Vabari vangu vakabuda ku Estoniya, Hondo Yocipiri yo Nyika Yese poyainga yeciithwa voenda ku Aremanha, nyika yondakabarihwa. Pondakabahwa, ivona vakatanga kunasirira kuti vaende kogara ku Kanadhaa. Ndau yokutanga yotakagara phedo no Ottawa, ku Kanadhaa, yainga nyumba dokokowane yaigaravo huku. Itusu tainga varombo kamare. Asi taikwanisa kuha mazanda pa matabishu.

Njiku imweni Zvapupu zva Jehovha zvakaverengera mai wangu bhuku ra Apokaripsi 21:3, 4. Ivona vakadakarira maningi zvovakazwaro, vototanga kucema. Mbeu yo cokwadi yakakura mu mwoyo mwavo, zvoita kuti mamaa na papaa vaenderere mberi mbhera pakubhabhatijwa.

Vabari vangu avacaikwanisa kubhuya ushoni Cingezi, asi vakabatisisa maningi cokwadi. Tingati mu masabudu ese, pikija pakupera kushanda njiku yese ku fabhirika yo kunyungurusa simbi ku Sudbury, Ontario, babangu vaitora inini no hambzaji yangu Sirvhiya kuti tiende kocumaera. Sumana jese taijija Murindiri inga mbhuri. Papaa na mamaa vakandijijisa kuda Mwari. Zvondhozvo zvakandiita kuti ndipire upenyu hwangu kuna Jehovha mu gore ra 1956, pandainga no gumi ro makore. Kuda kwavaiita Jehovha kwakandivangisa mu upenyu hwangu hwese.

Pandakapera kujija, ndakaphingaijika padoko. Ndairangarira kuti kudari ndikava piyona, andicaizova no mare inokwana kuti ndiite hwendo ngo ndeki inga zvandaidaya. Ndakawana basa ku radhiyo ro kurija muzika jakagaravhahwi. Ndaida maningi basa iri. Zvecivoneka kuti ndaishanda mbhera usiku, ndairuza maningi musongano no kushamwarijana no vandhu vacikadi Jehovha. Pejisire, hana yangu yakarovejwa ngo Bhaibheri yakandibesera kuti ndiite cinjo.

Ndakathutha kwenda ku Oshawa, Ontario. Konayo ndakazivana na Ray Norman, hambzaji yake Lesli no mapiyona amweni. Vese vakandidakarira maningi. Kuvona mudakaro wavo kwakandiita kuti ndicinje zvandaiita. Ivona vakandivangisa kuti nditange basa ro upiyona, ndakaritanga mu mweji setembro wo 1966. Ndainga ndakadakara, upenyu hwangu hwaifamba ushoni. Ngo kudaro, kwakaitika zviro zvinoshamaisa zvakacinja upenyu hwangu.

Pandainga ndecijija, ndakatara petisau ndotumira ku Bheteri ro Toronto, ku Kanadhaa. Pakufamba ko nguva, pondainga ndiri piyona, ndakakokwa kuti ndishande ku Bheteri ko makore marongomuna. Inini ndaida maningi Lesli, ngo kudaro, ndaithya kuti kudari  ndikatendera mukoka uwu, andicaizomuvonazve. Pasure po kuita mukumbiro wakareba ngo mwoyo wese, ndakatendera mukoka wo kwenda ku Bheteri, ndoenekana na Lesli ndakasuruvara.

Pandakagumeyo ndakashanda ku ndau inopajihwa nguvo, pakufamba ko nguva pa ndau inoashihwa varendo. Pa mukuvo uwu, Lesli wakatanga kushanda inga piyona anosisira ku Gatineau, Kebheki. Pa vhaza jakawanda ndaimuvhunjisa kuti iyena ari kuitenyi no kuvhunjisa dangani ndainga ndatema civaringo caushoni. Tevere cakaitika ciro cakandidakajisa maningi mu upenyu hwangu. Ray hama ya Lesli yakakokwa kuti iviye koshanda pa Bheteri. Iyena wakava mudoni wangu wo kwaratu. Izvo zvakaita kuti ushamwari hwangu na Lesli uvange maningi. Takacadha mu njiku yokupejisira yo makore marongomuna ondainga ndakagajwa kuti ndishande pa Bheteri, njiku 27 ya fevereiro yo 1971.

Inini na Lesli takagajwa kuti tiende ku ungano inoverekethwa ndumi yo Cifransa, ku Kebheki. No papera makore manganani, ndakashamaisika maningi pondakakokwa kuti ndishande inga muvonereri wo ndharaundha, pondainga no makore anokwana kuita 28. Ndaijivona kuti ndiri mujaha maningi no acikafaneri. Asi ndakavangiswa maningi ngo magama anowanika pana Jeremia 1:7, 8. Lesli wainga akaita asindheti ngo karu, zvokuti wainesehwa maningi kuti avate. Waro taizoitisa kudini kuti tiite basa iri ro kuvhakacira ungano? Iyena wakati: “Kudari Jehovha watikoka kuti tiite ciri cese, aticaidikana kueja kuciita?” Takatendera mukoka uwu no kudakajihwa ngo basa iri ko makore anokwana kuita 17.

Inga muvonereri wo ndharaundha, ndainga ndakabatikana maningi, nee andicainga no mukuvo wakawanda kuti ndikwanise kubungaijavo no mukaji wangu. Apa ndakava no cijijo cimweni. Ngo Muciposa comangwanani, musuvo wedu wakatakwa. Pondakafunungura musuvo apacaengepi no mundhu, asi painga no sesto yainga no jira, mafuruta, kejhu, pau jakadihwa zviro, botiri ro vhinyu, kopo no ciphepha cainga cicizivi kutahwa zina, asi cainga no masoko aya: “Toranyi mukaji wenyu muende kobungaija naye.” Yainga njiku yakaseja no ino zuva. Asi ndakavhunja mukaji wangu kuti ndainga no hurukuro kuti ndinasisire, ngo kudaro, andicaizokwanisa kwenda naye. Iyena wakazwisisa, asi wakasuruvara padoko. Pondakagara pasi, hana yakatanga kurova. Ndakarangarira maningi bhuku ro Vaefeso 5:25, 28. Magama aya a Jehovha akandiceukija kuti ndinodikana kutaja mazwiro o mukaji wangu. Pasure po kuita mukumbiro, ndakavhunja mukaji wangu kuti: “Ngatende,” izvi zvakamudakajisa maningi. Ndakafambisa karu yedu, toenda ku ndau yakaseja mumbhiripiri mo murambo, takawaja jira redu togara. Yakava njiku inodakajisa maningi yatakava nayo. Pikija zvakadaro, ndiciri kunasirira hurukuro jangu.

Kushanda inga muvonereri wo ndharaundha kwakava kunodakajisa, takashandira ku nyika jakawanda kuvha ku Korombiya Bhritanika mbhera Terra Novha. Cido cangu ciya co kuda kuita hwendo cainga  cecikwanirisika. Ndairangarira kwenda ku Cikora co Giriyadhe asi andicaida kuva misiyonariyo. Ndaivona mamisiyonariyo inga vandhu vanosisira maningi, ndaivona inga ndicikakwanirisi. Kusiyapo zvondhozvo, ndaithya kutumihwa ku nyika yo Afrika, kwaingaya no ndhendha no hondo. Ndaidakara maningi.

Mu gore ro 1992, Zvapupu zva Jehovha zvakatangazve kucumaera pambhene mu nyika jimweni jaiita divi ro Uniyau Sovhietika. Ngo kudaro, hama jakativhunjisa dangani taizokwanisa kuthutha kuti tiende ku Estoniya kuti tishande inga mamisiyonariyo. Takashamaisika maningi, asi takaita mukumbiro ngo pamusoro pazvo. Pa vhaza iyi takajivhunjisazve kudari: ‘Kudari Jehovha akatikoka kuti tiite zviri zvese azvicaizova zvaushoni kueja kuzviita?’ Itusu takatendera, asi inini ndakarangarira kudari ‘zvaushoni, ngokuti atiripi kwenda ku Afrika.’

Ngo kukasika takatanga kujijira ndumi inoverekethwa ku Estoniya. No papera mweji munganani tiri konayo, ndakakokwa kuti ndishande inga muvonereri wo ndharaundha. Taidikana kufambira ungano jinokwana kuita 46 no magurupu anokwana kuita matatu ainga ku nyika jo Bhartiko, jakadari inga Kaliningrad no Rusiya. Izvi zvaireva kuti taidikana kujijira ndumi yo Ciretau, Cirituwaniya no Cirusiya. Zvainesa maningi. Shamwari jedu jakadakara maningi ngo kuvona kuvangisira kwataiita, ngo kudaro, jakatibesera. Mu gore ra 1999 ku Estoniya kwakava no Bheteri, ndakagajwa kuti ndishandire pa komisau yo firiyari pamwepo na hama Toomas Edur, Lembit Reile na Tommi Kauko.

Takaziva hama jakawanda jainga jakatohwa joendeswa ku Sibheriya. Pikija no kushaisha kutajwa mu kadheya no kugara ndhambo no mbhuri javo, ivona avazivi kugara vandhu vanoviga bundu. Vakaramba vakadakara no kuvangisira mu basa ro kucumaera. Izvi zvakatibesera kuvona kuti tinokwanisa kucungirira no kuramba takadakara pikija no zvineso.

Makore paainga ecikhirira no kushanda ngo simba kwatainga teciita ticikazorori, mukaji wangu wakatanga kuremba maningi. Itusu atizivi kuzwisisa ngo kukasika kuti kuremba kwake uku, yainga ndhendha inodanijwa kuti fibromyalgia. Takatema civaringo co kuda kuhwirira ku Kanadhaa. Potakakokwa kuti tiende ku Cikora co ku Patterson, Novha Yorki, Estadhus Unidhus yo Amerika, tairangarira kuti aticaizokwanisepi kwendeyo. Pasure po kuita mukumbiro, takatendera. Jehovha wakakomborera civaringo cedu. Potainga ku cikora ici, mukaji wangu wakakwanisa kuraphwa ndhendha yake iyi. Ngo kudaro, takakwanisa kuita mabasa inga zvataiita kare.

Mu usiku umweni mu gore ro 2008, potainga ku Estoniya, takafonehwa ngo hama jo ku cine ro pasi pese, jecitivhunjisa dangani taitendera kwenda koshanda ku nyika yo Khongo. Ndakashamaisika maningi ngokuti ndaidikana kupa mupinguro pa njiku inotevera. Pakutanga andizivi kuvhunja mukaji wangu, ngokuti ndaizviziva kuti aacaizovata. Kusiyapo zvondhozvo, wakazokonehwa kuvata ndini, ngokuti ndaiita mukumbiro kuna Jehovha ndecimuvhunja zvaindiitisa kuti nditame kudakarira kwenda koshandira ku Afrika.

 Pa njiku yakatevera ndakavhunja mukaji wangu kuti: “Jehovha ari kutikoka kuti tiende koshandira ku Afrika. Tinozvizivisa kudini kuti atikwanisi kudari ticizivi kueja?” Potakapeja makore anokwana kuita 16 tiri ku Estoniya, takakhwira ndeki kwenda ku Kinshasa, nyika yo Khongo. Bheteri rakondhoyo rainga no jhardhim yakaseja maningi, yainga ndau yakanyararisa. Ciro cokutanga cakadira mukaji wangu mu kwaratu yedu, ndi cikhadhi caainga naco cingo takavha Kanadhaa. Pa cikhadhi ici painga pakatahwa magama aya: “Dakarai paunonga uri.” Potakatanga kuzivana no hama, kuitisa jijo jo Bhaibheri no kudakajihwa ngo kuva mamisiyonariyo, takadakara maningi. Pa kufamba ko nguva, takava no mudakaro wo kuvhakacira mabheteri akawanda mu nyika jinokwana kuita 13 jo mu Afrika. Izvi zvakatibesera kuti tikwanise kuvona kusiyana-siyana ko zviro no kuseja kwakaita vandhu. Kuthya kwandaiitaya kwakapera, takabonga Jehovha ngo kutitumira kuti tiende koshanda ku Afrika.

Ku Khongo, takapuwa zvokuha zvakasiyana-siyana, zvimweni tairangarira kuti aticaizvidakarira. Patakavona hama jecidakara ngo kuha izvi, itusu takaejavo kuzviha, takadakara maningi ngo kuzviita.

Takaita hwendo kwenda ku divi rimweni ro ku nyika yo ku Khongo kuti tiende kovangisa hama no hambzaji no kujipa zviro zvojaida. Pa ndau iyi cikwata co masoca cainga cecihwisa vanakaji no vana. Hama jakawanda ajicainga no zvizinji ku divi ro kunyama. Pikija zvakadaro, vetero yavo yakavanga ku rumuko, kuda kwavaiita Jehovha no kugondeka kwavo ku sangano rake, kwakapsasa maningi mwoyo wedu. Muezaniso wavo wakatibesera kurangarira kuti ngenyi tiri kushandira Jehovha no kuvangisa rutendo hwedu kwaari. Hama jimweni jainga jakaruza nyumba javo no zviro zvavairima. Izvi zvakandiceukija kuti zviro zvo kunyama zvingangarangaka ngo kukasika nokutizve ushamwari hwedu na Jehovha unosisira maningi. Pikija no zvineso zvojaisongana najo, hama ajicaigara jecirekramari. Mavonero ovaiita zviro akatiita kuti tikwanise kuhwisana no zvineso zvedu no cicunge.

Perapo, pakaitikazve zviro zvimweni zvinoshamaisa. Takakumbihwa kuti tithuthe kuti tiende ku Bheteri ro ku Hong Kong. Aticairangarira kuti taizogara  ku Aziya! Pasure pokuvona besero ra Jehovha ku nyika jese jotakashanda, takatendera mukoka uwu. Mu gore ra 2013 no musoji padama, takasiya shamwari jedu jotaida maningi no zviro zvinoshamaisa zvo ku Afrika, ticikazivi kuti ngozvapi zvaizoviya.

Yakava cinjo yakakura maningi kwenda kogara ku Hong Kong, ngokuti i dhorobha rakazara ngo vandhu vanovha ku ndau jakasiyana-siyana. Takanesehwa maningi kuti tibhuye Cishina. Hama jakanasa kutiashira ushoni, takadakarira maningi zvokuha zvokondhoyo. Pikija basa rainga reciwanda maningi pa Bheteri, zviro zvainga zvecidhura maningi. Ngo kudaro, Mukhumbi Unotonga wakatema civaringo co kutengesa predhiyo zinji jaishandiswa ngo Bheteri. No papera mukuvo mushoma, mu gore ra 2015, takaenda ku Bheteri ro Koreya dhu Suri, kotakaenderera mberi tecishanda. Kondhoyo, takadikana kujijira kuvereketa ndumi imweni inonesa maningi. Pikija atito takwanisa ushoni kuivereketa, hama jiri kutivangisa jecinanga kuti tiri kuitisa nane padoko ngo padoko.

Kuita shamwari jipsa azvizivi kureruka mukuvo wese, asi takavona kuti kutanga ndusu kukhombija kuashira kwedu vamweni, kungatibesera kuti tizivane no vamweni ngo kukasika. Takakwanisa kuvona kuti hama jedu jakatojana maningi ngo cajo kuciripi kusiyana. Cimwenizve, Jehovha wakatiita mu njira yokuti tinokwanisa kufunungura mwoyo wedu no kukhombija rudo kuno shamwari jakawanda.—2 Vakorinte 6:11.

Takajijira kuti tinodikana kuvona vandhu inga manera Jehovha anovavona. No kupsaka njira yo kuvona manera Jehovha anokhombija rudo hwake no ndhungamiriro jake. Mukuvo wese woticaijizwa ushoni, kana pataijivhunjisa dangani vamweni vaitidakarira kana kuti haiwa, taienda koverengazve zvikhadhi zvinovangisa zvotakapuwa ngo shamwari jedu. Jehovha wakadavira mukumbiro jedu, wotigondesa kuti anotida no kutivangisa kuti tienderere mberi.

Pa makore ese aya, inini no mukaji wangu takajijira kuti zvinosisira maningi kupsaka nguva yo kugara tese, azvinenyi kuti takabatikana kudini. Cimwenizve, takazwisisa kuti tinodikana kuseka patinoceukija zviro zvimweni zvatakaita maningi-ningi paya potaieja kujijira ndumi imweni. Usiku hwese, taieja kupsaka ciro cimwe kuti tibongesere Jehovha.

Kunasa kunanga, ndaijizwa kuti andicaikwanisa kuva misiyonariyo kana kugara ku nyika imweni. Asi ndakadakara ngo kuziva kuti zviro zvese zvinokwanisika ngo besero ra Jehovha. Ndakarangarira magama o muporofita Jeremiya wakati: ‘Oh Jehovha ndimwi makandicengeja.’ (Jeremia 20:7) Eya, iyena wakatipa zviro zvakawanda maningi zvinotishamaisa, zvinodakajisa no kutipa makomborero aticairangarira ngo kukwanirisa cido cangu cokuda kuita hwendo ngo ndeki. Takaita hwendo ku ndau jakawanda maningi, jokuti andizivi kumbojirangarira pondainga cimujaha no kuvhakacira mabheteri akawanda maningi. Ndinobongesera maningi mukaji wangu ngo kundibesera mumabasa ese ondakagajwa.

Mukuvo wese tinoceukija kuti tiri kuita zvese izvi ngokuti tinoda Jehovha. Makomborero ese atinawo wari anovonesa zviro zvizinji zvinozoita Jehovha kumbejiyo apo ‘paanozofunungura nyara jake kuti agutise zvese zvinorarama.’—Nduyo 145:16.