1. Mukuzwirana na 1 Pedhru 5:2, ngorapi basa rinodakajisa rinoithwa ngo vakuru?

 VAKURU vakagajwa kuti vangwarire mavhuta anosisira a Jehovha. Vanarume ava, vanoreremeja maningi basa ravo ro kushandira hama no hambzaji javo no kushanda ngo simba kuti vave ‘vahavisi vanohavisa.’ (Jeremia 23:4; verenganyi 1 Pedhru 5:2.) Tinobongesera maningi ngo kuva no vanarume ava mu ungano jedu!

2. Vakuru vangasongana no zvineso zvapi?

² Pavanonga veciita mabasa ovakagajwa, vakuru vanosongana no zvineso zvakawanda maningi. Ngo divi rimweni, kutaja ungano zvinobatanija kuita mabasa akawanda. Hama imweni iri mukuru inogara ku Estadhus Unidhus inozwi Toni, yakadikana kujijira maningi ngo kuva mundhu wakaezanana pa kuita basa rovainga vakagajwa. Ivona vakananga kudari: “Mukutanga ko mutungu wo koronavhiru, ndakaeja kushanda ngo simba kuti ndironge musongano jo ungano no wo basa ro kucumaera. Azvinenyi no basa rondainga ndaita, mukuvo wese ndaidikana kuita zvinopinda izvi. Ndakabatikana maningi, zvoita kuti nditame nguva yo kuverenga Bhaibheri, yo kuita jijo yo mundhu ega no yo kuita mukumbiro.” Mukuru umweni wo ku Kosovho, anodanwa Ereri, wakahwisana no zvineso zvakasiyana pavainga ku mutundhu umweni waiitika hondo, vaivona zvecinesa kuzwira ndhungamiriro jo sangano. Ivona vakati: “Rutendo hwangu wakaejwa Bheteri porakandigaja kuti ndiende kobesera hama no hambzaji jainga jiri kundau yaiitikari hondo. Inini ndaithya, nokutizve ndhungamiriroyo yaiita inga icikabeseri.” Hama Timi, vainga misiyonariyo vaigara ku Aziya, vakavona kuva zvecinesa maningi kuita zviro zvavaida njiku no njiku. Ivona vakati: “Mukuvo muzinji ndaijizwa ndakaremba kuti nditaje hama no hambzaji.” Ngozvapi zvingabesera vakuru vari kuhwisana no zvineso zvakafanana?

3. Tingabesereka kudini ngo muezaniso wo Mutongi Gidhiyoni?

 ³ Vakuru vangajija zviro zvizinji kuvha ku muezaniso wo Mutongi Gidhiyoni. (Vahebheru 6:12; 11:32) Pa mukuvo umwewo, iyena wainga mungwariri no muhavisi wo vandhu va Mwari. (Vatongi 2:16; 1 Kronike 17:6) Inga ndi Gidhiyoni, vakuru vakagajwa kuti vataje vandhu va Mwari pa mukuvo wo zvineso. (Mabasa o Vapostori 20:28; 2 Timoti 3:1) Itusu tingajija kuva vandhu vanozvidodokesa no vanozwira ngo muezaniso wa Gidhiyoni. Kuvangisira kwake kwakaejwa paainga eciita mabasa aakagajwa. Azvinenyi dangani tiri vakuru kana kuti haiwa, tinodikana kuva vandhu vanobongesera, ngo kuva no vakuru pakati pedu. Tingabesera vanarume ava vo kumujimu vanoshanda ngo simba.—Vahebheru 13:17.

4. Gidhiyoni wakakhombijisa kudini kujidodokesa?

⁴ Gidhiyoni wainga mwanarume waijidodokesa. b Ngirozi ya Jehovha poyakavhunja Gidhiyoni kuti wainga asanwa ndi Jehovha kuitira kusujunura vandhu vake ku Vamidhiyani vainga no simba maningi, ngo kujidodokesa kwake iyena wakadavira kuti: “Mbhuri yangu iri murombo kupinda jese pa ukama hwa Manasa, ininivo ndiri mundhu wokupejisira pa muzi pangu.” (Vatongi 6:15) Waijizwa acikakwanirisi pa kuita basa raakagajwa, asi Jehovha waiziva kuti iyena waizokwanisa. Ngo besero ra Jehovha Gidhiyoni wakakwanirisa basa raakagajwa.

5. Ngopapi panganesa kuti mukuru ave anojidodokesa?

⁵ Vakuru vanoita zvese zvavanokwanisa kuti vakhombije kujidodokesa pa zviro zvese zvavanoita. (Mikeya 6:8; Mabasa o Vapostori 20:18, 19) Ivona avajikuji ngo zviro zvavari kuda kuita kana kuti zvavanonga vaita, nee avajipi ndava ngo zvavanonga vaposa. Asi pamukuvo umweni zvinonesa kuti mukuru ave mundhu anojidodokesa. Inga muezaniso, iyena angatendera mabasa ese aanogajwa, wozovona kuti zvinonesa kukwanirisa. Pa mukuvo umweni zvinganesa kuti ave anojidodokesa vandhu pavanomubonga ngo basa raaita asi vamweni vomushora ngo manera aaitaro basa. Vakuru vangajijenyi ngo muezaniso wa Gidhiyoni kuti vazobesereke pa mugariro jakadari?

6. Vakuru vanojijenyi ngo kujidodokesa kwa Gidhiyoni? (Vonanyi foto.)

⁶ Kumbiranyi besero. Mundhu anojidodokesa anoziva kuti asipi zvese zvaanokwanisa  kuita. Gidhiyoni wainga mundhu waijidodokesa ngo kujizwa akasujunuka kukumbira besero vamweni. (Vatongi 6:27, 35; 7:24) Vakuru vano uzivi vanoitavo zvakafanana. Hama Toni vambonangwaya, vanosanangura kuti: “Ngo kuva kwangu mujijisi, ndaitendera mabasa akawanda kupinda aya ondaiziva kuti ndaizomakwanisa. Ndakatemavo civaringo co kubatanija shwiro iyi yo kujidodokesa pa kunamata kwedu ko mbhuri ndovhunjisa mukaji wangu kuti anangevo mavonero ake ngo pamusoro po shwiro iyi. Takabesereka ngo kuvona vhidhiyo iri mu saiti yedu jw.org ino musoro unoti: “Rovejanyi, Thembanyi zve Ipanyi Simba Vamweni inga Jesu.” Hama Toni vakatanga kukoka hama jimweni kuti jizovabesere pa basa ravo. Ngowapi wakava muviyo? Hama Toni vakati: “Mabasa o mu ungano ari kuithwa, inini wari ndaano mukuvo wakawanda kuti ndivangise ushamwari hwangu na Jehovha.”

7. Vakuru vangatevejeresa kudini Gidhiyoni pavanoshohwa? (Jakobo 3:13)

⁷ Kudari ari wese akamushora mucadavira ngo kunyangajwa. Muejo umweni ku vakuru nga paya pavanoshohwa. Muezaniso wa Gidhiyoni ungabeserazve. Pacina kukana-kana, eciziva kuti wainga acizivi kukwana, Vaefraimu pavakamushora, wakadavira ngo njira yaushoni. (Vatongi 8:1-3) Gidhiyoni aazivi kudavira ngo kunyangajwa. Iyena wakakhombija kuti waijidodokesa ngo kupurukira kuneseka kwavo no kubhuya navo ngo kungwarira kwese no kuvaita kuti vanyarare. Vakuru vano uzivi vanotevejera Gidhiyoni ngo kunasa kupurukira no kudavira ushoni kudari vakashohwa. (Verenganyi Jakobo 3:13.) Ngo kuita kudaro zvinoita kuti ungano ive no runyararo.

8. Vakuru vanodikana kuitenyi pavanosimbhwa? Ipanyi muezaniso.

⁸ Ipanyi rukujo hwese kuna Jehovha. Gidhiyoni paakasimbhwa ngo vamweni ngo kunyisa kwaakaita Vamidhiyani, iyena wakapa rukujo Jehovha. (Vatongi 8:22, 23) Vakuru vangatevejeresa kudini Gidhiyoni nyamasi uno? Vanodikana kupa rukujo Jehovha pa zviro zvavanoita. (1 Vakorinte 4:6, 7) Inga muezaniso, mukuru paanosimbhwa ngo kunasa kwake kujijisa ushoni, anodikana kukhombija kwazvinovha zvaanojijisaro, mu Bhaibheri kana kujijiswa kwatinoithwa ngo sangano ra Jehovha. Vakuru nguva jese vanodikana kujivona pacavo kuti vari kujikuja kana kuti haiwa. Vonanyi muezaniso wo mukuru umweni anodanijwa kuti Timoti. Hama Timoti povakagajwa vaidakarira maningi kuita hurukuro ya vese. Ivona vakati: “Ndaiita muezaniso jakareba no jinonesa. Kazinji vandhu vaindibongesera ngo hurukuro jondaiita. Vandhu vakabatikana pa kundikuja kusiyapo kukuja Bhaibheri na Jehovha.” Pakufamba ko nguva, hama Timoti vakazwisisa kuti vaidikana kuita cinjo pa manera avo o kujijisa kuti vandhu vatame kuvakuja. (Mazwi Akangwara 27:21) Ngowapi wakava muviyo? Ivona vanosanangura kuti: “Vandhu vakasiyana-siyana vaindivhunja manera ovakabesereka ngo hurukuro yangu kuti vahwisane no zvineso zvavo, kuti vacungirire muejo no kukhwedera phedo na Jehovha. Ndinodakara maningi ngo kuzwa manera andinosimbhwa kupinda kare.”

9. Kucunga no kuzwira ka Gidhiyoni kwakaejeswa kudini? (Vonanyi foto yo pakapa.)

⁹ Gidhiyoni paakapera kugajwa kuti atungamirire Vaiziraeri, waidikana kuva mundhu wakacunga no anozwira. Iyena wakavhunjwa ndi Jehovha kuti waidikana kuphwanya dandiro ra baba wake ravainamatira Bhaari. (Vatongi 6:25, 26) Gidhiyoni paakapera kuunganija masoca, Jehovha wakamuvhunja ko vhaza jinokwana kuita mbiri kuti iyena waidikana kupungura  mutengo wo masoca. (Vatongi 7:2-7) Pakupejisira, wakavhunjwa kuti aende ku akapamento kohwisa muvengi wake cousiku.—Vatongi 7:9-11.

10. Kuzwira ko mukuru kungaejeswa kudini?

¹⁰ Vakuru vanodikana kugara vakanasiririka kuti ‘vazwire.’ (Jakobo 3:17) Mukuru anozwira anocijikira pa zvinonangwa mu Matahwa no zvinonangwa ngo sangano ra Jehovha. Ngo kuita kudaro, anogaja muezaniso wakanaka ku vamweni. Asi pikija zvakadaro, kuzwira kwake kungaejwa. Inga muezaniso, iyena angavona zvecinesa kuzwira ndhungamiriro jaanopuwa. Pamukuvo umweni angatorangarira kuti ndhungamiriro iri yese yaanopuwa ndiyonadi kana kuti ngo yo ungwaru. Kana kuti iyena angatogajwa basa rokuti ringazomudira mukadheya. Vakuru vangatevejeresa kudini kuzwira ka Gidhiyoni pa shwiro jakadari?

11. Ngozvapi zvingabesera vakuru kuti vave vandhu vanozwira?

¹¹ Zwiranyi ndhungamiriro no kuishandisa. Jehovha wakavhunja Gidhiyoni kuti aparaje dandiro ra baba wake no kuvaka dandiro imbza ra Jehovha no kuvhunjwa kuti ngocapi cinyama caaidikana kupira. Gidhiyoni aazivi kukana-kana kana kurangarira kuti azvicaingepi izvona zvaakavhunjwa ndi Jehovha, iyena wakazwira zvaakavhunjwaro no kuzviita. Nyamasi uno, vakuru vo ungano vanoashira ndhungamiriro jo sangano ra Jehovha pecishandiswa karata, zviziviso no ndhungamiriro jimweni jinotibesera kuti tirambe takavanga no kuramba tiri phedo na Jehovha. Tinoda vakuru vedu vo ungano no kuzwira ndhungamiriro javanotipekeja. Tese mu ungano tinozobesereka.—Nduyo 119:112.

12. Vakuru vangashandisisa kudini mbhangiro iri pana Vahebheru 13:17, kudari sangano rikaita cinjo?

¹² Ivanyi makasujunuka pa kuita cinjo. Ceukijanyi kuti Jehovha wakakumbira Gidhiyoni kuti apungure mutengo wo masoca anokwana kuita 99. (Vatongi 7:8) Kangaije iyena wakatojivhunjisa kudari: ‘Cinjo iyi inodikanadi? Kureva kuti izvi zvinoshandadi?’ Kusiyapo kuita izvi, Gidhiyoni wakazwira. Vakuru nyamasi uno, vanotevejera muezaniso wa Gidhiyoni ngo kuzwira pa kuita cinjo mukuzwirana no ndhungamiriro javanopuwa ngo sangano. (Verenganyi Vahebheru 13:17.) Inga muezaniso mu gore ra 2014, Mukhumbi Unotonga wakacinja manera owaibesera pa kuvakiswa ko Nyumba jo Magungano no Nyumba jo Umambo. (2 Vakorinte 8:12-14) Ungano aicaizosarepi no magava kuitira kuzopagari. Inga manera zvaiithwa kare, sangano raifiarisi mare yo kuvaka Nyumba yo Umambo, perapo ungano yaizopagari mareyo padoko ngo padoko. Asi wari uno sangano rinoshandisa mare yo mupiro jo ungano jese kuti rivakise Nyumba jo Umambo no Nyumba jo Magungano kwese kwazvinonga zvecidiwa, pikija kuti ungano imwe ingatopekeja mupiro jakawanda. Hama Jhose pavakazwa cinjo iyi ivona vakakana-kana kuti dangani  yaizoshanda, vecirangarira kudari: ‘Pikija Nyumba yo Umambo imwe basi aicaizovakiswazve, asipi iwona manera azvinoizwa zviro mu nyika ino.’ Ngozvapi zvakabesera hama Jhose kuti vabesere ndhungamiriro iyi? Ivona vakati: “Magama anowanika pa bhuku ra Mazwi Akangwara 3:5, 6, akandiceukija kuti ndinodikana kuthemba Jehovha. Muviyo wakona unoshamaisa maningi! Ativakisi basi Nyumba jo Umambo asi tinojijira kupa mupiro ngo njira yakasiyana-siyana kuti basa rienderere mberi.”

13. (a) Gidhiyoni wainga no cokwadi cenyi? (b) Vakuru vangatevejeresavo kudini muezaniso wa Gidhiyoni?

¹³ Itanyi kuda kwa Jehovha no kucunga kwese. Gidhiyoni wakazwira Jehovha pikija paya paainga ecithya. (Vatongi 9:17) Pasure po kuashira cigondiso ca Jehovha, Gidhiyoni waithemba kamare kuti Jehovha waizomubesera pakujivirira vandhu vake. Vakuru vokuti vari kugara ku ndau jokuti basa redu riri kurambijwa, vari kutevejera muezaniso wa Gidhiyoni. Ivona vanotungamirira no kucunga kwese musongano, basa ro kucumaera pikija no kusungwa, kuthyisijihwa, kuruza basa no zvimweni. c Dambujiko guru parinonga reciitika, vakuru vanozoda kuzwira ndhungamiriro javanoashira pikija jeciita inga jinonesa kuzwira. Inga muezaniso, tinozoashira ndhungamiriro kuti tingaitisa kudini kuti tizivise masoko o rutongeso nokuti tingaitisa kudini kuti tipone pakuhwisana kwa Gogi wo Magogi.—Ezekieli 38:18; Apokaripsi 16:21.

14. Kucungirira kwa Gidhiyoni kwakaejeswa kudini?

¹⁴ Gidhiyoni waidikana kushanda ngo simba inga mutongi. Vamidhiyani pavakatiza hondo co usiku, Gidhiyoni wakavatevera kuvha Kujezeraeri kuenda ku Murambo Jordhani. (Vatongi 7:22) Kunanga kuti Gidhiyoni wakaima pa Murambo wa Jordhani? Haiwa. Pikija wainga waremba no vanarume vake vanokwana kuita 300, ivona vakaramba vecienderera mberi vecivateverera. Pakupejisira, ivona vakahwisa Vamidhiyani no kuvanyisa.—Vatongi 8:4-12.

15. Kucungirira ko vakuru kungagumisa kudini pakuejwa?

 ¹⁵ Pamukuvo umweni, mukuru wakajizwa akaremba muviri no mu murangariro pakutaja ungano no mbhuri yake. Pa mugariro jakadari inga iji, vakuru vangatevejeresa kudini muezaniso wa Gidhiyoni?

16-17. Ngozvapi zvakabesera Gidhiyoni kuti acungirire, vakuru vangava no cokwadi cenyi? (Isaia 40:28-31) (Vonanyi foto.)

¹⁶ Thembanyi kuti Jehovha anozomuvangisa. Gidhiyoni wakathemba kuti Jehovha waizomuvangisa no kumupa simba, iyena wakazviita. (Vatongi 6:14, 34) Pavhaza imweni, Gidhiyoni no masoca ake vakatevera majimambo maviri o Kumidhiyani ngo soka, kuveni majimambo aidikana kufamba no makamera. (Vatongi 8:12, 21) Asi Mwari wakabesera Vaiziraeri kuti vawane majimambo aya no kumanyisa pa hondo. Vakuru vangathembavo Jehovha wiya ‘acikarembi no acikadi kuzorora.’ Paya pavanoda simba iyena anozovapa.—Verenganyi Isaia 40:28-31.

¹⁷ Vonanyi muezaniso wa hama Mateu vanoshanda ku Cikwata co Kuvhakacira Vanohwaja. Ngozvapi zvakavabesera kuti vacungirire? Hama Mateu vakananga kudari: “Inini ndakavona kukwanirisika ko magama ari pana Vafiripi 4:13. Mukuvo muzinji pandinojizwa ndakaremba, ndinoita mukumbiro kuna Jehovha ngo mwoyo wese, ndecikumbira kuti iyena andipe simba randinoda kuti ndibesere hama jangu. Pa mukuvo wondhowo, ndinovona mujimu wa Jehovha wecindipa simba no kundinbesera kuti ndicungirire.” Inga ndi Gidhiyoni, vakuru vanosonganavo no zvineso pavanonga vecishanda ngo simba kuti vangwarire vandhu va Jehovha pikija zvicizivi kureruka mukuvo wese. Zvakajeka kuti ivona vanodikana kuva vanojidodokesa no kuzwisisa kuti asipi mukuvo wese wavanozoita zvese zvavanozoda kuita. Mungathemba kuti Jehovha anozozwa mukumbiro jenyu no kumuvangisa kuti mucungirire.—Nduyo 116:1; Vafiripi 2:13.

18. Inga zvatavona, vakuru vangatevejeresa kudini muezaniso wa Gidhiyoni?

¹⁸ Vakuru vangajija zvakawanda ngo muezaniso wa Gidhiyoni. Ivona vanodikana kuva vanojidodokesa pa basa ravanoita no paya pavanosimbhwa kana kushohwa. Ivona vanodikana kuzwira no kuva no cicunge, maningi-ningi mugumo wo nyika ino paunonga wecikhwedera. Vanodikana kuthemba kuti azvinenyi no zvineso zvavari kusongana nazvo, Jehovha anozovavangisa. Zvokadi kamare, tinobonga vahavisi vanoshanda ngo simba no ‘kuramba tecireremeja vandhu vakaita inga ndivona.’—Vafiripi 2:29.