Bhaibheri arinangi. Asi irona rinotipa masoko anodakajisa anotibesera kuzwisisa kuti ngenyi ivona vakatema civaringo ici.

Ngirozi imweni yakavhunja Mariya kuti iyena waizova no mimba no kubara mwana. Ngirozi poyakananga masoko aya, Mariya na Josefa vaigara ku Nazareta, dhorobha raakabarihwa Josefa ku Garireya. (Ruka 1:26-31; 2:4) Pavakavha ku Ejipita, vakahwirira ku Nazareta. Jesu wakakurira kondhoyo wova mu gari weyo. (Mateu 2:19-23) Ngo iyo ndava, tikarangarira ngo pamusoro po Nazareta tinorangarira mazina o vandhu vatatu ava, Jesu, Josefa na Mariya.

Mariya wainga no ukama waidanwa Erizabheti, waigara ku Judha. Erizabheti wainga mukaji wo mupiri mukuru Zakariya, iyena wakazova mai wa Johani Mubhabhatiji. (Ruka 1:5, 9, 13, 36) Mariya wainga wakavhakacira Erizabheti wogara naye ko mweji jinokwana mutatu. Perapo Mariya wakazohwirira ku Nazareta. (Ruka 1:39, 40, 56) Mariya waiziva ushoni ndharaundha yo Judha.

Pakufamba ko nguva, Josefa wakazwira mutemo wo ‘kotaririsa.’ Ngo kudaro, Josefa wakaita hwendo kuvha Nazareta kwenda Bheterehema “dhorobha ra Dhavhidhi,” inga zvainga zvakaporofetwa kuti Mesiya waizobarihwa kondhoyo. (Ruka 2:3, 4; 1 Samueli 17:15; 20:6; Mikeya 5:2) Mariya paakapera kubara, Josefa waida kuhwirira ku nyika yake no mwana waingari wabahwa. Ivona vakagara ku Bheterehema, kuvha konayo kwenda Jerusarema kunoita makiromita anokwana kuita 9. Izvo zvaizovabesera kuti vatore mwana wavo kuti vaende naye ku themberi kuti vaite mupiro mukuzwirana no mutemo.—VaLevi 12:2, 6-8; Ruka 2:22-24.

Ngirozi ya Mwari yainga yakavhunja Mariya kuti mwana waaizobarari waizopuwa “cigaro co umambo ca . . . Dhavhidhi” no kutonga inga “Mambo.” Zvingaita kuti Josefa na Mariya vakarangarira kuti zvinosisira kuti Jesu abahwe mu dhorobha ra Dhavhidhi. (Ruka 1:32, 33; 2:11, 17) Kangaije ivona vakatorangarira kuti zvaizova zvaushoni kwenderera mberi vari kondhoyo vecivetera ndhungamiriro yavaizopuwa ndi Mwari.

Atinasi kuziva kuti ivona vainga vaano mukuvo wakadini vari ku Bheterehema vazivi vanganani vo ndhondho povakaguma kondhoyo. Povakaguma, mbhuri iyi yainga yecigara pa nyumba, “mwana” wainga aciri mudoko. (Mateu 2:11) Zvinovoneka inga kuti kusiyapo kuhwirira ku Nazareta, vakagara Bheterehema ko mukuvo wakati kuti.

Herodhi wakapa mutemo wokuti vauraye “vana vese vorume vo mu Bheterehema.” (Mateu 2:16) Pasure po kuashira masoko aivha kuna Mwari, Josefa na Mariya, vakatiza kwenda ku Ejipita na Jesu mbhera kufa ka Herodhi. Pakufamba ko nguva, Josefa wakatora mbhuri yake wohwirira ku Nazareta. Ngenyi avazivi kuhwirira ku Bheterehema? Ngokuti pa mukuvo uwu, mwana wa Herodhi, Arkerau waitonga Judheya, wainga mundhu wakashata maningi. Kusiyapo zvondhozvo, ngirozi ya Jehovha yainga yakavhunja Josefa ngo ngozi yaizovepo ngo kwenda kondhoyo. Ku Nazareta iyena waizokwanisa kurera Jesu inga munamati wokadi wa Jehovha.—Mateu 2:19-22; 13:55; Ruka 2:39, 52.

Zvinovoneka kuti Josefa wakafa Jesu acito afa no kuita kuti vamweni vakwanisevo kwenda kudenga. Ngo kudaro, Josefa anozomuswa kuti ararame pasi pano. Vazinji vanozosongana naye no kuziva zvizinji ngo pamusoro po kuti ngenyi iyena na Mariya vakaenderera mberi vari Bheterehema Jesu naapera kubahwa.