1-2. Inga ndi Roti, zvineso zvapi zviri kuhwisana no Makristu nyamasi uno?

 PATINOVONA mufambiro wakashata uno vandhu nyamasi uno, tinova no mazwiro akafanana no akava na Roti. Iyena “waihwajihwa ngo mufambiro unopseruja wo vashaishi,” ngokuti waiziva kuti Jehovha anonyenya mufambiro wakadaro. (2 Pedhru 2:7, 8) Zvecivoneka kuti Roti waireremeja no kuthya maningi Mwari, wainyenya mufambiro wakashata wainga no vandhu vaimutendeneja. Itusu, takatendenejwavo ngo vandhu vacikareremeji ndhungamiriro jakarurama ja Jehovha. Pikija zvakadaro, tingakwanisa kwenderera mberi takacena mu mufambiro wedu kudari tikada Mwari no kumureremeja.—Mazwi Akangwara 14:2.

² Kuti tikwanise kuita izvi, Jehovha anotipa vangiso no ndhungamiriro jinowanika mu bhuku ra Mazwi Akangwara. Makristu ese, vanarume, vanakaji, majaha no vasharuka, vangabesereka ngo mazano o uzivi anowanika mu bhuku iri.

3. Mukuzwirana na Mazwi Akangwara 17:3, ngorapi thangwe rimwe rinotiita kuti tide kujivirira mwoyo wedu? (Vonanyi foto.)

³ Thangwe rinosisira rinotiita kuti tide kujivirira mwoyo wedu wokuezanisira ngo rokuti Jehovha anosotesesa mwoyo wedu. Izvi zvinoreva kuti iyena anokwanisa kuvona zvizinji kupinda mavonekero edu okunja anovoniwa ngo vamweni. Iyena anovona zviya zvatiri ngo mukati. (Verenganyi Mazwi Akangwara 17:3.) Iyena anozotida maningi kudari tikazaja murangariro wedu ngo uzivi waanotipa. (Johani 4:14) Ngo kudaro, atizokhuvazwi narini ngo mufambiro wakashata no manyepo a Sathana no o vandhu vari mu nyika yake. (1 Johani 5:18, 19) Patinova phedo na Jehovha, rudo hwedu no nderemejo zvinozokuravo.  Zvecivoneka kuti atidi kunyangajisa Baba wedu, atidi kurangarira zviro zvinotiita kuti tigume pa kushaisha. Patinoejwa kuti tiite zvakashata, zvaizova zvaushoni kujivhunjisa kudari: ‘Ndingazviitisa kudini kushaisha ngo cabomo kuti ndinyangajise mundhu anondida maningi?’—1 Johani 4:9, 10.

4. Kuthya Jehovha kwakabesera kudini hambzaji imweni kuti itame kuwira pa muejo?

⁴ Hambzaji Marta vanogara ku Krowasiya vakaejwa kuti vaite zvo uhure, vakatara kudari: “Zvaindinesera maningi kurangarira ushoni no kuhwisana no cido co kuda kuita zvakashata. Asi kuthya kwandaiita Jehovha kwakandijivirira.” b Zvakaitikisa kudini izvi? Hambzaji Marta vakarangarijisisa ngo muviyo jaizovepo ngo kutema civaringo cakashata. Itusu tingaitavo zvakafanana. Muviyo wakashatisisa maningi pa zvese ngo wo kunyangajisa Jehovha no kutama kuva vandhu vanotendehwa kumunamata kwenda no kwenda.—Genesi 6:5, 6.

5. Ngozvapi zvamajija ngo muezaniso wa hama Reo?

⁵ Patinothya Jehovha, atishamwarijani no vandhu vanoita zvakashata. Hama Reo vanogara ku Khongo, vakavona kuti izvi ngo zvokadi. Nopapera makore anokwana kuita marongomuna no vabhabhatijwa, vakashamwarijana no vandhu vakashata. Vakarangarira kuti avacaingepi vecishaisha, kudari vacizivi kuita ciri cese cakashata. Pacizivi kupera mukuvo wakareba, shamwari javo jakaita kuti ivona vamwe maningi doro no kuita uhure. Pondhopo vakatanga kurangarijisisa ngo zvavakajijiswa ngo vabari vavo no mudakaro wo vainga varuza. Ngowapi wakava muviyo wakona? Vakatangazve kuita zviro zvaushoni. Ngo besero ro vakuru, ivona vakahwirira kuna Jehovha. Nyamasi uno, vari kudakara ngo kushanda inga mukuru no piyona anosisira.

6. Tinoda kubhuya ngo vanakaji vapi vaviri vo kuezanisira?

 ⁶ Ngatende tibhuisane ngo cipauko 9 co bhuku ra Mazwi Akangwara, apo patinoverenga ngo vanakaji vaviri vokuezanisira, umwe anoimirira upenji umweni uzivi. (Ezanisanyi no Varoma 5:14; Vagaratiya 4:24.) Patinonga teciita izvi, ngatirangarire kuti nyika ya Sathana inoda maningi zvo uhure no zvoumitu-mitu. (Vaefeso 4:19) Ngo kudaro, zvinosisira maningi kwenderera mberi tecithya Mwari no kutama kuita zvakashata. (Mazwi Akangwara 16:6) Inga muviyo, tese, vanarume kana vanakaji, tingabesereka maningi ngo zvinonangwa mu cipauko ici. Mwanakaji umwe nga umwe anonangwa kuti ari kukoka vandhu vacina hwiru kana “vacina uzivi.” Umwe nga umwe wavo anonanga kudari: ‘Vianyi koha cingwa cangu.’ (Mazwi Akangwara 9:1, 5, 6, 13, 16, 17) Asi zvinoitika kuno vandhu vanotenderari mukoka uwu no vanoramba kuutendera, zvakasiyana maningi.

7. Mukuzwirana na Mazwi Akangwara 9:13-18, ngozvapi zvinoitika kuno vaya vanotendera mukoka wo mwanakaji wo upenji? (Vonanyi foto.)

⁷ Vonanyi mukoka wo mwanakaji wo ‘upenji.’ (Verenganyi Mazwi Akangwara 9:13-18.) Ngo cicunge cese iyena anodanija vaya vacina uzivi, eciti ‘izanyi pano’ tibuse. Ngowapi unova muviyo wakona? “Vandhu avazivi kuti kanyi ko benji kuno varungu.” Kangaije munokwanisa kurangarijira magama okuezanisira akaezana no aya, anangwa mu zvipauko zvokutanga zvo Mazwi Akangwara. Tinongwajwa ngo pamusoro po “mwanakaji wonyikanja” no wo ‘uhure.’ Bhaibheri rinoti: “Nyumba yake inoxeamira ku rufu.” (Mazwi Akangwara 2:11-19) Mazwi Akangwara 5:3-10, inotingwaja ngo pamusoro po “mwanakaji anoomba” wokuti “soka jake jinoendesa ku rufu.”

8. Ngocapi civaringo catinodikana kutema?

⁸ Vaya vanopurukira zvinonangwa ngo mwanakaji wo “upenji,” vanodikana kutema civaringo co kutendera kana co kuramba mukoka uwu. Nguva jimweni, tingatodikanavo kutema civaringo cakadari. Ngozvapi zvatingaita kudari ari wese akatieja kuti tiite uhure kana kuvona zvoumitu-mitu patinonga tiri mu interneti?

9-10. Ngoapi mathangwe manganani anotiita kuti titame kuita zvo uhure?

⁹ Tino mathangwe akawanda anotiita kuti titame kuita uhure. Mwanakaji wo “upenji” anosananguhwa ngo kunanga kwake magama akadari inga aya: “Kumwa yakabiwa, inotapira.” “Kumwa yakabiwa” iyi icinyi? Bhaibheri rinoezanisa kuvatana ko vandhu vakacadha no kumwa inotondhoja. (Mazwi Akangwara 5:15-18)  Mukaji no mwamuna vangadakajihwa ngo kuita zvovatano mu mucadho wavo, kudari iwona wakataririswa ngo zvopamutemo. Izvi zvakasiyana maningi no “kumwa yakabiwa.” Kumwa iyi iri kunangira kuita zvo uhure. Izvi kazinji zvinoitwa ngo cifishe-fishe, inga manera inoita mbavha, iyo inoba ngo cifishe-fishe. “Kumwa yakabiwa” ingavoneka inga kuti inotapira kudari vandhu vanongaro veciita zvonazvo, vanonga vecirangarira kuti avazoziviki. Izvi andizvopi. Jehovha ari kuvona zvese. Kuruza unyasha hwa Jehovha i zviro zvakashatisisa maningi zvingatiitikira. Zvokadi kamare izvi “azvitapiri” nee azvidakajisi. (1 Vakorinte 6:9, 10) Asi pano zvimweni zvinonyangajisazve.

¹⁰ Kuita uhure kungamuita kuti munyowejeke, mujizwe mucikareremejeki, kuva no mimba yamucikadi no kuita kuti mbhuri jiparajane. Ngo zvo ungwaru kutama kutendera kwenda ku “nyumba” ko mwanakaji uwu wo upenji. Kusiyapo kufa basi ku divi ro umwari, ivona vangatowana ndhendha jinoita kuti vafe. (Mazwi Akangwara 7:23, 26) Vhesi ya 18 yo cipauko 9 inonanga kuti: “Vakokwi varo vari mu ujiki mo Iba.” Ngenyi vazinji vanotendera mukoka uwu unoendesari ku ngozi?—Mazwi Akangwara 9:13-18.

11. Ngenyi kuvona zvoumitu-mitu zvinokhuvaza?

¹¹ Ciro cimweni caticikadikani kuita i kuvona zvoumitu-mitu. Vamweni vanorangarira kuti kuvona zvoumitu-mitu azvikhuvazi. Kuvona zvoumitu-mitu zvinokhuvaza, izvi zvinoita kuti vatame nderemejo kuna ivona no kuno vamweni nokutizve zvinonesa maningi kusiya cirovejeso ici. Vandhu pavanovona zvoumitu-mitu, zvinozovanesera kuzvikanganwa. Kuvona zvoumitu-mitu akubeseri vandhu kuti vasiye zviro zvakashata, asi kunobesera kuti cidoco civange maningi. (Vakorose 3:5; Jakobo 1:14, 15) Izvokadi kuti vandhu vanovona zvoumitu-mitu, vanozogumira pakuita zvo uhure.

12. Tinokhombijisa kudini kuti tiri kueja kutama kuvona zviro zvinotiita kuti tirangarire kuita zvo vatano?

¹² Inga Makristu ngozvapi zvatinodikana kuita kudari mu terefoni mwedu mukabuda zviro zvinokhombija zvoumitu-mitu? Tinodikana kuzvivhisa ngo kukasika. Ngenyi tinodikana kuita izvi? Ngokuti tinoguma pa kubesereka kudari tikaceukija kuti ciro cinosisira maningi mu upenyu hwedu i ushamwari hwedu na Jehovha. Pikija zviro zvimweni zvicikakhombiji zvoumitu-mitu, zvingatoita kuti tive no cido co kuita zvo vatano. Cimwenizve, atidi kurangarira nee ciricese haco cinotiita kuti tirangarire kuita zvo vatano. (Mateu 5:28, 29) Mukuru umweni anogara ku Tairandiya anozwi Dhavhidhi, wakati: “Ndinojivhunjisa kuti: ‘Pikija zvirozvo azvikhombiji zvoumitu-mitu, Jehovha anozodakara kudari ndikaenderera mberi ndecizvivona?’ Kurangarijisisa uku kwakandibesera kuti ndiite zviro ngo ungwaru.”

13. Ngozvapi zvinozotibesera kuti tiite zviro ngo uzivi?

¹³ Kuthya kuita ciricese cinoita kuti Jehovha anyangajwe, zvinozotibesera kuti tiite zviro ngo ungwaru. Kuthya Mwari i “cinyuke co uzivi.” (Mazwi Akangwara 9:10) Tinokwanisa kuvona izvi pakutanga ko cipauko 9 co bhuku ra Mazwi Akangwara, apo “uzivi” hwokadi hunoezaniswa no mwanakaji.

14. Mukoka wapi wakasiyana watinoverenga mu bhuku ra Mazwi Akangwara 9:1-6?

¹⁴ Verenganyi Mazwi Akangwara 9:1-6. Apa tinoverenga ngo pamusoro po mukoka wa Jehovha, Musiki wedu, uwo ari Cinyuke co uzivi hwese. (Mazwi Akangwara 2:6; Varoma 16:27) Tinoverenga ngo pamusoro po nyumba yakakura maningi ino mapirari anokwana kuita 7. Muezaniso uwu unovonesa kuti Jehovha anokova maningi nokutizve  anokwengweneja vese vanoda kushandisa uzivi wondhowo mu upenyu hwavo.

15. Jehovha anotikoka kuti tiitenyi?

¹⁵ Kuvha ku muezaniso wo mwanakaji anoezanisihwa no “uzivi hwokadi,” anonangwa mu cipauko 9 ca Mazwi Akangwara, tinojija kuti Jehovha anokova no kutipa zviro zvese zvaushoni. Mavhesi aya anonanga kuti mwanakaji uwu anokoka vandhu kuti vaviye pa muzi pake, kuti vahe zvokuha zvinonaka, nyama pomwe no vhinyu yaainga akanasirira. (Mazwi Akangwara 9:2) Kusiyapo zvondhozvo, mukuzwirana no vhesi 4 na 5: “[Uzivi hwokadi] unovereketa no vacina ungwaru, weciti: ‘Vianyi koha cingwa cangu.’” Ngenyi tinodikana kwenda kumuzi ko mwanakaji uwu wo uzivi hwokadi koha zvaanobika? Jehovha anoda kuti vana vake vave no uzivi no kuvazve vakangwaririka. Iyena aadi kuti tiite zviro zvinotikhuvaza. Izvo ngo zvinoitisa kuti ‘abesere vandhu vakarurama.’ (Mazwi Akangwara 2:7) Patinothya Jehovha ngo njira yaushoni, tinomuita kuti adakare. Tinozwa mbhangiro yake yo uzivi no kudakara ngo kuishandisa.—Jakobo 1:25.

16. Kuthya kunyangajisa Mwari kwakabesera kudini hama Araini kuti vateme civaringo ngo uzivi? Izvi zvakava no muviyo wapi?

¹⁶ Vonanyi kuti kuthya kunyangajisa Jehovha kwakabesera kudini hama Araini kuti vateme civaringo caushoni. Hama Araini vaishanda inga mukuru mu ungano no porosori ku shikora. Ivona vakati: “Vandhu vandaijijisa navo vaivona firimi jinovonesa zvoumitu-mitu inga njira yokujijisa vandhu ngo pamusoro po zvovatano.” Asi hama Araini avazivi kutendera kucengejwa ngo zvavainangari. Ivona vakati: “Ngo ndava yo kuthya kwangu kunyangajisa Jehovha, ndakaramba kamare kuvona firimi iji. Ndakasanangurira vadoni vangu kuti andicaidepi kujivona.” Hama Araini vainga vecishandisa mbhangiro yo “uzivi” hwokadi no ‘kuteveja gwanja ro uzivi.’ (Mazwi Akangwara 9:6) Kucunga kwakaitari hama iyi, kwakaita kuti majiporosori amweni atange kujija Bhaibheri no kwenda kumusongano.

17-18. Makomborero api ari kubuswa ngo vaya vanotendera mukoka wo mwanakaji wo “uzivi” hwokadi, ngozvapi zvavari kuvetera? (Vonanyi foto.)

¹⁷ Jehovha wakashandisa muezaniso jo vanakaji vaviri ava vokuezanisira, kuitira kutikhombija kuti tingaitisa kudini kuti tive no kumbeji kunodakajisa. Vaya vanotendera mukoka wo mwanakaji wo “upenji” vanoeja kudakajihwa ngo kuita uhure. Kunasa kunanga, ivona vari kupona kuti vadakajihwe wari uno, vecikanganwa kuti vari kuruza kumbeji kunodakajisa. Zvovari kuitaro zvinoita kuti ivona vawire “mu ujiki mo Iba.”—Mazwi Akangwara 9:13, 17, 18.

¹⁸ Izvi zvakasiyana maningi no vaya vanotendera mukoka wo mwanakaji “wo uzivi”! Wari  ivona vari kudakajihwa ngo kuha zvokuha zvakanasa kunasirihwa no zvinovaka muviri, zvokuha zvo divi ro umwari. (Isaia 65:13) Ecishandisa muporofita Isaya, Jehovha wakati: “Ndizwisisenyi, ihanyi bzakanaka; munozodakara ngo bzokuha bzinopa simba.” (Isaia 55:1, 2) Tiri kujijira kuda zvinoda Jehovha no kunyenya zvaanonyenya. (Nduyo 97:10) Cimwenizve, tinodakara ngo kukoka vamweni kuti vaviyevo kozwa ngo pamusoro po “uzivi hwokadi.” Zvakadari inga tiri kukhuwa “mu ndau jakakhwira jo guta kuti: ‘Acina uzivi ngaaze kuno.’” Makomborero atinoashira no anozoashira vaya vanotendera mukoka watiri kupari asipi wari uno basi, iwona ngo wo ‘kuzorarama’ kwenda no kwenda ngokuti anotitendera kuti ‘tirarame patinonga teciteveja gwanja ro uzivi.’—Mazwi Akangwara 9:3, 4, 6.

19. Mukuzwirana no bhuku ra Mucumaeri 12:13, 14, tinodikana kutema civaringo co kuitenyi? (Vonanyi bhokiso rinoti: “ Kuthya Mwari Kunotibesera.”)

¹⁹ Verenganyi Mucumaeri 12:13, 14. Kureremeja kwatinoita Jehovha kunozotijivirira no kutibesera kuti tienderere mberi takacena no tiri phedo naye mu njiku jino jo kupejisira. Tinozoenderera mberi tecikoka vandhu vakawanda kuti vaviye kojija no kubesereka ngo “uzivi” hwokadi, ngokuti tinoda maningi Jehovha no kubesereka ngo kumureremeja ngo mwoyo wese.