MUSORO WO KUJIJA WO 26
Ivanyi Makanasiririka Kuitira Njiku ya Jehovha
“Njiku ya Jehovha inoviya no usiku inga mbavha.”—1 VATESARONIKA 5:2.
NDUMBO 143 Rambanyi Mecishanda, Makarinda zve Makavetera
ZVATICAJIJA a
1. Ngozvapi zvatinodikana kuita kuti tipone pa njiku ya Jehovha?
BHAIBHERI parinobhuya ngo “njiku ya Jehovha,” rinonangira nguva yaanozotonga vavengi vake no kuponesa vandhu vake. Kareko, Jehovha waipanica majinja amweni. (Isaia 13:1, 6; Ezekieli 13:5; Sofoniya 1:8) Mu njiku jino, “njiku ya Jehovha,” inotanga ngo kuparajwa ko Bhabhironiya Guru no kuzopejisira pa hondo yo Armagedhoni. Kuti tipone pa “njiku” iyi, tinodikana kujinasirira wari. Jesu aazivi kunanga basi kuti tinodikana kujinasirira kuitira “dambujiko guru,” asi wakanangavo kuti “garanyi makanasiririka” kuitira njikuyo.—Mateu 24:21; Ruka 12:40.
2. Ngenyi tingabesereka ngo karata yo 1 Vatesaronika?
2 Pakarata yake yokutanga yaakafemehwa ku Vatesaronika, mupostori Pauro wakashandisa muezaniso jakawanda kuti abesere Makristu kuti agare akanasiririka kuitira njiku huru yo rutongeso. Mupostori Pauro waiziva kuti njiku ya Jehovha aicaizoviya pa mukuvo wondhowo. (2 Vatesaronika 2:1-3) Pikija zvakadaro, iyena wakavangisa hama kuti jijinasirire kuitira njiku yondhoyo inga inoguma mangwana, itusuvo tinodikana kuitavo zvakafanana. Ngativone zviro zvitatu zvaakasanangura: Cokutanga, njiku ya Jehovha yaizogumisa kudini, cocipiri, ndiani waizopona pa njiku yondhoyo no cocitatu, tingajinasirisa kudini kuitira njikuyo.
NJIKU YA JEHOVHA INOZOGUMISA KUDINI?
Paakatara karata yo 1 Vatesaronika, mupostori Pauro wakashandisa muezaniso jingatibesera (Vonanyi ndima 3)
3. Njiku ya Jehovha inozogumisa kudini? (Vonanyi foto.)
3 “No usiku inga mbavha.” (1 Vatesaronika 5:2) Uwu ndi muezaniso wokutanga waakasanangura mupostori Pauro ngo pamusoro po kuguma ko njiku ya Jehovha. Mbavha kazinji jinoba no usiku panonga panocidima kuti jibe zvajinoda. Njiku ya Jehovha inozogumavo ngo civhumbu yobata vandhu mu njira yovainga vacikaveteri. Pikija Makristu o cokwadi, iwona angatoshamaisika ngo manera zviro zviri kuitikari ngo kukasika. Asi mukusiyana no vandhu vakashata ava, itusu atizoparajwi.
4. Mu njira yapi njiku ya Jehovha yakagara inga kuhwajihwa kunoita mwanakaji ano mimba?
4 “Inga kuhwajihwa kwaanoita mwanakaji ano mimba.” (1 Vatesaronika 5:3) Mwanakaji ano mimba aakwanisi kuziva kamare nguva yaanozobara asi iyena anoziva kuti anozobara. Izvi pazvinoitika, kubara uku kunozoitika ngo civhumbu, kova kunohwaja no kunonesa kucijikira. Munjira yakaezana, itusu atizivi njiku nee nguva ya inozoguma njiku ya Jehovha. Pikija zvakadaro, tinoziva kuti njiku iyi inozoguma nokutizve njiku yo rutongeso hwa Jehovha kuno vandhu vakashata inozoitika icikaposi.
5. Munjira yapi dambujiko guru rakadari inga kutanga ko njiku?
5 Inga kutanga ko njiku. Muezaniso wo mupostori Pauro wocitatu unosanangurazve mbavha jinoba co usiku. Asi Pauro anocinja mavonero ake otanga kuezanisira njiku ya Jehovha no kutanga ko njiku. (1 Vatesaronika 5:4) Mbavha inoviyaya no usiku ingabatikana pakuvona zvairikubaro, yotama kuvona kuti nguva yapera. Kueja ko njiku kungatanga kuvoneka ngo civhumbu vototanga kuvoneka. Dambujiko Guru rinozosiyavo pambhene vaya vanoita inga mbavha vanoenderera mberi vari mucidima veciiita zviro zvicikadakajisi Mwari. Mukusiyana navo, itusu tinodikana kuva takanasiririka tecitama kuita zviro zvicikadakajisi Jehovha tecipsaka “zviro zvakanaka, zvakarurama no zvo cokwadi.” (Vaefeso 5:8-12) Tevere Pauro wakashandisa muezaniso muviri ecinangira vaya vacikazoponi.
NDIANI ACIKAZOPONI PA NJIKU YA JEHOVHA?
6. Mu njira yapi vandhu vazinji vakavata? (1 Vatesaronika 5:6, 7)
6 “Vese vanovata.” (Verenganyi 1 Vatesaronika 5:6, 7.) Pauro wakaezanisa vaya vacikaponi pa njiku ya Jehovha na vese vari kuvata. Ivona avaripi kuziva zviri kuitika pazvakavatendenejaro no kupera kuri kuita nguva. Ngo kudaro, ivona avakwanisi kuziva zviro zvinosisira zviri kuitika no kuda kuita ciricese. Vazinji nyamasi uno, vakavata pa divi ro umwari. (Varoma 11:8) Ivona avatendi kuti tiri kupona “munjiku jo kupejisira” nokutizve dambujiko guru rinozoviya sambiri pano. Zviri kuitikari mu nyika zvingamusa vaya vakavata ku divi ro umwari zvoita kuti vatange kudakarira masoko o Umambo atiri kucumaera. Asi vazinji vanohwirirazve kuenda kovata kusiyapo kugara vakamuka. Pikija vaya vanotothemba kuti kuno njiku yo rutongeso vanotorangarira kuti iciri ndhambo. (2 Pedhru 3:3, 4) Zvinosisira maningi kuti tigare takamuka kudivi ro umwari.
7. Kuitisa kudini vandhu vaya vanozoparajwa pa njiku ya Jehovha vakadari inga vakadhakwa?
7 “Vese vanodhakwa.” Mupostori Pauro wakaezanisira vaya vanozoparajwa ndi Mwari inga vaya vakadhakwa. Vaya vakadhakwa, vanonoka kuzwisisa zviri kuitika pa ndau yakavatendenejaro. Cimwenizve, vanotema zvivaringo zvakashata. Munjira yakaezana, vandhu vakashata avatendi kuzwira ngwajo ja Mwari. Ivona vanosana kuita zviro zvinovaendesa koparajwa. Asi Makristu anovhunjwa kuti agare akarinda no kuita zviro ngo kunasa kurangarira ushoni. (1 Vatesaronika 5:6) Mujiji umweni wo Bhaibheri, wakananga kuti kurangarira ushoni uku “i kuva no murangariro jakagajana no kutibesera kuti tiite zviro munjira yaushoni no kutiita kuti titeme zvivaringo ngo njira yo ungwaru.” Ngenyi tinodikana kuva takagajana no takavanga? Ngokuti atizotenderi kunghwinira mu zvomatongehwe o nyika no zvimweni zvinoitika nyamasi uno. Kangaije kutoita zviro kunoengejeka maningi njiku ya Jehovha painonga yeciguma. Pikija zvakadaro, atidikani kuthimwa-thimwa ngo zviro zvatinozodikana kuzoita. Mujimu wa Jehovha unozotibesera kuti tive no murangariro wa ushoni no wakagajana no kuda kutema zvivaringo zvaushoni.—Ruka 12:11, 12.
NGOZVAPI ZVATINODIKANA KUITA KUTI TIVE TAKANASIRIRIKA KUITIRA NJIKU YA JEHOVHA?
Pikija vandhu vazinji vari kugara vacikaneseki ndizvona, itusu takanasiririka kuitira njiku ya Jehovha ngo kusimira muthavo wo rutendo no rudo pomwe no kapaseti yo vetero (Vonanyi ndima 8, 12)
8. Kuitisa kudini 1 Vatesaronika 5:8, inoezanisira mugariro jinozobesera kuti tienderere mberi takarinda? (Vonanyi foto.)
8 “Ngatisimire muthavo . . . no . . . kapaseti.” Pauro ari kutiezanisa inga masoca akasimira kuitira kuenda ku hondo. (Verenganyi 1 Vatesaronika 5:8.) Zvinovetehwa kuti musoca wese ari pa basa ave akanasiririka kuitira kuhwa hondo mukuvo wese. Izvi ndizvona zvatinodikanavo kuita. Tinozova takanasiririka kuitira njiku ya Jehovha kudari tikasimira muthavo wo rutendo no rudo pomwe no kapaseti yo vetero. Mugariro iji jinozotibesera maningi.
9. Rutendo hunotijiviririsa kudini?
9 Muthavo waijivirira mwoyo wo musoca. Rutendo no rudo unojiviriravo mwoyo wedu wo kuezanisira. Zviro izvi zvinozotibesera kuti tienderere mberi tecishandira Mwari no kutevera Jesu. Rutendo unozotibesera kuthemba kuti Jehovha anozotipfupa ngo kumushandira kwatinomuita ngo mwoyo wese. (Vahebheru 11:6) Izvi zvinozotiita kuti tive takagondeka ku mutungamiriri wedu Jesu, pikija tecidikana kucungirira zvineso zvatiri kusongana nazvo. Tinokwanisa kuvangisa rutendo hwedu kuti ticijikire zvineso zvese zvatinosongana nazvo ngo kuvona muezaniso jo vandhu vo mu njiku jedu jino, vanoramba vakagondeka pikija no kuteverehwa kana no zvineso zvo mare. Tingatizazve murawu wo kudisisa mare ngo kutevejera muezaniso wo vaya vakapungura zvavainga nazvo no kudira Umambo hwa Mwari pakutanga mu upenyu hwavo. b
10. Kuda kwatinoita vandhu vatinocumaera kunotibesera kudini kuti ticungirire?
10 Rudo unosisira maningi kuti tive vandhu vakarinda. (Mateu 22:37-39) Kuda kwatinoita Mwari kunotibesera kucungirira patinonga tecicumaera pikija no zvineso zvingaviya. (2 Timoti 1:7, 8) Zvecivoneka kuti tinokhombijira rudo hwedu kuno vandhu vacikashandiri Jehovha, tinoenderera mberi tecicumaera mu ndima yedu pikija tecishandisa foni kana karata. Atiruzi vetero yo kuti vatinocumaera vanozocinja, voda kuita zvaushoni.—Ezekieli 18:27, 28.
11. Kuda kwatinoita hama no hamzaji jedu kunotibeseresa kudini? (1 Vatesaronika 5:11)
11 Kuda kwatinoita vamweni kunobatanija kuda hama no hambzaji jedu. Tinokhombija rudo uhu ngo ‘kuvangisana no kubesana ngocedu.’ (Verenganyi 1 Vatesaronika 5:11.) Inga masoca, itusu tinovangisana ngocedu. Ngo zvokadi kamare kuti musoca angakhuvaza musocadoni wake hondo painonga yeciitika asi iyena aacaizoita izvi ngo cabomo. Mukuezanavo, aticaizokhuvaza hama jedu tecizviziva kana kuhwirijira zvavakatiitira. (1 Vatesaronika 5:13, 15) Cimwenizve, tinokhombija rudo hwedu tecireremeja hama jese jinotungamirira mu ungano. (1 Vatesaronika 5:12) Pauro paakatara karata iyi ku ungano yo Vatesaronika, aicainga no gore rimwe no ya umbhwa. Kangaije hama jakagajwa kuti jitungamirire ajicaiziva zvakawanda. Zvingaita kuti vakatomboitavo zviro zvokuti azvicainga zvaushoni. Ngo kudaro, ivona vaidikana kureremejwa. Dambujiko guru parinonga recikhwedera, kangaije tingatoda maningi besero ro vakuru no ndhungamiriro kupinda zvatiri kuita wari. Tingatoguma pakukonehwa kubhuya no cine ro pasi pese kana kuti Bheteri, ndiyo ndava zvinosisira maningi kujijira kuda no kureremeja vakuru vo ungano wari. Azvinenyi ngozvapi zvingaitika, ngatienderere mberi takarinda ticikabatikani pakutama kukwana kwavo asi takabatikana pakuziva kuti Jehovha ecishandisa Jesu ari kutungamirira vanarume ava vakagondeka.
12. Vetero inojivirira kudini murangariro wedu?
12 Kudari inga kapaseti yaingwarira musoro wo musoca, vetero yedu yo ruponeso inongwarira murangariro wedu. Ngo vetero yakavanga, tinoziva kuti zviro zvatinopuwa ngo nyika ino, azvishandi ciro. (Vafiripi 3:8) Vetero yedu inotibesera kuti tive vandhu vakagajana no vakavanga. Hama Warase na hambzaji Raurinda, vanoshanda ku Afrika vakavona kuti izvo ngo zvokadi. Mukati mo sumana ndhatu, umwe wakafihwa ndi mai umweni ofihwa ndi baba. Ngondava yo mutungu wo korona vhiru, ivona avazivi kukwanisa kuhwirira kumuzi kuti vave pamwepo no mbhuri yavo. Hama Warase vakananga kudari: “Vetero yo rumuko yakandibesera kurangarira ngo pamusoro pavo kuciripi ngo manera avainga mu njiku jo kupejisira asi ngo manera avanozova mu njiku javo jokutanga mu nyika imbza. Vetero iyi inondinyaraja pandinonga ndakasuruvara ngo ndava yo kufihwa.”
13. Ngozvapi zvatinodikana kuita kuti tiashire mujimu mucena?
13 “Mucajima muriro wo mujimu mucena.” (1 Vatesaronika 5:19) Mupostori Pauro wakaezanisira mujimu mucena inga muriro uri mukati mwedu. Patinova no mujimu wa Mwari tinovangisira maningi no kudakara ngo kuda kuita zviro zvakanaka tova no simba ro kushandira Jehovha. (Varoma 12:11) Ngozvapi zvatinodikana kuita kuti tiashire mujimu mucena? Tingaita mukumbiro tecikumbira mujimu mucena, kujija Soko ra Mwari no kubatana pamwepo no sangano rake rinotungamirihwa ngo mujimu mucena. Kuita izvi kunozotibesera kuti tisakurire “mucero yo mujimu.”—Vagaratiya 5:22, 23.
Jivhunjisenyi kudari: ‘Zviito zvangu zvinokhombija kuti ndinoda kuenderera mberi ndeciashira mujimu wa Mwari?’ (Vonanyi ndima 14)
14. Ngozvapi zvaticikadikani kuita kudari tecida kuenderera mberi teciashira mujimu mucena wa Mwari? (Vonanyi foto.)
14 Mwari paanopera kutipa mujimu mucena, tinodikana kungwarira kuti titame ‘kujima muriro wo mujimu mucena.’ Mwari anopa mujimu wake basi kuna vaya vano murangariro yakacena no mufambiro wakacena. Iyena aazoendereri mberi ecitipa mujimu mucena kudari tikarangarira zviro zvakashata no kuita mukuzwirana nazvo. (1 Vatesaronika 4:7, 8) Kuti tienderere mberi teciashira mujimu mucena atidikanivo ‘kushora uporofeti.’ (1 Vatesaronika 5:20) “Uporofeti,” apa uri kunangira masoko anofemehwa ngo mujimu mucena wa Mwari kubatanijavo njiku ya Jehovha no kukasika ko njiku jedu jino. Itusu atirangariri kuti njiku ya Jehovha kana kuti Armagedhoni aizoviyi patinonga tecipona. Kusiyapo zvondhozvo, tinokhombija kuti tinoda kuti iviye ngo kukasika ngo kugara tecirangarira no kubatikana ‘pakuita mabasa okujipira o umwari’ no kuva no mufambiro wakacena njiku jese.—2 Pedhru 3:11, 12.
“IVANYI NO COKWADI PA ZVIRO ZVESE”
15. Tingaitisa kudini kuti titame kucengejwa ngo masoko anonangwa ngo madhimoni? (1 Vatesaronika 5:21)
15 Sambiri pano vavengi va Mwari vanozonanga magama aya “wari tiri kugara mu runyararo ticina ngozi iri yese.” (1 Vatesaronika 5:3) Masoko akafemehwa ngo madhimoni anozozaja nyika no kucengeja vandhu vakawanda. (Apokaripsi 16:13, 14) Tingativo kudini na itusu? Atizocengejwi kudari ‘tikava no cokwadi pa zviro zvese.’ (Verenganyi 1 Vatesaronika 5:21.) Gama ro Cigiriki rakashandiswa ro kuti “ivanyi no cokwadi,” wari rinoshandiswa ngo vandhu vanoeja simbi jakadari inga, goridhi no sirivha kuti vavone kuti dangani irona ngo rokadi. Ngo kudaro, tinodikana kueja zviya zvatinozwa no zvatinoverenga kuti tivone dangani ngozvokadi. Zvakava zvinosisira maningi Kuvatesaronika, zvinozovavo zvinosisira maningi kwatiri dambujiko guru parinonga recikhwedera. Kusiyapo kutendera zvese zvinonangwa ngo vamweni, tinoshandisa kukwanisa kwedu kurangarira kuti tiezanise zvatinoverenga no zvatinozwa na zviya zvinonangwa ngo Bhaibheri no sangano ra Jehovha. Patinoita izvo atizocengejwi no masoko anoziviswa ngo madhimoni.—Mazwi Akangwara 14:15; 1 Timoti 4:1.
16. Ngoyapi vetero yatinayo, ngozvapi zvatinodikana kuita?
16 Inga cikwata cimwe, vandhu va Jehovha vanozopona pa dambujiko guru. Umwe nga umwe wedu atizivi zviro zvinozoitika mangwana. (Jakobo 4:14) Pikija zvakadaro, azvinenyi dangani tinozopona pa dambujiko guru kana kuti tinofa dambujiko guru ricito ratanga, tinozokomborehwa ngo upenyu ucikaperi kudari tikaenderera mberi takagondeka. Vakazojwa vanozova na Jesu kudenga. Vo mavhuta amweni vanozova mu paradhiso pasi pano. Itusu tese, tinodikana kubatikana pa vetero yedu inoshamaisa no kuva takanasiririka kuitira njiku ya Jehovha.
NDUMBO 150 Psakanyi Mwari Kuitira Ruponeso Hwenyu
a Mubhuku ro 1 ro Vatesaronika cipauko co 5, tinowana muezaniso jakawanda jinotijijisa ngo pamusoro po njiku ya Jehovha iri kuviyari. “Njiku,” iyi icinyi? Inozogumisa kudini? Ndiani anozopona? Ndiani acikazoponi? Tingaitisa kudini kuti tigare takanasiririka? Tinozovona zvakanangwa ndi mupostori Pauro no kuzodavira muvhunjo iji.
b Vonanyi mutevejwana unoti: “Ivona Vakazvipira ngo Mwoyo Unoda.”
