MUSORO WO KUJIJA WO 31
“Vanganyi Mucikacukunuki”
“Ngo kudaro hama jangu jinodiwa, vanganyi mucikacukunuki.” —1 VAKORINTE 15:58.
NDUMBO 122 Ivanyi Vakavanga, Mucatetemera!
ZVATICAJIJA a
1-2. Mu njira yapi Makristu anoezanisihwa no predhiyo yakareba maningi? (1 Vakorinte 15:58)
MUKUPERA ko gore ra 1970, predhiyo yo 60 andari, yakatanga kuvakwa ku dhorobha ro Tokiyo ku Japau. Vandhu pavaivona predhiyo iyi yecivakwa vaishamaisika maningi vecitojivhunjisa kuti iyona inokwanisa kucijikira pakazoitika mudhuma ngo pasi kana kuti haiwa. Izvi zvaizokwanisika kudini? Mainjinyero akavakari nyumba iyi, vakaivaka mu njira yokuti iyona ivange no kuzokwanisa kucijikira kuzungunyika ko nyika kuri kwese. Makristu akaezana no nyumba iyi yakarebari. Kuitisa kudini?
2 Mukristu anodikana kuva pakati no pakati, wakavanga no acikacukunuki. Iyena anodikana kuva akavangazve no acikacukunuki paanonga ecizwira mutemo ja Jehovha no ndhungamiriro jake. (Verenganyi 1 Vakorinte 15:58.) Iyena anonga akanasiririka kuti ‘azwire’ nokuenderera mberi eciita kudaro. Ngo divi rimweni, iyena anodikana kuva mundhu ‘anozwisisa’ pese pokuti mugarirowo unonga wecida kuti iyena aite kudaro. (Jakobo 3:17) Mukristu wakajijira kuva no mavonero aya, aazobatisisi maningi zvimutemo nee aazotenderivo kuita zviro zvese. Mu cijijo cino, tinozovona kuti tingaitisa kudini kuti tive vandhu vacikacukunuki. Tinozovonazve njira shanu jinoshandiswa ndi Sathana kuti arembese cido cedu cokuda kujijira manera atingaita kuti tive takavanga ticikacukunuki.
TINGAITISA KUDINI KUTI TIVE TAKAVANGA?
3. Ngojapi mutemo jakapa Jehovha jinowanika pana Mabasa o Vapostori 15:28, 29?
3 Jehovha ndiyena ega basi anodikana kupa mutemo kuno vandhu vake, mutemo iji jakanasa kujeka akamare. (Isaia 33:22) Inga muezaniso, muzana ro kutanga ro makore, mukhumbi unotonga wakananga kuti Makristu anodikana kuva akavanga ngo njira ndhatu. Yokutanga, kutama kunamata zvithombe, tonamata Jehovha basi. Yocipiri, kureremeja mutemo wa Jehovha wo kuti ngazi yakacena no yo citatu, kuzwira zvinonangwa ngo Bhaibheri ngo pamusoro pokutama kuita zvo uhure. (Verenganyi Mabasa o Vapostori 15:28, 29.) Makristu angaitisa kudini kuti azwire Jehovha pa mativi matatu anangwari?
4. Tingaitisa kudini kuti tinamate Jehovha basi? (Apokaripsi 4:11)
4 Itusu tinoramba kunamata zvithombe, tonamata Jehovha basi. Iyena wakavhunja Vaiziraeri kuti vanamate iyena basi. (Deuteronòmio 5:6-10) Jesu paakaejwa ndi Sathana, iyena wakanasa kujekesa kuti tinodikana kunamata Jehovha basi. (Mateu 4:8-10) Ngo iyo ndava, atinamati zvithombe nee atitonamativo vandhu. Inga muezaniso, atinamati vatungamiriri vo magerejha, vatungamiriri vo zvoporitika, vaimbi vanozivikaya maningi nee atitonamativo vanoitaya muphikizano. Itusu tinonamata Jehovha basi uwo “wakasika zviro zvese.”—Verenganyi Apokaripsi 4:11.
5. Ngenyi tinozwira mutemo wa Jehovha ngo pamusoro po kucena ko upenyu no ngazi?
5 Itusu tinoreremeja mutemo wa Jehovha ngo pamusoro po kucena ko upenyu no ngazi. Ngenyi? Ngokuti Jehovha anonanga kuti ngazi inoimirira upenyu, cipo cinosisira maningi catakapuwa ndiyena. (VaLevi 17:14) Jehovha paakatendera vandhu kuti vahe nyama, aazivi kuvatendera kuti vahe no ngazi yakona. (Genesi 9:4) Wakaphindazve mupango uwu paakapa Mutemo wa Mosi. (VaLevi 17:10) Jehovha wakavhunja mukhumbi unotonga wo muzana ro kutanga ro makore kuti uvhunje Makristu kuti ‘aregere [kushandisa] . . . ngazi.’ (Mabasa o Vapostori 15:28, 29) Itusu tinozwira mupango uwu patinosana kuti ngoyapi njira yatingaraphwa ndiyona. b
6. Ngozvapi zvatinodikana kuita kuti tizwire mutemo jakarungama ja Jehovha?
6 Itusu tinozwira ndhungamiriro jakakhwirira ja Jehovha. (Vahebheru 13:4) Mupostori Pauro wakatingwaja kuti ‘tiuraye’ mativi o muviri wedu kana kuti cido cese cokuda kuita zviro zvakashata. Itusu atiiti zviro zvokuti zvaizotiita kuti tiite zvo uhure nee ativoni zviro zvondhozvo. (Vakorose 3:5; Jobe 31:1) Patinoejwa kuti tiiite zviro zvakashata, ngo kukasika tinoramba murangariro kana kuti zviito zvaizoita kuti tikhuvaze ushamwari hwedu na Jehovha.
7. Tinodikana kutema civaringo co kuitenyi, ngenyi?
7 Jehovha anovetera kuti itusu ‘tizwire ngo mwoyo wese.’ (Varoma 6:17) Zvaanotivhunja mukuvo wese ngo zvaushoni kwatiri, atikwanisi kucinja mutemo jake. (Isaia 48:17, 18; 1 Vakorinte 6:9, 10) Itusu tinovangisira kuti tidakajise Jehovha no kukhombija murangariro wakafanana no wakakhombijwa ngo mutari wo nduyo paakati: “Ndinoteveja matongero enyu ngo mwoyo wangu wese; nga uu mupocero wangu mbhera narini.” (Nduyo 119:112) Asi Sathana anoeja kurembesa cido cedu cokuda kuenderera mberi takavanga. Iyena anoshandisa njira japi?
SATHANA ANOITISA KUDINI KUTI AREMBESE CIDO CEDU COKUENDERERA MBERI TAKAVANGA?
8. Sathana anoshandisa kudini kuteverehwa kuti arembese cido cedu cokuda kuenderera mberi takavanga?
8 Kuteverehwa. Sathana anoeja kutiteverera mu muviri no mu murangariro kuti arembese cido cedu cokuda kuenderera mberi takavanga. Cido cake ngo co ‘kutivhavhura’ kuti apeje ushamwari hwedu na Jehovha. (1 Pedhru 5:8) Makristu okutanga akaneswa, kutakwa otogumira pakuuraiwa ngo ndava yo cido cavo cokuda kuenderera mberi akavanga. (Mabasa o Vapostori 5:27, 28, 40; 7:54-60) Nyamasi uno, Sathana aciri kushandisavo murau uwu wokuteverera. Tinokwanisa kuvona izvi ngo zviri kuithwa ngo utongi unoteverera hama no hambzaji jedu ku Rusiya no ku nyika jimweni no manera ari kuteverehwa mundhu umwe nga umwe.
9. Muezaniso wapi unovonesa kuti tinodikana kungwarira pa kuvangirijwa kucikanasi kuvoneka?
9 Kuteverehwa kucikanasi kuvoneka. Kusiyapo kushandisa kuteverehwa kamare, Sathana anoshandisavo ‘murau’ kuti atihwise. (Vaefeso 6:11) Vonanyi muezaniso wo hama imweni inodanijwa Bhobho, yakadikana kuithwa operasau yakakura maningi. Ivona vakavhunja mamedhiko kuti avacaizotendera kuraphwa kuri kwese kwaizobatanija ngazi. Medhiko waizovaoperari wakatendera kuita zvonazvo acikashandisi ngazi. Pa usiku vacito vacekwa operasau, ukama hwa hama Bhobho pohwainga hwapinda kanyi, medhiko umweni wakaviya kobhuya navo, medhiko uwu wakananga kuti aacaizoshandisa ngazi pakuita operasau iyi. Asi kudari zvaizodiwa wainga nayo ngazi yakanasiririka. Kangaije medhiko uwu waitorangarira kuti hama Bhobho vaizotendera ngo kuti ukama hwavo ahucainga phedopo. Hama Bhobho vakaenderera mberi vakavanga, votonanga kuti avacaizotendera kudihwa ngazi ngo njira iri yese hayo.
10. Ngenyi manera o kurangarira o vandhu vo nyika akashata maningi? (1 Vakorinte 3:19, 20)
10 Manera o kurangarira o vaya vacikazwiri mutemo ja Jehovha. Kudari tikarangarira manera anorangarira vandhu vacikazwiri mutemo ja Jehovha, tingatogumiravo pakuita inga ndivona. (Verenganyi 1 Vakorinte 3:19, 20.) “Uzivi hwo nyika ino” kazinji unoita kuti vandhu vatame kuzwira Mwari. Makristu amweni o Pergamu no Tiyatira, akatanga kurangarira inga manera airangarira vandhu vainga vakavatendeneja, vainga vecinamata zvithombe no kuita zvo uhure. Jesu wakatumira mbhangiro yakavanga ungano mbiri iji ngokuti ivona vaitendera kuti vandhu mu ungano vaite uhure. (Apokaripsi 2:14, 20) Nyamasi uno, vandhu vanotivangirija ngo njira iri yese kuti tiite zvakashata. Vandhu vo pambhuri yedu no shamwari vangatoeja kutikhohwesa kuti tiri kubatisisa maningi mutemo no kutonangazve kuti apana cakashata pakutama kuzwira mutemo ja Mwari. Inga muezaniso, ivona vangatonanga kuti apana cakashata kudari itusu tinoda kuita mukuzwirana no zvatinoda, nokutonangazve kuti ndhungamiriro jo Bhaibheri ajicashandi.
11. Ngozvapi zvaticikadikani kuita?
11 Nguva jimweni tingatoguma pakurangarira kuti ndhungamiriro jatinopuwa ndi Jehovha ajizivi kunasa kujeka. Kangaije tingajizwa teciejwa kuti tiite ‘kupindirija zviro zvakatahwa.’ (1 Vakorinte 4:6) Vatungamiriri vo zviara vo mu nguva ja Jesu vaiitavo zvondhozvo. Ivona vaiengejera mupango javo pa Mutemo wa Mosi, zveciita kuti zvinese ku vandhu vaya vaidaya kuzwira. (Mateu 23:4) Jehovha anotipa ndhungamiriro jakajeka ecishandisa Soko rake no sangano rake. Apana anodikana kuengejera zvimweni pa ndhungamiriro jaanotipa. (Mazwi Akangwara 3:5-7) Tikadaro, atizopindiriji zviro zvakatahwa mu Bhaibheri nee atizodiri mutemo kuno hama no hambzaji jedu kuitira zviro zvo mundhu ega.
12. Sathana anoshandisisa kudini “kucengeja kwabiresi”?
12 Masoko anocengeja. Sathana anoshandisa “kucengeja kwabiresi” no “zviro zvo nyika,” kuti acengeje no kuparajanisa vandhu. (Vakorose 2:8) Mu nguva jo vapostori, izvo zvaibatanija jijiso jaicijikira pa uzivi hwo vandhu, jijiso jo Vajudha jainga jicizivi kucijikira mu Bhaibheri no jijiso jo kuti Mukristu waidikana kuzwira Mutemo wa Mosi. Murangariro iji jaicengeja vandhu ngo kuti ijona jaiita kuti ivona vave ndhambo no Cinyuke co uzivi hwokadi, Jehovha. Nyamasi uno, Sathana anoshandisa notisiya no interneti kuti andhandhanise joweyowe no masoko okunyepa anonangwa ngo vatungamiriri vo poritika. Izvi zvakaitika maningi mukati mo mutungu wo korona vhiru. c Zvapupu zva Jehovha zvaizwiraya mutemo jo zvaipuwa ngo sangano rake, avazivi kugara vecithimwa-thimwa inga vandhu vaya vakagaraya vecipurukira masoko aya o kunyepa.—Mateu 24:45.
13. Ngenyi tinodikana kujingwarira ku zviro zvinophingaija?
13 Zviro zvinophingaija. Tinodikana kuramba tecisotesesa kuti tizive “ngozvapi zvinosisira maningi.” (Vafiripi 1:9, 10) Patinophingaijika tinotoruza nguva no simba rataizoshandisa pakuita zviro zvinosisira. Zviro zvo njiku no njiku zvakadari inga kuha, kumwa, mabungaijo no basa zvingatiphingaija kudari tikatendera kuti izvona zvive zvinosisira maningi mu upenyu hwedu. (Ruka 21:34, 35) Kusiyapo zvondhozvo, njiku jese tinozwa no kuverenga masoko ngo pamusoro po joweyowe no zvimweni zvinonga zvecirongwa ngo vanotungamirira zvoporitika. Tinodikana kungwarira kuti titame kuphingaijwa ngo zviro izvi. Ngo divi rimweni, kudari tikatama kungwarira tingazotanga kubesera zviro izvi ngo mu murangariro no mu mwoyo medu. Sathana anoshandisa njira jese jataperari kuvona no cinangwa cokuda kurembesa cido cedu cokuda kuita zvakanaka. Ngatende tivone kuti tingaitisa kudini kuti ticijikire kuhwiswa kwese kwatiri kuithwari toenderera mberi takavanga.
TINGAITISA KUDINI KUTI TIENDERERE MBERI TAKAVANGA?
Kuti muenderere mberi makavanga munodikana kurangarira kuti ngenyi makajipira no kubhabhatijwa ngo kujija Soko ra Mwari, kurangarijisisa ngo pamusoro po zvamajijaro, kuvangisa mwoyo wenyu no kuthemba Jehovha (Vonanyi ndima 14-18)
14. Ngozvapi zvingatibesera kuti tienderere mberi takavanga tiri kudivi ra Jehovha?
14 Rangariranyi kuti ngenyi imwimwi makajipira no kubhabhatijwa. Imwimwi makaita zviro izvi ngo kuti maida kuva ku divi ra Jehovha. Ceukijanyi kuti ngozvapi zvakamubesera kuti muvone kuti mainga mawana cokwadi. Makaziva Jehovha momureremeja no kumuda inga Baba wenyu vo kudenga. Makava no rutendo zvomuita kuti mukhauye. Rudo hwenyu kuna Jehovha wakamuita kuti musiye kuita zvakashata motanga kuita zvinomudakajisa. Makajizwa ushoni pamakatanga kuzwisisa kuti Mwari wamuregerera. (Nduyo 32:1, 2) Makatanga kuenda kumusongano no kuvhunja vamweni zviro zvinoshamaisa zvamakajija. Inga Mukristu wakajipira no kubhabhatijwa, wari muri kufamba mugwanja rinoendesa ku upenyu, motema civaringo co kuenderera mberi muri mugwanja iri.—Mateu 7:13, 14.
15. Ngenyi zvinosisira kujija Soko ra Mwari no kurangarijisisa?
15 Jijanyi Soko ra Mwari no kurangarijisisa ngo pamusoro paro. Muti paunova no miji jakaenda pasi kamare, iwona unovanga. Mu njira yakaezana, patinojija Soko ra Mwari, rutendo hwedu unokura toenderera mberi takavanga. Patinojija no kuenderera mberi tecirangarijisisa zvatajijaro, rutendo hwedu unovanga maningi togumira pakukhohwa kamare kuti zvaanotikumbira Mwari kuti itusu tiite ngo zvaushoni. (Vakorose 2:6, 7) Rangariranyi ngo ndhungamiriro ja Jehovha, mazano ake no manera aakajivirira vashandiri vake vo mu nguva jokare. Inga muezaniso, Ezekieri paakava no civoniso iyena wakanasa kusotesesa ngirozi payainga yecipima themberi. Civoniso ici cakavangisa Ezekieri no kumujijisa zviro zvinosisira kuti azvishandise pakubesera kwaiita kunamata kwakacena. d (Ezekieli 40:1-4; 43:10-12) Itusu tinobeserekavo patinojija no kurangarijisisa zviro zvakajikisisa zviri mu Soko ra Mwari, Bhaibheri.
16. Kuva no mwoyo wakavanga kwakabesera kudini hama Bhobho? (Nduyo 112:7)
16 Vangisanyi mwoyo wenyu. Mambo Dhavhidhi wakananga kuti iyena aacaizosiya kuda Jehovha. Iyena wakati: “Mwari, mwoyo wangu wakavanga.” (Nduyo 57:8) Itusu tingavavo no mwoyo wakavanga ngokunasa kuthemba Jehovha. (Verenganyi Nduyo 112:7.) Vonanyi muezaniso wa hama Bhobho vambonangwaya. Mamedhiko paakananga kuti ngazi yaizova iripo pavainga veciita operasau, ivona vakananga kuti zvaizova zviri nane kubuda pacipitaripo pa nguva yondhoyo kamare. Hama Bhobho vakazonanga kudari: “Inini ndaizviziva kuti izvi ndizvona zvandaida azvinenyi ngo zvapi zvaizoitika.”
Tikava no rutendo hwakavanga, tinozokwanisa kuramba takavanga azvinenyi no zvineso zvatinozosongana nazvo (Vonanyi ndima 17)
17. Ngozvapi zvatajija ngo muezaniso wa hama Bhobho? (Vonanyi foto.)
17 Hama Bhobho vakakwanisa kuenderera mberi vakavanga ngo kuti ivona vainga vapera kusunga kare zvavainga vecida vacito vaenda kucipitari. Cokutanga ivona vaida kuti civaringo cavo cidakajise Jehovha. Cocipiri, ivona vakanasa kujija zvinonangwa ngo mabhuku edu ngo pamusoro po kucena ko upenyu no ngazi. Cocitatu, ivona vaithemba kuti kuzwira ndhungamiriro ja Jehovha kwaizovabesera kwenda no kwenda. Itusu tingakwanisavo kuva no mwoyo wakavanga azvinenyi no zvineso zvatinosongana nazvo.
Bharaki no masoca ake akacunga, vari kuhwisa masoca a Sizera (Vonanyi ndima 18)
18. Muezaniso wa Bharaki unotijijisenyi ngo kuthemba Jehovha? (Vonanyi foto yo pakapa.)
18 Thembanyi Jehovha. Vonanyi manera Bharaki wakabudirira ngo kuthemba ndhungamiriro ja Jehovha. Pa mukuvo uwu, Vaiziraeri avacainga vakanasiririka kuti vaende ku hondo. Ivona nee avacainga no nvuti, asi Jehovha wakavhunja Bharaki kuti aende kohwisa mutungamiriri wo masoca o Vakhanani waidanwa Sizera uwo wainga no nvuti jakawanda. (Vatongi 5:8) Muporofitakaji Dhebhora wakavhunja Bharaki kuti abzuke pa dhundhu kuti aende kosongana na Sizera pomwe no karu jake jaikwana kuita 900. Zvaizonesa maningi kuti Vaiziraeri vahwisane pa ndau yakati setete ngokuti Vakhanani vainga no karu jakawanda jo hondo. Pikija zvakadaro, Bharaki wakazwira. Pavainga vecibzuka pa dundhu Tabhori, Jehovha wakaita kuti kune nvura yakawanda maningi, karu jo hondo ja Sizera jakajomba kana kuzamira, Jehovha woita kuti Bharaki awine. (Vatongi 4:1-7, 10, 13-16) Mu njira yakaezana, Jehovha anozotibesera kuti tiwine kudari tikamuthemba no kuthembha ndhungamiriro jatinopuwa ngo sangano rake.—Deuteronòmio 31:6.
TEMANYI CIVARINGO COKUENDERERA MBERI MAKAVANGA MUCIKACUKUNUKI
19. Ngenyi munoda kuenderera mberi mucikacukunuki?
19 Nyika ino icito yaparajwa, tinodikana kuenderera mberi tecihwisana na Sathana kuti tirambe takavanga. (1 Timoti 6:11, 12; 2 Pedhru 3:17) Ngatiteme civaringo cokuenderera mberi takavanga ticikarembeswi ngo ndava yo kuteverehwa, kuvangirijwa kucikanasi kuvoneka, manera okurangarira o vandhu vacikazwiri mutemo ja Jehovha, masoko o kunyepa no zviro zvinophingaija. (Vaefeso 4:14) Kunja kwa izvi, ngatienderere mberi takavanga ticikacukunuki tecida Jehovha no kuzwira mupango jake. Pamukuvo wondhowo, tinodikana kuva vandhu vanozwisisa. Pa jijo inotevera, tinozovona kuti Jehovha na Jesu ndi muezaniso wakanaka wo vandhu vanozwisisa.
NDUMBO 129 Tinozocungirira
a Kuvhira mu njiku ja Adhamu na Evha, Sathana ari kueja kukhohwesa vandhu kuti ivona vangatema vega civaringo cokuti ngozvapi zvakanaka, ngozvapi zvakashata. Iyena anoitavo zvondhozvo na itusu nyamasi uno, anoeja kutikhohwesa kuti atidikani kutevera mutemo ja Jehovha nee kutozwira ndhungamiriro jatinopuwa ngo sangano rake. Cijijo ici, cinozotibesera kuti tijijivirire pa mujimu wokutama kuzwira mutemo ja Jehovha inga zvinoithwa ngo vateveri va Sathana. Cinozotibeserazve kuti tivangise cido cedu cokuda kuenderera mberi tecizwira Jehovha.
b Kuti muwane masoko mazinji ngo pamusoro pokuti Mukristu angaitisa kudini kuti ave no mavonero akanaka ngo pamusoro po ngazi, vonanyi cijijo 39 co bhuku Mungadakara Kwenda no Kwenda!
c Vonanyi musoro unowanika mu jw.org, unoti: “Jingwarirenyi ku Masoko o Kunyepa,” mu Cishona.
d Kuti muwane masoko mazinji, vonanyi cipauko 13 no 14 co bhuku Kunamata Kwakacena, mu Cishona.