1. Ngozvapi zvakamushamaisa pamakaeja kutanga kubhuya masoko o mu Bhaibheri no vamweni?

MUCACEUKIJA mukuvo womakazwisisa kuti mawana cokwadi? Zvakava zvakareruka kuzwisisa zviro zvese zvamakajija mu Bhaibheri. Imwimwi makarangarira kuti vandhu vaizodakara ngo kuzojija zvamakajija, vozvitenda. Imwimwi makava no cokwadi cokuti masoko o mu Bhaibheri aizovapa upenyu wakanaka wari no vetero inodakajisa yo kumbeji. (Nduyo 119:105) Ngo kudaro, imwimwi makavhunja shamwari jenyu no ukama hwenyu zvokadi zvamakawana. Waro zvicinyi zvakaitika? Zvakamushamaisa ngo zvokuti, vazinji vakaramba kuzwa zvamaivavhunja.

2-3. Mu njiku ja Jesu, vandhu vaivona kudini Jesu no masoko aaicumaera?

² Itusu atidikani kukahamara vandhu vamweni pavanoramba masoko atinocumaira. Mu njiku ja Jesu, vandhu vazinji vakamuramba, pikija iyena wakaita mushamaiso ecitatija kuti wakavha kuna Mwari. Inga muezaniso, Jesu paakamusa Razaro, azvizivi kuva zvakafisika ku vandhu vaimunyenya. Pikija zvakadaro, vatungamiriri vo Cijudha avazivi kutenda kuti Jesu wainga Mesiya. Atee ivona vaipsaka kuuraya Jesu na Razaro!—Johani 11:47, 48, 53; 12:9-11.

³ Jesu waiziva kuti vazinji avacaizotenda kuti iyena wainga Mesiya. (Johani 5:39-44) Iyena wakananga kudari kuno cikwata co vajiji va Johani Mubhabhatiji: ‘Anodakara wiya acikakhugunyiki ngo ndava yangu.’ (Mateu 11:2, 3, 6) Waro ngenyi vandhu vazinji vakaramba Jesu?

4. Ngozvapi zvatinozojija pa musoro uwu?

⁴ Pa musoro uno no pamusoro unozari, tinozovona mathangwe manganani akaita kuti vandhu vazinji vo muzana rokutanga, vatame kutenda Jesu. Tinozovonazve kuti ngenyi vandhu  vazinji vo mukuvo uno vanokhugunyika. Cinosisira maningi, tinozojijazve kuti ngenyi tinodikana kuvangisa rutendo hwedu kuna Jesu kuti titame kukhugunyika.

5. Ngenyi vandhu vazinji avacaitenda kuti Jesu wainga Mesiya wakagondeswa?

⁵ Vandhu vazinji vakakhugunyika ngo ndava yo nyika yaakakurira Jesu. Ivona vaitenda kuti Jesu wainga mujijisi anoshamaisa. Cimwenizve, iyena waiita mushamaiso. Asi ku vandhu vondhovo, iyena wainga mwana wo muvezi wainga murombo. Iyena wainga wo Nazareta, dhorobha raivoniwa kuti arisisiri maningi. Pikija Natanaeri wakazova mujiji wa Jesu, wakananga kudari pakutanga: “Ku Nazareta kungabvavo bzauxoni kani?” (Johani 1:46) Natanaeri kangaije aacaidepi dhorobha iri rakabarihwari Jesu. Kangaije iyena wairangarira ngo pamusoro po ciporofita cinowanika pana MIKEYA 5:1, cinobhuya kuti Mesiya waizobarihwa mu Bheterehema, haiwa ku Nazareta.

6. Ngozvapi zvaizobesera vandhu vo mu njiku ja Jesu kuti vazive kuti iyena ndi Mesiya?

⁶ Matahwa anonanga kudini? Muporofita Isaya wakananga ngo pamusoro po vavengi va Jesu kuti ivona avacaizotaja ‘[Mesiya] no mubarihwana wake.’ (Isaia 53:8) Masoko mazinji ngo pamusoro pake ainga akaporofitwa. Nokwainga kuti vandhu vakapsaka nguva kuti vapopore zvese zvaibhuiwa ngo pamusoro pake, vaizokwanisa kuziva kuti Jesu waizobarihwa ku Bheterehema ari mubarihwana wa Mambo Dhavhidhi. (Luka 2:4-7) Ngo kudaro, ndau yaizobarihwa Jesu, yainga yakanangwa mu ciporofita cinowanika pana MIKEYA 5:1. Waro cineso cakava capi? Vandhu vakakasika kutonga. Ivona vainga vacina masoko ese. Ngo ndava yazvo ivona vakakhungunyika.

7. Ngenyi vandhu vazinji nyamasi uno avadakariri vandhu va Jehovha?

⁷ Muri kuvona cineso condhoco nyamasi? Hina. Vandhu va Jehovha vese ivarombo; ivona vanovoniwa ngo vazinji inga “vacizivi kujija no varombo.” (Maitiro o Vapostori 4:13) Vandhu vamweni vanorangarira kuti vandhu va Jehovha avakwanisi kujijisa Bhaibheri, ngokuti avazivi kujija zvikora zvo magerejha. Vamweni vanoti Zvapupu zva Jehovha “igerejha ro Amerika,” kuveni vamweni vanoti pa Zvapupu zva Jehovha zvinomwe, umwe wakhona anogara Estadhos Unidhus. Vamwenizve vanonanga kuti Zvapupu zva Jehovha azvitendi Jesu. Ko makore akawanda, vandhu vanotidanija kuti “Makomunista,” “Vafei vo Amerika” no “Mabhandidhu.” Zvecivoneka kuti vandhu vese vanonangari zviro izvi avana masoko ese ngo pamusoro po Zvapupu zva Jehovha, ivona vanokhugunyika.

8. Mukuzwirana no Maitiro o Vapostori 17:11, vandhu vanodikana kuitenyi kuti vazive vashandiri va Mwari nyamasi uno?

⁸ Mundhu angaitenyi kuti atame kukhugunyika? Vandhu vanodikana kuziva zvese zvinobatanijwepo. Inga zvakaitwa ngo mutari wo Vhangeri ra Ruka. Iyena wakashanda ngo simba kuti ajije “bziro bzese bzakaitika, kubvira pakutanga.” Iyena waida kuti vaverengi vake vave no gwinyiso ro zviro zvavakazwa ngo pamusoro pa Jesu. (Luka 1:1-4) Vandhu vo Cijudha vo muzana rokutanga vo Kubhereya vaidari inga ndi Ruka. Ivona pavakazwa pakutanga masoko akanaka ngo pamusoro pa Jesu, vakapsanga mu Matahwa o Cihebheru kuti vazwisise zvavainga vavhunjwa. (Vereganyi Maitiro o Vapostori 17:11.) Mu njira yakafanana, vandhu nyamasi unovanodikana kuziva zvese zvinobatanijwepo. Ivona vanodikana kuezanisa zvavanojijiswa ngo vandhu va Jehovha no zvinonangwa ngo Matahwa.  Vanodikanavo kujija ngo pamusoro po zviro zviri kuitwa ngo vandhu va Jehovha nyamasi uno. Kudari vakanansa kuziva “masoko ese,” avazotenderi kuzwa masoko anokhuvaza no anovafukija mumeso.

9. Ngozvapi zvakaitika Jesu paakaramba kuita civoniso cinovha mugore?

⁹ Vamweni vo mu njiku ja Jesu avacaidakara ngo zviro zvaaijijisa. Ivona vaida zvizinji. Ivona vakamukumbira kuti kudari iyena ndi Mesiya ngaaite “civoniso co mugore.” (Mateu 16:1) Kangaije ivona vaida kuti Jesu aite zvondhozvo ngo pamusoro po zvavainga vakaverenga pana Danieli 7:13, 14. Asi nguva ya Jehovha yokuti Ciporofita ici cikwanirisike yainga icito yaguma. Zvainga zvecijijiswa ndi Jesu zvaikhombija kamare kuti iyena wainga Mesiya. Asi iyena paakaramba kuita civoniso cavaida, ivona vakakhugunyika.—Mateu 16:4.

10. Jesu wakakwanirisa kudini zvakatahwa ngo Muporofita Isaya ngo pamusoro pa Mesiya?

¹⁰ Matahwa anonanga kudini? Muporofita Isaya wakatara kudari ngo pamusoro pa Mesiya: “Aazokhuwi, aazomusi izwi rake, aazozwisi izwi rake mu makwanja.” (Isaia 42:1, 2) Jesu wakaita mushando wake pasi pano acikajivonesi. Iyena aazivi kuvaka themberi jino nduma, aazivi kusimira nguvo jinokhombija kuti iyena imundhu wo gerejha, aazivi kudanijwa ngo mazina o magerejha. Upenyu hwake pawainga pa ngozi, iyena wakaramba kuita mushamaiso pamberi pa Mambo Herodhi. (Luka 23:8-11) Iyena wakaita mushamaiso munganani, asi waibatikana maningi pa basa ro kucumaira masoko akanaka. Iyena wakavhunja vajiji vake kuti, “ndazira bzondhobzo.”—Marco 1:38.

11. Ngo api mavonero akashata ano vandhu nyamasi uno?

¹¹ Muri kuvona cineso condhoco nyamasi? Hina. Vandhu vazinji nyamasi uno vanoshamaiswa maningi ngo nyumba huru yo gerejha no manera ayakavakwa no kupintahwi kwayakaitwa. Vanoshamaiswazve ngo mazina okureremeja o vatungamiriri vo magerejha no zvirovejeso zvainga zvakakanganiwa  ngo vandhu vazinji zvicikaripi zvo Cikristu. Asi vandhu vanoenda ku magerejha aya, apana cavanojija ngo pamusoro pa Mwari no zvidisiso zvake. Mukusiyana, vaya vanoenda ku musongano jedu jo Cikristu vanojija ngo pamusoro po zvinoda Jehovha kuti vaite no kuvona kuti vangaponesa kudini mukuzwirana no kuda kwake. Nyumba jedu jo Umambo jakaseja jorongeka. Asi ajizivi kunemeswa kupindirija mudida. Cimwenizve, vaya vanotungamirira avasimiri nguvo jinovaitisa kuti vave no nduma, nee avadanijwi ngo mazina okureremeja anosisira maningi. Zvatinojija no zvatinotenda, zvakacijikira mu Soko ra Mwari. Pijika zvakadaro, vandhu vazinji nyamasi uno vari kukhugunyika ngokuti vanorangarira kuti manera edu okunamata aashamaisi. Cimwenizve, zvatinojijisa andizvopi zvavanodakarira maningi kuzwa.

12. Inga zvanangwa pana Vaheberi 11:1, 6, tinodikana kuitenyi kuti tivangise rutendo hwedu?

¹² Tingaitenyi kuti titame kukhugunyika? Mupostori Pauro wakavhunja Makristu aipona ku Roma kudari: “Kutenda kunobva ku utokotesi. Utokotesi hunoitwa ngo izwi ra Kristu.” (VaRoma 10:17) Itusu tinova no rutendo wakavanga ngo kujija Bhaibheri kuciripi ngo kwenda kuzvirovejeso zvo magerejha zvinonangwa ngo Bhaibheri kuti zvakashata, pikija hazvo kuti zvirovejeso izvi zvecivoniwa kuti zvinodakajisa no kushamaisa. Itusu tinodikana kuva no rutendo wakavanga wakacijikira pa zivo yakarungama ngokuti “pacina rutendo, apana anodakarisa Mwari.” (Verenganyi Vaheberi 11:1, 6.) Zvokadi itusu atidi kuvona civoniso cinovha mugore kuti zvitikhohwese kuti tawana cokwadi. Kunasa kujija Bhaibheri kunovangisa rutendo hwedu no kutikhohwesa kuti tawana cokwadi no kuvhisa kukanakana kwedu.

13. Zvicinyi zvakaita kuti vandhu vazinji varambe Jesu?

¹³ Mu njiku ja Jesu, vajiji va Johani Mubhabhatiji vakabararika hwiru ngokuti vajiji va Jesu avacaizira. Jesu wakasanangura kuti ivona vainga vacina thangwe rokuzira  ngokuti iyena wainga aciri naivona. (Mateu 9:14-17) Pikija zvakadaro, Vafarisi no vavengi vamweni va Jesu vaimuzonda ngokuti iyena aacaiitepi zvirovejeso zvavo. Jesu paakarapa mundhu waihwaja ngo mu Sabudu, ivona vakanyangajwa. (Marco 3:1-6; Johani 9:16) Ngo divi rimweni, ivona vaizvikuja, ngokuti vainanga kuti itusu tinongwarira Sabudu, kuveni ivona vaivona kuti azvizivi kushata kuita nyagoso mu themberi. Ivona vakanyangajwa maningi Jesu paakavhisa pambhene zvavaiitaro. (Mateu 21:12, 13, 15) Jesu wakavacumaira mu sinagoga yo Nazareta. Ivona vakanyangajwa maningi ngokuti Jesu wakashandisa muezaniso jo zviro zvakaitika no Vaiziraeri, zvaikhombija kuti ivona vainga vandhu vanoumbau no vacina rutendo. (Luka 4:16, 25-30) Vazinji vakaramba Jesu ngokuti iyena waiita zviro zvavainga vacikaiti.—Mateu 11:16-19.

14. Ngenyi Jesu wakavhisa pambhene zvirovejeso zvo vandhu zvavaiita zvicikazwirani no Matahwa?

¹⁴ Matahwa anonanga kudini? Ecishandisa Muporofita Isaya Jehovha wakati: “Ngokuti vandhu ava vanokhwedera kondiri ngo mazwi basi, vondireremeja ngo muromo basi, asi mwoyo yavo iri ndhambo neni, no midiro yo vanondipa: mupango yo vandhu basi no bziro bzakajijwa ngo cirovejo.” (Isaia 29:13) Jesu wainga ano razau paakavhisa zvirovejeso zvaiizwa ngo vandhu ava zvicikazwirani no Matahwa. Vese vaijijisa zvirovejeso no mutemo yo vandhu zvicikazwirani no Matahwa, vairamba Jehovha na wiya waakatuma inga Mesiya.

15. Ngenyi vandhu vazinji nyamasi uno, avadi Zvapupu zva Jehovha?

¹⁵ Muri kuvona cineso condhoco nyamasi? Hina. Vandhu vazinji vanozonda Zvapupu zva Jehovha ngokuti ivona avaceukiji mabuso no zvirovejeso zvicikazwirani no Matahwa, zvakadari inga kuceukija njiku yokubahwa no makhisimuso. Vamweni vanonyangajwa pavanovona Zvapupu zva Jehovha zvicikabatani navo pa kuceujika mabuso o nyika, kana kubatana navo pa zvirovejeso zvo panjaumba zvicikazwirani no Soko ra Mwari. Ivona vanokhugunyika ngo njira iyi ngokuti vanothemba kamare kuti zvavanoitari vecinamata Mwari zvinotendehwa. Ivona avazokwanisi kumudakajisa, kudari vakatendera zvirovejeso zvo nyika, voramba zvinojijisa Bhaibheri.—Marco 7:7-9.

16. Mukuzwirana na Nduyo 119:97, 113, 163-165, ngozvapi zvatinodikana kuita no zvaticikadikani kuita?

¹⁶ Tingaitenyi kuti titame kukhugunyika? Itusu tinodikana kuda kamare mutemo ja Jehovha no ndungamiriro jake. (Verenganyi Nduyo 119:97, 113, 163-165.) Kudari tikada Jehovha, itusu tinozoramba zvirovejeso zvese zvicikamureremeji. Itusu atizotenderi ciri cese haco kuti ciphingaije rudo hwedu kuna Jehovha.

17. Ngozvapi zvakaitisa kuti vandhu vazinji vakhugunyike mu njiku ja Jesu?

¹⁷ Vamweni vo mu njiku ja Jesu vaida utongi umweni ngo kukasika. Ivona vaivetera kuti Mesiya waizovasujunura pa kushuphwa kovaiitwa ngo utongi wo Ciroma. Asi pavakaeja kuita Jesu Mambo, iyena wakaramba. (Johani 6:14, 15) Vapiri kubatanijavo no vamweni, vaithya kuti Jesu waizocinja utongi zvoita kuti Varoma vanyangajwe vovavhisa pacigaro cavo cavainga vapuwa inga vapiri. Ngo ndava yo kuthya zvaizovaitikira, Vajudha vazinji vakakhugunyika.

18. Zviporofita zvapi zvo Bhaibheri zvaibhuya ngo pamusoro pa Mesiya, zvairambwa ngo vandhu vazinji?

¹⁸ Matahwa anonanga kudini? Pikija zviporofita zvizinji zvainanga kuti Mesiya waizova mundhu ano simba, asi zviporofita zvimweni, zvinokhombija kuti Mesiya pakutanga  waidikana kufa ngo ndava yo zvishaishi zvedu. (Isaia 53:9, 12) Waro ngenyi Vajudha vainga no murangariro yakashata ngo pamusoro pa Mesiya? Vandhu vazinji vo mu njiku ja Jesu avacaitenda ciporofita ciri cese cainga cicikagondesi kupeja zvineso zvavo pa nguva yondhoyo.—Johani 6:26, 27.

19. Ngojapi murangariro jakashata jinoita kuti vandhu vazinji varambe masoko edu nyamasi uno?

¹⁹ Muri kuvona cineso condhoco nyamasi? Hina. Vandhu vazinji nyamasi uno vanokhugunyika ngokuti vanotivona ticikanghwiniri mu zvouporitika. Ivona vanorangarira kuti itusu taidikana kuvhota. Asi itusu tinozviziva kuti kudari tikasana mundhu kuti ave mutongi wedu, tinonga teciramba Jehovha. (1 Samueli 8:4-7) Vandhu vanorangarira kuti itusu taidikana kuvaka zvikora, zvipitari kuti tikwanise kubesera vandhu. Asi ivona vanokhugunyika ngokuti itusu takabatikana pa basa rokucumaira, haiwa kuda kueja kutonga zvineso zvo nyika ino ngo kukasika.

20. Ngozvapi zviro zvinodikana kuva zvinosisira maningi mukuzwirana no masoko a Jesu anowanika pa Mateu 7:21-23?

²⁰ Tingaitenyi kuti titame kukhugunyika? (Verenganyi Mateu 7:21-23.) Basa redu guru ngo rokucumaira masoko akanaka inga zvatakavhunjwa ndi Jesu. (Mateu 28:19, 20) Nakamwe atidi kuphingaijwa ngo pamusoro po zvouporitika no shwiro jo nyika ino. Itusu tinoda vandhu no kuneseka ngo zvineso zvavo. Asi njira yakanaka yokubesera vo pacigarisano vedu ngo yo kuvajijisa ngo pamusoro po Umambo hwa Mwari no kuvabesera kuti vave no ushamwari na Jehovha.

21. Tinodikana kusunga kuitenyi?

²¹ Pa musoro uno, tavona mathangwe marongomuna akaitisa kuti vandhu vazinji varambe Jesu mu zana rokutanga, tavonazve kuti ngenyi vandhu vazinji nyamasi uno, vanoramba vateveri va Jesu. Kureva kuti zviro izvi ndizvona basi zvatinodikana kuva no ubhasopa? Haiwa. Pa musoro unozotevera, tinozokwanisa kuvonazve mathangwe marongomuna anokhugunya. Itusu tinodikana kuva vandhu vakacunga kuti titame kukhugunyika toenderera mberi tecivangisa rutendo hwedu!