari. . . . Asi itusu tinomuvangisa kuti muenderere meciengejera kuita kudaro.” Magama o mavhesi aya akatarihwa Makristu ainga ecikhombija kucungirira, pena no rudo. Asi ivona vaidikana kuenderera mberi vecikhombija mugariro iji. Itusu tinodikana kuita zvakafanana. Kuti tibesereke, ngativone kuti Makristu o muzana ro kutanga akakhombijisa kudini mugariro umwe nga umwe. Perapo tinozovona kuti tingatevejeresa kudini vajiji ava no kuva no cokwadi cokuti takanasiririka kuitira dambujiko guru.

5. Makristu o kutanga akacungiririsa kudini zvineso zvaakasongana nazvo?

⁵ Makristu o kutanga aidikana kucungirira. (Vahebheru 10:36) Ivona vaisongana no zvineso zvaisonganavo no vandhu vo mu nguva yondhoyo asi vaisongana no muejo jimweni ngokuti vainga Makristu. Vazinji vavo vaiteverehwa haiwa basi ngo zviara zvo Cijudha, asi vaiteverehwavo ngo mbhuri javo pomwe no utongi hwo Roma. (Mateu 10:21) Mukati mo ungano yavo mainga no vapanduki vaieja kujijisa jijiso jo kunyepa kuti vapause ungano. Ivona vaidikana kungwarira kuti vatame kucengejwa. (Mabasa o Vapostori 20:29, 30) Pikija no zvese izvi, Makristu ondhowo akacungirira. (Apokaripsi 2:3) Vakazviitisa kudini? Ivona vakarangarijisisa ngo pamusoro po muezaniso jo mu Bhaibheri jo kucungirira. Umwe wakona ngo wa Jobe. (Jakobo 5:10, 11) Ivona vakaita mukumbiro vecikumbira simba. (Mabasa o Vapostori 4:29-31) Ivona vakaenderera mberi vecithemba kuti Jehovha waizovabesera kudari vakaenderera mberi vecicungirira.—Mabasa o Vapostori 5:41.

6. Tinojijenyi ngo zvakaithwa ndi hambzaji Merita kuti vacungirire kuteverehwa kovaiithwa?

⁶ Kudari tikajija mukuvo wese ngo muezaniso jo kucungirira jinowanika mu Bhaibheri no mu mabhuku edu no kurangarijisisa ngo pamusoro pajo, tinozokwanisavo kucungirira. Ngo kuita izvi hambzaji Merita vanogara ku Aribhaniya, vakakwanisa kucungirira kuteverehwa kwakashata maningi kwavaiithwa ngo mbhuri yavo. Ivona vakati: “Kujija ngo pamusoro po zvakaitika na Jobe kwakandivangisa maningi. Iyena wakatambujika maningi acikazvizivi kuti ndiani waiitisaro zvineso zvondhozvo. Pikija zvakadaro, iyena wakananga kudari: ‘Ndinotokotesa uceni hwangu mbhera kufa.’ (Jobe 27:5) Ndakarangarira kuti zvineso zva Jobe zvainesa maningi kupinda zvangu. Pikija jobe acainasepi kuziva kuti ndiyani waiitisa zvineso zvake, inini ndinoziva kuti ndiyani ari kuitisa zvineso zvangu.”

7. Pikija kuti atiripi kuhwisana no zvineso zvakawanda, ngozvapi zvatinodikana kujijira kuita wari uno?

⁷ Itusu tingakwanisa kucungirira ngo kuita mukumbiro kuna Jehovha mukuwo wese no kubhuya ngo pamusoro po zviro zvatiri kuneseka ndizvona. (Vafiripi 4:6; 1 Vatesaronika 5:17) Zvingaita kuti imwimwi amuripi kuhwisana no zvineso zvakawanda wari uno. Kureva kuti imwimwi munoita mukumbiro kuna Jehovha, mecikumbira besero rake paya pamunonga mecineseka kana paya pamunonga mucikazivi zvokuita? Kudari imwimwi mecikumbira besero ra Jehovha ngo pamusoro po zvineso zvo njiku no njiku wari uno, munozokwanisa kukumbira besero rake pa zvineso zvese zvamunozosongana nazvo kumbejiyo. Ngo kudaro, munozova no cokwadi cokuti Jehovha anozomubesera paya pamunoda besero no kuthembazve kuti iyena anoziva kuti ngozvapi zvaanodikana kumuitira.—Nduyo 27:1, 3.

8. Muezaniso wa hambzaji Mira unokhombijisa kudini kuti kucungirira zvineso nyamasi uno, kunotibesera kuti tizocungirire zvineso zvinozoviya? (Jakobo 1:2-4) (Vonanyi foto.)

 ⁸ Zvinozotirerukira kucungirira pa dambujiko guru kudari tikacungirira nyamasi uno. (Varoma 5:3) Ngenyi tingananga zvondhozvo? Hama jimweni jakavona kuti kucungirira muejo umwe nga umwe wo jaisongana najo, zvaizovabesera kuzocungirira muejo jaizoviya. Kucungirira kwakavabesera kuti vavangise rutendo hwavo pakuthemba kuti Jehovha wakanasiririka kuti avabesere. Rutendo wakavabesera kuti vacungirire zvineso zvaizoviyazve. (Verenganyi Jakobo 1:2-4.) Hambzaji Mira vari piyona ku Aribhaniya, vakavona kuti kucungirira kwakavabesera kuti vaenderere mberi vakacunga. Ivona vakananga kuti, mukuvo umweni vaijizwa kuti ndivona vega vaisongana no zvineso zvakawanda. Ivona vanoceukija manera avakabesehwa ndi Jehovha ko makore anodarika 20 apera. Cimwenizve, vanoanja kujivhunja kudari: ‘Endererai mberi wakagondeka. Ucasiya kushandira Jehovha, iyena wakakubesera kuti unyise zvineso zvizinji.’ Imwimwivo mungarangarijisisa ngo manera Jehovha wakamubesera ndiwona kuti mucungirire. Thembanyi kuti Jehovha anozwisisa zvineso zvamuri kusongana nazvo nokutizve iyena anozomubesera. (Mateu 5:10-12) Ngo kudaro, dambujiko guru parinozotanga munozojijira kucungirira no kutema civaringo co kuenderera mberi mecicungirira.

9. Hama jo ungano yo ku Antiyokiya yo Siriya jakakhombijisa kudini pena?

⁹ Vonanyi kuti ngozvapi zvakaitika no Makristu o ku Judheya paakasongana no dambujiko ro njara huru. Ungano yo Antiyokiya yo ku Siriya, payakazwa ngo pamusoro po njara yainga yeciitika, pacina kukana-kana vakazwira pena hama jo ku Judheya. Ivona vakaita zviri zvese kuti vabesere hama no hambzaji javo. Vakasunga “kuti umwe nga umwe anodikana kutumira zvokubesera ndizvona hama jo ku Judheya.” (Mabasa o Vapostori 11:27-30) Pikija hama jakasongana no dambujiko ro njara jaigara ndhambo, Makristu o ku Antiyokiya akatema civaringo co kuenda kovabesera.—1 Johani 3:17, 18.

10. Tingakhombijisa kudini pena ku hama no hambzaji jinonga jawihwa ngo ngozi? (Vonanyi foto.)

¹⁰ Itusu nyamasi uno tingakhombijiravo pena patinozwa hama no hambzaji jedu jiri kusongana no ngozi jinoitika jega. Ngo kukasika tingajipira kuti tibesere, kuita mupiro kuitira kubesera basa ro nyika yese no kuitira mukumbiro hama jinonga jawihwa ngo ngozi. b (Mazwi Akangwara 17:17) Inga muezaniso, kutangira mu gore ra 2020, kwakaumbhwa Komisau Jinobesera Vawihwa ngo Ngozi jinokwana kuita 950 kutenderera pasi pese kuitira kubesera vaya vainga vecida besero pa mukuvo wo korona. Tinobongesera maningi hama no hambzaji jinozvipira pakuita basa iri. Ngo ndava yo pena yovainga nayo kuno hama no hambzaji, hama jaiitari divi ro komisau iji, jaivapa zviro zvinodikana kuti vaenderere mberi vecishandira Jehovha. Cimwenizve, vaivakisa nyumba jo hama no kuvakisavo Nyumba jo Umambo.—Ezanisanyi na 2 Vakorinte 8:1-4.

11. Kubesera kwatinoita vamweni kunoitisa kudini kuti Baba wedu vo kudenga vakujwe?

¹¹ Patinoita zviri zvese kuti titatijire pena, vamweni vanovona zvatinongaro teciita. Inga muezaniso, mu gore ra 2019, dutu raizwi Dhoriyani, rakaphwanya Nyumba yo Umambo yo ku Bhahama. Hama jedu pajainga jecivaka Nyumba yo Umambo, ivona vakakumbira impereza imweni yaiita basa ro kuvaka yainga iciripi yo Zvapupu zva Jehovha kuti inange mare yaidiwa kuti ivona vaite basa raidiwaro ponapo. Mune wo imperezeyo, wakati: “Ndinozomupa zvese zvamunoda mucikapagari, . . . kuti basa iri riithwe. . . . Ndiri kuita izvi ngokuti ndinoda  maningi sangano renyu. Ndinoshamaisika maningi ngo manera amunotaja shamwari jenyu.” Uzinji hwo vandhu mu nyika ino avamuzivi Jehovha. Asi vazinji vakona vanovona zvinoithwa ngo Zvapupu zva Jehovha. Tinodakara maningi kudari tikaziva kuti pena yatinokhombijira vamweni inozobesera vandhu kuti vadevo kuziva ngo pamusoro pa Jehovha uwo “ano usizi hwakakura.”—Vaefeso 2:4.

12. Kuitisa kudini kukhombija pena nyamasi uno kunotinasirira kuitira dambujiko guru? (Apokaripsi 13:16, 17)

¹² Ngenyi tinodikana kukhombija pena dambujiko guru parinonga reciitika? Bhaibheri rinovonesa kuti vaya vacizivi kugondeka ku vatongi vo nyika ino, vanosongana no matambujiko wari uno no pamukuvo wo kuti dambujiko guru rinonga reciitika. (Verenganyi Apokaripsi 13:16, 17.) Hama no hambzaji jedu jinozoda zviro kuti jizokwanise kupona ndizvona. Mambo wedu Jesu Kristu pavanozoviya kuti vatonge vandhu, tinoda kuwanika tecitatijirana pena, zvoita kuti ivona vatikoke kuti tigare “utaka hwo Umambo.”—Mateu 25:34-40.

13. Inga zvatinovona pana Varoma 15:7, Makristu okutanga akavangisa kudini rudo hwavo?

¹³ Vese vaiziva kuti Makristu o kutanga aidisana ngocawo. Kunanga kuti zvaivarerukira kukhombija rudo uhu? Vonanyi basi vandhu vakasiyana-siyana vainga mu ungano yo Roma. Vamweni vainga Vajudha vainga vakajijiswa kuzwira Mutemo wa Mosi kuveni vamweni vainga no zvirovejeso zvimwenivo, vakarehwa mu njira yakasiyana-siyana. Makristu amweni ainga varanda kuveni amweni ainga akatosujunuka. Zvingaita kuti amweni aingaro akasujunuka aengavo varanda. Waro Makristu aya aizoitisa kudini kuti aenderere mberi ecikhombijira rudo pikija no kusiyana uku? Mupostori Pauro wakavavangisa kuti ‘vaashirane ngocavo.’ (Verenganyi Varoma 15:7.) Iyena waida kunangenyi? Gama rakasandujwa rokuti ‘ashirananyi ngocenyu,’ rinoreva kuashira mundhu pa muzi pedu kana patinonga tiri pamwepo no shamwari. Inga muezaniso, Pauro wakavhunja Firimoni manera waidikana kuashira Onezimo. Iyena wakati: “Muashirei ngo kunaka mwoyo.” (Firimoni 17) Kuveni Prisira na Akira vakaashira Aporo, uwo wainga acikazivi zvakawanda ngo pamusoro po Cikristu kupinda ivona, perapo vakabhuya naye ngo “pamutivi.” (Mabasa o Vapostori 18:26) Makristu aya aazivi kutendera kuti kusiyana kovainga vakaita kuvabarire zvineso, kusiyapo zvondhozvo vakaashirana ngocavo.

14. Hambzaji Ana no mwamunavo vakakhombijisa kudini rudo?

¹⁴ Itusu tingakhombijavo rudo kuno hama no hambzaji jedu ngo kuvaashira patinonga tino shamwari jedu. Izvo zvinozoitisa kuti ivona vakhombijevo kuti vanotida. (2 Vakorinte 6:11-13) Ngatende tivone muezaniso wa hambzaji Ana no mwamuna wavo. No papera mukuvo mushoma no vaenda ku nyika yo vakagajwa kuti vatange basa ravo imbza, Kumavirira ko Afrika, mutungu wo korona vhiru wakatanga. Ngo ndava yo mutungu uwu, azvicaizokwanisika kusongana no hama no hambzaji javo. Izvi zvakaita kuti vanesehwe maningi kuvaziva. Waro vaizoitisa kudini kuti vazivane no hama? Vakashandisa vhidhiyo konferensiya kuti vabhuye navo no kuvavhunja kuti vaida maningi kuvaziva. Hama no hambzaji jakadakara maningi ngo rudo hwakakhombijwa ngo varovorani ava vaingari mamisiyonariyo, zvoita kuti hama jitange kuvafonera no kuvatarira mesajhi. Ngenyi varovorani ava vakaeja kuziva hama no hambzaji javo? Hambzaji Ana vakati: “Rudo hwandakakhombijihwa pamwepo no mbhuri yangu pa mukuvo wakanaka no wakashata, wakazara mu mwoyo mwangu no mu murangariro mwangu. Izvo zvinondiita kuti ndidevo kukhombija rudo.”

15. Majijenyi ngo muezaniso wa hambzaji Vhanesa ngo pamusoro po kuda hama no hambzaji jedu? (Vonanyi foto.)

¹⁵ Uzinji hwedu tiri mu ungano muno hama no  hambzaji jinovha ku ndau jakasiyana no jino mugariro jakasiyana. Tinovangisa rudo hwedu kwavari ngo kusotesesa mugariro javo jaushoni. Hambzaji Vhanesa vanoshanda ku Novha Zerandiya, vanovona zvecinesa maningi kuzwana no hama jimweni mu ungano. Ivona vakatema civaringo cokwenda kobhuya no vandhu vanaya mugariro jinovanyangajisa, kusiyapo kugara ndhambo navo. Ngo kuita izvo zvakavabesera kuvona kuti ngenyi Jehovha anoda vandhu vondhovo. Ivona vakati: “Kuvhira mwamunangu povakatanga kushanda inga muvonereri wo ndharaundha, tiri pakati po vandhu vano mugariro jakasiyana-siyana, izvi zviri kundibesera kuti ndishamwarijane navo. Wari inini ndinodakarira maningi kusiyana-siyana kwakaitari hama. Zvakajeka kuti Jehovha anodakariravo kusiyana-siyana uku, ngokuti wakatikwevera mu cikwata cino vandhu vakasiyana-siyana.” Patinojijira kuvona vamweni inga manera Jehovha anovavona, tinokhombija kuti tinovada.—2 Vakorinte 8:24.

16. Ngenyi rudo unozova wecisisira maningi pa mukuvo wo dambujiko guru? (Vonanyi foto.)

¹⁶ Tinozodikana kuda hama no hambzaji jedu pa dambujiko guru. Jehovha anozotijiviririsa kudini dambujiko iri parinozotanga? Vonanyi ndhungamiriro yaakapa Jehovha kuno vandhu vake Bhabhironiya rokare parainga recida kuparajwa, iyena wakati: “Vianyi, vandhu vangu, nghwinanyi mumba menyu, konyanyi musuvo sure kwenyu, jifindarisenyi mukuvo muxoma, mbhera uxungu hwa Mwari hupinde.” (Isaia 26:20) Zvinovoneka inga kuti magama aya anozoshandavo kwatiri patinozosongana no dambujiko guru. “Nyumba” iri kunangwari, inganangira ungano jese. Pa mukuvo wo dambujiko guru tinozojivirihwa ndi Jehovha patinonga takaungana no hama no hambzaji jedu. Ngo kudaro, tinodikana kushanda ngo simba wari kusiyapo basi kuti ticijikire zvinoithwa ngo hama no hambzaji jedu, asi kuti tivakhombijire rudo. Kupona kwedu kunozofira pa kuita zvondhozvo.

17. Kudari tikava takanasiririka wari uno, tinozokwanisa kuitenyi pa dambujiko guru?

¹⁷ “Njiku huru ya Jehovha” inozova inonesa maningi kuno vandhu vese. (Sofoniya 1:14, 15) Vandhu va Jehovha vanozosonganavo no zvineso. Asi kudari tikajinasirira wari, tinozokwanisa kuva vandhu vakagajana no vanokwanisa kubesera vamweni. Tinozokwanisa kucungirira zvineso zviri zvese zvatinozosongana nazvo. Hama no hambzaji jedu pajinotambujika, tinozoita zvese zvatinokwanisa kuti tivabesere ngo kuvakhombijira pena no kuvapa zvavanoda. Kudari tikajijira kuda hama no hambzaji jedu wari, tinozokwanisa kukhombija kuti tinojida kumbejiyo. Jehovha anozotikomborera ngo kutipa upenyu ucikaperi mu nyika icina ngozi no zvineso.—Isaia 65:17.