VANDHU vazinji vanoziva kuti Jesu wakakohomehwa pa mutanda pakati po mbavha mbiri no kuuraiwa. (Mateu 27:35-38) Asi vamweni vanorangarira kuti Bhaibheri ariripi kuzwirana parinonanga kuti muviri wa Jesu wakanasirihwa no kwenda kovigwa mu guva.—Marko 15:42-46.

Vandhu vamweni vanoshora zvakatahwa mu Mavhangeri, vanosara no muvhunjo wo kuti dangani mundhu wakakohomehwa pa mutanda waidikana kwenda kovigwa mu guva, inga zvaiitwa mundhu wakafa ngo njira imweni. Kusiyapo zvondhozvo, vandhu ava vanoshorari zvakatahwa mu Mavhangeri, vanotenda kuti vandhu vanofa ngo kukohomehwa vaidikana kutajwa ngo njira yakasiyana. Jhornarista umweni anodanwa Ariel Sabar, wakananga kuti ngenyi vandhu vano mavonero ondhowo. Iyena wakati: “Kukohomera pa cipambhano ainga manera okupanica vandhu vaiita zviro zvakashata. Vazivi vamweni vanovona kuti azvina shwiro kurangarira kuti Varoma vaizotendera kuti vandhu vakadaro vaende kovigwa mu guva inga zvaizoitwa vandhu vamweni vakafa ngo njira imwenivo hayo.” Varoma vaida kunyoweja kamare mbavha jaifaya jakakohomehwa. Ngo kudaro, vaiisiya kuti muviri javo jihiwe ngo zvinyama zvo musora. Mativi aizosararo o muviri javo, aizodihwa mu guva rimwero.

Asi vanojija ngo zvomathere, vakavona zviro zvakasiyana, ngo pamusoro po Vajudha vanganani vakauraiwa ngo njira iyi. Mu gore ro 1968, kwakapfumbhuhwa maphondo o mwanarume umweni wakauraiwa mu zana rokutanga ro makore. Iwona akawanika mu guva ro ukama hwake phedo no Jerusarema. Iwona ainga mu bhokiso. Pa maphondo amweni akawanikari, paingavo no phondo ro pa cisisinindo. Irona rainga rakakohomehwa pa tabwa ngo peregu yaireba mutengo unopindirija cikunwe cimwe no meya kana 11.5 o masetimetro. Sabar wakati: “Cisisinindo ici, cainga co mwanarume waidanwa Yehochanani. Icona cakabesera kutonga jowe-yowe rainga riripo ngo pamusoro po zvinonanga mavhangeri ngo pamusoro po kuvighwa ka Jesu.” Zvakajeka kuti “cisisinindo ca Yehochanani, wakava muezaniso wo mundhu wakakohomehwa mu nguva ya Jesu wakatendehwa ngo Varoma kuti vaite mavigire o Cijudha.”

Vandhu vangatova no mavonero akasiyana ngo pamusoro po phondo ro pa cisisinindo rakawanikaya no manera ainga akakohomehwa Jesu pa mutanda. Asi zvakajeka ngo zvokuti, mbavha jimweni jaienda kovigwa mu guva kamare kuciripi kudihwa mu guva ro vandhu vakawanda. Izvi zvinovonesa kamare kuti zvinonanga Bhaibheri kuti muviri wa Jesu wakavigwa mu guva zvinothembeka. Zvakawanikari zvinovonesa kuti muviri wa Jesu wakanasirihwa no kuvigwa mu guva inga zvinonanga Bhaibheri.

Cinosisira maningi ngo co kuti, Jehovha wainga wakananga kuti Jesu waizovigwa mu guva ro mwanarume wakakhupuka. Apana waizokwanisa kuita kuti Soko ra Mwari ritame kukwanirisika.—Isaia 53:9; 55:11.