1. (a) Ngoyapi vetero yatinopuwa ndi Jehovha? (b) ‘Kuimira Tenji Mwari’ zvinoda kurevenyi? (Vonanyi “Kudurujihwa ko Magama.”)

 JEHOVHA wakapa vetero inoshamaisa ku vese vaya vanomuda. Sambiri pano anozopeja kuhwaja, kusuruvara no kufa. (Apokaripsi 21:3, 4) Iyena anozobesera “varombo” avo vari kuvetera kuti iyena acinje nyika ino kuti ive paradhiso. (Nduyo 37:9-11) Anozoita kuti umwe nga umwe wedu, ave no ushamwari wo phedo naye kupinda watinawo wari. Izvi zvinozodakajisa maningi kamare. Asi zvicinyi zvinoitisa kuti itusu tithembe kuti zvigondiso izvi zva Jehovha zvinozokwanirisika? Jehovha nguva jese anokwanirisa zviya zvaanonanga. Ngo kudaro, tina thangwe ra ushoni rinotiita kuti ‘tiimire Tenji Mwari.’ * (Nduyo 27:14) Tinozokwanisa kukhombija izvi ngo kuvetera no kusengerera kwese no takadakara kuti Mwari wedu akwanirise zvigondiso zvake zvese.—Isaia 55:10, 11.

2. Jehovha nguva jese wakanasiririka kuti aitenyi?

² Kuvhira kare, Jehovha wakavonesa kuti iyena anokwanirisa zvigondiso zvake. Vonanyi muezaniso umwe basi. Mu bhuku ra Apokaripsi, Jehovha wakagondesa kuti mu njiku jedu jino iyena waizobatanija vandhu vo majinja ese, mavhumbo no ndumi kuti vamushandire vakabatana. Nyamasi uno, cikwata ici co vandhu cinozivika inga “vandhu vakawanda maningi vacikaverengeki.” (Apokaripsi 7:9, 10) Pikija cikwata ici cino vandhu vo mukhaindi wakasiyana-siyana, vanarume no vanakaji no vana vanovha mu nyika jese no ndumi jese, ivona  imbhuri imwe yakabatana. (Nduyo 133:1; Johani 10:16) Vandhu vakawanda maningi ava vacikaverengeki vanovangisira maningi kuti vacumaere masoko akanaka. Nguva jese ivona vakanasiririka kuti vabhuye no vandhu vese vavanosongana navo ngo pamusoro po vetero yo nyika yakanakisisa yatinozova nayo kumbejiyo. (Mateu 28:19, 20; Apokaripsi 14:6, 7; 22:17) Kudari munoita divi ro vandhu vakawanda ava vacikaverengeki, pacina kukana-kana vetero yo kuzova no zviro zvakanaka kumbejiyo inosisira maningi kwamuri.

3. Ngocapi cido ca Sathana?

³ Sathana aadi kuti itusu tive no vetero kuitira kumbeji kwedu. Cido cake ngo cokuita kuti titende kuti Jehovha aatitaji no kutizve iyena aakwanirisi zvigondiso zvake. Kudari Sathana akakwanisa kutiita kuti tiruze vetero yedu, atizovi no cicunge, cimwenizve tinozoima kushandira Jehovha. Inga zvatinozovona, Sathana wakaeja kuita kuti Jobe aruze vetero yake no kusiya kushandira Jehovha.

4. Ngozvapi zvatinozovona pa musoro uwu? (Jobe 1:9-12)

⁴ Pa musoro uwu, tinozovona kuti Sathana wakaejesa kudini kuita kuti Jobe atame kuva wakagondeka kuna Jehovha. (Verenganyi Jobe 1:9-12.) Tinozovonazve kuti ngozvapi zvatingajija ngo muezaniso wa Jobe no kuvona kuti ngenyi zvinosisira kuceukija kuti Mwari anotida no kuti iyena anokwanirisa zvigondiso zvake.

5-6. Ngozvapi zvakaitika mu upenyu hwa Jobe pa nguva shomani?

⁵ Jobe wainga no upenyu wa ushoni maningi. Iyena waingazve no ushamwari wo phedo na Jehovha. Wainga no mbhuri yakakura no yakadakara. Iyena waingazve wakakhupuka. (Jobe 1:1-5) Asi pa njiku imwe basi, Jobe wakaruza zvese. Pakutanga wakaruza upfumi hwake hwese. (Jobe 1:13-17) Tevere, wakaruza vana vake vese. Amborangariranyi basi ngozi iyi yakasonganari na Jobe. Vabari pavanoruza basi mwana umwe, ivona vanosuruvara maningi. Ngo kudaro, amborangariranyi kuti Jobe no mukaji wake vakajizwa kudini pavakazwa kuti vana vavo vese vafa. Pacina kukana-kana, Jobe wakamwesa nguvo jake wowa pasi.—Jobe 1:18-20.

⁶ Tevere Sathana wakaita kuti Jobe ave no ndhendha inohwaja maningi no inozizimusa. (Jobe 2:6-8; 7:5) Izvi zvicito zvaitika, iyena wainga mundhu waireremejwa maningi. Vandhu vazinji, vaiviya kokumbira mazano kwaari. (Jobe 31:18) Asi wari ivona vaimunyenya. Iyena wainyenywazve ngo hama jake, shamwari jake, kubatanijavo no vashandiri vake.—Jobe 19:13, 14, 16.

7. (a) Jobe waitenda kuti zvineso zvake zvaivha kwapi, asi ngozvapi zvaacikazivi kuita? (b) Makristu angasongana kudini no zvineso zvakaezana no zvatiri kuvonari pa foto?

⁷ Sathana waida kuti Jobe atende kuti matambujiko ake aivonesa kuti Mwari wainga wakanyangajwa nayena. Inga muezaniso, Sathana wakashandisa mbhepo huruwane kuti nyumba yainga no vana va Jobe iwe no kuuraya vese. (Jobe 1:18, 19) Iyena wakaitavo kuti muriro waivha mugore upeje mushambi wese wa Jobe kubatanijavo no vashandiri vake vaiukorondha. (Jobe 1:16) Zvecivoneka kuti mbhepo no muriro zvaivha mugore, Jobe wakarangarira kuti izvona zvaivha kuna Jehovha. Inga muviyo, iyena wakatenda kuti kangaije wakaita zviro zvakashata zvinonyangajisa Jehovha. Pikija zvakadaro, Jobe aazivi kutuka Baba wake. Jobe waiziva kuti ko makore mazinji iyena wainga wakaashira zviro zvakawanda maningi zvaivha kuna  Jehovha. Iyena wakarangarira kuti kudari wakatendera kuashira zviro zvaushoni zvaivha kuna Jehovha, waidikanavo kutendera zviro zvakashata. Iyena wakati: “Ngarikomborehwe zina ra Tenji Mwari.” (Jobe 1:20, 21; 2:10) Pikija kuti Jobe wakaruza upfumi hwake, vana vake no uhomi hwake hwaushoni iyena wakaenderera mberi wakagondeka kuna Jehovha. Asi Sathana aazivi kuimira pondhopo.

8. Ngozvapi zvakaitazve Sathana kuti ahwise Jobe?

⁸ Sathana wakashandisa vandhu vatatu vaijiita inga shamwari ja Jobe, kuti vamuite kuti ajizwe kuti aasisiri. Vanarume ava vakananga kuti Jobe wainga ecitambujika ngo kuti iyena wainga akaita zviro zvakawanda zvakashata. (Jobe 22:5-9) Cimwenizve, ivona vakaeja kumukhohwesa kuti azvinenyi dangani wakaita zviro zvakawanda zvaushoni, Mwari aacaireremeja kuvangisira kwaaitaro. (Jobe 4:18; 22:2, 3; 25:4) Ivona vakaejazve kuita kuti Jobe arangarire kuti Mwari aamudi, aamutaji no kutizve kumushandira azvina zvazvinobesera. Magama avo akaita kuti Jobe ajizwe inga kuti aacina vetero.

9. Zvicinyi zvakabesera Jobe kuti ave no cicunge no simba?

⁹ Amborangariranyi basi. Jobe wakagara pamarota ecihwajihwa maningi. (Jobe 2:8) Shamwari jake jakaenderera mberi jecinanga kuti iyena aacaingepi mundhu waushoni no kuti zvese zvaainga eciita azvicaisisira. Iyena wainga ecihwajihwa maningi ngo muejo jaaingari ecisongana najo no kusuruvara ngo kufihwa ngo vana vake. Pakutanga, aazivi kudavira ciro. (Jobe 2:13–3:1) Kudari shamwari jake jakarangarira kuti Jobe waizosiya kushandira Jehovha, jainga jecizvicengeja. Ngokuti pamukuvo wondhowo Jobe wakamusa musoro wake wosota shamwari jake iji jo kunyepa, woti: “Ndinotokotesa uceni hwangu mbhera kufa.” (Jobe 27:5) Zvicinyi zvakabesera Jobe  kuti ave no cicunge no simba pikija no zvineso zvese zvaaisonganari nazvo? Pikija wainga akasuruvara maningi, iyena aazivi kuruza vetero yo kuti Mwari wake ano rudo waizopeja matambujiko ake. Iyena waiziva kuti pikija akafa, Jehovha waizomumusa.—Jobe 14:13-15.

10. Zvakaitikari na Jobe zvinotijijisenyi?

¹⁰ Zvakaitikari na Jobe zvinotijijisa kuti Sathana aakwanisi kutivangirija kuti tisiye kushandira Jehovha nokutizve Jehovha anokwanisa kuvona zvese zvatiri kusongana nazvo. Muezaniso wa Jobe ungatibeseravo kuti tizwisise zvese zvinobatanijwa pa shwiro iyi. Ngativone zviro zvinganani zvatingajija ngo muezaniso wa Jobe.

11. Kudari tikaenderera mberi tecithemba Jehovha, tingava no cokwadi cenyi? (Jakobo 4:7)

¹¹ Jobe wakavonesa kuti kudari tikaenderera mberi tecithemba Jehovha, tingakwanisa kucungirira muejo uri wese watingasongana nawo no kubudirira pa kurhwa na Sathana. Ngowapi unozova muviyo wakona? Bhaibheri rinotigondesa kuti Dhiyabhu anozotitiza.—Verenganyi Jakobo 4:7.

12. Vetero yo rumuko yakavangisa kudini Jobe?

¹² Tinodikana kuva no rutendo hwakavanga ku vetero yo rumuko. Inga zvakanangwa pa musoro wakapera, Sathana kazinji anoshandisa kuthya kufa kuti atiite kuti itusu tisiye kushandira Jehovha. Inga pa mugariro wa Jobe, Sathana wakananga kuti Jobe waizoita zvese, pikija kusiya kushandira Jehovha kuti aponese upenyu hwake. Sathana wainga ecijicengeja. Ngokuti pikija Jobe paairangariraya kuti waizofa, iyena wakaenderera mberi wakagondeka kuna Jehovha. Kuthemba kwaaita unaki hwa Jehovha no vetero yakavanga yo kuti Jehovha waizokwanisa kuita kuti zviro zvive nane, kwakamubesera kuti acungirire. Jobe wainga no rutendo hwakavanga, hwokuti kudari Jehovha akatama kucinja zviro kuti zvive ushoni paainga ari penye, iyena waizokwanisa kumumusa kumbejiyo. Vetero yo rumuko yainga yokadi kamare kwaari. Kudari ikavavo yokadi kwatiri, pikija rufu auzokwanisi kutiita kuti tisiye kushandira Jehovha.

13. Ngenyi tinodikana kungwarira muejo jakashandisa Sathana kuti aeje Jobe?

¹³ Tinodikana kungwarira maningi muejo jakashandisari Sathana kuti aeje Jobe. Ngokuti nyamasi uno, iyena anoshandisavo muejo jakafanana kuti atieje. Vonanyi basi zvaakananga: “Mundhu [kuciripi Jobe basi] anopa bzese bzaanabzo kuti ajiponese.” (Jobe 2:4, 5) Ngo kudaro, Sathana wakananga kuti itusu atidi Jehovha Mwari ngo mwoyo wese nokutizve tinozosiya kumushandira tecida kuponesa upenyu hwedu. Kusiyapo zvondhozvo, Sathana wakananga kuti Mwari aatidi, iyena aavoni kuvangisira kwatinoita kuti timudakajise. Zvecivoneka kuti itusu tinoziva cido ca Sathana, atitendi manyepo aya.

14. Muejo jatingasongana najo jingatibeseresa kudini?

¹⁴ Tinodikana kuvona muejo jatinosongana najo inga mukana wo kujija zviri zvese ngo pamusoro pedu. Muejo jakasonganari na Jobe, jakamubesera kuti iyena akwanise kuvona paakarembera no kuitisa nane. Inga muezaniso, iyena wakakwanisa kuvona kuti anodikana kuva mundhu anojidodokesa maningi. (Jobe 42:3) Itusu tingatojijiravo zviri zvese ngo pamusoro pedu patinosongana no muejo. Hama inodanwa Nikora * yakadihwa mukadheya pikija yecisongana no zvineso zvakawanda zvo uhomi, yakati: “Nguva yondakapeja ndiri mu kadheya, yakandibesera kuvona mugariro jandinodikana kuitisa nane.” Patinovona kuti  ngopapi potakarembera tinokwanisa kushanda kuti tiitise nane.

15. Ndiyani watinodikana kupurukira, ngenyi?

¹⁵ Tinodikana kupurukira Jehovha kuciripi vavengi vedu. Jobe wakanasa kuteya njeve Jehovha paainga ecivereketa naye. Mwari wakarangarijijisa na Jobe wo muvhunjisa kudari: ‘Wakavona simba rangu pa zviro zvakasikwa?’ Ndinoziva zvese zvawakasongana nazvo. Unorangarira kuti andineseki ndiwe here? Jobe no kuzvidodokesa kwese wakadavira no kubongesera ngo kuvona unaki wa Jehovha. Iyena wakati: “Ndaimuziva ngo bzo vainanga vamweni; asi bzino majiso angu aya amuvona.” (Jobe 42:5) Zvinovoneka inga kuti Jobe wainga acakandogara pamarota, muviri wake wakazara ngomavonje, waingazve acakasuruvara ngo kufihwa ngo vana vake, paakananga magama aya. Pikija zvakadaro, Jehovha wakamukhohwesea kuti iyena waimuda no kuti waitendera zvese zvaaita.—Jobe 42:7, 8.

16. Mukuzwirana na Isaia 49:15, 16, ngozvapi zvatinodikana kurangarira patinosongana no zvineso?

¹⁶ Nyamasi unovo, vandhu vangatituka no kutitaja munjira icikasisiri. Ivona vangatoeja kupsipisa mugariro wo umwe na umwe wedu kana wo sangano ra Jehovha ngo ‘kutinyepera zviro zvese zvakashata.’ (Mateu 5:11) Kuvhira kuzvakaitika na Jobe tinojija kuti Jehovha anothemba kuti itusu tinozoenderera mberi takagondeka kwaari patinonga tecisongana no zvineso. Jehovha anotida maningi no kutizve aazosiyi vaya vanomuvetera. (Verenganyi Isaia 49:15, 16.) Mucadopurukira manyepo ari ese anonangwa ngo vavengi va  Mwari. Hama imweni inodanwa Jemusi yo ku Turkiya mbhuri yavo yakasongana maningi no zvineso, yakati: “Takazwisisa kuti kupurukira manyepo anonangwa ngo pamusoro po vandhu va Mwari kwaizotirembesa. Ngo kudaro, takasotesesa vetero yedu yo Umambo toenderera mberi tecibatikana mu basa ra Jehovha. Inga muviyo, mudakaro wedu auzivi kupera.” Inga ndi Jobe, tinoda kupurukira Jehovha. Manyepo anonangwa ngo vavengi vedu aazorembesi vetero yedu.

17. Majijenyi ngo muezaniso wo vanarume no vanakaji vakagondeka vanonangwa mu cipauko 11 co Vahebheru?

¹⁷ Jobe ndi umwe basi wo vashandiri va Jehovha wakaenderera mberi wakacunga no wakavanga paaisongana no zvineso zvakasiyana-siyana. Pa karata yake ku Vahebheru, mupostori Pauro wakanangavo ngo vazinji vamweni vaakadanija kuti “njama huru yo zvapupu.” (Vahebheru 12:1) Ivona vakasonganavo no muejo jakasiyana-siyana. Asi vakaenderera mberi vakagondeka kuna Jehovha. (Vahebheru 11:36-40) Kunanga kuti kucungirira kwavo no kushanda kwavo ngo simba kwakava kwabiresi? Haiwa. Pikija avazivi kukwanisa kuvona kukwanirisika ko zviprofita zva Jehovha mu upenyu hwavo, ivona vakaenderera mberi vecivetera Jehovha. Zvecivoneka kuti ivona vaiziva kuti vainga vandhu vaitendehwa ndi Jehovha, vainga no cokwadi cokuti vaizovona kukwanirika ko zvigondiso zvake. (Vahebheru 11:4, 5) Muezaniso wavo ungativangisa kuti tienderere mberi tecivetera Jehovha.

18. Matema civaringo cokuitenyi? (Vahebheru 11:6)

¹⁸ Tiri kupona mu nyika yo kuti iri kuvha mukushata kwenda mukushatisisa. (2 Timoti 3:13) Sathana ari kwenderera mberi ecieja vandhu va Jehovha. Pikija no zvineso zvatinozosongana nazvo kumbejiyo, ngatiteme civaringo cokushandira Jehovha no simba rese, tecithemba kuti “vetero yedu iri kuna Mwari anopona.” (1 Timoti 4:10) Ceukijanyi kuti makomborero akaashira Jobe anovonesa kuti “Jehovha wakazara ngo pena no usizi.” (Jakobo 5:11) Tingaendereravo mberi takagondeka kuna Jehovha, tecithemba kuti iyena “anopfupa vanomupsaka ngo mwoyo wese.”—Verenganyi Vahebheru 11:6.