Ciitiko ici cinothyisa, cakacinja upenyu hwangu ngokuti ndipona pondakatanga kupsaka Musiki. Asi ndicito ndamuvhunja zvakaitika pasure po usiku uwu, siyanyi ndimuverengere zvakandiitikira pandainga mwana mudoko, zvakandibesera kuti ndipsake Mwari.

Ndakabahwa mu gore ro 1937 ku Gesinaini, cidhorobha cidoko cinowanika ka njikazi ko Fransa. Baba wangu vaibata mu mugodhi, ivona vakandijijisa kusisira ko kushanda ngo simba. Vondijijisazve kuva mundhu anoda ururami inga ndivona. Izvo zvakavatora kuti vaite ciri cese kuti vabesere vadoni vavo pavainga pa mugariro wakashata ku basa. Kuti vaitise nane mugariro uwu, ivona vakabatana no cikwata caibesera vandhu vaishanda mu mugodhi. Ivona vainyangajwa maningi ngo zviro zvakashata zvaiitwa ngo vatungamiriri vo magerejha. Vazinji vavo vainga vakakhupuka, pikija zvakadaro, ivona vaikumbira mare no zvokuha ku vandhu vaishanda mu mugodhi, avo vaitohwisana no upenyu kuti vawane zvokupona ndizvona. Babangu vaisembhuswa ngo zviro zvakashata zvaiitwa ngo vatungamiriri vo magerejha, ngo iyo ndava, avazivi kundijijisa ciri cese ngo pamusoro po kunamata.  Kunasa kunanga, atizivi kumbobhuya ngo pamusoro pa Mwari.

Pandaikura, ndakatangavo kunyenya zvakashata. Zvakashata izvi zvaibatanijavo mukheto waiitihwa vandhu vaivha ku nyika jimweni vaiviya kogara ku Fransa. Inini ndaitamba bhora no vana vamweni vaivha ku nyika jimweni i ndaida maningi kuva ku cikwata cavo. Kusiyapo zvondhozvo, mai wangu avacainga vo Fransa vainga vo Poroniya. Inini ndaida kuti vandhu vo majinja ese vagare pamwepo mu runyararo vacinasa kutajana ushoni.

Ndakatohwa kwenda ku usoca mu gore ro 1957. Ndizvona zvakaitisa kuti ndive pa matundhu o Arijheriya ondanangaya pakutanga. Ndotangaya kukumbira besero ra Mwari ndecinanga kuti: “Mwari! Mwari wangu!” Asi ndakavona mbongoyo kuciripi cikwata co masoca. Ndakamuka kusujunuka kamare! Pikija zvakadaro, ciitiko ici no hondo, zvakandiita kuti ndinase kurangarira ngo pamusoro po cinangwa co upenyu. Ndojivhunjisa kudari: Ngenyi ndiri pano? Kunanga kuti Mwari anonditaja here? Kureva kuti njiku imweni tinozova no runyararo wo kwenda no kwenda here?

Pa nguva yakazotevera, ndakaenda kovona vabari vangu, pondainga ndeciendeyo ndakasongana no Capupu ca Jehovha. Iyena wakandipa La Sainte Bible, Bhaibheri rimweni ro Cifransa rakasandujwa ngo Vakatorika, rondakatanga kuriverenga pondakahwirira Arijheriya. Pandainga ndeciverenga ndakashamaisika maningi ngo zvandakaverenga pana Apokalipsi 21:3, 4. Vhesi iji jinonanga kudari: “Nga uu muzi wa Mwari no vandhu . . . Anozopukusa misoji yo mu meso mavo. Akucazovi no kufa nokuti mariji, kurira nokuti kuhwaja. Ngokuti bzokare bzakapinda.” Izvi zvakandishamaisa maningi. Zvakandiita kuti ndijivhujise kudari: ‘Izvi zvinozokwanirisikadi kamare?’ Pa nguva iyi andicaiziva ciri cese ngo pamusoro pa Mwari no Bhaibheri.

Pondakapejisa basa rangu ro usoca mu gore ro 1959, ndakasongana no Capupu cimweni cinodanwa Fransois, wakandijijisa zvizinji ngo pamusoro po Bhaibheri. Inga muezaniso, iyena wakanditatija mu Bhaibheri painga pakatahwa zina ra Mwari, Jehovha. (Nduyo 83:18, Shanduro yeNika Itsva) Iyena wakandidurujirazve kuti Jehovha anozoviisa ururami pa nyika, kuitazve kuti nyika ive paradhiso no kukwanirisa magama anowanika pana Apokaripsi 21:3, 4.

Ndakakwanisa kuvona kuti jijiso iji jainga no shwiro, zvokuti jakapsasa maningi mwoyo wangu. Asi ndainyangajwa maningi ngo vatungamiriri vo magerejha ngokuti ivona vaijijisa zviro zvicikaripi mu Bhaibheri. Ndainga ndotanga kurangarira inga ndi Babangu, ndoguma pa kuda kuita ciri cese ngo kukasika kuti ndipeje kutama kurungama, i ndaida kuita izvi ngo kukasika.

Hama Fransois no hama jimweni vakandibesera kuti ndive mundhu wakathiva. Ivona vakandidurujira kuti basa redu inga Makristu asipi ro kutonga asi ngo ro kupa vetero vandhu ngo kucumaera masoko akanaka o Umambo. Iri ndirona basa rakaita Jesu no raakapa vateveri vake kuti vaitevo. (Mateu 24:14; Luka 4:43) Ndakajijira kuva mundhu anobhuya ushoni no vandhu vamweni pikija ndicikatenderani no zvovanotenda. Bhaibheri rinonanga kudari: “Mubatiri wa Mwari aatendehwi kugara acipipana. Anodikana kupfavira vese.”—2 Timoti 2:24.

 Ndakaita cinjo inodikana, ndoguma pa kubhabhatijwa inga umwe wo Zvapupu zva Jehovha pa gungano ro mutundhu mu gore ro 1959. Kondhono ndakazivana no hambzaji imweni inodanwa Anjera, yondakadakarira maningi. Ndakatotanga kwenda ku ungano kwayo, toguma pa kucadha mu gore ro 1960. Iyena wainga mwanakaji waushoni maningi, mukaji anoshamaisa, cipo cinovha kuna Jehovha.—Mazwi Akangwara 19:14.

Pa makore akati kuti, ndakajijira zviro zvinosisira maningi kuvha ku hama jino uzivi. Ciro cinosisira maningi nga ici: Kuti tibudirire pa basa riri rese rinonesa, tinodikana kujidodokesa no kushandisa magama anowanika pana Mazwi Akangwara 15:22, anoti: “Pano vapangiri vakawanda, mabasa anobuda uxoni.”

Mu gore ro 1964 ndakakwanisadi kuvona kamare kuti magama aingadi okadi kamare. Mu gore rondhoro, ndakatanga kushanda inga muvonereri wo ndharaundha no kuvangisa hama kuti jivange ku divi ro umwari. Asi pa mukuvo wondhowo ndainga no makore anokwana kuita 27 i ndaida maningi besero. Ngo kudaro, ndaishaisha kuita zviro zvimweni. Asi ndakaeja kujija ngo zviro zvandaishaisharo. Kusiyapo zvondhozvo, ndakajijira maningi ngo muezaniso wo vandhu vainga no uzivi.

Ndakaceukija zviro zvakandiitikira pandakatanga kushanda inga muvonereri wo ndharaundha. Potakapera kuvhakacira ungano yo Parijhi, hama imweni yainga yakaivha ku divi ro umwari, yakakumbira kubhuya na inini padoko. Inini ndakati: “Zvingaita.”

Iyona yakandivhunjisa kudari: “Ruwijhi, medhiko paanoviya pa muzi anonga eciviya kovona ani?”

Inini ndakadavira kudari: “Mundhu anohwaja.”

Ivona vakati: “Ndizvonadi kamare. Asi inini ndinovona kuti iwewe unopeja nguva yakawanda maningi no vandhu vakaivha ku divi ro umwari, vakadari inga vakuru vo ungano. Kuveni mu ungano mwedu muno hama no hambzaji jakawanda jakasuruvara, vacumaeri vapsa no vamweni vano nyowa. Ivona vaizombongesera maningi kudari nowaizopejavo nguva yakawanda naivona, kana kutocenga-cenga navo zviri zvese.”

Ndakabongesera maningi hama iyi ngo zano iri raushoni. Rudo hwayo kuno mavhuta a Jehovha hwakapsasa maningi mwoyo wangu. Pikija zvakandinesera kutendera kuposa kwandakaitaya, ngo kukasika ndakatanga kushandisa zano riya. Ndinobonga  maningi Jehovha ngo kuva no hama yakadari inga iyi.

Mu gore ro 1969 no 1973 ndakagajwa kuti ndivonerere bauhwa rinovonerera zvokuha, pa magungano maviri o nyika jese akaitwa ku Estadhio yo Korombiya, ku Parijhi. Pa gungano rakaitwa mu gore ro 1973 painga no hama jaikwana kuita 60.000 jaidikana kupuwa zvokuha pa njiku shanu. Aticaiziva kuti taizozviitisa kudini. Apazve kuti tikwanise kubudirira taidikana kushandisa mbhangiro inowanika pana Mazwi Akangwara 15:22 no kupsaka besero ro vamweni. Ndakapsaka besero ro hama no hambzaji jimweni. Jakadari inga vanotengesa mu restaurante, vanorima masamba, vabiki no vandhu vanoita basa ro kutenga zviro. Tese takakwanisa kuita basa iri rinonesa.

Mu gore ro 1973, inini no mukaji wangu takakokwa kuti tiende koshanda ku Bheteri ro Fransa. Basa rondakatanga kuita rainesa maningi. Ndaidikana kutumira mabhuku kuno hama jo nyika yo Kamaroni. Kondhono basa redu rainga recirambijwa mu makore o 1970 mbhera 1993. Izvo zvakandiita kuti ndikaye-kaye maningi. Zvingaita kuti hama jaivonerera Bheteri ro Fransa jakavona manera ondaikaya-kaya. Kuti jindivangise, ijona jakananga kudari: “Hama jedu ku Kamaroni jinoda mabhuku. Ngo kudaro tinodikana kuita zviri zvese kuti tivape.”

Kuti ndikwanise kubhuya no vakuru vanogara Kamaroni, ndakaita hwendo hwakasiyana-siyana, ndecigumira mu nyika jinoita mugano no Kamaroni. Hama iji jainga no cicunge no uzivi. Ivona vakandibesera kuti ndiwane manera okutumira mabhuku, kuti hama jikwanise kumaashira nguva jese. Jehovha wakakomborera kuvangisira kwedu. Pa makumaviri o makore, hama ajicaicotehwa ngo Murindiri no bhuku raishandiswa pa musongano wo pakati po sumana raidanijwa Nosso Serviço do Reino.

Kuvhira pa mukuvo wotakatanga kuzivana, ndakavona kuti Anjera wainga no ushamwari  hwakavanga na Jehovha. Potakapera kucadha, izvi ndakatanga kuzvivona ushoni kamare. Inga muezaniso, pa usiku hwotakapera kucadha, iyena wakandikumbira kuti ndiite mukumbiro kuna Jehovha ngo pamusoro po cido cedu co kuda kwenderera mbheri tecishandira Jehovha inga varovorani. Jehovha wakadavira mukumbiro wedu.

Anjera wakandibeserazve kuti ndithembe Jehovha. Inga muezaniso, mu gore ro 1973 potakakokwa kuti tiende koshandira ku Bheteri, inini andicaida ngokuti ndaida maningi kushanda inga muvonereri wo ndharaundha. Asi Anjera wakandiceukija kuti itusu tainga tapira upenyu hwedu kuna Jehovha. Ngo kudaro, itusu taizoita zvese zvataizovhunjwa ngo sangano ra Jehovha kuti tiite. (Vaheberi 13:17) Ndakatenderana nazvo! Ngo kudaro, ndakaenda ku Bheteri. Mukaji wangu ano uzivi, wakaezanana i anoda Jehovha. Mugariro iji jakavangisa maningi ushamwari hwedu i jakatibesera kuti titeme zvivaringo zvaushoni ko makore akawanda tiri tese.

Pikija wari taavasharuka, Anjera acaenderera mberi ano mugariro jakanaka maningi. Inga muezaniso, zvikora zvo umwari zvinojijiswa pecishandiswa Cingezi, kuti itusu tipinde kuzvikora izvi, takadikana kushanda ngo simba kuti tikwanise kuvereketa Cingezi. Takadikana kupinda mu ungano inovereketwa Cingezi pikija tainga no makumanomwe o makore. Zvecivoneka kuti ndaishanda inga muvonereri wo Bheteri, kujija Cingezi cainga cineso cikuru maningi. Asi itusu takabesana. Wari patino makumasere o makore, tiri kwenderera mberi tecinasirira musongano jedu ngo ndumi mbiri Cingezi no Cifransa. Cimwenizve, tiri kuita zvese zvatinokwanisa mu ungano yedu no mu basa ro kucumaera. Jehovha wakakomborera kuvangisira kwataiita kuti tijije Cingezi.

Mu gore ra 2017 takaashira makomborero amweni. Inini na Anjera takakokwa kuti tiende ku Cikora co Vavoneri vo Cine no Vakaji Vavo, caizoitwa ku Cine ro Kujijisa ro Watchtower ku Patterson, Novha Yorki.

Kunasa kunanga, Jehovha ndi Mujijisi Mukuru. (Isaia 30:20) Azvitishamaisi kuvona kuti vandhu vake, vadoko, vakuru, veciashira jijiso yakakhwirira kamare! (Deuteronòmio 4:5-8) Mukuengejera, ndakavona kuti majaha anopurukira Jehovha no hama no hambzaji jingatema zvivaringo zvaushoni mu upenyu hwajo jova vashandiri va Jehovha vakagondeka. Mazwi Akangwara 9:9 inoticeukija kudari: “Pangirai muzivi, anozonyanya kuzivisisa, jijisai mururami, anozojijisisa.”

Nguva jimweni ndinorangarira zvakaitika ko makumatandhatu o makore akhirira pondaingaya ku matundhu o Arijheriya co usiku. Co usiku wondhowo andicaiziva kuti ndaizova no upenyu unodakajisa. Ndakajijira zvizinji kuvha ku vamweni! Zvokadi ndi Jehovha wakandipa Anjera no upenyu unodakajisa. Ngo kudaro ndatema civaringo co kutama kusiya kujijira ngo pamusoro pa Baba wedu vo kudenga no ku hama no hambzaji jedu jino uzivi, jinoda Jehovha.