1-2. Ngozvapi zvineso zvinosongana no hama pomwe no hambzaji jedu?

MUPOSTORI Pauro wakavangisa Timoti no Makristu amweni kuti vaite zvavanokwanisa mu basa rokucumaira. (2 Timoti 4:5) Ngo kudaro, itusu tinoteveja mbhangiro ya Pauro no kuita zvese zvatinokwanisa kuti tishandire Jehovha. Asi nguva jimweni zvinonesa. Hama no hambzaji zinji vanothya kuita basa iri rokucumaira. (2 Timoti 4:2) Inga muezaniso, amborangariranyi basi ngo hama jinogara mu nyika yokuti basa redu rokucumaira, riri kurambiswa. Asi pikija zvakadaro, ivona vanocumaira veciziva kuti vangazoguma pakudihwa mukadheya.

² Vashandiri va Jehovha vari kusongana no zvineso zvakasiyana-siyana zvinovarembesa. Inga muezaniso, vamweni vangashanda nguva yakawanda maningi kuti vakwanise kusapota mbhuri yavo. Ivona vanoda kuita zvizinji mu basa rokucumaira, asi vanonga vakaremba pakupera ko sumana. Vamweni vangaita zvidoko pa kushandira Jehovha ngokuti vano ndhendha icikarapiki kana kuti vaavasharuka, zvotovanesera kuti ivona vabude pa muzi. Vamweni vanotojizwa kuti avasisiri kuna Jehovha. Hambzaji Mariya, * vanogara Medhiyo Oriyente, vakananga kudari: “Ndakadikana kushanda ngo simba kuti ndikwanise kuhwisana no mazwiro angu okujivona inga andisisiri zvokuti zvaainditora kuti ndigume pakucamwa. Izvo zvaindiita kuti ndijipe ndava. Zvaitora mukuvo no simba randaizopeja mu basa rokucumaira.”

3. Ngozvapi zvaticada kuzovona pa jijo iyi?

³ Azvinenyi no zvineso zvatinosongana nazvo, Jehovha angatipa simba kuti tienderere mberi tecimushandira kana kuita zvatinokwanisa pa basa rokucumaira. Ticito tabhuya ngo manera anotibesera Jehovha, ngativone manera aakabesera Pauro na Timoti kuti vakwanise kuita basa rokucumaira pikija vaisongana no zvineso.

4. Zvineso zvapi zvakasongana na Pauro?

⁴ Pauro wakasongana no zvineso zvizinji. Kunasa kunanga, iyena waida kuvangiswa pasure po kutakwa, kufuhwa ngo mapuwe no kufungihwa mukadheya. (2 VaKorinto 11:23-25) Pauro waizviziva kuti waidikana kushanda ngo simba kuti ahwisane no murangariro jicikabeseri. (VaRoma 7:18, 19, 24) Cimwenizve, iyena wainga no cineso co uhomi caidari inga “muzwa mu muviri,” zvokuti waida kuti Mwari acivhise.—2 VaKorinto 12:7, 8.

5. Pauro wakakwanisa kudini kuita basa rake pikija no zvineso zvaakasongana nazvo?

⁵ Jehovha wakapa simba Pauro kuti aenderere mberi eciita basa rake rokucumaira pikija no zvineso zvaaisongana nazvo. Ngatende tivone zvakaitwa ndi Pauro. Inga muezaniso, Pauro paainga akafungihwa pa muzi pake ku Roma, iyena wakacumaera masoko akanaka ngo kuvangisira kwese pamberi po vatungamiriri vo Cijudha no utongi. (Maitiro o Vapostori 28:17; VaFilipi 4:21, 22) Cimwenizve, iyena wakakwanisa kucumaera Vangwariri vazinji vo mu Nyumba ya Mambo no vese vaiviya kuzomuvona. (Maitiro o Vapostori 28:30, 31; VaFilipi 1:13) Pa mukuvo wondhowo Pauro wakatara karata jaizokwanisa kubesera Makristu ocokwadi mu njiku jino. Muezaniso wa Pauro wakavangisa maningi ungano yo Roma, zvoita kuti hama jo kondhono ‘jitokotese ngo simba Vangeri, vacingathyi.’ (VaFilipi 1:14) Pikija Pauro aaicaikwanisa kuita zvizinji pa mugariro waainga nawo, iyena wakaita zvese zvaaikwanisa kuti ‘vhangeri rienderere mberi.’—VaFilipi 1:12.

6. Mukuzwirana no 2 VaKorinto 12:9, 10, zvicinyi zvakabesera Pauro kuti akwanise kuita basa rake?

⁶ Pauro wakazwisisa kuti zvese zvaiita kuti ashandire Jehovha, waizvikwanisa ngo besero ra Mwari kuciripi ngo simba rake. Iyena wakananga kuti simba ra Mwari “rinotatijwa mu kurembejeka.” (Verenganyi 2 VaKorinto 12:9, 10.) Ecishandisa mujimu wake mucena, Jehovha wakapa Pauro simba rokukwanisa kuita basa rake pikija eciteverehwa, kudihwa mukadheya no zvineso zvimweni zvaakasongana nazvo.

7. Ngozvapi zvineso zvakadikana kunyisa Timoti kuti akwanise kuita basa rake?

⁷ Timoti mudoni wa Pauro waithembavo simba ra Mwari kuti akwanise kuita basa rake. Timoti wakabesera Pauro mu hwendo hwakawanda mu basa ro umisiyonariyo. Cimwenizve, Pauro wakamutuma kuti aite hwendo wakasiyana-siyana kuti avangise ungano.  (1 VaKorinto 4:17) Timoti waijizwa kuti aakwanirisi. Izvo zvakaita kuti Pauro amuvhunje kudari: “Ucaxohwa ngo ndava yo kuita mujaha.” (1 Timoti 4:12) Pa mukuvo uwu, Timoti wainga no muzwa mu muviri, zvingaita kuti kwainga ‘kuhwara kwake kuzinji.’ (1 Timoti 5:23) Asi yena waiziva kuti Jehovha waizomupa simba ecishandisa mujimu mucena wake kuti aenderere mberi ecicumaera masoko akanaka no kuvangisa hama jake.—2 Timoti 1:7.

8. Jehovha anovangisa kudini vashandiri vake nyamasi uno?

⁸ Nyamasi uno, Jehovha anopa vashandiri vake “simba rakakura” kuti vakwanise kuenderera mberi vecimushandira vakagondeka. (2 VaKorinto 4:7) Ngatende tivone zviro zvirongomuna zvaanotipa Jehovha kuti ativangise no kutibesera kuti tive takagondeka kwaari. Mukumbiro, Bhaibheri, ushamwari hwo Cikristu no basa redu rokucumaira.

9. Mukumbiro ungatibeseresa kudini?

⁹ Vangiswanyi ngo kuita mukumbiro. Inga zvakatahwa pana VaEfeso 6:18, Pauro wakativangisa kuti tiite mukumbiro kuna Mwari “njiku jese.” Mwari anozodavira mukumbiro jedu ngokutibesera. Hama Joni vanogara Bhorivhiya, vakakwanisa kuvona besero ra Jehovha pavakasongana no zvineso zvakawanda maningi. Mukaji wa hama Joni no vabari vavo vakahwaja maningi pa mukuvo wondhowo. Hama Joni vakanesehwa maningi kuti vakwanise kukorondha vese vo vatatu pa mukuvo wondhowo. Mai wavo vakazotamika. Zvakatora mukuvo wakareba maningi kuti mukaji wavo na baba wavo vaite nane. Vecirangarira zvakaitikari, hama Joni vakati: “Pandaithimwa-thimwa maningi, zvaindibesera i kuita mukumbiro kuna Jehovha ndecimuvhunja kamare zvandaizwa.” Jehovha wakapa hama Joni simba ravaida kuti vakwanise kucungirira. Hama Ronardho mukuru wo ungano anogara ku Bhorivhiya, vakazwa kuti mai wavo vainga no khanseri. Mweji munganani jakazotevera, mai wavo vakazotamika. Zvicinyi zvakabesera hama Ronardho kuti vakwanise kucungirira? Ivona vakati: “Kuita mukunbiro kuna Jehovha kwakandiita kuti ndikwanise kuvhunja Jehovha zvandaizwa. Ndaizviziva kuti iyena anokwanisa kundizwisisa kupinda ari wese, atee kutopinda inini.” Nguva jimweni tinojizwa kuti atikwanisi kucungirira zvineso zvedu, nee atitokwanisi kuziva zvatinodikana kunanga pa mukumbiro. Asi Jehovha anotikoka kuti tiite mukumbiro kwaari, pikija tecivona zvecinesa kunanga mazwiro edu no zvatiri kurangarira.—VaRoma 8:26, 27.

10. Inga zvatinovona pana Vaheberi 4:12, ngenyi kuverenga Bhaibheri no kurangarijisisa zvataverengaro zvinosisira?

¹⁰ Vangiswanyi ngo kushandisa Bhaibheri. Pauro waiverenga Matahwa kuti awane simba. Itusu tinodikanavo kuita zvakafanana. (VaRoma 15:4) Patinoverenga Soko ra Mwari no kurangarijisisa zvataverengaro, Jehovha angashandisa mujimu wake mucena kuti atibesere kuzwisisa Matahwa no kumashandisa pamugariro watiri waro. (Verenganyi Vaheberi 4:12.) Hama Ronardho vanangwaya pakutanga vakati: “Ndinodakara maningi ngokuti ndakatanga kuva no cirovejeso cokuverenga Bhaibheri usiku hwese. Ndairangarijisisa maningi ngo mugariro ja Jehovha no rudo hwaanahwo ku vashandiri vake. Izvo zvakandibesera kuti ndiwanezve simba.”

11. Bhaibheri rakabeseresa kudini hambzaji yainga noni yakasuruvara?

¹¹ Patinorangarijisisa zviri mu Soko ra Mwari, zvinozotibesera kuti tive no mavonero aushoni ngo pamusoro po zvineso zvedu. Vonanyi kuti Bhaibheri rakabeseresa kudini hambzaji yainga noni yakasuruvara. Mukuru  umweni wakaipa zano kuti iverenge bhuku ra Jobe. Iyona yakariverenga, asi ngokukasika, iyona yakatanga kutonga manera airangarira Jobe. Iyona yakarangarira kudari: “Jobe! Ucava no mavonero akashata kudaro!” Asi iyona yakazwisisa kuti manera oyairangariraro, ainga akatoezana kamare no a Jobe. Izvo zvakaibesera kuti icinje manera ayo okurangarira no kuwana simba rokukwanisa kucungirira kuhwajihwa koyainga nako ngo kufihwa ngo mwamunayo.

12. Jehovha anotivangisa kudini ecishandisa hama no hambzaji?

¹² Kuvangiswa ngo ushamwari wo Cikristu. Njira imweni inoshandisa Jehovha kuti avangise Makristu ikushandisa hama no hambzaji. Pauro wakatara kuti waida maningi ‘kuvangisana’ no hama no hambzaji jake. (VaRoma 1:11, 12) Hambzaji Mariya vanangwaya pakutanga, vaidakarira maningi kuva pamwepo no hama no hambzaji. Ivona vakati: “Jehovha waishandisa hama no hambzaji jicikazivi zvineso zvangu. Ijona jainanga zviri zvese zvinovangisa kana kutara zviri zvese zvinovangisa, izvo zvainga zvondhozvo zvandaida kamare. Cimwenizve ndaibesereka ngo kuva pamwepo no hambzaji jimweni jainga no zvineso zvakafanana no zvangu no kujija ngo zvavakaita kuti vanyise zvinesozvo. Vakuru nguva jese vaiita kuti inini ndijizwe kuti ndinoita divi mu ungano.”

13. Tingaitisa kudini kuti tivangisane pa musongano jedu?

¹³ Njira yakanakisisa yo kuvangisa vamweni ngo yo kuva pa musongano jo ungano. Pamunoviya kumusongano, ngenyi amueji kuvangisa vamweni ngo kuvavhunja kuti munovada no kuvabonga ngo zvavari kuita? Inga muezaniso, musongano ucito watanga mukuru umweni anodanijwa Pita wakavhunja hambzaji imweni ina mwamuna acikaripi Capupu, kudari: “Tinovangiswa maningi ngo kumuvona pano pa musongano. Nguva jese munonasirira vana venyu vatandhatu kuti vape mupinguro pa musongano.” Kubongesehwa kwakaita hambzaji iyi zvakaita kuti irire, yoguma pakunanga kudari: “Zvokadi kamare ndadakara maningi ngo kuzwa zvondhozvo nyamasi.”

14. Basa rokucumaira, rinotibeseresa kudini?

¹⁴ Kuvangiswa ngo basa rokucumaera. Patinocumaera vamweni, tinojizwa ushoni, azvinenyi dangani vandhuvo vanotipurukira kana kuti haiwa. (Mazwi Akangwara 11:25) Hambzaji Siteisi vakavangiswa ngo basa rokucumaira. Umwe wo pambhuri yo hambzaji iyi paakajingwa, iyona yakaperehwa ngo simba, yotanga kujivhunjisa kudari: ‘Ndaidikana kuita ciri cese kuti ndimubesere?’ Azvicainga zvakareruka ku hambzaji iyi kutama kurangarira ngo pamusoro po shwiro iyi. Zvicinyi zvakabesera hambzaji iyi kuti ihwisane no mugariro uwu? Kucumaera! Hambzaji iyi payaiita zvizinji mu basa rokucumaira, iyona yakatanga kubatikana maningi ngo vandhu vo mu ndima mwayo vaida besero. Iyona yakananga kudari: “Kuvha pa mukuvo uwu, Jehovha wakandipa mundhu waida kujija Bhaibheri uwo wakaenderera mberi ngo kukasika. Izvo zvakandivangisa maningi. Ciro cakandibesera maningi i basa rokucumaira.”

15. Ngozvapi zvamajija ngo zvanangwa ndi hambzaji Mariya?

¹⁵ Vamweni ngo pamusoro po mugariro wavo vanojizwa kuti avakwanisi kuita zvizinji mu basa rokucumaira. Kudari muno mazwiro ondhowo, ceujanyi kuti Jehovha anodakara ngo zviro zvamunoita. Vonanyizve muezaniso wa hambzaji Mariya. Hambzaji iyi poyakathutha kwenda ku nyika imweni inovereketwa ndumi imweni, iyona yakajizwa inga kuti aicakwanisi kuita zvizinji. Iyona yakaguma pakunanga kudari: “Nguva jimweni ndaikwanisa basi kupa mupinguro wakafupika, kuverenga Bhaibheri  no kupa taratadho mu basa rokucumaira.” Izvi zvakaiita kuti ijizwe kuti aikwanisi kuita zvizinji mukuezanisa na vaya vanovereketa ndumiyo. Ngo kudaro, iyona yaidikana kucinja murangariro wondhowo. Iyona yakatanga kuzwisisa kuti Jehovha angaishandisa pikija icikanasi kuvereketa ndumi yondhoyo. Iyona yakati: “Zvinonangwa mu Bhaibheri zvakareruka maningi, izvona zvingakwanisa kucinja upenyu hwo vandhu.”

16. Zvicinyi zvingakwanisa kubesera vaya vacikakwanisi kubuda pamuzi kuti vawane simba?

¹⁶ Jehovha anovona no kubonga cido cedu cokuda kumushandira, pikija ticikabudi pa muzi. Jehovha angatibesera kuti ticumaere vanotitaja, vanoenda na itusu kucipitari, mamedhiko no mafurumero. Kudari itusu tikaezanisa mabasa otaiita kare no atiri kuita nyamasi, tingaguma pa kuremba. Asi tikakwanisa kuvona manera atiri kubesehwa ndi Jehovha wari, tinozokwanisa kucungirira no mudakaro zvineso zvatiri kusongana nazvo.

17. Mukuzwirana no Mucumaeri 11:6, ngenyi tinodikana kuenderera mberi tecicumaira pikija tecikavoni muviyo ngo kukasika?

¹⁷ Itusu atizvizivi kuti imbeu yapi yocokwadi yatinosima yova no muji perepo yokura. (Verenganyi Mucumaeri 11:6.) Inga muezaniso, hambzaji Bharbhara vano makore anokwana kuita makumasere, nguva jimweni vanocumaira ngo foni no kutara karata. Pa karata imweni yovakatara, ivona vakadira Murindiri wo 1 wa Março wo 2014 wainga no musoro unoti: “Zvawakaitihwa naMwari.” Iyona aicaizviziva kuti yainga yatumira karata ku varovorani vainga Zvapupu zva Jehovha, asi vainga vacikaendi koocumaira no kwenda kumusongano. Ivona vakauverenga vhaza jakawanda. Mwamunevo vakakwanisa kuvona kuti Jehovha ari kubhuya kamare na iyena. Varovorani ava, vakatanga kuviya kumusongano padoko ngo padoko. Pasure po makore anopindirija makumaviri na manomwe, ivona vakazovazve Zvapupu zva Jehovha zvinovangisira. Acimborangariranyi kuvangiswa kwakaitwa hambzaji Bharbhara ngo kuvona muviyo waushoni kuvha ku karata imwe yavakatumiraya.

18. Zvicinyi zvatinodikana kuita kuti tibesehwe ngo simba ra Jehovha?

¹⁸ Jehovha anotipa mukana kuti tiashire simba rake. Patinoshandisa zvese zvaanotipa inga mukumbiro, Bhaibheri, ushamwari wo Cikristu no basa rokucumaira, tinothemba kuti Jehovha anokwanisa kutibesa. Ngatithembe Baba wedu vo kudenga avo vanoda ‘kuti vavangise vaya vanomugonda ngo mwoyo yavo yese.’—2 Kronike 16:9.