1. Zviro zvapi zvamakajija pamakatanga kujija Bhaibheri?

 MUCIRI kuceukija pomakatanga kujija cokwadi? Zvingaita kuti makashamaisika ngo kuziva kuti Mwari ano zina. Kangaije makadakara ngo kuziva kuti Mwari aapisi vandhu. Makadakarazve maningi ngo kuziva kuti vandhu vakafaya vanozomuswa mozova navo mu paradhiso.

2. Kusiyapo kujija zvokadi zvo Bhaibheri basi, makakwanisazve kwenderera mberi mu mativi api? (Vaefeso 5:1, 2)

² Pamaienderera mberi mecijija Soko ra Mwari, rudo hwenyu kuna Jehovha waiengejeka. Rudo hwondhowo wakamuita kuti muenderere mberi mecishandisa zvamaijija. Makatanga kutema zvivaringo zvaushoni makacijikira pa zvamakajija. Makatangazve kurangarira no kuita zviro zvaushoni, ngokuti maida kudakajisa Jehovha. Kudari inga mwana anotevejera baba wake vano rudo, imwimwi munonga mecitevejeravo Baba wenyu vokudenga.—Verenganyi Vaefeso 5:1, 2.

3. Muvhunjo japi jatinodikana kujiita?

³ Jivhunjisenyi kudari: ‘Kureva kuti rudo hwangu kuna Jehovha wavanga maningi wari kupinda pandakatangaya kuva Mukristu? Kuvhira pondakapera kubhabhatijwa, manera angu okurangarira no okuita zviro akaezana no a Jehovha, maningi-ningi pa kukhombija rudo kuno hama no hambzaji jangu?’ Kudari mukavona kuti ‘rudo hwamainga nahwo pakutanga’ watanga kutondhora, mucadorembejeka. Izvi zvakaitikavo no Makristu o muzana ro kutanga. Jesu aazivi kuvasiya, nee aazotisiivo. (Apokaripsi 2:4, 7) Iyena anoziva kuti tingakwanisazve kuva no rudo hwotaingaya nahwo pakutanga.

4. Ngozvapi zvatinozovona mu cijijo cino?

⁴ Mu cijijo cino, tinozovona kuti tingaitisa kudini kuti tienderere mberi tecida Jehovha no vamweni. Perapo, tinozovona makomborero manganani atinozowana ngo kwenderera mberi tecida Jehovha no hama jedu.

5-6. Ngozvapi zvineso zvakahwisana no mupostori Pauro paaita basa ro kucumaera? Ngozvapi zvakamubesera kuti aenderere mberi ecishandira Jehovha?

⁵ Mupostori Pauro waidakara maningi ngo kushandira Jehovha, asi asipi mukuvo wese wozvaireruka. Iyena waidikana kuita hwendo ko mumango wakareba, izvi zvainesa maningi pa mukuvo wondhowo. Nguva jimweni, waidikana kusongana no “ngozi jo mumurambo” no “ngozi jo mbavha.” Mukuvo umweni, vavengi vake vaitomutaka. (2 Vakorinte 11:23-27) Nguva jimweni, hama ajicaibongesera ngo zvese zvaithwari ndiyena kuti avabesere.—2 Vakorinte 10:10; Vafiripi 4:15.

⁶ Ngozvapi zvakabesera Pauro kuti aenderere mberi ecishandira Jehovha? Wakajijira zvakawanda maningi ngo pamusoro po undhu hwa Jehovha kuvha mu Matahwa no kuvha ku zviya zvakamuitikira. Iyena waithembazve kuti Jehovha Mwari waimuda maningi. (Varoma 8:38, 39; Vaefeso 2:4, 5) Wakaguma pa kuda maningi Jehovha. Pauro wakakhombija kuti waida Jehovha ‘ngo kushandira vakasanwa no kuenderera mberi ecivashandira.’—Vahebheru 6:10.

7. Tingaengejera rudo hwedu kuna Jehovha ngo njira yapi?

⁷ Tingaengejera rudo hwedu kuna Jehovha ngo kunasa kujija Bhaibheri. Pamunonga meciverenga Bhaibheri, ejanyi kuvona kuti ciitiko cimwe nga cimwe cinomujijisenyi ngo pamusoro pa Jehovha. Jivhunjisenyi kudari: ‘Zvandiri kuverengari zvinovonesa kudini kuti Jehovha anondida? Izvona zvinondibesera kudini kuti ndidevo Jehovha?’

8. Mukumbiro unotibesera kudini kuti tiengejere rudo hwedu kuna Jehovha?

⁸ Njira imweni yatingashandisa kuti tiengejere rudo hwedu kuna Jehovha, ngo yo kuita mukumbiro nguva jese. (Nduyo 25:4, 5) Inga muviyo Jehovha anozodavira mukumbiro jedu. (1 Johani 3:21, 22) Hambzaji imweni inodanijwa kuti Khani inogara ku Aziya, yakati: “Ndakatanga kuda Jehovha pondakatanga kujija ngo pamusoro pake, asi pondakavona Jehovha acidavira mukumbiro jangu ndakamuda maningi. Izvi zvakandindundira kuti ndiite zvinomudakajisa.” b

9. Tinozvizivisa kudini kuti Timoti waida hama no hambzaji?

⁹ Pasure po makore manganani mupostori Pauro naava Mukristu, wakaziva mujaha umweni wainga no muezaniso wakanaka, waindanwa Timoti. Timoti waida Jehovha no vamweni. Pauro wakavhunja Vafiripi kudari: “Andina umweni ano murangariro wakaezana no wa [Timoti], anozonasa kumukorondha.” (Vafiripi 2:20) Pauro aacainanga kuti Timoti waikwanisa ushoni kuronga mabasa no kuita ushoni hurukuro, asi waishamaisika ngo rudo hwainga na Timoti kuna hama no hambzaji jake. Pacina kukana-kana, ungano jaaivhakacira jaivetera no cidaka-daka cese vhaza yaaizoviyazve kuti avavhakacire.—1 Vakorinte 4:17.

10. Hambzaji Ana no mwamunavo vakakhombijisa kudini rudo kuno hama no hambzaji?

¹⁰ Itusu tinopsakavo njira yokubesera hama no hambzaji jedu. (Vahebheru 13:16) Vonanyi zvakaitika na hambzaji Ana vakanangwaya pa cijijo cakapera. Pasure po kuitika dutu, ivona no mwamunavo vakaenda kovhakacira mbhuri imweni yo Zvapupu, vovona kuti denga ro nyumba yavo rainga rapera kuphwanyika ngo ndava yo dutu raingari raitika.  Inga muviyo, mbhuri iyi yainga icinazve nguvo jakacena. Hambzaji Ana vakati: “Takatora nguvo javo topaja, toengomari, topeta no kujihwirija. Kwatiri azvizivi kuva zviro zvikuru, asi mbhera nyamasi tiri shamwari no shamwari.” Rudo una hambzaji Ana no mwamunavo kuno hama no hambzaji, wakavaita kuti ivona vade kuvabesera.—1 Johani 3:17, 18.

11. (a) Vamweni vanojizwa kudini patinovakhombijira rudo? (b) Mukuzwirana na Mazwi Akangwara 19:17, Jehovha anoitenyi patinokhombija rudo?

¹¹ Patinova takanaka mwoyo no kukhombija rudo kuno vamweni, ivona vanovona kuti tiri kutevejera Jehovha. Kangaije itusu atizvizivi kuti vanoreremeja kunaka mwoyo kwatinokhombija. Hambzaji Khani vanangwaya, vaciri kuceukija vandhu vakavabesera. Ivona vakati: “Ndinobongesera maningi hambzaji jese jaiviyaya konditora kuti tiende mu basa ro kucumaera. Ivona vaiviya konditora, taicenga-cenga zviri zvese no kuhwirira kondisiya kumuzi ndakangwaririka. Wari ndiri kuzwisisa kuti rainga basa rakakura maningi kwavari. Ivona vaiita zvese ngo ndava yo rudo.” Ndizvona kuti asipi vandhu vese vanozomubongesera ngo zvamunoita. Hambzaji Khani vakananga kudari ngo pamusoro po vakavabeseraya: “Ndinoda kuvaitira zvavakandiitiraya, asi andikuzivi kwavanogara. Jehovha anokuziva, ndinoita mukumbiro kuti iyena avaitire zviro zvandicikakwanisi kuvaitira.” Zvakanangwari ndi hambzaji Khani ndizvonadi. Jehovha anovona zviro zvidokowani zvatinoita kuti tikhombije kunaka mwoyo. Iyena anovona kuvangisira kwese kwatinoita, izvona zvakadari inga gava raanaro kuti atipagari.—Verenganyi Mazwi Akangwara 19:17.

12. Hama jingakhombijisa kudini rudo mu ungano? (Vonanyi foto.)

¹² Kudari imwimwi muri hama, mungakhombijisa  kudini rudo kuna vamweni no kuvaitira zviro kuti muvabesere? Hama imweni iri mujaha inodanijwa Jhordhani yakavhunjisa mukuru kuti ngozvapi zvaingaita kuti ibesere maningi ungano. Mukuruwo wakamusimba ngo kwenderera kwaainga aita no kupa mazano aizomubesera kuti akwanise kuita zvizinji. Inga muezaniso, iyena wakavangisa hama Jhordhani kuti vagume sedho pa Nyumba yo Umambo kuti vacungamijane no vamweni. Kusiyapo zvondhozvo, vaidikana kupa mupinguro jakawanda pamusongano, kwenda kocumaera pamwepo no cikwata cavo no kupsaka manera okubesera vamweni. Hama Jhordhani vakashandisa mazano ovakavhunjwari, zvovabesera kuti vajije zvakawanda no kuengejera kuda kwavo hama no hambzaji. Ivona vakajijira kuti hama painova mubeseri wo ungano, aitangi kubesera vamweni, inoenderera mberi yecivabesera.—1 Timoti 3:8-10, 13.

13. Rudo wakabesera kudini hama imweni inodanwa Kristiyano kuti itange kushandazve inga mukuru?

¹³ Ngozvapi zvamungaita kudari makamboshanda inga mubeseri wo ungano kana mukuru? Jehovha anoceukija basa rese ramakaita no rudo waimundundiraro kuti muite zvondhozvo. (1 Vakorinte 15:58) Iyena ari kuvonavo rudo wamuri kwenderera mberi mecikhombija. Hama imweni inodanwa kuti Kristiyano, yakanyangajwa maningi poyakasiya kushanda inga mukuru. Iyona yakati: “Ndakaita zvese zvandaikwanisa kuti ndienderere mberi ndecishandira Jehovha no kukhombija rudo hwangu kwaari, azvinenyi dangani ndiri kushanda inga mukuru kana ndicikashandi.” Pa kufamba ko nguva, hama Kristiyano vakagajwazve inga mukuru. Ivona vakananga kudari: “Ndaithya padoko pondakagajwazve kuti ndishande inga mukuru. Asi inini ndakatema civaringo co kuti kudari Jehovha ngo unyasha hwake anoda kuti  ndishandezve inga mukuru, ngo ndava yo rudo hwangu naye no kuno hama no hambzaji ndinoita zvondhozvo.”

14. Tinojijenyi ngo muezaniso wa hambzaji Erena?

¹⁴ Vashandiri va Jehovha vanovonesavo rudo hwavo kuno vamweni. (Mateu 22:37-39) Inga muezaniso, hambzaji Erena vanogara ku Georgia, vakananga kudari: “Pakutanga ciro caindiita kuti ndide kucumaera, wainga rudo hwangu kuna Jehovha. Asi kuda kwangu Jehovha pakwaiengejeka, kuda kwandaiita vandhu kwaiengejekavo. Ndaieja kurangarira kuti zvineso zvapi zviri kusongana no vandhu no kuvona kuti shwiro yapi ingavabaya mwoyo. Pandairangarijisisa maningi ngo pa musoro po vandhu ava, ndaiva no cido co kwenda kovabesera.”—Varoma 10:13-15.

15-16. Inga zvatiri kuvona pa foto, ngoapi makomborero atinozova nawo kudari tikakhombija rudo kuno vamweni?

¹⁵ Patinokhombijira rudo kuno hama no hambzaji jedu, vandhu vamweni vanobesereka ndizvona. Pakandotanga mutungu wo korona vhiru, hama imweni inodanijwa Paoro no mukaji wayo vakabesera hambzaji zinji jainga jiri vasharuka kuti vashandise foni, tabhereti no komputadhori kuti vakwanise kucumaera. Hambzaji imweni yainga no cineso pa kushandisa zviro izvi, yakazokwanisa kuzvishandisa ngo ndava yo besero iri. Iyona yakakwanisa kukoka ukama hwayo kuti uviye ku Cirangarijo. Ukama hwayo unokwana kuita 60 wakakwanisa kuvona Cirangarijo  wecishandisa vhidhiyo konferensiya. Ngo ndava yo kuvangisira kwa hama Paoro no mukaji wavo, hambzaji iyi yaamusharuka yakakwanisa kubesereka pamwepo no mbhuri yayo. Pa kufamba ko nguva, iyona yakatarira hama Paoro kudari: “Ndinobonga maningi ngo kubesera vasharuka vari mu ungano mwedu. Narini andizokanganwi manera Jehovha anoneseka ngo vandhu vake no kuvangisira kwamakaita.”

¹⁶ Zviitiko zvakadari zvakajijisa ciro cinosisira maningi kuna hama Paoro. Vakajija kuti rudo unosisira maningi kupinda uzivi no kukwanisa kuita zviro. Ivona vakati: “Ndiri kushanda inga muvonereri wo ndharaundha. Wari ndiri kuzwisisa kuti, pikija vacumaeri avangaceukiji hurukuro jandakaita, ivona vaciri kuceukija zviro zvandakaita kuti ndivabesere.”

17. Ndiyani anozobeserekavo patinokhombija rudo?

¹⁷ Patinokhombijira rudo kuno vamweni, tinobesereka ngo njira yaticikarangariri. Hama Jonatani vanogara ku Novha Zerandiya, vakavona kuti izvi ndizvonadi. Pa vhaza imweni ngo Musabudu co masikati zuva recipisa maningi, ivona vakavona hama imweni iri piyona yecicumaera yega. Hama Jonatani vakatema civaringo cokuti mu Masabudu ese co masikati vaizoshanda no hama iyi yaingari piyona. Ivona avacaizviziva kuti kubesera kwavaizoitari hama iyi, kwaizovabeseravo. Hama Jonatani vakati: “Pa mukuvo wondhowo andicaidakarira maningi kucumaera. Asi pondakapera kuvona manera inojijisa hama yaingari piyona no muviyo jaushoni joyainga najo, ndakatanga kudakarira basa iri. Kusiyapo zvondhozvo, ndakawana shamwari yakandibesera kuti ndikure ku divi ro umwari, ndidakarire basa ro kucumaera no kuva no ushamwari wo phedo na Jehovha.”

18. Jehovha anoda kuti itusu tiitenyi?

¹⁸ Jehovha anoda kuti rudo hwedu kwaari no kuno vamweni uengejeke. Inga zvatavona mu cijijo cino, tingavangisa rudo hwedu kuna Jehovha ngo kuverenga Soko rake, kurangarijisisa no kuita mukumbiro kwaari. Tingaengejera rudo hwedu kuno hama no hambzaji jedu ngo kuita zviro zvinovabesera. Rudo hwedu paunoengejeka, tinova phedo na Jehovha pomwe no hama no hambzaji jedu, tozobusa ushamwari uhu kwenda no kwenda.